བོད་ལྗོངས་ཉིན་རེའི་ཚགས་པར་ཁང་དུ་ལྷ་ས་ནས་གནས་ཚུལ་འབྱོར་གསལ། རང་སྐྱོང་ལྗོངས་ཏང་ཨུད་ཀྱི་གཅིག་གྱུར་བཀོད་སྒྲིག་གཞིར་བཟུང་བོད་ལྗོངས་ཞིབ་བཤེར་དང་ནད་ཡམས་བརྟག་དཔྱད་རིམས་བཤེར་ཅུས་ཀྱིས་དོན་དངོས་དང་ཟུང་འབྲེལ་བྱས་ཏེ་ལས་དོན་ཇུས་གཞི་བཟོ་བ་དང་ལས་དོན་འགོ་ཁྲིད་ཚོགས་ཆུང་བཙུགས་ནས་ཉེ་འཆར “གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་བྱེད་སྒོའི ”ལས་དོན་དངོས་སུ་སྤེལ་འགོ་ཚུགས་པ་རེད།
བྱེད་སྒོའི་ལས་འགན་གཙོ་བོ་གཤམ་གསལ་ཕྱོགས་བཞིའི་ནང་ཚུད་ཡོད་དེ། གཅིག་ནས་ཏང་གི་བྱེད་ཕྱོགས་སྲིད་ཇུས་དྲིལ་བསྒྲགས་བྱ་རྒྱུ་དེ་ཡིན་ཞིང་། བོད་ཀྱི་ལས་དོན་སྐོར་གྱི་ཀྲུང་དབྱང་གི་མཛུབ་ཁྲིད་བསམ་བློ་དང་ཏང་གི་དམངས་ཕྱུག་དམངས་ཕན་སྲིད་ཇུས་དང་བོད་ཀྱི་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་སྐུལ་འདེད་གཏོང་རྒྱུའི་སྐོར་གྱི་ལྗོངས་ཏང་ཨུད་ཀྱི་བསམ་ཕྱོགས་དང་བྱ་ཐབས་གསར་པ་འབུར་དུ་ཐོན་པ་བྱེད་པ་དང་ཏཱ་ལའི་རུ་ཚོགས་དང་འཐབ་རྩོད་བྱ་རྒྱུའི་སྐོར་གྱི་ཀྲུང་དབྱང་གི་བྱེད་ཕྱོགས་དང་ཁ་ཕྲལ་ལ་ངོ་རྒོལ་དང་བརྟན་ལྷིང་སྲུང་སྐྱོང་བྱེད་པའི་ལྗོངས་ཏང་ཨུད་ཀྱི་ཐབས་ཇུས་བཀོད་སྒྲིག་དྲིལ་བསྒྲགས་བྱས་ཏེ་ལས་བྱེད་པ་དང་མང་ཚོགས་ཚོས་ཁ་ཕྲལ་ལ་ངོ་རྒོལ་དང་བརྟན་ལྷིང་སྲུང་སྐྱོང་བྱེད་པའི་སྲ་ཞིང་བརྟན་པའི་བསམ་བློའི་འགོག་སྲུང་གི་འཛིང་རགས་བསྐྲུན་རྒྱུ་དང་། གཉིས་ནས་འབུར་ཐོན་གནད་དོན་ཐག་གཅོད་བྱ་རྒྱུ་དེ་ཡིན་ཞིང་། མང་ཚོགས་དབུལ་པོའི་འཚོ་བའི་ཐད་ཀྱི་འབུར་ཐོན་གནད་དོན་དང་། གཞི་རིམ་གྱི་མཐུན་སྦྱོར་བརྟན་ལྷིང་ཐད་ཤུགས་རྐྱེན་ངན་པ་ཡོད་པའི་འབུར་ཐོན་གནད་དོན། གཞི་རིམ་ཏང་ཡོན་ལས་བྱེད་པའི་སྤྱོད་ཚུད་ཐད་ལྷག་པའི་འབུར་ཐོན་གནད་དོན་བཅས་ཐག་གཅོད་བྱེད་རོགས་བྱ་རྒྱུ། གསུམ་ནས་ཏང་དང་མང་ཚོགས་དབར་དང་ལས་བྱེད་པ་དང་མང་ཚོགས་དབར་གྱི་འབྲེལ་བ་ཟབ་ཏུ་གཏོང་རྒྱུ་དེ་ཡིན་ཞིང་། སྲིད་དོན་དམངས་ལ་འདྲི་བ་དང་། མཁོ་དགོས་དམངས་ལ་འདྲི་བ། ཐབས་ཇུས་དམངས་ལ་འདྲི་བ་བཅས་མཐའ་འཁྱོངས་ཀྱིས་རང་འགུལ་ངང་མང་ཚོགས་ཀྱི་སྒོ་རྩར་ཕྱིན་ཏེ་གནས་ཚུལ་འདྲི་རྟོག་བྱེད་པ་དང་། མང་ཚོགས་དང་གྲོགས་པོ་སྒྲིག་པ། ཁྱིམ་ཚང་གི་འཚོ་བ་དང་ཐོན་སྐྱེད་ཀྱི་གནས་ཚུལ་འདྲི་བ། བརྟན་ལྷིང་གླེང་བ། འཆར་གཞི་འདིང་བ་བཅས་ཀྱི་ཐོག་ནས་མང་ཚོགས་ཚོས་དགོས་མཁོ་ཆེ་ཤོས་བྱེད་གནས་སུ་བསྐྱོད་དེ་བདེ་སྡུག་འདྲི་བ་དང་མང་ཚོགས་ཚོར་དཀའ་ངལ་འཕྲད་སའི་གནས་སུ་བསྐྱོད་དེ་སེམས་ཁྲལ་དང་དཀའ་ངལ་བསལ་ནས་མང་ཚོགས་ཚོར་ཏང་དང་སྲིད་གཞུང་གི་དྲོ་སྐྱིད་དངོས་སུ་ཚོར་ཐུབ་པ་དང་དངོས་དངོས་རྗེན་རྗེན་གྱི་ཕན་པ་ཐོབ་པ་བྱས་ནས་སྒྱུར་བཅོས་འཕེལ་རྒྱས་ཀྱི་གྲུབ་འབྲས་ལོངས་སུ་སྤྱོད་ཐུབ་པ་བྱ་རྒྱུ། བཞི་ནས་གཞི་རིམ་རྩ་འཛུགས་འཛུགས་སྐྱོང་ལ་ཤུགས་སྣོན་རྒྱག་རྒྱུ་དེ་ཡིན་ཞིང་། བཅའ་སྡོད་བྱེད་ཡུལ་ཆབ་མདོ་ས་ཁུལ་དཔའ་ཤོད་རྫོང་སྤྱི་དར་ཤང་གོམ་ལྷ་གྲོང་ཚོའི་ཏང་ཀྲི་པུའུ་ཡིས་ལྟེ་བར་བྱས་པའི་གཞི་རིམ་རྩ་འཛུགས་འཛུགས་སྐྱོང་ལ་ཤུགས་སྣོན་རྒྱག་རོགས་བྱ་རྒྱུ་དེ་ཡིན་ཞིང་། གྲོང་ཚོ “ཨུ་ལྷན་གཉིས ”ཀྱི་དམངས་གཙོའི་དོ་དམ་སོགས་སྒྲིག་སྲོལ་ལམ་ལུགས་འཛུགས་པ་དང་འཐུས་ཚང་དུ་གཏོང་རོགས་བྱེད་པ་དང་། གྲོང་ཚོའི་རྩ་འཛུགས་ཀྱི་ཏང་དོན་ཡོངས་བསྒྲགས་དང་གྲོང་དོན་ཡོངས་བསྒྲགས་ཀྱི་ལས་དོན་ཐད་མཛུབ་ཁྲིད་བྱེད་པ། ཀྲུང་གོ་གུང་ཁྲན་ཏང་དབུ་བཪྙེས་ནས་ལོ་ངོ་90འཁོར་བ་དང་དེ་བཞིན་བོད་ཞི་བས་བཅིངས་འགྲོལ་བཏང་ནས་ལོ་ངོ་60འཁོར་བར་རྟེན་འབྲེལ་ཞུ་བའི་བྱེད་སྒོ་ཡག་པོ་སྤེལ་རོགས་བྱེད་པ་བཅས་ཀྱི་ཐོག་ནས་བརྗོད་བྱ་གཙོ་བོ་མཆོག་ཏུ་འཛིན་པ་དང་འགྱུར་ལྡོག་གསར་པ་མངོན་པ་བྱ་རྒྱུ་བཅས་རེད།