གངས་ལྗོངས་ས་མཐོར་ཏང་དར་གཡོ།  

    སྐལ་བཟང་མེ་ཏོག་ནི་བབ་ཆགས་པ་ལས་བཀྲག་མདངས་འཚེར་བ་ཞིག་མེད་ནའང་དེས་བློ་བརྟན་འགྱུར་མེད་ཀྱི་སྙིང་སྟོབས་མཚོན་པ་དང་ཆ་རྐྱེན་དཀའ་ཚེགས་ཆེ་བའི་ས་མཐོར་ཚེ་སྲོག་གི་བཀྲག་མདངས་འཚེར་ཐུབ་ཀྱི་ཡོད། ང་ཚོའི་ཉེ་འགྲམ་དུ་སྐལ་བཟང་མེ་ཏོག་དེ་ལྟ་བུ་ཞིག་ཡོད་པ་སྟེ། ཁོང་གིས་སྤྱིར་བཏང་གི་ལས་གནས་ཐོག་སྐད་གྲགས་མེད་པའི་ངང་འབད་བརྩོན་བྱས་ཏེ་སྐལ་བཟང་མེ་ཏོག་ལྟར་མཛེས་པའི་ལང་ཚོར་བརྟེན་ནས་ཐུན་མོང་མ་ཡིན་པའི་མི་ཚེའི་ལམ་བུ་གཏོད་ཀྱི་ཡོད་པ་དང་ཁོང་ནི་ཆབ་མདོ་རྫོང་འགུ་རོ་གྲོང་རྡལ་ཏང་ཨུད་ཀྱི་ཧྲུའུ་ཅི་གཞོན་པ་ཀྲེན་ཀྲང་ཝང་རུང་ཡིན།

    ཕྱུག་འགྱུར་ལམ་བུའི་ཐོག་གི་སྣེ་ཁྲིད་པ།

    1982ལོར་སྐྱེས་པ་དང་ལོ་ཉི་ཤུ་ལྷག་ཙམ་ནས་ཀྲེན་ཀྲང་གི་ལས་གནས་ཁུར་བ་ནི་དངོས་གནས་མི་རྣམས་ཀྱིས་ཡིད་སྨོན་བྱེད་ཡུལ་ཞིག་ཡིན། ལོ་ན་མཉམ་པའི་བུད་མེད་མང་ཆེ་བས་མི་ཚེའི་ཁྲོད་ཀྱི་མཛེས་སྡུག་ལྡན་པའི་ལང་ཚོ་ལོངས་སྤྱོད་བྱེད་སྐབས་ཝང་རུང་ནི་འཇོན་ཐང་ཆེ་བའི་བུད་མེད་ཀྲེན་ཀྲང་ཞིག་ཏུ་གྱུར་ཡོད། “གོ་གནས་ནི་ཏང་དང་མི་དམངས་ཀྱིས་ང་ལ་གནང་བའི་འགན་འཁྲི་ཞིག་ཡིན་པས་མང་ཚོགས་ལ་དབུལ་སྒྲོལ་ཕྱུག་འགྱུར་བྱེད་རོགས་བྱེད་པ་དང་གྲོང་རྡལ་དེ་ཡོངས་ཀྱི་མི་སེར་ཚོས་བདེ་སྐྱིད་ལྡན་པའི་འཚོ་བ་སྐྱེལ་ཐུབ་པ་བྱས་ཚེ་གཞི་ནས་རྩ་འཛུགས་ཀྱི་ཡིད་ཆེས་དང་མི་དམངས་ཀྱི་གལ་ཆེའི་མངག་བཅོལ་ལ་ངོ་གནོང་མི་དགོས་པ་ཞིག་ཡོང་གི་རེད ”ཞེས་ཝང་རུང་གིས་བརྗོད་པ་དང་གྲོང་རྡལ་ཏང་ཨུད་ཀྱི་ཧྲུའུ་ཅི་གཞོན་པ་ཀྲེན་ཀྲང་ཝང་རུང་གིས་གྲོང་རྡལ་དེའི་འཕེལ་རྒྱས་དང་བརྟན་ལྷིང་དང་གྲོང་རྡལ་དེ་ཡོངས་ཀྱི་མི་དམངས་ལ་བདེ་སྐྱིད་ཡོང་ཐབས་བྱེད་པའི་ལས་གནས་ལྕི་པོ་དེ་རང་ཉིད་ཀྱི་ཕྲག་ཏུ་ཁུར་ཡོད། ཀྲེན་ཀྲང་གི་ལས་གནས་ཁུར་རྗེས་གཤམ་དུ་བསྐྱོད་ནས་བརྟག་ཞིབ་བྱེད་པ་དང་དུད་ཚང་དུ་བསྐྱོད་ནས་མང་ཚོགས་ལ་བཅར་འདྲི་བྱེད་པ་ནི་ཝང་རུང་གི་རྒྱུན་ལས་ཤིག་ཡིན། བརྟག་ཞིབ་གཏིང་ཟབ་བྱས་པ་བརྒྱུད་འགུ་རོ་གྲོང་རྡལ་དེ་རྒྱལ་ལམ་317དང་214རུ་གནས་པ་དང་། ཆབ་མདོ་ས་ཁུལ་དང་ས་འབྲེལ་ཡིན་པ། གནམ་གཤིས་དྲོ་བ། ས་བབ་བདེ་སྙོམས་ཡིན་པ་སོགས་ཀྱི་ལེགས་ཆར་བརྟེན་པ་དང་རྣམ་གྲངས་འཛུགས་སྐྲུན་དང་། གྲོང་རྡལ་འཛུགས་སྐྲུན། ནོར་ཁུངས་གཏོད་པ། རྟེན་གཞི་འཛུགས་སྐྲུན། ལམ་ལུགས་འཛུགས་སྐྱོང་སོགས་ལ་གཞི་བཙུགས་ནས་ཝང་རུང་དང་གྲོང་རྡལ་ཏང་ཨུད་ཀྱི་ཚན་ཁག་གཅིག་གི་མི་རྣམས་ཀྱིས “རྨང་གཞི་འདིང་བ་དང་། མཁར་རྫོང་བརྟན་དུ་གཏོང་བ། འགན་འཁྲི་སྒྲུབ་པ། མིག་དཔེ་སྟོན་པ། སྟོབས་ཤུགས་གཅིག་ཏུ་སྒྲིལ་བ། འཕེལ་རྒྱས་ལ་སྐུལ་མ་གཏོང་བ ”བཅས་ཀྱི་ལས་དོན་གྱི་བསམ་ཕྱོགས་བཏོན་ནས་ཏང་ཨུད་ཀྱིས་རྟེན་གཞི་འཛུགས་སྐྲུན་དང་ཏང་ཡོན་གྱིས་སྣེ་ཁྲིད་དེ་ལས་གཏོད་བྱེད་པའི “འཛུགས་སྐྲུན་གཅིག་དང་ལས་གཏོད་གཅིག ”གཞི་རྟེན་དུ་བྱས་ཏེ་སྔོ་ཚལ་དྲོད་ཁང་ཆེ་མོ་འཕེལ་རྒྱས་གཏོང་བ་དང་། ཞིང་འབྲོག་པའི་ཨར་ལས་རུ་ཁག་སྒྲིག་འཛུགས་བྱེད་པ། རྡོ་གསེག་ར་བ་འཛུགས་པ། ཞིང་འབྲོག་པའི་སྐྱེལ་འདྲེན་རུ་ཁག་འཛུགས་པ། ངལ་ལས་ཕྱིར་གཏོང་བྱ་རྒྱུ་སྒྲིག་འཛུགས་བྱེད་པ་སོགས་ཀྱི་བྱེད་ཐབས་སྣ་མང་སྤྱད་པ་བརྒྱུད་གྲོང་གསེབ་ཀྱི་མཉམ་སྡེབ་དཔལ་འབྱོར་རྒྱུན་ཆད་མེད་པར་འཕེལ་རྒྱས་དང་སྟོབས་ཆེར་བཏང་ནས་གྲོང་རྡལ་དེ་ཡོངས་ཀྱི་དཔལ་འབྱོར་དང་སྤྱི་ཚོགས་ཐད་འཕེལ་རྒྱས་མགྱོགས་པོ་ཡོང་བ་བྱས་ཡོད། 2010ལོར་འགུ་རོ་གྲོང་རྡལ་གྱི་རྒྱལ་ནང་གི་ཐོན་སྐྱེད་རིན་ཐང་བསྡོམས་འབོར་སྒོར་ཁྲི་4993.61ཟིན་པ་དང་། མི་རེའི་ཆ་སྙོམས་ཡོང་འབབ་ཁེ་གཙང་སྒོར 4704.3ཟིན་པ། ཞིང་འབྲོག་པའི་སྐྱེལ་འདྲེན་རུ་ཁག་ཁོ་ནར་འབབ་འཕར་སྒོར་ཁྲི་700ལྷག་ཙམ་བྱུང་ཡོད།

