རྨང་གཞི་བརྟན་པོ་བཏིང་དངོས་ཕན་དོན་གཉེར་བྱེད།

    བོད་ལྗོངས་ཀྱི་ལས་དོན་ཚོགས་ཆུང་1000ལྷག་ཙམ་དང་ལས་བྱེད་པ་ཆིག་ཁྲི་ལྷག་ཙམ་གྲོང་ཚོ་དང་དུད་ཚང་དུ་བསྐྱོད་དེ་གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་བྱེད་སྒོ་སྤེལ་ནས་ཟླ་བ་གཅིག་ཕྱིན་ཡོད། དུས་ཡུན་ཟླ་བ་གཅིག་རིང་ལས་དོན་ཚོགས་ཆུང་གིས་གནམ་གཤིས་གྲང་བ་དང་དངོས་པོ་དཀོན་པ་སོགས་ཀྱི་དཀའ་ངལ་བསལ་ནས་གཞི་རིམ་ལས་བྱེད་པས་བསམ་བློ་གཏོང་སར་བསམ་བློ་གཏོང་བ་དང་གཞི་རིམ་མང་ཚོགས་ཀྱི་མཁོ་རིགས་ལ་སེམས་ཁྲལ་བྱས་ཡོད། ལས་དོན་ཏན་ཏིག་སྒྲུབ་པ་དང་ཆབས་ཅིག་གྲོང་ཚོར་བཅའ་སྡོད་ལས་དོན་ཚོགས་ཆུང་གི་ལས་བྱེད་པ་རང་ངོས་ལའང་སློབ་གསོ་དང་སྦྱོང་བརྡར་ཐེབས་ཡོད།

    མང་ཚོགས་ཀྱི་འདུ་ཤེས་རྒྱུན་ཆད་མེད་པར་ཟབ་ཏུ་སོང་བ།

    མང་ཚོགས་ལ་སེམས་ཁུར་དང་མང་ཚོགས་ཀྱི་ཁེ་ཕན་ལ་སྲུང་སྐྱོང་བྱ་རྒྱུ་དེ་གྲོང་ཚོར་བཅའ་སྡོད་ལས་དོན་གྱི་གཙོ་གནད་ཅིག་ཡིན་ཞིང་། ལས་དོན་ཚོགས་ཆུང་གིས་གཞི་རིམ་མང་ཚོགས་ལ་ལས་བཟང་སྒྲུབ་པ་དང་དོན་དངོས་གཉེར་རིང་རང་ངོས་ཀྱི་མང་ཚོགས་ཀྱི་འདུ་ཤེས་རྒྱུན་ཆད་མེད་པར་ཟབ་ཏུ་ཕྱིན་ཡོད།

    གྲོང་ཚོར་བཅའ་སྡོད་ལྗོངས་ཏང་ཨུད་གཞུང་དོན་ཐིང་དང་ལྗོངས་ཐད་གཏོགས་ལས་ཁུངས་ལས་དོན་ཨུ་ལྷན་གྱི་མཉམ་འབྲེལ་ལས་དོན་ཚོགས་ཆུང་ནག་ཆུ་རྫོང་དང་ཤན་རྩ་རྫོང་ཐར་མ་ཤང་གི་གྲོང་ཚོ་བརྒྱད་པར་བཅའ་སྡོད་བྱེད་སྐབས་ལས་དོན་ཚོགས་ཆུང་གི་ཙུའུ་ཀྲང་ལྗོངས་ཏང་ཨུད་གཞུང་དོན་ཐིང་གི་དྲུང་ཆེ་གཞོན་པ་བློ་བཟང་རྒྱ་མཚོས་ཤང་གི་ལས་བྱེད་པས་གྲོང་མི་གཉིས་སྔ་ས་ནས་ལས་དོན་ཚོགས་ཆུང་གི་རྒྱུན་གཏན་འཚོ་བར་རོགས་རམ་བྱེད་དུ་འཇུག་རྒྱུའི་བཀོད་སྒྲིག་བྱས་པ་ཤེས་སྟབས་ཁོང་གིས་ཤང་དང་གྲོང་ཚོས་གྲོང་ཚོར་བཅའ་སྡོད་ལས་དོན་ཚོགས་ཆུང་ལ་དམིགས་བསལ་གྱི་ལྟ་སྐྱོང་གང་ཡང་བྱེད་མི་དགོས་ཞེས་བཤད་པ་དང་ད་དུང་ཡུལ་མི་ཚོར་ཁྱིམ་ལ་སྔ་ཙམ་ལོག་སྟེ་རྒྱུན་གཏན་གྱི་ཐོན་སྐྱེད་དང་འཚོ་བར་ཤུགས་རྐྱེན་མི་ཐེབས་པ་བྱེད་དགོས་པའི་མངགས་བཅོལ་བྱས་ཡོད།

