ནག་ཆུ་ས་ཁུལ་གྱི་ལས་བྲལ་དང་ལས་འཁྱུར་ངལ་གསོ་རྒྱག་མཁན་མི་སྣའི་ཏང་ཀྲི་པུའུ་12པ་ནི་ལྷ་ས་གྲོང་ཁྱེར་གྱི་ནུབ་ངོས་བདེ་སྡོད་སྒོ་རའི་ནང་ཡོད་པ་དེར་ཏང་ཡོན་55ཡོད་པ་དང་གཤམ་འོག་ཏུ་ཏང་རྩ་འཛུགས་ཀྱི་ཚོགས་ཆུང་6ཡོད། ཉེ་བའི་ལོ་ཤས་ནང་ལྷ་སར་བཅའ་སྡོད་ནག་ཆུ་ས་ཁུལ་གྱི་ལས་བྲལ་དང་ལས་འཁྱུར་ངལ་གསོ་རྒྱག་མཁན་མི་སྣའི་ཞབས་ཞུའི་ས་ཚུགས་ཀྱི་ཏང་སྤྱི་ཁྱབ་ཀྲི་པུའི་སྣེ་ཁྲིད་འོག་ཀྲི་པུའུ་དེས་ལས་བྲལ་དང་ལས་འཁྱུར་ངལ་གསོ་རྒྱག་མཁན་ཏང་ཡོན་ཚང་མ་སྒྲིག་འཛུགས་བྱས་ཏེ་ཏང་གི་ལམ་ཕྱོགས་དང་བྱེད་ཕྱོགས་སྲིད་ཇུས་སློབ་སྦྱོང་ནན་ཏན་བྱེད་པ་དང་ཏང་ཡོན་གྱི་གདོང་ལེན་དཔེ་བཟང་གི་ནུས་པ་འདོན་སྤེལ་བྱ་རྒྱུར་སྣང་ཆེན་བྱས་ཏེ་ཁ་ཕྲལ་ལ་ངོ་རྒོལ་བྱེད་པའི་འཐབ་རྩོད་ནང་ཀྲི་པུའུ་དེས་དམག་འཐབ་མཁར་རྫོང་གི་ནུས་པ་འདོན་སྤེལ་གང་ལེགས་བྱས་ནས་བྱས་རྗེས་མངོན་གསལ་དོད་པོ་བཞག་ཡོད་པར་བརྟེན་གོང་རིམ་གྱིས་སྔོན་ཐོན་གཞི་རིམ་ཏང་རྩ་འཛུགས་ལ་བདམས་ཡོད།

