སློབ་སྦྱོང་རྣམ་པའི་ཏང་རྩ་འཛུགས་འཛུགས་སྐྱོང་བྱེད་རྒྱུར་སྐུལ་འདེད་ཏན་ཏིག་གཏོང་དགོས།
བོད་ལྗོངས་ཉིན་རེའི་ཚགས་པར་ཁང་དུ་རྩེད་ཐང་ནས་གློག་འཕྲིན་འབྱོར་གསལ། སློབ་སྦྱོང་རྣམ་པའི་ཏང་རྩ་འཛུགས་འཛུགས་སྐྱོང་གི་བྱེད་སྒོར་སྐུལ་འདེད་ཏན་ཏིག་གཏོང་ཆེད་ཉིན་ཤས་གོང་ལྷོ་ཁ་ས་ཨུད་ཀྱིས་ས་ཁུལ་གྱི་དོན་དངོས་དང་ཟུང་འབྲེལ་བྱས་ཏེ་སློབ་སྦྱོང་གི་འཆར་གཞི་སྔར་བས་བཀོད་སྒྲིག་དང་ཚན་རིག་དང་མཐུན་པའི་འཕེལ་རྒྱས་དང་། མཆོང་སྐྱོད་ལྟ་བུའི་འཕེལ་རྒྱས། ཡུན་རིང་བདེ་འཁོད་བཅས་ཀྱི་བརྗོད་བྱ་གཙོ་བོ་དེར་དམ་པོར་དམིགས་ནས “རྟེན་གཞི་བཞི་དང་སྲོག་ཤིང་གཅིག ”གི་འཐབ་ཇུས་ཀྱི་གནས་བབ་དེ་གཏོད་རྒྱུར་ཤུགས་སྣོན་རྒྱག་པ་དང་། དཔལ་འབྱོར་འཕེལ་རྒྱས་གཏོང་སྟངས་བསྒྱུར་མགྱོགས་སུ་གཏོང་བའི་གཙོ་རྐང་དེར་དམིགས་པ། “ཐོན་ལས་གཉིས་པ་དང་། གསུམ་པ། དང་པོ ”བཅས་ཀྱི་གྲུབ་ཆ་སྲ་བརྟན་དང་རིམ་སྤོར་བྱེད་པའི་གཙོ་རྒོལ་ཁ་ཕྱོགས་དེར་དམིགས་པ་བཅས་བྱས་ཏེ་སློབ་སྦྱོང་རྣམ་པའི་ཏང་རྩ་འཛུགས་འཛུགས་སྐྱོང་གི་བྱེད་སྒོར་སྐུལ་འདེད་གཏོང་རྒྱུ་དེ་གཏིང་ཟབ་ཀྱི་ཕྱོགས་སུ་འཕེལ་རྒྱས་ཧུར་ཐག་གཏོང་བཞིན་ཡོད་པ་རེད།
ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་རིགས་པའི་གཞུང་ལུགས་ཀྱི་མ་ལག་སློབ་སྦྱོང་བྱ་རྒྱུ་དེ་ལས་འགན་ཨང་དང་པོར་བརྩིས་ནས་ཁྲིམས་ལྟར་ཇུས་ཐག་གཅོད་པ་དང་། སྲིད་འཛིན་པ། དོ་དམ་བྱེད་པ། བྱ་བ་སྒྲུབ་པ་བཅས་ཀྱི་འགོ་ཁྲིད་ལས་བྱེད་པའི་འཇོན་ཐང་ཆེ་རུ་དང་ཆུ་ཚད་རྒྱུན་ཆད་མེད་པར་མཐོ་རུ་གཏོང་བཞིན་ཡོད་པ་རེད།
སློབ་སྦྱོང་བྱེད་སྟངས་བཀོད་སྒྲིག་ལུགས་མཐུན་བྱེད་ཅིང་། སློབ་སྦྱོང་གི་བརྒྱུད་རིམ་ནང་ནམ་རྒྱུན་རང་སྦྱོང་བྱེད་པའི་རྨང་གཞིའི་ཐོག་ལྷོ་ཁ་ས་ཨུད་ཀྱིས་གཅིག་སྡུད་སློབ་སྦྱོང་ཐེངས་11བཀོད་སྒྲིག་བྱ་རྩིས་ཡོད་པ་དེའི་ཁྲོད་ས་ཨུད་རིགས་པའི་གཞུང་ལུགས་ལྟེ་བའི་སློབ་སྦྱོང་ཚོགས་ཆུང (རྒྱ་ཆེ )གི་སློབ་སྦྱོང་དང་བཅའ་ཁྲིམས་ཟུར་ཁྲིད་ཀྱི་སྙན་ཞུའི་ཚོགས་འདུ་ཐེངས་3དང་སྐབས་དོན་གྲོས་བསྡུར་གྱི་སློབ་སྦྱོང་ཚོགས་ཐེངས་8ཡོད་ཅིང་། ལྟེ་བའི་ཚོགས་ཆུང་གི་ཁོངས་མིས་རང་ངོས་ནས་ཁྲིད་སྟོན་དང་། སྣེ་ཁྲིད་ནས་སློབ་སྦྱོང་། བརྟག་ཞིབ། ཟུར་ཁྲིད། སྒྲོག་འགྲེལ། ལག་ལེན་བཅས་བྱས་ཏེ་སློབ་སྦྱོང་རྣམ་པའི་ཏང་རྩ་འཛུགས་དང་སློབ་སྦྱོང་རྣམ་པའི་འགོ་ཁྲིད་ཚན་ཁག་འཛུགས་སྐྱོང་ཧུར་ཐག་བྱ་རྒྱུ་ཡིན་པ་རེད།