    མལ་གྲོ་གུང་དཀར་རྫོང་རྒྱ་མ་ཤང་ཙི་ཙི་རོང་གྲོང་ཚོར་བཅའ་སྡོད་རང་སྐྱོང་ལྗོངས་ཏང་ཨུད་རྩ་འཛུགས་པུའུ་དང་ལྗོངས་སྒྲིག་གཞི་གཞུང་ལས་ཁང་གི་ལས་དོན་ཚོགས་ཆུང་གིས་གྲོང་ཚོར་བཅའ་སྡོད་བྱེད་པའི་དུས་ཚོད་དེའི་རིང་ཚང་མའི་བསམ་འཆར་མང་ཙམ་ཉན་པ་དང་ལག་ལེན་བསྟར་ཐུབ་པའི་ཇུས་གཞི་བཟོས་ཏེ་ནུས་ཤུགས་ཡོད་རྒུས་མང་ཚོགས་ཀྱི་དངོས་ཡོད་དཀའ་ངལ་སེལ་རོགས་བྱ་རྒྱུའི་སེམས་ཐག་བཅད་ཡོད།

    ཏང་གཤིས་ཀྱི་འདུ་ཤེས་གཏིང་ཟབ་ཏུ་སོང་བ།

    བློ་གཅིག་སེམས་གཅིག་གིས་མི་དམངས་ལ་ཞབས་འདེགས་ཞུ་རྒྱུ་ནི་ཏང་གི་དམིགས་ཡུལ་ཡིན་ཞིང་། གྲོང་ཚོར་བཅའ་སྡོད་ལས་བྱེད་པ་ཚོས་གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་བྱེད་སྒོ་སྤེལ་རིང་བསམ་བློར་བཅིངས་འགྲོལ་གཏོང་བ་དང་། དངོས་ཐོག་བདེན་འཚོལ་བྱེད་པ། དུས་བསྟུན་འཕེལ་རྒྱས་བཅས་མཐའ་འཁྱོངས་བྱས་སྟབས་ཏང་གཤིས་ཀྱི་འདུ་ཤེས་རྒྱུན་ཆད་མེད་པར་གཏིང་ཟབ་ཏུ་འགྲོ་བ་དང་ཞབས་ཞུའི་འདུ་ཤེས་རྒྱུན་ཆད་མེད་པར་ཟབ་ཏུ་ཕྱིན་ཡོད།

    གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོར་གྲོང་ཚོར་བཅའ་སྡོད་བོད་ལྗོངས་ཉིན་རེའི་ཚགས་པར་ལས་ཁུངས་ཀྱི་ལས་དོན་ཚོགས་ཆུང་གི་ཁོངས་མི་ལྔ་ཨ་མདོ་རྫོང་སྟོད་མ་ཤང་མདུང་རི་གྲོང་ཚོར་བཅའ་སྡོད་བྱེད་སྐབས་བོད་བྱང་ཐང་དུ་རུས་ཟུག་རྒྱག་པའི་གྲང་རླུང་ལྡང་བའི་ཁྲོད་དཀར་གཙང་ཁ་བཏགས་འཁྱེར་ནས་དགའ་བསུ་ཞུ་བར་ཡོང་མཁན་ཨ་མདོ་རྫོང་གི་འགོ་ཁྲིད་པ་མཐོང་སྐབས་ཚང་མར་སེམས་འགུལ་ཧ་ཅང་ཆེན་པོ་ཐེབས་ཏེ་གྲོང་ཚོར་བཅའ་སྡོད་ལས་དོན་གྱི་ཐོབ་པར་དཀའ་བའི་གོ་སྐབས་དེ་སྤྱད་དེ་འབྲོག་པ་མང་ཚོགས་ལ་ལས་བཟང་དང་དོན་དངོས་མང་ཙམ་བསྒྲུབ་རྒྱུའི་སེམས་ཐག་བཅད་ཡོད།

