བོད་ལྗོངས་ཉིན་རེའི་ཚགས་པར་ཁང་དུ་ལྷ་ས་ནས་ཟླ་4ཚེས་3ཉིན་གནས་ཚུལ་འབྱོར་གསལ། ཟླ་4ཚེས་1ནས་ཚེས་2ཉིན་བར་རང་སྐྱོང་ལྗོངས་ཀྱི་གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་བྱེད་སྒོའི་འགོ་ཁྲིད་ཚོགས་ཆུང་གཞུང་དོན་ཁང་གི་སྐོར་ཞིབ་ཚོགས་ཆུང་དང་པོའི་ཙུའུ་ཀྲང་ཀྲང་ཕུའུ་ཧྲན་གྱི་སྣེ་ཁྲིད་འོག་ཀོང་པོ་རྒྱ་མདའ་རྫོང་དུ་བྱེད་སྒོ་སྤེལ་ཚུལ་ལ་ཞིབ་བཤེར་གནང་བ་རེད།

    ཟླ་4ཚེས་1ཉིན་རང་སྐྱོང་ལྗོངས་ཀྱི་གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་བྱེད་སྒོའི་འགོ་ཁྲིད་ཚོགས་ཆུང་གཞུང་དོན་ཁང་གི་སྐོར་ཞིབ་ཚོགས་ཆུང་དང་པོས་གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་བྱེད་སྒོའི་ལས་དོན་སྒྲུབ་ཚུལ་སྐོར་གྱི་ཀོང་པོ་རྒྱ་མདའ་རྫོང་གི་སྙན་སེང་གསན་པ་དང་འབྲེལ་ཀོང་པོ་རྒྱ་མདའ་རྫོང་གིས་སྤེལ་བའི་བྱེད་སྒོར་གདེང་འཇོག་གང་ལེགས་གནང་བ་དང་། ཀོང་པོ་རྒྱ་མདའ་རྫོང་གིས་མི་འདང་ས་ཞིབ་བཤེར་དང་ཆད་པ་བསྐངས་ནས་གྲོང་ཚོ་སོ་སོའི་ལས་ཀའི་དོན་དངོས་དང་ཟུང་འབྲེལ་གྱིས “ཕྱིར་དྲན ”གྱི་བྱེད་སྒོ་སྤེལ་དགོས་པ་དང་། ལས་ཀ་བྱེད་སྟངས་འོས་འཚམས་ཡོང་བ་བྱས་པའི་ཁར་རང་སོའི་ལས་ཀ་བྱེད་སྟངས་ཀྱང་མི་འཕྱུགས་པ་ཞིག་བྱས་ནས་མི་དམངས་མང་ཚོགས་ཆེད་བྱ་བ་དངོས་བསྒྲུབ་པ་དང་དཀའ་གནད་བསལ་དགོས་པ། ཞིབ་བཤེར་བྱེད་ཤུགས་ཆེ་རུ་གཏོང་བ་དང 《གྲོང་ཚོར་བཅའ་སྡོད་ལས་དོན་ཚོགས་ཆུང་གི་ལས་ཀའི་ཕྱོགས་སྟོན 》གཞིར་བཟུང་ལས་དོན་ཚོགས་ཆུང་ཁག་གིས་ལས་ཀ་དོ་མཉམ་མེད་པའི་གནད་དོན་ཐག་གཅོད་བྱེད་དགོས་པ། དྲིལ་བསྒྲགས་བྱ་རྒྱུར་སྔར་བས་ཤུགས་སྣོན་བརྒྱབ་སྟེ་བཀྲག་མདངས་འཚེར་ས་དང་དམིགས་བསལ་ཁྱད་ཆོས་ཇི་ཡོད་འདོན་སྤེལ་བྱེད་དགོས་པ་བཅས་ཀྱི་བླང་བྱ་བཏོན་གནང་བ་རེད།