    རྒྱུན་དུ་སློབ་སྦྱོང་ལ་ལྷོད་གཡེང་མི་གཏོང་བ།

    2001ལོར་ཏང་ཡོན་རྒན་གྲས་འགའ་རེ་ལས་གནས་ལས་བབས་རྗེས་ལྷ་ས་གྲོང་ཁྱེར་གྱི་ནུབ་ངོས་བདེ་སྡོད་སྒོ་རའི་ནང་གཅིག་སྡུད་དུ་བཀོད་སྒྲིག་བྱུང་ཡོད། ཏང་ཡོན་རྒན་གྲས་ཚོ་ལས་གནས་ལས་བྲལ་ཡང་སྙིང་སྟོབས་མི་ཉམས་པར་མུ་མཐུད་ནུས་པ་འདོན་སྤེལ་བྱ་ཆེད་ཏང་ཀྲི་པུའུ་12པ་དེ་བཙུགས། ཀྲི་པུའུ་ཡི་ཁོངས་མི་5ཡིས་ཧྲུའུ་ཅི་ཀརྨ་དགེ་ལེགས་དང་ཧྲུའུ་ཅི་གཞོན་པ་མར་ཆུན་གྱི་སྣེ་ཁྲིད་འོག་རྩ་འཛུགས་ཀྱི་བྱེད་སྒོ་ཆད་མྱོང་མེད་པ་དང་ཟླ་རེའི་ཚེས་15འཆར་རིམ་དུ་སློབ་སྦྱོང་བྱེད་ཀྱི་ཡོད། ཏང་ཡོན་རྒན་གྲས་ཀྱིས་སློབ་སྦྱོང་ཧུར་ཐག་བྱས་ནས་རང་ཉིད་ཀྱི་ཤེས་བྱ་ཟམ་མི་ཆད་པར་ཕུན་སུམ་ཚོགས་སུ་གཏོང་བ་དང་ཏང་གི་ཚོགས་ཆེན་བཅུ་བདུན་པའི་དགོངས་དོན་དང་། གཟི་བརྗིད་བརྒྱད་དང་ཞེ་ཁྲེལ་བརྒྱད་ཀྱི་སློབ་གསོ། ཏཱ་ལར་ཐེར་འདོན་དགག་རྒྱག་བྱེད་པ་བཅས་ཀྱིས་རྩོམ་ཡིག་དང་དེ་བཞིན་ལྷ་སའི “3·14”དོན་རྐྱེན་ཐོན་རྗེས་དོན་རྐྱེན་དེ་ཐག་གཅོད་བྱ་རྒྱུའི་སྐོར་གྱི་ལྗོངས་ཏང་ཨུད་ཀྱི་གལ་ཆེའི་ཡིག་ཆ་དང་སློབ་སྦྱོང་གི་གལ་ཆེའི་ཡིག་ཆ་གཞན་དག་རྣམས་ཀྲི་པུའུ་ཡིས་ཏང་ཡོན་ཚང་མར་སྤྲད་པ་མ་ཟད་ཏང་གི་གྲོན་དངུལ་སྤྱད་དེ་ཏང་ཡོན་ཚང་མར་སྒྲ་བསྡུ་འཕྲུལ་འཁོར་ཆུང་གྲས་རེ་ཉོས་ཡོད། སློབ་སྦྱོང་བྱེད་རིང་ཀྲི་པུའུ་ཡི་ཁོངས་མིས་སློབ་སྦྱོང་གི་སྣེ་ཁྲིད་པ་དང་སྣེ་ཁྲིད་ནས་གཏམ་བཤད་ཀྱི་བྱེད་ཅིང་། ལྷ་སའི “3·14” དོན་རྐྱེན་ཐོན་རྗེས་ཀྲི་པུའུ་ཡིས་སློབ་སྦྱོང་བྱ་ཐེངས་མང་དུ་བཏང་ཡོད།