    ལྷོ་ཁ་ས་ཁུལ་གྲ་ནང་རྫོང་དཀྱིལ་རུ་ཤང་གི་གཟར་ཕུ་ཤར་གྲོང་ལྷན་གྱི་སྒོ་ར་ཆུང་ངུའི་ནང་གི་ལྷབ་ལྷུབ་ཏུ་གཡོ་བའི་སྐར་ལྔའི་དར་དམར་མཐོང་སྐབས་དེ་གར་བཅའ་སྡོད་བོད་ལྗོངས་སློབ་ཆེན་གྱི་ལས་དོན་ཚོགས་ཆུང་གི་ཁོངས་མི་ཚོར་སེམས་འགུལ་ཐེབས་ཤིང་གྲང་རླུང་ལྡང་བའི་ཁྲོད་གཟར་ཕུ་ཤར་གྲོང་ཚོའི་གྲོང་མི་ཚོས་དགའ་སྤྲོ་དཔག་མེད་ཀྱི་བསམ་ཚུལ་འཆང་བ་དང་དུས་ཆེན་གྱི་གཟབ་མཆོར་སྤྲས་ཏེ་ལག་ཏུ་དཀར་གཙང་ཁ་བཏགས་འཁྱེར་བ་དང་གྲོ་སོ་ཕྱེ་མར་མཐོན་པོར་བཀྱགས་ནས་ལམ་གྱི་གཡས་གཡོན་གཉིས་སུ་ལངས་ཏེ་ལས་དོན་ཚོགས་ཆུང་ཕེབས་པར་དགའ་བསུ་ཞུས་སྟབས་ལས་དོན་ཚོགས་ཆུང་གི་བློ་མཐུན་ཚང་མར་དྲོ་སྐྱིད་ཚོར་བ་དང་མང་ཚོགས་ཚོས་འཕེལ་རྒྱས་ཡོང་བ་བྱེད་པ་དང་བརྟན་ལྷིང་ལ་བསམ་བློ་གཏོང་བའི་བསམ་འདུན་དེ་བས་ཤེས་ཚོར་བྱུང་བ་དང་ཆབས་ཅིག་གྲོང་ཚོར་བཅའ་སྡོད་བྱས་ཏེ་ལས་དོན་བསྒྲུབ་རྒྱུའི་ཁོང་ཚོའི་ཡིད་ཆེས་དང་སེམས་ཤུགས་ལྡབ་འཕར་བྱུང་ཡོད།

    འགན་འཁྲིའི་འདུ་ཤེས་ཟབ་ཏུ་སོང་བ།

    མིག་སྔ་ནི་ལྗོངས་ཡོངས་ཀྱི་དཔྱིད་དུས་ཞིང་འབྲོག་ཐོན་སྐྱེད་བྲེལ་བརྩོན་ཆེ་བའི་དུས་ཚོད་དང་ཏག་ཏག་འཁེལ་བས་ཞིང་པ་ཚོས་དཔྱིད་རྨོད་དང་སོན་འདེབས་ཀྱི་གྲ་སྒྲིག་ལ་བྲེལ་བ་དང་འབྲོག་པ་ཚོས་རེའུ་ལུག་སྐྱེ་བསུ་དང་ཕྱུགས་ཕྲུག་གསོ་ཚགས་བྱ་རྒྱུར་བྲེལ་བཞིན་ཡོད། ཁོང་ཚོས་བྲེལ་བརྩོན་ཆེན་པོས་ཐོན་སྐྱེད་བྱས་ཏེ་ཕྱུག་འགྱུར་ཕྱོགས་སུ་སྐྱོད་པའི་སྤྲོ་སེམས་དེས་ལས་དོན་ཚོགས་ཆུང་ལ་སེམས་འགུལ་ཆེན་པོ་ཐེབས་ཡོད།

    ལས་དོན་ཚོགས་ཆུང་གིས་ཤན་རྩ་རྫོང་ཐར་མ་ཤང་གྲོང་ཚོ་བརྒྱད་པའི་འབྲོག་པ་ཕྱུག་པོ་སྐར་མ་གཡང་སྐྱིད་ཀྱི་ཁྱིམ་ནས་བོད་ཀྱི་ལོ་གསར་རིང་ཁྱིམ་དེའི་བུ་མོ་ཆེ་བ་དང་པ་ཕ་འབྲོག་རར་མཉམ་དུ་བསྐྱོད་དེ་ལུག་ངོ་གྲངས་བརྒྱ་ཕྲག་ཁ་ཤས་དང་གཡག་མགོ་གྲངས་བཅུ་ཕྲག་འཚོ་བའི་འགན་ལྗི་པོ་འཁུར་བ་ཤེས་པ་རེད། ལས་དོན་ཚོགས་ཆུང་གི་བློ་མཐུན་ཚོས་འབྲོག་པ་ཚོ་གྲོང་ཁྱེར་ནང་གི་མི་ལྟར་ལྷོད་གཡེང་དང་ཉམས་དོད་པོའི་ངང་ལོ་གསར་བཏང་མི་ཐུབ་ཀྱང་ཁོང་ཚོའི་སེམས་ནང་ལོ་གསར་ལས་ཀྱང་དགའ་འོས་པ་ཞིག་ཡོད་པ་ནི་ཉིན་ལྟར་གཅེས་པར་འོས་པའི་ལུ་གུ་བཙའ་བའི་དགའ་སྤྲོར་རོལ་བ་དེ་ཡིན། དུས་དེར་འབྲོག་པ་ཚོའི་སེམས་སུ་ལོ་གསར་དེ་ལོ་གསར་པའི་ནང་བདེ་ཞིང་སྐྱིད་པ་དང་ནོར་ལུག་འཕེལ་ཁ་རྒྱས་པའི་སྨོན་ལམ་རྒྱག་པའི་མཛད་སྒོ་ཞིག་ཏུ་དེ་བས་གྱུར་ཡོད་པ་ཤེས་བྱུང་།

