ལས་བྱེད་ཆིག་ཁྲི་གྲོང་ཚོ་སྟོང་དུ་བསྐྱོད།  ལས་བྱེད་མང་ཚོགས་སེམས་པ་གཅིག་ཏུ་སྦྲེལ།

—— གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་བྱེད་སྒོ་གཏིང་ཟབ་ངང་སྤེལ།  

    བོད་ལྗོངས་ཉིན་རེའི་ཚགས་པར་ཁང་དུ་ལྷ་ས་ནས་གནས་ཚུལ་འབྱོར་གསལ། གསར་འགོད་པར་གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་བྱེད་སྒོའི་རང་སྐྱོང་ལྗོངས་འགོ་ཁྲིད་ཚོགས་ཆུང་གི་གཞུང་དོན་ཁང་ནས་ཤེས་རྟོགས་བྱུང་གསལ་ལྟར་ན། ལྗོངས་ཡོངས་སུ་གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་བྱེད་སྒོ་སྤེལ་ཚུན་རང་ལྗོངས་ཀྱི་ཚན་པ་ཁག་དང་སྡེ་ཚན་ཁག་གིས་ཚད་མཐོའི་མཐོང་ཆེན་དང་། སྒྲིག་འཛུགས་ཞིབ་ཚགས། སྐུལ་སློང་ཧུར་ཐག་བཅས་བྱས་ཏེ་དུས་འགོའི་གྲ་སྒྲིག་ལས་དོན་ཁག་གོ་རིམ་ལྡན་པའི་ངང་སྒྲུབ་བཞིན་ཡོད་པ་རེད།

    ཚེས་23ཉིན་གྱི་ཕྱི་དྲོ་རང་སྐྱོང་ལྗོངས་རྒྱལ་ཁབ་ས་ཆ་ཐོན་ཁུངས་ཐིང་གིས་གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་བྱེད་སྒོའི་སྐུལ་སློང་ཚོགས་འདུ་འཚོགས་ཏེ་རྒྱལ་ཁབ་ས་ཆ་ཐོན་ཁུངས་ཁོངས་གཏོགས་ཀྱིས་གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་བྱེད་སྒོའི་ལས་དོན་བཀོད་སྒྲིག་བྱས་ཤིང་། ཚོགས་ཞུགས་མི་སྣ་ཚོས་ངེས་པར་དུ་ལྗོངས་ཏང་ཨུད་ཀྱི་བླང་བྱ་ལྟར་བསམ་བློ་དང་བྱེད་སྤྱོད་ལྗོངས་ཏང་ཨུད་ཀྱི་ཐབས་ཇུས་བཀོད་སྒྲིག་ཐོག་གཅིག་གྱུར་ཡོང་བ་བྱས་ཏེ་གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་གལ་ཆེའི་དོན་སྙིང་ལ་ངོས་འཛིན་གང་ལེགས་བྱེད་པ་དང་། གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་བྱེད་སྒོ་སྤེལ་བའི་དགོས་གཏུགས་ཆེ་བའི་སེམས་པ་དང་འགན་འཁྲིའི་སེམས་པ་ཆེ་རུ་བཏང་སྟེ་གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་བྱེད་སྒོའི་བླང་བྱ་ཁག་རྒྱལ་ཁབ་ས་ཆ་ཐོན་ཁུངས་ལས་དོན་གྱི་ཕྱོགས་ཁག་ནང་ལག་བསྟར་དོན་འཁྱོལ་བྱ་རྒྱུ་དང་དུས་མཚུངས་ད་རེས་ཀྱི་བྱེད་སྒོ་དེ་གོ་སྐབས་ལ་བརྩིས་ཏེ་མང་ཚོགས་ཀྱི་འདུ་ཤེས་སྔར་བས་ཆེ་རུ་གཏོང་བ་དང་། མང་ཚོགས་ཀྱི་ཁེ་ཕན་ཞིག་ཡིན་ཕྱིན་བྱ་བ་ཆུང་ངུ་ཞིག་མིན་པའི་བསམ་བློ་བརྟན་པོ་འཛུགས་པ། གྲོང་ཚོར་བཅའ་སྡོད་དང་དུད་ཚང་དུ་སྐྱོད་པ་དང་གནས་གཞིར་བཅའ་སྡོད་དང་ཕྱོགས་ཡོངས་ལ་སྐྱོད་དེ་ལས་དོན་སྒྲུབ་པ། མང་ཚོགས་ཁྲོད་དུ་ཟབ་འཇུག་བྱེད་པ་དང་མང་ཚོགས་ལ་ཞབས་འདེགས་ཞུ་བ། མང་ཚོགས་དང་འབྲེལ་བ་བྱེད་པ། མང་ཚོགས་ལ་དྲིལ་བསྒྲགས་བྱེད་པ། མང་ཚོགས་སྒྲིག་འཛུགས་བྱེད་པ་བཅས་ཀྱི་ཐབས་ལམ་གསར་པ་དང་ཐབས་ཤེས་གསར་པ་འཚོལ་ཞིབ་ཧུར་ཐག་བྱས་ཏེ་བོད་ཀྱི་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ལ་སྐུལ་འདེད་གཏོང་ཆེད་མང་ཚོགས་ཀྱི་རྨང་གཞི་སྔར་ལས་བརྟན་པ་ཞིག་འདིང་རྒྱུ་ཡིན་ཞེས་མགྲིན་གཅིག་ཏུ་བཤད་པ་དང་སྐུལ་སློང་ཚོགས་འདུའི་ཐོག་རྒྱལ་ཁབ་ས་ཆ་ཐོན་ཁུངས་ཐིང་གི་ལས་བཟོ་ཚོས་ད་དུང་གཞི་རིམ་གྱི་འབྲེལ་གཏུགས་ས་ཚིགས་ལྷ་ས་གྲོང་ཁྱེར་འདམ་གཞུང་རྫོང་ཡངས་པ་ཅན་གྲོང་རྡལ་གྱི་ཟམ་གསར་གྲོང་ཚོའི་དཀའ་ངལ་ཡོད་པའི་མང་ཚོགས་ལ་ཞལ་འདེབས་ཕུལ་བ་རེད།