    བརྗོད་བྱ་གཙོ་བོའི་སློབ་གསོར་ཕན་འབྲས་དངོས་ཐོན་རྒྱུར་མཐོང་ཆེན་བྱེད་པ།

    “ཁ་ཕྲལ་ལ་ངོ་རྒོལ་དང་། བརྟན་ལྷིང་སྲུང་སྐྱོང་། འཕེལ་རྒྱས་ལ་སྐུལ་འདེད ”བཅས་ཀྱི་བརྗོད་བྱ་གཙོ་བོའི་སློབ་གསོའི་བྱེད་སྒོ་སྤེལ་རིང་ཏང་ཀྲི་པུའུ་དེས་ཕན་འབྲས་དངོས་ཐོབ་རྒྱུར་མཐོང་ཆེན་བྱས་ནས་ཏང་ཡོན་སྒྲིག་འཛུགས་ཀྱིས་ཏཱ་ལའི་སྡིག་ཉེས་ལ་ཐེར་འདོན་དགག་རྒྱག་བྱས། ཏང་ཡོན་ཚོས་རང་སོ་སོའི་འཚར་ལོངས་ཀྱི་དོན་དངོས་ལ་གཞིགས་ཏེ་ཐེར་འདོན་དགག་རྒྱག་གི་རྩོམ་ཡིག་བྲིས་པ་དང་ཀྲི་པུའུ་ཡིས་ད་དུང་ཏང་ཡོན་སྒྲིག་འཛུགས་ཀྱིས་ལྷ་སའི་ཞོལ་གྲོང་དང་བོད་ལྗོངས་རྟེན་རྫས་བཤམས་མཛོད་ཁང་དུ་ལྟ་སྐོར་བྱས་ནས་སྤྱི་ཚོགས་གསར་ཪྙིང་བསྡུར་བའི་སློབ་གསོ་སྤེལ་ཡོད། རྒྱ་ཆེའི་ཏང་ཡོན་ཚོས་ང་ཚོའི་བདེ་སྐྱིད་ཀྱི་འཚོ་བ་ནི་ཀྲུང་གོ་གུང་ཁྲན་ཏང་གིས་གནང་བ་ཞིག་ཡིན་པས་གུང་ཁྲན་ཏང་མེད་ན་བོད་གསར་པ་མེད་ལ་རང་ཉིད་ཀྱི་ད་ཆའང་མེད་པ་དང་བོད་མི་དམངས་རྣམས་བདེ་སྐྱིད་ཀྱི་འཚོ་བ་སྐྱེལ་རྒྱུ་ཡོད་པ་དེ་ཏཱ་ལའི་རུ་ཚོགས་ཀྱིས་མཐོང་འདོད་མི་བྱེད་པ་ཞིག་ཡིན་པར་བརྟེན་ཁོ་པ་ཚོས་ཇེ་ངན་ཇེ་སྡུག་གི་སྒོ་ནས་གཏོར་བཤིག་གི་བྱེད་སྤྱོད་སྤེལ་གྱི་ཡོད། ཏང་ཡོན་ཞིག་གི་ངོས་ནས་ང་ཚོས་ངེས་པར་དུ་དར་ཆ་གསལ་སྟོན་གྱིས་ཁ་ཕྲལ་ལ་ངོ་རྒོལ་དང་བློ་གཅིག་སེམས་གཅིག་གིས་ཏང་གི་རྗེས་སུ་འབྲང་རྒྱུ་ཡིན་ཞེས་མགྲིན་གཅིག་ཏུ་བཤད།

    མཐུན་སྒྲིལ་བརྟན་ལྷིང་གི་ཁོར་ཡུག་བཟང་པོ་ཞིག་ཡོད་པ།

    ཏང་ཡོན་དབར་དང་ཀྲི་པུའུ་ནང་ཁུལ་དུ་ལས་ཀ་ཡོད་ན་སྔོན་ལ་ཕན་ཚུན་བཤད་ནས་ཐུན་མོང་གི་ངོས་འཛིན་བྱུང་བ་དང་བསམ་བློ་གཅིག་གྱུར་བྱུང་རྗེས་ཏང་ཡོན་གྱི་ཁྲོད་དུ་སྐུལ་སློང་དང་བཀོད་སྒྲིག་བྱེད་ཅིང་། བདེ་སྡོད་སྒོ་རའི་ནང་དུ་གྲོང་མི་དུད་ཚང་500ལྷག་ཙམ་ཡོད་པ་རྣམས་ལྗོངས་ནང་ཁུལ་གྱིས་ཁུལ་ཁག་ནས་ཡོང་བ་ཞིག་ཡིན། མཐུན་སྒྲིལ་མཛའ་གྲོགས་དང་མཐུན་སྦྱོར་ལྡན་པའི་སྒོ་ར་གཏོད་ཆེད་བདེ་སྡོད་སྒོ་ར་དེའི་གཞོགས་འདེགས་འོག་ཏང་ཀྲི་པུའུ་12པའི་ཏང་ཡོན་དང་སྡེ་ཁུལ་གཞན་དག་གི་ཏང་ཡོན་ཚོས་རང་འགུལ་ངང་དངུལ་བསྡུས་ནས་སྒྲ་ཕབ་འཕྲུལ་འཁོར་སོགས་སྒྲིག་ཆས་ཉོས་ཏེ་ཡུལ་མི་སྒྲིག་འཛུགས་ཀྱིས་སྒོར་གཞས་རྒྱག་པ་དང་ལུས་སྦྱོང་བྲོ་གར་གཞན་དག་འཁྲབ་ནས་མཐུན་སྦྱོར་ལྡན་པའི་ཁོར་ཡུག་བཟང་པོ་ཞིག་གཏོད་པར་འབྲེལ་ཡོད་ཕྱོགས་ཀྱི་འགོ་ཁྲིད་ཀྱི་བསྔགས་བརྗོད་ཐོབ་ཡོད།