    གྲོང་ཚོར་བཅའ་སྡོད་ལས་བྱེད་པ་ཚོས་གཞི་རིམ་དང་མང་ཚོགས་ཀྱི་ཁྲོད་དུ་གཞི་རིམ་གྱི་འཕེལ་རྒྱས་བསམ་ཕྱོགས་ལེགས་པར་འགོད་རོགས་དང་མང་ཚོགས་ཀྱི་སེམས་ཁྲལ་དང་དཀའ་ངལ་སེལ་རོགས་བྱེད་པའི་བརྒྱུད་རིམ་ཁྲོད་ནས་གཞི་རིམ་ལས་བྱེད་པའི་སྤྱོད་ཚུལ་ཏན་ཏིག་དང་འགན་འཁུར་བའི་རྣམ་འགྱུར་དེ་དག་ལས་ཁོང་ཚོར་སེམས་འགུལ་དང་ཞིང་འབྲོག་པའི་འཕེལ་རྒྱས་ཡོང་བ་བྱེད་པ་དང་འབྱོར་འབྲིང་ཕྱོགས་སུ་བསྐྱོད་པའི་སྤྲོ་སེམས་ཀྱིས་ཁོང་ཚོར་སེམས་འགུལ་ཐེབས་པ་དང་ཆབས་ཅིག་ཁོང་ཚོར་གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་བྱེད་སྒོ་ལས་འཁུར་དགོས་པའི་ལས་འགན་དེས་དུས་དང་རྣམ་པ་ཀུན་ཏུ་སྐུལ་ལྕག་གཏོང་བཞིན་ཡོད།

    གྲོང་ཚོར་བཅའ་སྡོད་བོད་ལྗོངས་རྩོམ་རིག་སྒྱུ་རྩལ་ལས་རིགས་མཉམ་འབྲེལ་ལྷན་ཚོགས་ཀྱི་གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་བྱེད་སྒོའི་ལས་དོན་ཚོགས་ཆུང་གིས་བཞད་མཐོང་སྨོན་རྫོང་ནགས་ལས་ཅུས་དང་དེ་བཞིན་ཤང་དང་གྲོང་ཚོའི་ལས་བྱེད་པ་དང་གྲོས་མོལ་བྱས་ཏེ་ཤིང་འཛུགས་ནགས་བཟོ་ཟླ་བའི་བྱེད་སྒོ་སྤེལ་རྒྱུ་དང་གནའ་ཤིང་སྲུང་སྐྱོང་བྱ་རྒྱུའི་ཐད་སྤྱི་ཆིངས་བཞག་པ་རེད། འདི་ནི་ཉེ་ཆར་བཞད་མཐོང་སྨོན་རྫོང་གཞུང་གྲོང་ཚོའི་ཏང་ཡོན་ལས་བྱེད་པས 《གནའ་ཤིང་སྲུང་སྐྱོང་སྤྱི་ཆིངས 》ཐོག་རང་ཉིད་ཀྱི་མིང་འགོད་བཞིན་པའི་གནས་ཚུལ་ཡིན་པ།

    ཉེ་ཆར་གྲོང་ཚོར་བཅའ་སྡོད་ལྗོངས་མི་དམངས་ཞིབ་དཔྱོད་ཁང་གི་ལས་དོན་ཚོགས་ཆུང་གིས་དུས་ཡུན་ཉིན་10སྤྱད་དེ་སྤྱི་ལེ་1000 ལྷག་ཙམ་བསྐྱོད་ནས་མཚོ་ཆེན་རྫོང་ཟླ་གཞུང་ཤང་ཤར་གདོང་གྲོང་ཚོའི་འབྲོག་པ་མང་ཚོགས་ཀྱི་ཁྱིམ་དུ་སྲིད་ཇུས་སྒྲོག་འགྲེལ་དང་ས་གནས་ས་ཐོག་ཏུ་བརྟག་ཞིབ་ཀྱི་ལས་དོན་ཧུར་ཐག་སྤེལ་ཞིང་། འདི་ནི་ལས་དོན་ཚོགས་ཆུང་གི་ཁོངས་མིས་ས་གནས་ས་ཐོག་ཏུ་བརྟག་ཞིབ་བྱེད་པར་བསྐྱོད་པའི་གནས་ཚུལ་ཡིན་པ།