“ཟླ་3ཚེས་19ཉིན་སྟར་ཁའི་སྡོང་ཕྲུག་བཏབ་པ་དང་ས་སྟོང་མུའུ་25ཡི་ཐོག་སྟར་ཁའི་སྡོང་ཕྲུག་རྐང་4000བཏབ་པ་དེས་ལོ་ཤས་ཀྱི་རྗེས་སུ་མང་ཚོགས་ཀྱི་ཡོང་སྒོ་འཕར་སྣོན་ཡོང་རྒྱུ་སྨོས་ཅི་དགོས། དེ་དག་དྲན་ཚེ་གྲོང་མི་དང་མཉམ་དུ་ངལ་རྩོལ་བྱས་ནས་དཀའ་ངལ་ག་ཚོད་ཡོད་ཀྱང་སེམས་སྐྱིད་པོ་འདུག ”ཅེས་པ་འདི་ནི་ཉིང་ཁྲི་རྫོང་ཀླུ་ནང་གྲོང་རྡལ་སྨུ་གྲོང་ཚོར་བཅའ་སྡོད་རང་སྐྱོང་ལྗོངས་བཟའ་བཅའ་དང་སྨན་རྫས་ལྟ་སྐུལ་དོ་དམ་ཅུས་ཀྱི་ལས་དོན་ཚོགས་ཆུང་གི་ཁོངས་མི་ལི་ཧའེ་ལེའང་གིས་དམངས་ཀྱི་གནས་ཚུལ་བཀོད་པའི་ཉིན་ཐོ་ཞིག་རེད།

    ལས་དོན་ཚོགས་ཆུང་གྲོང་ཚོར་བཅའ་སྡོད་བྱས་རྗེས་གྲོང་ཚོ་ནས་འབྲོག་རར་བསྐྱོད་སའི་ལམ་བུ་གུ་དོག་པོ་ཡོད་པ་དང་ཟམ་པ་འགའ་ཤས་ལོ་མང་སོང་ཀྱང་ཉམས་གསོ་བྱས་མེད་པས་མང་ཚོགས་ཀྱི་ཐོན་སྐྱེད་དང་འཚོ་བར་དཀའ་ངལ་མང་པོ་བཟོ་གི་ཡོད་པ་ཤེས་རྗེས་ས་ཁུལ་འགྲིམ་འགྲུལ་ཅུས་གདན་དྲངས་ཏེ་ཟམ་པར་དངོས་སུ་བརྟག་ཞིབ་བྱེད་པ་དང་། རིག་པས་ཁུངས་སྐྱེལ་བྱེད་པ། འཆར་འགོད་བྱེད་པ་བཅས་བྱས་ནས་ཅུས་གཞུང་དོན་ཁང་གི་ཚོགས་འདུའི་ཐོག་ཐག་གཅོད་བྱ་རྒྱུའི་སྙན་ཞུ་ཕུལ་བ་དང་མ་དངུལ་སྒོར་ཁྲི་15བཏང་ནས་འབྲོག་རར་དཔྱང་ཟམ་ཞིག་བསྐྲུན་པ་དང་འབྲོག་རའི་ལམ་བུ་བརྟན་དུ་གཏོང་རྒྱུའི་གཏན་འབེབས་བྱས་པ་དང་རྣམ་གྲངས་དེ་ལས་འགོ་ཚུགས་ཟིན་པ་དང་མ་དངུལ་ཚང་མ་དམིགས་སར་འབྱོར་ཡོད་པ་རེད། “ཟླ་3ཚེས་24ཉིན་ང་ཚོ་དང་གྲོང་མི་རྣམས་མཉམ་དུ་དཔྱང་ཟམ་བསྐྲུན་པར་བསྐྱོད་ནས་གཙོ་བོ་པང་ལེབ་རུལ་པ་དེ་ཚོ་བརྗེ་རྒྱུ་རེད། གྲོང་ཚོ་ནས་རྐང་ཐང་དུ་བསྐྱོད་ཚེ་ཆུ་ཚོད་4འགོར་གྱི་འདུག གྲོང་མི་ཚོས་ཆུ་སྐེད་པ་ཙམ་ལ་སླེབས་པའི་ཆུའི་ནང་དུ་མཆོང་ནས་པང་ལེབ་བརྗེས་པ་དང་ཆུ་དེ་ནི་གངས་བཞུར་བའི་ཆུ་ཡིན་པས་གྲང་ཟུག་ཧ་ཅང་ཆེན་པོ་ཡོད། གྲོང་མི་ཚོ་ནི་གཅེས་པར་འོས་པ་ཞིག་འདུག་ལ་ཧ་ཅང་སེམས་རྩ་འཁོལ་པོ་ཞིག་འདུག ”ཅེས་ལི་ཧའེ་ལེའང་གི་ཟིན་ཐོའི་ནང་བཀོད་ཡོད་པ་རེད།

