བོད་ལྗོངས་ཉིན་རེའི་ཚགས་པར་ཁང་དུ་ལྷ་ས་ནས་གནས་ཚུལ་འབྱོར་གསལ། ཉེ་དུས་གསར་འགོད་པར་ལྷ་ས་གྲོང་ཁྱེར་གྱི་ཕྱོགས་མི་དོ་དམ་གྱི་ཚོད་ལྟའི་ས་ཚིགས་ཀྱི་ལས་དོན་ཚོགས་ཆེན་ཐོག་ནས་ཤེས་རྟོགས་བྱུང་བར། ཁོངས་གཏོགས་ཁུལ་ནང་གི་ཕྱོགས་མིར་དོ་དམ་བྱ་རྒྱུ་ཪྙོག་འཛིང་ཆེ་བའི་ད་ཡོད་ཀྱི་གནས་ཚུལ་ལ་དམིགས་ཏེ་ན་ནིང་ནས་བཟུང་ལྷ་ས་གྲོང་ཁྱེར་ཁྲེང་ཀོན་ཆུས་ཀྱིས་ནུས་ལྡན་གྱི་བྱེད་ཐབས་སྤྱད་དེ་རྒྱུན་དུ་དུད་ཚང་ནང་བསྐྱོད་ནས་སྐད་ཆ་འདྲི་བ་དང་། རྩ་འཛུགས་རྒྱུན་ཆད་མེད་པར་འཐུས་སྒོ་ཚང་དུ་གཏོང་བ། ཕྱོགས་མིར་ཐོ་འགོད་ཞིབ་ཕྲ་བྱེད་པ་བཅས་བྱས་ཏེ་ཕྱོགས་མིའི་དོ་དམ་ལས་དོན་ལ་སྐུལ་འདེད་ཏན་ཏིག་བཏང་བ་རེད།

    ཕྱོགས་མིའི་རྩ་འཛུགས་འཛུགས་སྐྱོང་འཐུས་སྒོ་ཚང་དུ་བཏང་ཞིང་། 2010ལོ་ནས་བཟུང་ཁྲེང་ཀོན་ཆུས་ཀྱིས་ཤང་ཁག་དང་། ཁྲོམ་གཞུང་དོན་གཅོད་ཁྲུའུ། གྲོང་མི་ཨུ་ཡོན་ལྷན་ཁང (གྲོང་ཚོ )བཅས་སུ་ཏང་སྲིད་འགན་འཁུར་བློ་མཐུན་གཙོ་བོས་ཙུའུ་ཀྲང་གནང་བའི་ཕྱོགས་མིའི་ཞབས་ཞུ་དང་དོ་དམ་ལས་དོན་འགོ་ཁྲིད་ཚོགས་ཆུང་རིམ་པ་བཞིན་བཙུགས་པ་མ་ཟད་ད་དུང་སྡེ་ཁུལ་44རུ་ཕྱོགས་མིའི་ཞབས་ཞུའི་དོ་དམ་ས་ཚིགས་བཙུགས་པས་ཆེད་འགན་འཁུར་མཁན་གཞོགས་འདེགས་དོ་དམ་པ་100དང་ལས་འགན་གཅིག་ལྕོགས་གཞོགས་འདེགས་དོ་དམ་པ་17གྱིས་ཁེ་ལས་དང་སྡེ་ཁུལ་དུ་ཕྱོགས་མིར་སྐོར་བཤེར་དང་ཐོ་འགོད་སོགས་ཀྱི་ལས་དོན་སྒྲུབ་སྟབས་ཁྲེང་ཀོན་ཆུས་སུ་རིམ་གསུམ་ཕྱོགས་མིའི་ཞབས་ཞུའི་དོ་དམ་ལས་དོན་གྱི་དྲ་བ་ཆགས་ཆེད་སྲ་ཞིང་བརྟན་པའི་རྩ་འཛུགས་ཀྱི་འགན་ལེན་མཁོ་འདོན་བྱས་ཡོད་པ་རེད། ཕྱོགས་མིའི་ཞབས་ཞུའི་བྱེད་ཐབས་ལེགས་སུ་བཏང་ཞིང་། ཕྱོགས་མི་དང་རྒྱ་ཆེའི་གྲོང་མིར་སྟབས་བདེ་སྐྲུན་ཆེད་ཁྲེང་ཀོན་ཆུས་ཀྱིས་སྤྱི་བདེ་དང་། ཕྱོགས་བསྡུས་བཅོས་སྐྱོང་གཞུང་དོན་ཁང་། འཆར་ལྡན་བུ་བཙའ་ཨུ་ལྷན། ཁྲིམས་འཛིན་སོགས་སྡེ་ཚན་དང་གཞི་རིམ་རྩ་འཛུགས་ནུས་ལྡན་ངང་བསྡུ་སྒྲིལ་གྱིས་གཅིག་སྡུད་གཞུང་དོན་སྒྲུབ་ནས་ཕྱོགས་མིས་དུས་ཚོད་ཐུང་ཤོས་ནང་འབྲེལ་ཡོད་འགྲོ་ལུགས་གཉེར་ཐུབ་པ་བྱས་ཡོད།