    ལས་སྒོ་འཕེར་བའི་ཏང་ཨུད་ཀྱི་ཧྲུའུ་ཅི་གཞོན་པ།

    གྲོང་རྡལ་ཏང་ཨུད་ཀྱི་ལས་བགོས་ལྟར་གྲོང་རྡལ་ཏང་ཨུད་ཀྱི་ཧྲུའུ་ཅི་གཞོན་པ་ཡིན་པའི་ཝང་རུང་གིས་སྲིད་གཞུང་གི་ཁྱོན་ཡོངས་ཀྱི་ལས་དོན་ལ་དམ་འཛིན་གཙོ་བོ་བྱས་པ་མ་ཟད་ད་དུང་གྲོང་རྡལ་ཏང་ཨུད་ཀྱི་ཧྲུའུ་ཅིར་གཞོགས་འདེགས་ཧུར་ཐག་བྱས་ནས་གཞི་རིམ་ཏང་རྩ་འཛུགས་འཛུགས་སྐྱོང་ཐད་དམ་འཛིན་ཡག་པོ་བྱེད་ཀྱི་ཡོད།

    ཉེ་བའི་ལོ་ཤས་རིང་ཝང་རུང་གིས་ཚན་རིག་དང་མཐུན་པའི་གོང་འཕེལ་གྱི་ལྟ་བ་སློབ་སྦྱོང་ལག་བསྟར་བྱེད་པའི་བྱེད་སྒོ་དང་སྔོན་གཏོད་ལེགས་བརྩོན་གྱི་བྱེད་སྒོ་དང་ཟུང་འབྲེལ་བྱས་ནས་གྲོང་རྡལ་དེ་ཡོངས་ཀྱི་ཞིང་འབྲོག་པ་ཏང་ཡོན་321ལ་ཡིག་ཚགས་བཟོས་པ་དང་འཐུས་ཚང་དུ་བཏང་བ་དང་། “གསོ་སྐྱོང་ཁག་གསུམ ”གཙོ་གནད་དུ་བྱས་ཏེ་རྒྱ་ཆེའི་ཏང་ཡོན་ལས་བྱེད་པའི་དཔེ་སྟོན་སྣེ་ཁྲིད་ཀྱི་ནུས་པ་འདོན་སྤེལ་བྱ་རྒྱུར་ཁྲིད་སྟོན་བྱས་ཏེ་ལས་གཏོད་ཕྱུག་འགྱུར་བྱ་རྒྱུར་སྣེ་ཁྲིད་བྱེད་པ་དང་མང་ཚོགས་ཀྱི་སྣེ་ཁྲིད་ནས་ཐུན་མོང་ཐོག་ཕྱུག་འགྱུར་ཡོང་བ་བྱས་ཡོད། གྲོང་རྡལ་དེ་ཡོངས་ཀྱིས་ཕྱུག་འགྱུར་སྣེ་ཁྲིད་པ་12ཏང་ཡོན་དུ་འཕེལ་རྒྱས་བཏང་བ་དང་། ཏང་ཡོན་9ཕྱུག་འགྱུར་སྣེ་ཁྲིད་པར་གསོ་སྐྱོང་བྱས་པ། ཏང་ཡོན་ཕྱུག་འགྱུར་སྣེ་ཁྲིད་པ་6གྲོང་ཚོའི་ལས་བྱེད་པར་གསོ་སྐྱོང་བྱས་ནས་གྲོང་ཚོའི “ཨུ་ལྷན་གཉིས ”ཀྱི་ཚན་ཁག་གི་རྗེས་གྲབས་སྟོབས་ཤུགས་སྔར་བས་འཐུས་ཚང་དུ་བཏང་བ་དང་འབྲེལ་ཆེད་མི་གཏན་འཁེལ་བྱས་ནས་དྲིལ་བསྒྲགས་དང་། རོགས་རམ། སྣེ་ཁྲིད་བཅས་བྱས་ཏེ་གྲོང་ཚོའི “ཨུ་ལྷན་གཉིས ”ཀྱི་ཚན་ཁག་ལ་རྒྱུན་འཛིན་པ་ཡོད་པའི་འགན་ལེན་ཏན་ཏིག་བྱས་ཡོད།