    སྐོར་ཞིབ་ཚོགས་ཆུང་གིས་རྒྱ་མདའ་ཤང་སྤང་དཀར་སྒང་གྲོང་ཚོར་བཅའ་སྡོད་ཉིང་ཁྲི་ས་ཁུལ་བཟའ་བཅའ་དང་སྨན་རྫས་ལྟ་སྐུལ་དོ་དམ་ཅུས་ཀྱི་ལས་དོན་ཚོགས་ཆུང་གི་བྱེད་སྒོའི་གནས་ཚུལ་སྐོར་གསན་ནས་ལས་དོན་ཚོགས་ཆུང་གིས་མང་ཚོགས་ཚོར་སྣེ་ཁྲིད་དེ་འདེབས་འཛུགས་དང་གསོ་ཚགས་བྱེད་རྩིས་ཡོད་པ་ཤེས་སྐབས། སྐོར་ཞིབ་ཚོགས་ཆུང་གིས་གྲོང་ཚོར་བཅའ་སྡོད་ལས་དོན་ཚོགས་ཆུང་གིས་གྲོང་ཚོ་དེ་གའི་དོན་དངོས་དང་བསྟུན་པ་དང་སྤྱི་ཡོངས་ནས་བསམ་བློ་བཏང་སྟེ་གྲོང་ཚོ་དེ་རང་དང་འཚམས་པའི་རྣམ་གྲངས་འཁྱེར་ཡོང་ནས་མང་ཚོགས་ཚོར་དངོས་ཕན་ཐོབ་པར་བྱེད་པ་དང་སྦྲགས་གྲོང་ཚོར་བཅའ་སྡོད་ལས་དོན་ཚོགས་ཆུང་གིས “ཨུ་ལྷན་གཉིས ”ཀྱི་ཚན་ཁག་འཛུགས་སྐྱོང་ལ་ངེས་པར་དུ་དམ་འཛིན་ནན་པོ་བྱས་ཏེ་གྲོང་ཚོ་དེ་ཉིད་འགྱུར་མེད་སྟོབས་ལྡན་གྱི་སྣེ་ཁྲིད་དཔུང་ཁག་ཅིག་ཏུ་འཛུགས་སྐྲུན་བྱས་ནས་ཏང་གི་གཞི་རིམ་སྲིད་དབང་གི་རྨང་རྩ་བརྟན་དུ་གཏོང་དགོས་པའི་རེ་བ་བཏོན་གནང་བ་རེད།

    ཟླ་4ཚེས་2ཉིན་སྔ་པོ་ནས་སྐོར་ཞིབ་ཚོགས་ཆུང་རླངས་འཁོར་ནང་བསྡད་དེ་ཉང་ཕུ་ཤང་དབུ་ནང་གྲོང་ཚོར་བཅའ་སྡོད་རང་སྐྱོང་ལྗོངས་དབུལ་སྐྱོར་གཞུང་དོན་ཁང་ལས་དོན་ཚོགས་ཆུང་ཡོད་སར་བསྐྱོད་ཅིང་། ལམ་བར་ཆུ་ཚོད་3ལྷག་ཙམ་བསྐྱོད་རྗེས་སྐོར་ཞིབ་ཚོགས་ཆུང་མཐོ་ཚད་རྒྱ་མཚོའི་ངོས་ལས་སྨི་4800ཡོད་པའི་ལས་ཀ་བྱ་ཡུལ་དུ་འབྱོར། དེ་གའི་ལས་དོན་ས་ཚིགས་ནི་ཀོང་པོ་རྒྱ་མདའ་རྫོང་གི་གྲོང་ཚོར་བཅའ་སྡོད་ལས་དོན་ཚོགས་ཆུང་23ཁྲོད་ཀྱི་ས་བབ་མཐོ་ཤོས་དང་། ལམ་སྡུག་ཤོས། ཁོར་ཡུག་ཞན་ཤོས་བཅས་ཀྱི་བཅའ་སྡོད་ས་ཚིགས་ཤིག་རེད། བཅའ་སྡོད་དབུལ་སྐྱོར་གཞུང་དོན་ཁང་གིས་དབུ་ནང་གྲོང་ཚོའི་དུད་ཚང་41གི་འབྲོག་པར་དྲོད་ཁང་རྒྱག་རོགས་བྱས་པ་དང་། དུད་ཚང་དབུལ་པོར་ཕྱུགས་རིགས་སྤྲད་པ། འཕྲུལ་ཁྲོན་2འདྲུ་བའི་དམངས་ཕན་རྣམ་གྲངས་ལ་དངུལ་སྒོར་ཁྲི་80དོན་འཁྱོལ་བྱེད་ཉེར་ཡོད་པ་བཅས་ཤེས་རྟོགས་བྱུང་སྐབས་སྐོར་ཞིབ་ཚོགས་ཆུང་གིས་གྲོང་ཚོར་བཅའ་སྡོད་དབུལ་སྐྱོར་གཞུང་དོན་ཁང་ལས་དོན་ཚོགས་ཆུང་གི་དུས་ཐེངས་གོང་མའི་ལས་ཀར་གདེང་འཇོག་གང་ལེགས་གནང་བ་རེད།