ལས་བྱེད་ཆིག་ཁྲི་གྲོང་ཚོ་སྟོང་དུ་བསྐྱོད།   ལས་བྱེད་མང་ཚོགས་སེམས་པ་གཅིག་ཏུ་སྦྲེལ།

    —— གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་བྱེད་སྒོ་གཏིང་ཟབ་ངང་སྤེལ།

    བོད་ལྗོངས་ཉིན་རེའི་ཚགས་པར་ཁང་དུ་གནས་ཚུལ་འབྱོར་གསལ། གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་བྱེད་སྒོ་སྤེལ་ཚུན་གྲོང་ཚོར་བཅའ་སྡོད་ལྷ་ས་གྲོང་ཁྱེར་ལས་དོན་ཚོགས་ཆུང་ཁག་གིས་ཕྱོགས་མང་པོའི་ཐད་ནས་མ་དངུལ་གྲབས་གསོག་བྱས་ཏེ་གཞི་རིམ་མང་ཚོགས་ལ་བྱ་བ་ཡག་པོ་སྒྲུབ་པ་དང་། བྱ་བ་དངོས་སྒྲུབ་པ། དཀའ་གནད་སེལ་བ་བཅས་བྱས་པར་གཞི་རིམ་མང་ཚོགས་ཚོའི་ཡོངས་ཁྱབ་ཀྱི་བསྔགས་བརྗོད་དང་གཅིག་གྱུར་ཐོག་གདེང་འཇོག་ཐོབ་ཡོད་པ་རེད། མིག་སྔའི་བར་གྲོང་ཚོར་བཅའ་སྡོད་ལྷ་ས་གྲོང་ཁྱེར་ལས་དོན་ཚོགས་ཆུང་གིས་རྣམ་གྲངས་87ལག་བསྟར་བྱས་པར་མ་དངུལ་སྒོར་ཁྲི་2167.03ཟིན་ཡོད་པ་རེད།

    གྲོང་ཚོར་བཅའ་སྡོད་ལས་དོན་ཚོགས་ཆུང་ཁག་གིས་བྱ་ཐབས་མང་པོ་སྤྱད་དེ་རིག་སྟོབས་དབུལ་སྐྱོར་བྱས་ཤིང་། ཆུ་ཤུར་གྲོང་ཚོར་བཅའ་སྡོད་ལས་དོན་ཚོགས་ཆུང་གིས་མ་དངུལ་སྒོར་ཁྲི་11.8རག་ཐབས་བྱས་ནས་སྙེ་མོ་རྫོང་སློབ་འབྲིང་དུ་ཕུ་གསུམ་ཤང་གི་ངལ་རྩོལ་ནུས་ཤུགས་ལྷག་མ་52ལ་རི་མོ་འབྲི་སྟངས་དང་བརྐོས་རྒྱག་སྟངས་དང་། པར་ཤིང་བརྐོས་ཀྱི་གསོ་སྦྱོང་འཛིན་གྲྭ་དུས་ཐེངས་གཉིས་གཉེར་བ་དང་བདེ་དབྱང་གྲོང་ཚོར་བཅའ་སྡོད་ལས་དོན་ཚོགས་ཆུང་གིས་ལྷ་ས་ནས་གཞིས་རྩེ་བར་གྱི་ལྕགས་ལམ་བསྐྲུན་པའི་གོ་སྐབས་གང་ལེགས་སྤྱད་དེ་ཀུང་སི་བཞི་དང་འབྲེལ་བ་བྱས་ནས་གྲོང་ཚོར་བྱེ་སྔོག་ས་ཚིགས་དང་རྡོ་འདོན་ར་བ་བཙུགས་པ་དང་འབྲེལ་ལས་བཟོ་སྤྱོད་པའི་གན་རྒྱ་ཡང་བཞག་པ་རེད།

    གྲོང་ཚོར་བཅའ་སྡོད་ལྷ་ས་གྲོང་ཁྱེར་ལས་དོན་ཚོགས་ཆུང་གིས་རང་འགན་གཙང་བསྒྲུབས་བྱེད་པ་དང་སེམས་ནུས་གང་ཡོད་བཏོན་ཏེ་གཞི་རིམ་ལ་བྱ་བ་ཡག་པོ་བསྒྲུབ་པ་དང་། བྱ་བ་དངོས་བསྒྲུབ་པ། དཀའ་གནད་སེལ་བ་བཅས་བྱས་པ་དང་ལྷག་བསམ་ཟོལ་མེད་དང་། དངོས་དོན་གཉེར་བ། འཕྲལ་དུ་དོན་འཁྱོལ་བཅས་བྱས་པར་གཞི་རིམ་གྱི་མི་རིགས་ཁག་གི་ལས་བྱེད་པ་དང་མང་ཚོགས་ཚོའི་བསྔགས་བརྗོད་ཐོབ་པ་རེད། སྟོད་ལུང་བདེ་ཆེན་རྫོང་རྒུ་རུམ་ཤང་སྦ་ར་གྲོང་ཚོའི་ལོ་ན་82ལ་སླེབས་པའི་ཏང་ཡོན་རྒན་གྲས་རྡོ་རྗེ་ཚེ་རིང་གིས “ལས་དོན་ཚོགས་ཆུང་གི་བློ་མཐུན་ཚོས་ཚོགས་ཆུང་དང་དུད་ཚང་དུ་བསྐྱོད་པ་དང་། དབུལ་པོར་འཚམས་འདྲི་ཞུ་བ། བདེ་སྡུག་འདྲི་བ། སྲིད་ཇུས་དྲིལ་བསྒྲགས་བྱེད་པ། བྱ་བ་དངོས་ཡག་པོ་བསྒྲུབས་པ་བཅས་གནང་སྟེ་ང་ཚོ་མི་སེར་དང་གཅིག་སེམས་གཅིག་སྦྲེལ་གནང་གི་འདུག ”ཅེས་བཤད་པ་རེད།