    ཁོང་གི་སྣེ་ཁྲིད་འོག་གྲོང་རྡལ་ཏང་ཨུད་དང་སྲིད་གཞུང་གིས་ཏང་དོན་དང་སྲིད་དོན་གྱི་ཡོངས་བསྒྲགས་སྒྲོམ་སྟེགས་འཛུགས་པ་དང་བསམ་འཆར་བསྡུ་ལེན་སྒམ་འཛུགས་པ་སོགས་ཀྱི་བྱེད་ཐབས་སྣ་མང་སྤྱད་དེ་ཏང་དོན་དང་སྲིད་དོན་ཡོངས་བསྒྲགས་ངང་བསྒྲུབ་རྒྱུར་སྔར་བས་སྐུལ་འདེད་བཏང་བ་དང་། གྲོང་རྡལ་འགོ་ཁྲིད་ཀྱིས་སྣེ་ཁྲིད་དེ་ཞབས་འདེགས་ལྟ་སྐུལ་གཱ་བཟོས་ནས་རང་རྟོགས་ངང་ཏང་ཡོན་དང་མང་ཚོགས་ཀྱི་ལྟ་སྐུལ་དང་གྲོས་བསྡུར་དང་ལེན་བྱེད་ཀྱི་ཡོད།

    ན་གཞོན་ལས་བྱེད་པ་འཚར་ལོངས་ཡོང་བར་རོགས་རམ་བྱེད་ཆེད་ཝང་རུང་གིས་ད་དུང་ཛ་དྲག་དང་། དཀའ་ངལ། ཉེན་ཁ་བཅས་ལྡན་པའི་ལས་འགན་ལྕི་པོ་མང་ཙམ་ཆེད་མངགས་ཀྱིས་ཁོང་ཚོར་འཁུར་དུ་བཅུག་པ་དང་ལས་འགན་སྔ་ཙམ་འཁུར་དུ་འཇུག་པ་དང་། ལས་འགན་མང་པོ་འཁུར་དུ་འཇུག་པ། ལས་འགན་ལྕི་པོ་འཁུར་དུ་འཇུག་པ་བཅས་བྱས་པ་བརྒྱུད་2007ལོར་གྲོང་རྡལ་ཏང་ཨུད་ཀྱིས་གསར་དུ་ལས་བགོས་བྱས་པའི་ན་གཞོན་ལས་བྱེད་པ་ལྔ་ཡུག་ཁུལ་དུ་ལས་ཀ་བྱེད་པར་བཀོད་སྒྲིག་བྱས་པ་དང་ལོ་ཁ་ཤས་རིང་གི་སྦྱོང་བརྡར་ལ་བརྟེན་ནས་ན་གཞོན་ལས་བྱེད་པ་ལྔར་གྲོང་གསེབ་ཀྱི་གཞི་རིམ་ལས་དོན་ལ་རྒྱུས་མངའ་བྱུང་སྟེ་མང་ཚོགས་ཀྱི་འདུ་ཤེས་དང་གཞི་རིམ་ལ་ཞབས་འདེགས་ཞུ་བའི་འདུ་ཤེས་ཆེ་རུ་སོང་ནས་དཀའ་སྤྱད་འབད་བརྩོན་དང་དམ་པ་དོན་གཉེར་གྱི་ལས་ཀའི་སྤྱོད་ཚུལ་ཞིག་ཆགས་ཡོད།

