ཟླ་2ཚེས་25ཉིན་གྲ་ནང་རྫོང་དཀྱིལ་རུ་ཤང་གཟར་ཕུ་ཤར་གྲོང་ཚོར་བཅའ་སྡོད་བོད་ལྗོངས་སློབ་ཆེན་གྱི་གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་བྱེད་སྒོའི་ལས་དོན་ཚོགས་ཆུང་གིས་གྲོང་ཚོར་དངོས་སུ་བཅའ་སྡོད་བྱས་ཏེ་ལས་དོན་སྤེལ་འགོ་བཙུགས་པར་གཞི་རིམ་ལས་བྱེད་པ་དང་མང་ཚོགས་ཀྱི་སྤྲོ་སེམས་འཁོལ་བའི་དགའ་བསུ་ཐོབ་ཅིང་། འདི་ནི་ལས་དོན་ཚོགས་ཆུང་གི་ཚོགས་གཙོ་ཡོན་ཏན་རྒྱ་མཚོ ( གཡོན་གྱི་དང་པོ )སོགས་ཀྱིས་གཞི་རིམ་གྱི་ལས་བྱེད་པ་དང་མང་ཚོགས་དང་གླེང་མོལ་བྱེད་པའི་གནས་ཚུལ་ཡིན་པ།
བོད་ལྗོངས་ཉིན་རེའི་ཚགས་པར་ཁང་དུ་གནས་ཚུལ་འབྱོར་གསལ། གསར་འགོད་པར་རང་སྐྱོང་ལྗོངས་གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་བྱེད་སྒོའི་འགོ་ཁྲིད་ཚོགས་ཆུང་གཞུང་དོན་ཁང་ནས་ཤེས་རྟོགས་བྱུང་གསལ། རང་ལྗོངས་ཀྱི་གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་བྱེད་སྒོའི་ནང་ཞུགས་མཁན་ལྗོངས (ཀྲུང་དབྱང )ཐད་གཏོགས་ལས་ཁུངས་ཀྱི་གྲོང་ཚོར་བཅའ་སྡོད་ལས་དོན་ཚོགས་ཆུང་གི་འབྲེལ་གཏུག་ས་ཚིགས་གཏན་འཁེལ་བྱས་རྗེས་ལས་ཁུངས་ཁག་གིས་ཚད་མཐོའི་མཐོང་ཆེན་བྱས་ནས་མགྱོགས་མྱུར་བྱ་སྤྱོད་སྤེལ་ཏེ་དུས་ཐོག་ཏུ་འབྲེལ་གཏུག་ས་ཚིགས་སུ་བསྐྱོད་དེ་ཞིབ་འཇུག་མཐིལ་རྟོགས་དང་། གནས་ཚུལ་ཤེས་རྟོགས། ད་ཚད་ལས་བརྒལ་བའི་ཇུས་འགོད། སྔ་སྣུར་གྱི་བཀོད་སྒྲིག་བཅས་བྱས་པའི་ཁར་ལས་ཁུངས་མི་ཉུང་བ་ཞིག་གིས་འགོ་ཁྲིད་གཙོ་བོས་དངོས་སུ་འགན་འཁུར་བའི་གྲོང་ཚོར་བཅའ་སྡོད་ལས་དོན་ཚོགས་ཆུང་བཙུགས་པ་དང་ཚན་རིག་དང་མཐུན་ལ་ལག་ལེན་བསྟར་འཐུས་ལྡན་པའི་བྱེད་སྒོའི་འཆར་གཞི་བཟོས་ཏེ་བྱེད་སྒོ་ཏན་ཏིག་དང་ནུས་ལྡན་ངང་སྤེལ་རྒྱུར་འགན་ལེན་བྱས་པ་རེད།
