ད་ཕན་ལོ་ཤས་རིང་དཔའ་ཤོད་རྫོང་སྤྱི་དར་ཤང་ཐང་འཁོར་གྲོང་ཚོའི་ཏང་ཀྲི་པུས་ཏང་འཛུགས་སྐྱོང་ལ་དམ་འཛིན་དང་བརྟན་ལྷིང་འགན་ལེན་བྱེད་པ་དང་། འཕེལ་རྒྱས་དོན་གཉེར་དང་དམངས་འཚོར་ཕན་བཏགས་པས་བྱ་གཞག་ཁག་ཁྱོན་ཡོངས་ནས་འཕེལ་རྒྱས་བྱུང་སྟེ་གྲོང་མི་བདེ་སྡོད་ལས་བརྩོན། སྤྱི་ཚོཌ་མཐུན་སྦྱོར་བརྟན་ལྷིང་དང་དབྱར་མཚོ་རྒྱས་པ་ལྟར་གོང་འཕེལ་འགྲོ་བ་བཅས་ཀྱི་དགའ་འོས་པའི་རྣམ་པ་མངོན་ཡོད་པ་རེད།
རྩ་བ་གཅིག་ཤུགས་ཆེར་བཏང་ནས་ཏང་འཛུགས་སྐྱོང་ལ་དམ་འཛིན་ཏན་ཏིག་བྱས་ཤིང་། གྲོང་ཚོའི “ཨུ་ལྷན་གཉིས ”སྐབས་བརྗེ་བྱས་རྗེས་སྐབས་གསར་པའི་ཧྲུའུ་ཅི་བསོད་ནམས་ཚེ་སྐྱིད་ཀྱི་སྣེ་ཁྲིད་འོག་ཐང་འཁོར་གྲོང་ཚོའི་ཏང་ཀྲི་པུས་རང་ངོས་འཛུགས་སྐྱོང་ལ་དམ་འཛིན་བྱས་ནས་ཏང་གི་སྲིད་སྐྱོང་རྨང་གཞི་ཟམ་མི་ཆད་པར་བརྟན་དུ་བཏང་བ་རེད། གཅིག་ནི་ཚན་ཁག་འཛུགས་སྐྱོང་ལ་དམ་འཛིན་བྱས་ཤིང་། ཏང་ཀྲི་པུས་གྲོང་ཚོའི “ཨུ་ལྷན་གཉིས ”ཀྱི་ཚན་ཁག་ཁོངས་མི་སྒྲིག་འཛུགས་བྱས་ཏེ་སྙིང་གཏམ་ཤོད་རེས་ཚོགས་འདུ་འཚོགས་ནས་འབྲེལ་གཏུག་ལ་ཤུགས་སྣོན་དང་མཐུན་སྒྲིལ་ཟབ་ཏུ་བཏང་ཐོག “ཨུ་ལྷན་གཉིས ”ཀྱི་ཚན་ཁག་གི་དུས་བཀག་ལྟར་སློབ་སྦྱོང་བྱེད་པའི་ལམ་ལུགས་བཙུགས་པ་དང་། གཉིས་ནི་དཔུང་ཁག་འཛུགས་སྐྱོང་ལ་ཤུགས་སྣོན་བརྒྱབ་ཅིང་། ཞིང་དལ་དུས་ཚོད་སྤྱད་དེ་ཏང་ཡོན་སྒྲིག་འཛུགས་བྱས་ནས་ཏང་གི་མཛུབ་སྟོན་དགོངས་པ་རབ་དང་རིམ་པ་སློབ་སྦྱོང་ནན་ཏན་དང་ཏང་གི་ཞིང་རོགས་ཞིང་ཕན་སྲིད་ཇུས་ཁག་སློབ་སྦྱོང་བྱས་པ། གསུམ་ནི་ལམ་ལུགས་འཛུགས་སྐྱོང་ལ་ཤུགས་སྣོན་བརྒྱབ་པ། བཞི་ནི་གྲོང་ཚོ་རིམ་པའི་དམངས་གཙོ་འཛུགས་སྐྱོང་ལ་སྐུལ་འདེད་ཧུར་ཐག་བཏང་བ། ལྔ་ནི་གཡུལ་ས་འཛུགས་སྐྱོང་ལ་དམ་འཛིན་ཡག་པོ་བྱས་པ་བཅས་རེད།