    གཅེས་སེམས་ཕུལ་ནས་སྔོན་ཐོན་བརྩོན་པ།

    ལྷ་སའི “3.14”དོན་རྐྱེན་དང་དབུན་ཁྲོན་ས་ཡོམ་གྱི་གནས་ཚུལ་ཐོན་རྗེས་ཏང་ཡོན་ཚོས་གྱོང་གུན་ཐེབས་པའི་སྤུན་ཟླར་རང་འགུལ་ངང་དངུལ་ཞལ་འདེབས་ཕུལ་ཡོད་པ་རེད། བསྡོམས་རྩིས་ལྟར་ན་2002ལོ་ནས་ད་ལྟའི་བར་ཏང་ཀྲི་པུའུ་དེའི་ཏང་ཡོན་གྱིས་སྔ་རྗེས་སུ་ཞལ་འདེབས་ཐེངས་7ཕུལ་བའི་དངུལ་འབོར་ཁྱོན་སྒོར་50870ཟིན་པ་དང་། དམིགས་བསལ་ཏང་གི་གྲོན་དངུལ་སྒོར་44250ཕུལ་ཡོད། ཟླ་5ཚེས་16གི་དངུལ་ཞལ་འདེབས་ཕུལ་བའི་ཉིན་དེར་ཆར་པ་ཆེན་པོ་བབས་ཀྱང་ཚང་མས་ཞལ་འདེབས་ཕུལ་ནས་བརྩེ་སེམས་མཚོན་པར་བྱས། ཀྲི་པུའུ་ཧྲུའུ་ཅི་ཀརྨ་དགེ་ལེགས་ནང་མི་གཉིས་ཀྱིས་ཕུལ་ཐེངས་གཅིག་ལ་སྒོར་ཁྲི་གཅིག་ཞལ་འདེབས་ཕུལ་ཡོད་པ་དང་ཨ་མདོ་རྫོང་མི་དམངས་འཐུས་ཚོགས་ཀྱི་ཀྲུའུ་རེན་ཟུར་པ་ནོར་གྲགས་ཀྱིས་ཀྱང་སྒོར་5000ཞལ་འདེབས་ཕུལ་ཡོད། ཏང་ཡོན་དེ་དག་གིས་བཤད་པ་ལྟར་ང་ཚོའི་ལོ་ན་དང་གཟུགས་པོའི་གནས་ཚུལ་གྱི་རྐྱེན་པས་ལས་ཐོག་ནས་བྲལ་ཟིན་པར་བརྟེན་ཏང་དང་རྒྱལ་ཁབ་ཀྱི་ཆེད་དུ་ལས་ཀ་ཆེན་པོ་བསྒྲུབ་ཐབས་བྲལ་ལ་གེགས་ཁུལ་གྱི་མི་དམངས་དང་དཔུང་པ་མཉམ་གཤིབ་བྱས་ནས་དམག་འཐབ་བྱེད་ཐབས་བྲལ་ན་ཡང་། ང་ཚོའི་སེམས་གེགས་ཁུལ་མི་དམངས་དང་ལྷན་དུ་གནས་ཡོད་པས་ང་ཚོས་ཞལ་འདེབས་ཕྲན་བུ་ཕུལ་བའི་ཐོག་ནས་གེགས་ཁུལ་མི་དམངས་ལ་རོགས་རམ་བྱེད་དགོས་ངེས་ཡིན། དེ་ནི་གུང་ཁྲན་ཏང་ཡོན་རྒན་གྲས་ཚོའི་སེམས་གཏིང་གི་སྐད་ཆ་ཡིན།