    “ལས་དོན་ཚོགས་ཆུང་གི་ཙུའུ་ཀྲང་ཏུང་ཧྲོའུ་རུའུ་ཡིས་ཉིན་ལྟར་ཕྱི་པོ་ཅི་འདྲ་ཡིན་མིན་ལ་མི་ལྟོས་པར་གྲོང་མིར་ནད་ལྟ་གྱི་ཡོད་པ་རེད། ངས་དྲན་གསལ་ལ་ཁོང་གིས་ནད་ལྟ་བའི་དུས་ཚོད་ཕྱི་ཤོས་ཤིག་ནི་ཐོ་རེངས་ཀྱི་ཆུ་ཚོད་གཉིས་པ་ཡིན་པ་དང་ལས་དོན་ཚོགས་ཆུང་གིས་ད་དུང་ང་ཚོ་གྲོང་མི་ཡོངས་ལ་བདེ་ཐང་གི་ཡིག་ཚགས་བཟོས་ཡོད་པ་དང་སྒོར་6000ཙམ་རི་བའི་སྨན་རྫས་ཀྱང་འཁྱེར་ཡོད་པས་ལས་དོན་ཚོཌ་ཆུང་ནི་སངས་རྒྱས་དངོས་རང་རེད ”ཅེས་གྲོང་ཚོ་ཨུ་ཡོན་ལྷན་ཁང་གི་ཀྲུའུ་རེན་ཉི་མ་དབང་འདུས་ཀྱིས་སེམས་འགུལ་ཐེབས་བཞིན་དུ་བཤད།

    གྲོང་ཚོ་ཨུ་ཡོན་ལྷན་ཁང་གི་ཐོག་སོ་ཉིས་ཐོག་ཏུ་ང་ཚོས་སྨི་གྲུ་བཞི་མ་10ལས་མེད་པའི “འཕྲོད་བསྟེན་སུའོ ”མཐོང་བྱུང་། གསར་འགོད་པས་ལྕོག་ཙེའི་སྟེང་དུ་བཞག་པའི་ནད་གཞི་སྨན་བཅོས་བྱེད་པའི་རེའུ་མིག་ལ་བལྟས་པ་དང་སྨན་བཅོས་ཐོ་འགོད་ཤོག་ལྷེ་བཅུ་ཙམ་བྲིས་ཡོད་པ་དང་ཐོ་འགོད་རེའུ་མིག་ཟིན་ཐོ་བཀོད་པར་གཞིགས་ན། གྲོང་མི་200ལྷག་ཙམ་ལ་སྨན་བཅོས་ཐུབ་ཡོད་པ་རེད།

    “རང་སྐྱོང་ལྗོངས་ཏང་ཨུད་ནས་མངགས་གཏོང་བྱས་པའི་ལས་དོན་ཚོགས་ཆུང་ནི་ལོ་མང་རིང་གི་ལས་དོན་ཚོགས་ཆུང་ཡག་ཤོས་ཤིག་ཡིན་པ་མ་ཟད། ང་ཚོའི་གྲོང་ཚོ་དབུལ་སྒྲོལ་ཕྱུག་འགྱུར་བྱེད་པའི་ལས་དོན་ཚོགས་ཆུང་ཞིག་ཀྱང་རེད། ང་ཚོ་གྲོང་ཚོ་ཡོངས་ཀྱིས་ལས་དོན་ཚོགས་ཆུང་འདིར་བསྡད་ནས་དུས་ནམ་ཡང་ང་ཚོའི་སྙིང་ཉེ་བ་ཞིག་བྱ་རྒྱུའི་རེ་བ་བྱེད་ཀྱི་ཡོད ”ཅེས་ཉི་མ་དབང་འདུས་ཀྱིས་གསར་འགོད་པར་བཤད།

    དབྱར་རྩྭ་དགུན་འབུ་འཐུ་བའི་ནམ་དུས་འཆར་ཉེར་ཡོད་པས་ཟླ་བ་ལྔ་པའི་ཟླ་འགོར་གྲོང་མི་ཚོ་རིར་བསྐྱོད་ནས་དབྱར་རྩྭ་དགུན་འབུ་འཐུ་བར་འགྲོ་དགོས་ཀྱི་ཡོད། དྲིལ་བསྒྲགས་ལས་དོན་ཡག་པོ་སྒྲུབ་ཆེད་ལས་དོན་ཚོགས་ཆུང་གི་ཙུའུ་ཀྲང་ཏུང་ཧྲོའུ་རུའུ་ཡིས་གསར་འགོད་པར “ང་ཚོས་བཟའ་བཅའ་དང་དགོས་མཁོ་ཡོད་པའི་དངོས་ཟོག་གྲ་སྒྲིག་བྱས་ཟིན་ལ་དཔྱིད་དུས་ཀྱི་འབྲོག་རར་བསྐྱལ་ཟིན་པས་གྲོང་མི་རྣམས་རིར་འབྱོར་རྗེས་ང་ཚོས་ཁོང་ཚོའི་རྗེས་སུ་བསྐྱོད་དེ་གྲོང་མི་རྣམས་གང་དུ་བསྐྱོད་རུང་ལས་དོན་ཚོགས་ཆུང་དེར་བསྐྱོད་རྒྱུ་ཡིན་ལ་ཏང་གི་དམངས་ཕན་སྲིད་ཇུས་དུད་ཚང་ཁྲི་སྟོང་མང་པོར་སྒྲོག་འགྲེལ་བྱས་ཏེ་གྲོང་མི་ཚོར་གུང་ཁྲན་ཏང་ཡག་དང་སྤྱི་ཚོགས་རིང་ལུགས་ཡག་ཅེས་པ་མྱོང་ཚོར་ཐུབ་པ་བྱ་རྒྱུ་ཡིན ”ཞེས་བཤད།