བོད་ལྗོངས་ཉིན་རེའི་ཚགས་པར་ཁང་དུ་ལྷ་ས་ནས་ཟླ་1ཚེས་ 27ཉིན་གནས་ཚུལ་འབྱོར་གསལ། ཚེས་27ཉིན་གྱི་ཕྱི་དྲོ་རང་སྐྱོང་ལྗོངས་ཀྱིས་གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་བྱེད་སྒོའི་འགོ་ཁྲིད་ཚོགས་ཆུང་གི་ཚོགས་འདུ་ཐེངས་དང་པོ་ལྷ་སར་འཚོགས་པ་རེད། རང་སྐྱོང་ལྗོངས་ཏང་ཨུད་ཀྱི་རྒྱུན་ལས་ཨུ་ཡོན་དང་། སྒྲིག་ཨུད་ཀྱི་ཧྲུའུ་ཅི། གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་བྱེད་སྒོའི་འགོ་ཁྲིད་ཚོགས་ཆུང་གི་ཙུའུ་ཀྲང་བཅས་ཡིན་པའི་ཅིན་ཧྲུའུ་པོ་དང་། རང་སྐྱོང་ལྗོངས་ཏང་ཨུད་ཀྱི་རྒྱུན་ལས་ཨུ་ཡོན་དང་། རྩ་འཛུགས་པུའི་པུའུ་ཀྲང་། གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་བྱེད་སྒོའི་འགོ་ཁྲིད་ཚོགས་ཆུང་གི་ཙུའུ་ཀྲང་གཞོན་པ་བཅས་ཡིན་པའི་དབྱིན་ཏེ་མིང་ཚོགས་འདུར་ཕེབས་པ་དང་འབྲེལ་གསུང་བཤད་ཀྱང་གནང་བ་རེད། ཅིན་ཧྲུའུ་པོ་ཡིས་ས་ཁུལ་ཁག་དང་སྡེ་ཚན་ཁག་ལ་གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་བྱེད་སྒོ་སྤེལ་རྒྱུ་དེ་ཆབ་སྲིད་ཀྱི་ལས་འགན་གལ་ཆེན་ཞིག་ཏུ་བརྩིས་ནས་འགན་ནན་པོ་འཁུར་བའི་རྣམ་འགྱུར་དང་། ཏན་ཏན་ཏིག་ཏིག་གི་སྤྱོད་ཚུལ། ཏན་ཏིག་ནུས་ལྡན་གྱི་ལས་དོན་བཅས་ཀྱི་ཐོག་ནས་བྱེད་སྒོ་དེ་རྔམ་བརྗིད་ལྡན་པ་དང་། གཏིང་ཚད་ལྡན་པ། ཁྱད་ཆོས་ལྡན་པ་བཅས་སུ་སྤེལ་ཐུབ་པ་བྱེད་དགོས་པ་དང་། སྒྲིག་འཛུགས་ཞིབ་ཚགས་དང་། བཀོད་སྒྲིག་ཞིབ་ཚགས། འགན་འཁྲི་གསལ་བཟོ་བཅས་བྱེད་དགོས་ཤིང་། བློ་མཐུན་མི་རེ་ངོ་རེ་ཚང་མས་རང་འགན་རང་འཁུར་དང་རང་འགན་གཙང་སྒྲུབ་ཀྱིས་ཁག་བགོས་བྱས་པའི་ལས་འགན་ཁག་སྤུས་འབོར་ཉིས་ལྡན་གྱི་སྒོ་ནས་ལེགས་གྲུབ་བྱས་ཏེ་བྱེད་སྒོར་དངོས་ཕན་ཐོབ་པའི་འགན་ལེན་བྱེད་དགོས་ཞེས་ནན་བཤད་གནང་བ་རེད།

    དབྱིན་ཏེ་མིང་གིས་ས་ཁུལ་ཁག་དང་སྡེ་ཚན་ཁག་ལ་གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་བྱེད་སྒོའི་མཛུབ་ཁྲིད་དགོངས་པ་དང་གཞི་རྩའི་རྩ་དོན་ལག་ལེན་མཐར་ཕྱིན་དང་ནན་ཏན་ངང་ཁོང་དུ་ཡག་པོ་ཆུད་པ་བྱེད་པའི་ཁར་མཐའ་དག་དོན་དངོས་ནས་འགོ་འཛུགས་རྒྱུ་མཐའ་འཁྱོངས་ཀྱིས་ཚན་རིག་དང་མཐུན་པའི་གོང་འཕེལ་ལ་སྐུལ་འདེད་གཏོང་རྒྱུ་དང་། མཐུན་སྦྱོར་བརྟན་ལྷིང་ལ་སྐུལ་འདེད་གཏོང་རྒྱུ། མི་དམངས་མང་ཚོགས་ལ་ཞབས་འདེགས་ཞུ་རྒྱུ་བཅས་དམིགས་ཡུལ་དུ་བྱེད་པ་དང་ཆེས་རྒྱ་ཆེའི་མི་དམངས་མང་ཚོགས་ཀྱི་རྩ་བའི་ཁེ་ཕན་མངོན་འགྱུར་ཡག་པོ་དང་། སྲུང་སྐྱོང་ཡག་པོ། འཕེལ་རྒྱས་ཡག་པོ་བཅས་ཡོང་བ་བྱ་རྒྱུ་དེ་འགོ་འཛུགས་ས་དང་དོན་ལ་བབས་སར་བྱས་ནས་མང་ཚོགས་ལ་བྱ་བ་དངོས་སྒྲུབ་པ་དང་། བྱ་བ་བཟང་པོ་སྒྲུབ་པ། དཀའ་གནད་སེལ་བ་བཅས་བྱེད་དགོས་ཞེས་བསྟན་གནང་བ་རེད།