ལྗོངས་ཏང་ཨུད་འཐབ་ཕྱོགས་གཅིག་གྱུར་པུའི་གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་བྱེད་སྒོའི་འབྲེལ་གཏུག་ས་ཚིགས་དེ་འཕེལ་རྒྱས་ཅུང་འགོར་བ་དང་དཀའ་ངལ་ཅུང་མང་བའི་ལྷོ་ཁ་ས་ཁུལ་ཟངས་རི་རྫོང་ཟངས་རི་གྲོང་རྡལ་སྦིད་པ་གྲོང་ཚོ་ཡིན་ཞིང་། རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་ལྗོངས་ཏང་ཨུད་འཐབ་ཕྱོགས་གཅིག་གྱུར་པུའི་པུའུ་ཀྲང་ཆེ་དགྲ་ལྷས་ལས་དོན་ཚོགས་ཆུང་གི་སྣེ་ཁྲིད་དེ་སྔ་སྣུར་དུ་སྦིད་པ་གྲོང་ཚོར་བརྟག་དཔྱད་ལས་དོན་སྤེལ་བར་བསྐྱོད་པ་དང་སྦྲགས་ཕྱོགས་ཁག་ནས་དངུལ་གྲབས་གསོག་བྱས་ནས་གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་བྱེད་སྒོའི་འགྲོ་གྲོན་དོན་འཁྱོལ་ཧུར་ཐག་བྱས་ཏེ་འབྲེལ་གཏུག་ས་ཚིགས་ཀྱི་དངོས་ཡོད་དཀའ་ངལ་དང་གནད་དོན་ནུས་ཤུགས་ཡོད་རྒུས་ཐག་གཅོད་བྱས་པ་རེད།
ལྗོངས་སྲིད་གཞུང་གཞུང་དོན་ཐིང་གི་གྲོང་ཚོར་བཅའ་སྡོད་ལས་དོན་ཚོགས་ཆུང་གིས་སྔ་སྣུར་དུ་གྲོང་ཚོར་བཅའ་སྡོད་འབྲེལ་གཏུག་ས་ཚིགས་འཕྱོངས་རྒྱས་རྫོང་ལྷ་ཡུལ་ཤང་པད་མ་སྒང་གྲོང་ཚོར་བརྟག་དཔྱད་ཞིབ་འཇུག་བྱེད་པར་བསྐྱོད་དེ་དོན་དངོས་དང་འཚམས་པ་དང་ཞིབ་ཕྲའི་ལས་ཀའི་འཆར་འགོད་བཟོས་ནས་ལྗོངས་སྲིད་གཞུང་གཞུང་དོན་ཐིང་གིས་གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་བྱེད་སྒོའི་འགོ་ཡག་པོ་ཞིག་འཛུགས་པར་རྨང་གཞི་ལེགས་པོ་ཞིག་བཏིང་བ་རེད།
ལྗོངས་ཆུ་བེད་ཐིང་གི་གྲོང་ཚོར་བཅའ་སྡོད་ལས་དོན་ཚོགས་ཆུང་གི་འབྲེལ་གཏུག་ས་ཚིགས་གཏན་འཁེལ་བྱས་རྗེས་ཐིང་ཏང་ཙུའུ་ཡིས་ཚད་མཐོའི་མཐོང་ཆེན་བྱས་ནས་མགྱོགས་མྱུར་བྱ་སྤྱོད་སྤེལ་ཏེ་དུས་ཐོག་ཏུ་ས་ཁུལ (གྲོང་ཁྱེར )དང་། རྫོང་། ཤང་བཅས་རིམ་པ་གསུམ་གྱི་འགན་འཁུར་འགོ་ཁྲིད་གཙོ་བོ་དང་འབྲེལ་བ་བྱས་ནས་འབྲེལ་གཏུག་ས་ཚིགས་ཀྱི་གཞི་རྩའི་གནས་ཚུལ་ཤེས་རྟོགས་བྱས་པ་དང་བྱེད་སྒོའི་འབྲེལ་གཏུག་མི་སྣ་བཀོད་སྒྲིག་བྱས་ཤིང་། ཐིང་ཏང་ཙུའི་ཧྲུའུ་ཅི་ལི་དབུན་ཧན་གྱིས་གྲོང་ཚོར་བཅའ་སྡོད་ལས་དོན་ཚོགས་ཆུང་གི་གྲ་སྒྲིག་ལས་དོན་ཁག་ལ་མཛུབ་ཁྲིད་དང་དེའི་ནང་ཞུགས་པའི་ཁར་བྱེད་སྒོའི་བླང་བྱ་གཞིར་བཟུང་ལག་བསྟར་གྱི་འཆར་གཞི་ཞིབ་ཕྲ་བཟོས་པ་རེད།