    མང་ཚོགས་ཀྱི་སྙིང་ཉེ་བ།

    ས་ཆ་གང་ཞིག་གི་མང་ཚོགས་ལ་དཀའ་ངལ་ཡོད་ཚེ་དེ་གར་ཝང་རུང་གིས་ཁོང་ཚོར་རོགས་རམ་བྱེད་པ་མཐོང་རྒྱུ་ཡོད་ཅིང་། 2006ལོའི་ཟླ་8པར་ས་སྒང་གྲོང་ཚོའི་གྲོང་མི་ཟླ་བ་ཚེ་རིང་གི་བུ་མོ་གཉིས་ལྷོ་ནུབ་མི་རིགས་སློབ་གླིང་དང་པེ་ཅིང་ཀྲུང་ལུགས་གསོ་རིག་དང་སྨན་རྫས་སློབ་གླིང་དུ་ཡིག་རྒྱུགས་འཕྲོད་ཡོད། ཕྲུ་གུ་གཉིས་ལ་སློབ་རོགས་དངུལ་བུན་གྱི་འགྲོ་ལུགས་གཉེར་མ་ཐུབ་པའི་དབང་གིས་སློབ་མཚམས་འཇོག་པའི་གནས་ཚུལ་འཕྲད་པ་ཤེས་རྟོགས་བྱུང་སྐབས་རྒྱུ་ལྷག་གཤག་བཅོས་བྱས་མ་ཐག་པའི་ཝང་རུང་གིས་འཕྲལ་དུ་ཕྲུ་གུ་གཉིས་ཁྲིད་དེ་རྫོང་དམངས་སྲིད་ཅུས་སུ་ཡོང་ནས་ཁོང་ཚོར་སློབ་རོགས་དངུལ་བུན་དང་དམིགས་བསལ་དཀའ་ངལ་ཡོད་པའི་འགྲོ་ལུགས་གཉེར་རོགས་བྱས་པ་དང་འབྲེལ་ཁོངས་གཏོགས་ནང་གི་སློབ་སྐྱོར་ཚན་པ་དང་ས་གནས་སུ་བཅའ་སྡོད་དཔུང་སྡེ་དང་མཐུན་སྦྱོར་བྱས་ནས་བུ་མོ་གཉིས་ལ་ལམ་གྲོན་དང་འཚོ་བའི་སྤྱོད་དངུལ་སྒོར་5000ཐག་གཅོད་བྱས་པ་དང་ཁོང་ཚོར་ནུབ་རྒྱུད་སློབ་རོགས་མ་དངུལ་དང་མིང་ཏེའི་སྦྱངས་འབྲས་ལེགས་ཐོན་གྱི་བྱ་དགའི་དངུལ་ལེན་རོགས་བྱས་ཡོད།