    ཕྱོགས་མིའི་ཏང་དང་སྡེ་ཚོགས་རྩ་འཛུགས་བཙུགས་ཤིང་། ཕྱོགས་མི་ཏང་ཡོན་དང་སྡེ་ཚོགས་ཀྱི་ཚོགས་མིའི་དབང་ཆ་འགན་ལེན་བྱ་ཆེད་ཁྲེང་ཀོན་ཆུས་ཀྱིས་ཀུན་བདེ་གླིང་ཁྲོམ་གཞུང་དོན་གཅོད་ཁྲུའུ་རུ་ཕྱོགས་མིའི་ཏང་ཡོན་དང་སྡེ་ཚོགས་ཀྲི་པུའུ་དང་པོ་དེ་བཙུགས་པས་ཁོངས་གཏོགས་ཁུལ་ནང་གི་ཕྱོགས་མི་ཏང་ཡོན་ལ་བྱེད་སྒོ་སྣ་ཚོགས་སྤེལ་ཡུལ་ཡོད་པ་དང་ཕྱོགས་མི་ཏང་ཡོན་དང་སྡེ་ཚོགས་ཀྱི་ཚོགས་མིའི་རྩ་འཛུགས་ཀྱི་འཚོ་བ་འགན་ལེན་ཐུབ་ནས་ཕྱོགས་མི་ཏང་ཡོན་དང་སྡེ་ཚོགས་ཀྱི་ཚོགས་མིས་གདོང་ལེན་དཔེ་བཟང་གི་ནུས་པ་འདོན་ཐུབ་པ་བྱུང་ཡོད།

    བཙའ་ལོ་རན་པའི་བུད་མེད་ལ་དོ་དམ་བྱེད་སྟངས་འཚོལ་ཞིབ་བྱས་ཤིང་། ཁྲེང་ཀོན་ཆུས་ཀྱིས་ཀུན་བདེ་གླིང་ཁྲོམ་གཞུང་དོན་གཅོད་ཁྲུའུ་རུ་ཕྱོགས་མིའི་འཆར་ལྡན་བུ་བཙའི་མཐུན་ཚོགས་དང་པོ་དེ་བཙུགས་ནས་ཕྱོགས་མིའི་འཆར་ལྡན་བུ་བཙའི་དྲིལ་བསྒྲགས་སློབ་གསོའི་བྱེད་སྒོ་སྤེལ་བ་དང་ཕྱོགས་མིར་སྦྲུམ་འགོག་དང་། བུ་བཙའ་ཚོད་འཛིན། ལེགས་བཙའ་ལེགས་གསོ་བཅས་ཀྱི་འབྲེལ་ཡོད་ཞབས་འདེགས་ཞུས་པས་བཙའ་ལོ་རན་པའི་ཕྱོགས་མི་བུད་མེད་ཀྱིས་རྒྱལ་ཁབ་ཀྱིས་གཏན་འབེབས་བྱས་པའི་རིན་མེད་འཆར་ལྡན་བུ་བཙའི་ཞབས་ཞུ་ལོངས་སྤྱོད་བྱ་རྒྱུ་འགན་ལེན་བྱས་པ་རེད། ཕྱོགས་མིའི་བུ་ཕྲུག་ལ་སློབ་གསོ་གཏོང་རྒྱུར་ཤུགས་སྣོན་བརྒྱབ་ཅིང་། ཕྱོགས་མིའི་བུ་ཕྲུག་སློབ་གྲྭར་བསྐྱོད་དཀའ་བའི་གནད་དོན་ཐག་གཅོད་ཏན་ཏིག་བྱ་ཆེད་ཁྲེང་ཀོན་ཆུས་ཀྱིས་ཁྲིམས་སྲོལ་གྱི་འབྲེལ་ཡོད་བླང་བྱར་ནན་པོར་གཞིགས་ནས་ཕྱོགས་མིའི་བུ་ཕྲུག་སློབ་གྲྭར་བསྐྱོད་པའི་ཁེ་དབང་འགན་ལེན་ཏན་ཏིག་བྱས་པ་མ་ཟད་སློབ་གྲྭ་ཁག་གིས་ཕྱོགས་མིའི་བུ་ཕྲུག་སློབ་གྲྭར་བསྡུ་རྒྱུའི་ཐད་མཐུན་སྦྱོར་ཧུར་ཐག་བྱས་ཡོད། ད་ཕན་ལོ་ཤས་རིང་ཁྲེང་ཀོན་ཆུས་ཀྱི་སློབ་གྲྭ་14ཡིས་ཕྱོགས་མིའི་བུ་ཕྲུག་5999བསྡུས་པ་དེས་ཁྲེང་ཀོན་ཆུས་ཀྱི་སློབ་མའི་བསྡོམས་འབོར་གྱི་49.5%བཟུང་ཡོད་པ་རེད།