བོད་ལྗོངས་ཉིན་རེའི་ཚགས་པར་ཁང་དུ་ལྷ་ས་ནས་གནས་ཚུལ་འབྱོར་གསལ། ཉེ་ཆར་མི་དམངས་དངུལ་ཁང་ལྷ་ས་ལྟེ་བའི་ཉིང་ལག་དངུལ་ཁང་གིས་རང་སྐྱོང་ལྗོངས་ཀྱི་གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་བྱེད་སྒོ་ཧུར་ཐག་སྤེལ་ནས་གནས་གཏན་འཁེལ་གྱི་བཅའ་སྡོད་བྱེད་ཡུལ་སྦྲ་ཆེན་རྫོང་གངས་ཆེན་ཤང་གྲོང་ཚོ་ལྔ་པར་དབུལ་སྐྱོར་བྱ་རྒྱུའི་བྱ་ཐབས་ཞིབ་འཇུག་དང་བཀོད་སྒྲིག་བྱས་པ་རེད།
དེ་གོང་ལོ་ཤས་རིང་གནས་གཏན་འཁེལ་གྱི་དབུལ་སྐྱོར་བྱས་པའི་ཉམས་མྱོང་ལ་ཕྱོགས་སྡོམ་བྱས་པའི་རྨང་གཞིའི་ཐོག་མི་དམངས་དངུལ་ཁང་ལྷ་ས་ལྟེ་བའི་ཉིང་ལག་དངུལ་ཁང་གིས་རོགས་སྐྱོར་བྱེད་པའི་ཞིབ་ཕྲའི་བྱ་ཐབས་ཁ་གསལ་བཟོས་པ་སྟེ། གཅིག་ནས་གནས་གཏན་འཁེལ་གྱི་གྲོང་ཚོར་བཅའ་སྡོད་བྱེད་མཁན་ཚོགས་ཆུང་གིས་གངས་ཆེན་ཤང་གྲོང་ཚོ་ལྔ་པའི་ཞིང་འབྲོག་པ་དུད་ཁྱིམ་ཚང་མའི་གནས་ཚུལ་ཞིབ་ཕྲ་གསལ་རྟོགས་ཐུབ་རྗེས་ཆེད་དོན་ཚོགས་འདུ་འཚོགས་ནས་གངས་ཆེན་ཤང་གྲོང་ཚོ་ལྔ་པའི་འཕེལ་རྒྱས་དང་འཚམ་པའི་ཞིབ་ཕྲའི་རོགས་སྐྱོར་བྱ་ཐབས་ཞིབ་འཇུག་བྱ་རྒྱུ་དང་། གཉིས་ནས་ཞིང་འབྲོག་མང་ཚོགས་ཀྱི་ཐོན་སྐྱེད་དང་འཚོ་བའི་ཁྲོད་ཀྱི་མངོན་གསལ་དོད་པའི་གནད་དོན་ཐག་གཅོད་བྱེད་པ་དང་མི་དམངས་མང་ཚོགས་དབར་གྱི་བརྩེ་དུང་ཟབ་ཏུ་བཏང་ནས་བྱེད་སྒོ་ཁག་ཡག་པོ་སྤེལ་བ་དང་ལྷག་དོན་དུ་མི་རིགས་སྲིད་ཇུས་དང་། ཆོས་ལུགས་སྲིད་ཇུས། ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པ་དང་ཀྲུང་དབྱང་གིས “ལོ་ལྔ་ཚན་བཅུ་གཉིས་པའི ”རིང་བོད་ལ་ལག་ལེན་བསྟར་བའི་དམིགས་བསལ་གྱི་གཟིགས་སྐྱོང་སྲིད་ཇུས་དང་དེ་བཞིན་ཞིང་དར་ཞིང་ཕན་གྱི་སྲིད་ཇུས་བཅས་དྲིལ་བསྒྲགས་བྱེད་ཤུགས་ཆེ་རུ་གཏོང་བ། གསུམ་ནས་གྲོང་ཚོར་བཅའ་སྡོད་བྱེད་མཁན་ལས་བྱེད་པར་སྒྲིག་ལམ་ཐད་བླང་བྱ་ནན་པོ་བཏོན་ནས་དངུལ་ཁང་གི་འགོ་ཁྲིད་གཅིག་གིས་འགན་འཁུར་རྒྱུ་གཏན་འཁེལ་བྱས་པའི་སྔོན་འགྲོའི་ཆ་རྐྱེན་འོག་གྲོང་ཚོར་བཅའ་སྡོད་བྱེད་མཁན་ལས་བྱེད་པས་རང་སྐྱོང་ལྗོངས་ཀྱི་བླང་བྱར་ནན་པོར་གཞིགས་ནས་བྱེད་སྒོ་དེ་ཐོབ་དཀའ་བའི་སློབ་སྦྱོང་དང་སྦྱོང་བརྡར་བྱེད་པའི་གོ་སྐབས་སུ་བརྩིས་ནས་ཏན་ཏན་ཏིག་ཏིག་ངང་གྲོང་ཚོ་དང་དུད་ཚང་དུ་བཅའ་སྡོད་བྱས་ནས་གནས་ཚུལ་ཤེས་རྟོགས་བྱས་ཏེ “དགེ་རྒན ”དང “སློབ་དཔོན ”མི་བྱེད་པར “སློབ་མ ”ཡག་པོ་བྱས་ནས་དཀའ་ངལ་སྣ་ཚོགས་ཁྱད་བསད་ཀྱིས་ཏན་ཏན་ཏིག་ཏིག་ངང་བྱེད་སྒོ་དེ་ཡག་པོ་སྤེལ་བ་དང་སྒྲིག་འཛུགས་ཡག་པོ་བྱས་ནས་བྱེད་སྒོར་ཕན་འབྲས་ཐོན་རྒྱུའི་འགན་ལེན་བྱེད་པ་བཅས་རེད།