    2008ལོར་ཝང་རུང་གིས་གྲོས་འགོ་བཏོན་པའི་འོག་གྲོང་རྡལ་ཏང་ཨུད་ཀྱིས་ཏང་ཡོན་གྱི་ཆ་སྒྲིག་རོགས་སྐྱོར་གྱི “1242”ཀྱི་འདུ་འགོད་སྒྲིག་འཛུགས་ལག་བསྟར་བྱས་ཡོད་པ་སྟེ། གྲོང་རྡལ་ལས་ཁུངས་ཀྱི་ཏང་ཡོན་གཅིག་གིས་དམིགས་བསལ་དཀའ་ངལ་ཡོད་པའི་མང་ཚོགས་2ལ་རོགས་སྐྱོར་བྱེད་པ་དང་། ཞིང་འབྲོག་པ་ཏང་ཡོན་བཞིས་དམིགས་བསལ་དཀའ་ངལ་ཡོད་པའི་མང་ཚོགས་2ལ་རོགས་སྐྱོར་བྱེད་པ་དང་འབྲེལ་རོགས་སྐྱོར་བྱེད་མཁན་ཏང་ཡོན་གྱི་གཞི་རྩའི་གནས་ཚུལ་དང་འབྲེལ་གཏུག་བྱེད་སྟངས་ཆ་སྒྲིག་རོགས་སྐྱོར་གྱི་འབྲེལ་གཏུག་ཤོག་བྱང་བཟོས་ནས་རོགས་སྐྱོར་བྱེད་ཡུལ་མང་ཚོགས་ལ་སྤྲད་དེ་མང་ཚོགས་ཚོར་བྱ་བ་ཡོད་ཚེ “འཚོལ་ཐུབ་པ་དང་སླེབས་ཐུབ་པ ”བྱེད་པ་དང “དམངས་ཀྱི་གནས་ཚུལ་འབྲེལ་གཏུག་བྱེད་པའི་ཐད་ཆད་ལུས་མེད་པ་དང་། གྲོང་དོན་དོ་དམ་གང་བྱུང་མི་བྱེད་པ། དམངས་ལ་ཞབས་ཞུ་ཞིབ་ཚགས་བྱེད་པ ”བཅས་བྱེད་ཐུབ་པ་བྱས་ཡོད། 2010ལོར་གྲོང་རྡལ་ཏང་ཨུད་ཀྱི་ཏང་ཡོན་གྱིས་ཆ་སྒྲིག་རོགས་སྐྱོར་བྱེད་ཚད་26ཟིན་པ་དང་ཞིང་འབྲོག་པའི་ཆ་སྒྲིག་རོགས་སྐྱོར་བྱེད་ཚད་55ཟིན་ནས་དཀའ་ངལ་ཡོད་པའི་མང་ཚོགས་ལ་ཞལ་འདེབས་བརྒྱབ་ཚད་མི་དམངས་ཤོག་སྒོར་ལ་ཕབ་ན་སྒོར་ཁྲི་3ལྷག་ཙམ་ཟིན་པ་དང་མང་ཚོགས་ལ་ཁས་ལེན་བྱས་པའི་བྱ་བ་ཁག་1995ཟིན་པ་དང་བྱ་བ་ཁག་1575དོན་འཁྱོལ་ཐུབ་པ་བྱས་ཡོད།

    ཝང་རུང་གིས་སྔར་ནས་བཟུང་རང་ཉིད་ཀྱི་སེམས་ནུས་ཡོད་རྒུ་ས་གཞི་འདིའི་ཐོག་ལེགས་སྐྱེས་སུ་ཕུལ་བས་འགུ་རོ་གྲོང་རྡལ་འདི་ཉིད་ཆབ་མདོ་ས་ཁུལ་གྱི་སྐད་གྲགས་ལྡན་པའི་དཔལ་འབྱོར་སྟོབས་ལྡན་གྲོང་རྡལ་ཞིག་ཏུ་གྱུར་ཡོད་པ་དང་གྲོང་རྡལ་དེ་ཡོངས་ཀྱི་སྤྱི་ཚོགས་བྱ་གཞག་ཁག་སྐས་རིམ་གསར་པ་ཞིག་གི་ཐོག་འཕེལ་རྒྱས་ཕྱིན་ནས་སྔ་རྗེས་སུ་རང་སྐྱོང་ལྗོངས་དང་ས་ཁུལ་གྱི་ཤེས་དཔལ་སྲོལ་གཏོད་ཀྱི་སྔོན་ཐོན་ཤང་གྲོང་དུ་བདམས་ཐོན་བྱུང་ཡོད་པ་དང་། 2009ལོར་ཝང་རུང་ལ་རྒྱལ་ཡོངས་ཀྱི “གསུམ་བརྒྱད་དར་དམར་བའི ”གཟི་བརྗིད་མཚན་སྙན་ཐོབ་པ་དང་། 2010ལོར་རང་སྐྱོང་ལྗོངས་ཏང་ཨུད་ཀྱི་ཚན་རིག་དང་མཐུན་པའི་གོང་འཕེལ་ལྟ་བ་སློབ་སྦྱོང་དང་ལག་ལེན་བྱེད་སྒོའི་འགོ་ཁྲིད་ཚོགས་ཆུང་གིས་ཝང་རུང་ལ “ཕུལ་བྱུང་གུང་ཁྲན་ཏང་ཡོན ”གྱི་གཟི་བརྗིད་མཚན་སྙན་སྤྲད་པ། 2011ལོའི་ཟླ་7ཚེས་1ཉིན་ཝང་རུང་ལ “རྒྱལ་ཡོངས་ཀྱི་ཕུལ་བྱུང་ཏང་དོན་ལས་དོན་པའི ”གཟི་བརྗིད་མཚན་སྙན་ཐོབ་ཡོད།