འགན་འཁྲི་གཅིག་ཤུགས་ཆེར་བཏང་ནས་ནུས་ཤུགས་ཡོད་རྒུས་བརྟན་ལྷིང་སྲུང་སྐྱོང་བྱས་ཤིང་། ཐང་འཁོར་གྲོང་ཚོའི་ཏང་ཀྲི་པུའི་ཚན་ཁག་གཅིག་གི་མིས་རྟག་ཏུ་ཁྱིམ་དུད་མི་རེ་ངོ་རེར་བསྐྱོད་དེ་རྒྱལ་གཅེས་རིང་ལུགས་དང་མི་རིགས་མཐུན་སྒྲིལ་སོགས་ཀྱི་དྲིལ་བསྒྲགས་སློབ་གསོ་གཏིང་ཟབ་བརྒྱབ་པས་རྒྱ་ཆེའི་མང་ཚོགས་ཀྱིས “མཐུན་སྒྲིལ་བརྟན་ལྷིང་ནི་བདེ་སྐྱིད་དང་ཁ་ཕྲལ་ཟང་ཟིང་ནི་ཆག་སྒོ་ཡིན་པའི ”གནད་ལུགས་ཤེས་རྟོགས་ཐུབ་ནས་གྲོང་ཚོ་དེ་ཡོངས་ཀྱི་ལས་བྱེད་པ་དང་མང་ཚོགས་ཀྱི་ཁ་ཕྲལ་ལ་ངོ་རྒོལ་དང་། བརྟན་ལྷིང་སྲུང་སྐྱོང་། འཕེལ་རྒྱས་ལ་སྐུལ་གཏོང་བཅས་ཀྱི་བསམ་བློའི་རྨང་གཞི་སྔར་བས་བརྟན་དུ་སོང་ཡོད་པ་རེད།
དམིགས་ཚད་གཅིག་ཤུགས་ཆེར་བཏང་ནས་བློ་རྩེ་གཅིག་སྒྲིམ་གྱིས་འཕེལ་རྒྱས་དོན་གཉེར་བྱས་ཤིང་། གྲོང་ཚོའི་ཏང་ཀྲི་པུས་དཔལ་འབྱོར་འཕེལ་རྒྱས་གཏོང་བ་དང་མང་ཚོགས་ཀྱི་ཡོང་འབབ་མང་དུ་གཏོང་རྒྱུ་དེ་ལས་འགན་གལ་ཆེན་ཨང་དང་པོར་བརྩིས་ནས་ས་ཆ་དེ་གའི་དོན་དངོས་ལ་གཞི་ཚུགས་ཏེ་འཕེལ་རྒྱས་ཀྱི་ད་ཡོད་གནས་ཚུལ་ལ་དབྱེ་ཞིབ་ནན་ཏན་བྱས་ཐོག “ངལ་ནུས་ཕྱིར་གཏོང་ལ་བརྟེན་ནས་མང་ཚོགས་ཕྱུག་པོ་ཆགས་པའི ”ཉེ་དུས་ཀྱི་དམིགས་ཚད་དང “ཐོན་ལས་འཕེལ་རྒྱས་ལ་བརྟེན་ནས་གྲོང་ཚོ་སྟོབས་ཆེར་གཏོང་བའི ”ཕུགས་ཕན་འཆར་འགོད་བཏོན་པ་རེད། ཐང་འཁོར་གྲོང་ཚོའི་ཏང་ཀྲི་པུའུ་ཡིས་གྲོང་ཚོ་དེ་གའི་གནམ་གཤིས་བཞའ་ཚན་ཆེ་བ་དང་པད་ཁ་འདེབས་འཛུགས་བྱ་རྒྱུར་འཚམ་པའི་ལེགས་ཆ་སྤྱད་དེ་མང་ཚོགས་སྣེ་ཁྲིད་དེ་འདེབས་འཛུགས་གྲུབ་ཆ་ལེགས་སྒྲིག་བྱས་ཐོག་པད་ཁ་འདེབས་འཛུགས་བྱ་རྒྱུ་ཁྱབ་གདལ་ཤུགས་ཆེན་བཏང་བ་རེད། གྲོང་ཚོའི་ཏང་ཀྲི་པུའུ་ཡི་ཚན་ཁག་གཅིག་གི་མིས་མང་ཚོགས་སྣེ་ཁྲིད་དེ་ཁྲོམ་ར་ཧུར་ཐག་བཏོད་པ་དང་རྫོང་གྲོང་གཙོ་བོར་བྱས་པའི་མཐའ་འཁོར་གྱི་ཤང་གྲོང་དུ་ཁྱབ་འགྱེད་ཐུབ་པའི་ཕྱིར་ཚོང་དྲ་སྦྲེལ་བཙུགས་པས་ཐོན་སྤྲོད་ཚོང་གསུམ་གཞི་གཅིག་ཏུ་གྱུར་བའི་པད་ཁའི་ཐོན་ལས་འབྲེལ་ཐག་རིམ་བཞིན་ཆགས་ཐོག་གྲོང་མིར་ཕྱུག་འགྱུར་གྱི་ལམ་བུ་ཞིག་བཏིང་བ་རེད།