བོད་ལྗོངས་ཉིན་རེའི་ཚགས་པར་ཁང་དུ་གནས་ཚུལ་འབྱོར་གསལ། ཚེས་24ཉིན་གྱི་སྔ་དྲོའི་ཆུ་ཚོད་9པར་ལྗོངས་ཏང་ཨུད་གཞུང་དོན་ཐིང་དང་ལྗོངས་ཐད་གཏོགས་ལས་ཁུངས་ལས་དོན་ཨུ་ལྷན་གྱིས་མཛད་སྒོ་འཚོགས་ཏེ་གྲོང་ཚོར་བཅའ་སྡོད་མཉམ་འབྲེལ་ལས་དོན་ཚོགས་ཆུང་གཞི་རིམ་དུ་གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་བྱེད་སྒོ་སྤེལ་བར་སྐྱོད་པར་དགའ་སྐྱེལ་ཞུས་པ་རེད།
རང་སྐྱོང་ལྗོངས་ཏང་ཨུད་ཀྱི་རྒྱུན་ལས་ཨུ་ཡོན་དྲུང་ཆེ་མགོན་པོ་བཀྲ་ཤིས་དགའ་སྐྱེལ་མཛད་སྒོར་ཞུགས་པ་དང་འབྲེལ་གྲོང་ཚོར་བཅའ་སྡོད་མཉམ་འབྲེལ་ལས་དོན་ཚོགས་ཆུང་གི་ཁོངས་མིར་ཁ་བཏགས་གཡོག་གནང་བ་དང་སྨོན་ཚིག་གསུངས་པ་རེད།
མགོན་པོ་བཀྲ་ཤིས་ཀྱིས་གྲོང་ཚོར་བཅའ་སྡོད་བྱེད་མཁན་བློ་མཐུན་ཚོའི་ཕྲག་སྟེང་དུ་ལྗོངས་ཏང་ཨུད་ཀྱི་ལས་འགན་ལྕི་པོ་ཡོད་པ་དང་ལྗོངས་ཏང་ཨུད་གཞུང་དོན་ཐིང་དང་ལྗོངས་ཐད་གཏོགས་ལས་ཁུངས་ལས་དོན་ཨུ་ལྷན་གྱི་གཟུགས་བཪྙན་མངོན་གྱི་ཡོད་ཅེས་བསྟན་གནང་བ་དང་སྦྲགས་ཁོང་གིས་གྲོང་ཚོར་བཅའ་སྡོད་ལས་དོན་ཚོགས་ཆུང་གི་ཁོངས་མི་ཚོར་གཞི་རིམ་དུ་ཆ་རྐྱེན་སྐྱོ་བ་དང་གསོ་རླུང་མི་འདང་བ་སོགས་ཀྱི་དཀའ་ངལ་ཁྱད་བསད་བྱས་ཏེ་གསོ་རླུང་མི་འདང་ཡང་སྙིང་སྟོབས་མི་ཉམས་པ་དང་དཀའ་ཚེགས་ཆེ་ཡང་སྡུག་རུས་འཁྱོག་པའི་སྙིང་སྟོབས་དར་སྤེལ་བཏང་ནས་དཀའ་སྡུག་ཆེ་བའི་ཁྲོད་སེམས་ཤུགས་འཕེལ་ཐབས་བྱེད་པ་དང་ཁོར་ཡུག་ཧ་ཅང་སྐྱོ་བའི་ཁྲོད་ཏང་གཤིས་ཞུན་བརྡར་བྱེད་པ་དང་། རང་ཉིད་ལ་རེ་བ་ནན་པོ་འདོན་པ་དང་རང་འགུལ་ངང་སྒྲིག་སྲོལ་ལམ་ལུགས་ལ་བརྩི་སྲུང་ཞུས་ཏེ་བྱེད་སྒོ་དེ་བརྒྱུད་མང་ཚོགས་དབར་གྱི་འབྲེལ་བ་རྒྱུན་ཆད་མེད་པར་གཏིང་ཟབ་ཏུ་གཏོང་བ་དང་མང་ཚོགས་དབར་གྱི་བརྩེ་དུང་ཆེ་རུ་བཏང་ནས་མི་སེར་ལ་བྱ་བ་དངོས་དང་བྱ་བ་བཟང་པོ་ཏན་ཏིག་ངང་སྒྲུབ་དགོས་པའི་བླང་བྱ་བཏོན་གནང་བ་དང་ཆབས་ཅིག་ཁོང་གིས་གྲོང་ཚོར་བཅའ་སྡོད་ལས་དོན་ཚོགས་ཆུང་གི་ཁོངས་མི་ཚོས་གཟུགས་པོར་གཅེས་སྤྲས་ཡག་པོ་བྱས་ནས་ཐེངས་དེའི་བྱེད་སྒོའི་ལས་འགན་ཁག་ཕུན་སུམ་ཚོགས་པོའི་ངང་ལེགས་པར་བསྒྲུབ་རྒྱུའི་ཐུགས་རེའང་གནང་བ་རེད།
ལྗོངས་ཏང་ཨུད་གཞུང་དོན་ཐིང་དང་ལྗོངས་ཐད་གཏོགས་ལས་ཁུངས་ལས་དོན་ཨུ་ལྷན་གྱི་མཉམ་འབྲེལ་ལས་དོན་ཚོགས་ཆུང་གི་ཙུའུ་ཀྲང་བློ་བཟང་རྒྱ་མཚོས་ལྗོངས་ཏང་ཨུད་ཀྱི་བཀོད་སྒྲིག་གཞིར་བཟུང་ཐེངས་དེའི་ལས་འགན་ཁག་ལེགས་པར་སྒྲུབ་ནས་མི་དམངས་ཀྱི་རེ་འདུན་དང་ལྗོངས་ཏང་ཨུད་ཀྱི་མངགས་བཅོལ་གལ་ཆེན་ཆུད་ཟོས་སུ་གཏོང་གི་མིན་ཞེས་གསུངས་པ་རེད།