    ཚེས་23ཉིན་གྱི་སྔ་དྲོ་རང་སྐྱོང་ལྗོངས་མི་འབོར་དང་འཆར་ལྡན་བུ་བཙའ་ཨུ་ལྷན་གྱིས་གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་བྱེད་སྒོའི་སྐུལ་སློང་དང་དྲོ་སྐྱིད་སྦྱིན་པ་དང་གཅེས་སེམས་མཚོན་པར་བྱེད་པའི་ཞལ་འདེབས་འབུལ་བའི་བྱེད་སྒོ་སྤེལ་ཞིང་། བྱེད་སྒོ་སྤེལ་རིང་ལྗོངས་ཡོངས་སུ་གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་བྱེད་སྒོའི་ཚོགས་འདུའི་དགོངས་དོན་བརྒྱུད་བསྒྲགས་བྱས་པ་དང་འབྲེལ་ལྗོངས་འཆར་ལྡན་བུ་བཙའ་ཨུ་ལྷན་གྱི་ལས་དོན་ཚོགས་ཆུང་ཟླ་2ཚེས་25ཉིན་སྨན་གླིང་རྫོང་གནས་ལུང་ཤང་གི་གླང་གོང་གྲོང་ཚོར་བཅའ་སྡོད་བྱས་ཏེ་མང་ཚོགས་དང་རྒྱ་ཁྱབ་ཏུ་འབྲེལ་གཏུགས་དང་དྲིལ་བསྒྲགས་བྱས་ནས་གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་བྱེད་སྒོའི་ལས་དོན་ཁག་བསྒྲུབ་རྒྱུའི་གཏན་འབེབས་ཀྱང་བྱས་པ་རེད། ཚོགས་འདུའི་ཐོག་རང་སྐྱོང་ལྗོངས་མི་འབོར་དང་འཆར་ལྡན་བུ་བཙའ་ཨུ་ལྷན་གྱི་ལས་ཐོག་དང་ལས་བྲལ་དང་ལས་འཁྱུར་ངལ་གསོ་རྒྱག་མཁན་ལས་བཟོ་40ལྷག་ཙམ་གྱིས་དངུལ་སྒོར་12000ཞལ་འདེབས་ཕུལ་བ་དེ་སྨན་གླིང་རྫོང་གནས་ལུང་ཤང་གི་གླང་གོང་གྲོང་ཚོའི་འགན་ལེན་ལྔའི་དུད་ཚང་དང་དཀའ་ངལ་ཡོད་པའི་དུད་ཚང་སོགས་ལ་སྤྲོད་རྒྱུ་རེད།

    ཚེས་22ཉིན་གྱི་སྔ་དྲོ་ཀྲུང་གོ་ཏར་འཕྲིན་བོད་ལྗོངས་ཀུང་སིས་ཏང་ཙུའུ་ཡི་ཚོགས་འདུ་འཚོགས་ཏེ་ལྗོངས་ཡོངས་སུ་གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་གསོ་སྦྱོང་ནང་དོན་དང་འགོ་ཁྲིད་པའི་གསུང་བཤད་ཀྱི་དགོངས་དོན་སློབ་སྦྱོང་ནན་ཏན་བྱེད་པ་དང་འབྲེལ་བྱེད་སྒོ་སྤེལ་རིང་གྲོང་ཚོར་བཅའ་སྡོད་འབྲེལ་གཏུགས་ས་ཚིགས་ཀྱི་འཕྲིན་གཏོང་འགན་སྲུང་ཞབས་ཞུའི་ལས་དོན་ཡང་ཆེད་དོན་བཀོད་སྒྲིག་བྱས་པ་རེད།