ལྗོངས་དམངས་སྲིད་ཐིང་གི་ཐིང་ཀྲང་བསྟན་འཛིན་འབྲུག་གྲགས་ཀྱི་སྣེ་ཁྲིད་འོག་ལྗོངས་དམངས་སྲིད་ཐིང་གི་གྲོང་ཚོར་བཅའ་སྡོད་ལས་དོན་ཚོགས་ཆུང་གིས་སྔོན་ལ་འབྲེལ་གཏུག་ས་ཚིགས་སུ་རྟོག་ཞིབ་བྱས་ནས་གཞི་རྩའི་གནས་ཚུལ་ཤེས་རྟོགས་བྱས་པ་དང་འབྲེལ་ས་གནས་དེ་གའི་རྫོང་དང་། ཤང་། གྲོང་ཚོ་བཅས་ཀྱི་གཞི་རིམ་ལས་བྱེད་པ་དང་བཞུགས་མོལ་བྱས་ཏེ་གཞི་རིམ་དང་མང་ཚོགས་ཀྱི་བསམ་བློ་གཏོང་ས་དང་རེ་སྒུག་བྱེད་ས་ཤེས་རྟོགས་ཀྱིས་གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་བྱེད་སྒོའི་ལག་བསྟར་འཆར་འགོད་ཚན་རིག་དང་མཐུན་པའི་ངང་བཟོས་ཏེ་ལས་དོན་ཚོགས་ཆུང་དུས་ཐོག་ཏུ་ས་ཚིགས་སུ་བསྐྱོད་ནས་སྔར་བས་དམིགས་སའི་རང་བཞིན་ཡོད་པའི་སྒོ་ནས་ལས་དོན་སྤེལ་རྒྱུ་འགན་ལེན་བྱ་ཆེད་མཐོང་ཐོས་མྱོང་གྲུབ་ཀྱི་དཔྱད་གཞི་ཁོང་དུ་ཆུད་པ་བྱས་པ་རེད།
ལྗོངས་རྩིས་བཤེར་ཐིང་དང་། རང་སྐྱོང་ལྗོངས་སློབ་གསོ་ལས་དོན་ཨུ་ཡོན་ལྷན་ཁང་། རང་སྐྱོང་ལྗོངས་ལུས་རྩལ་ཅུས། ཀྲུང་གོ་རྡོ་སྣུམ་བོད་ལྗོངས་བྲིན་ཚོང་ཀུང་སི། རང་སྐྱོང་ལྗོངས་ནགས་ལས་ཅུས། བོད་ལྗོངས་ལན་ཐུང་ཀུང་སི། རང་སྐྱོང་ལྗོངས་ཕྱི་དོན་གཞུང་དོན་ཁང་། བོད་ལྗོངས་ལས་རིགས་ལག་རྩལ་སློབ་གླིང་། བོད་ལྗོངས་ཉིན་རེའི་ཚགས་པར་ཁང་སོགས་གྲོང་ཚོར་བཅའ་སྡོད་ལས་དོན་ཚོགས་ཆུང་ཚང་མས་སྔ་སྣུར་དུ་འབྲེལ་གཏུག་ས་ཚིགས་སུ་བསྐྱོད་དེ་ཞིང་འབྲོག་པའི་ཐོན་སྐྱེད་དང་འཚོ་བའི་གནས་ཚུལ་དང་གནས་པའི་མངོན་གསལ་དོད་པའི་གནད་དོན་ཤེས་རྟོགས་དང་ཁོང་དུ་ཆུད་པ་བྱས་ནས་ས་ཁུལ ( གྲོང་ཁྱེར )དང་། རྫོང་། ཤང་བཅས་རིམ་པ་གསུམ་མཐུད་སྦྲེལ་བྱེད་པའི་ལས་དོན་ཡག་པོ་བསྒྲུབས་ནས་གྲོང་ཚོར་བཅའ་སྡོད་ལས་དོན་ཚོགས་ཆུང་གིས་ས་ཚིགས་སུ་བསྐྱོད་དེ་ལས་དོན་སྤེལ་རྒྱུར་རྨང་གཞི་བཏིང་ཡོད་པ་རེད།