སྣེ་གདོང་རྫོང་བྱེ་ས་གྲོང་ལྷན་ནི་ཧ་ཅང་ཕྱུག་པོ་ཡོད་པ་སྔ་ས་ནས་ཐོས་མྱོང་། གང་ཞིག་གིས་བྱེ་ས་གྲོང་ལྷན་གྱི་དཔལ་འབྱོར་མགྱོགས་མྱུར་འཕེལ་རྒྱས་འགྲོ་རྒྱུར་སྐུལ་མ་ཐེབས་པ་ཡིན་ནམ་སྙམ་པའི་ངང་གསར་འགོད་པ་བྱེ་ས་གྲོང་ལྷན་དུ་བསྐྱོད།

    བྱེ་ས་གྲོང་ལྷན་ལ་སླེབས་མ་ཐག་གྲོང་ལྷན་གྱི་ཀྲུའུ་རེན་ངག་དབང་སྐལ་ལྡན་གྱིས་མང་ཚོགས་ལ་དངུལ་སྤྲོད་བཞིན་ཡོད་པ་མཐོང་བྱུང་། དངུལ་བླངས་ཟིན་པའི་ཚོགས་ཆུང་གཉིས་པའི་གྲོང་མི་ཉི་མ་ཚེ་རིང་གིས་གསར་འགོད་པར “ད་ཆ་ང་ཚོའི་ས་ཞིང་ནོར་བུ་ལྟ་བུར་འགྱུར་ནས་ད་ལོ་ང་ལ་ས་ཞིང་ཤོར་བའི་ཁ་གསབ་དངུལ་སྒོར་9000 ལྷག་ཙམ་རག་བྱུང་བས་དངུལ་དེ་དག་གིས་སླར་ཡང་ངའི་ཚོང་རྒྱ་ཆེར་གཏོང་ཐུབ ”ཅེས་དགའ་ཚོར་ཆེན་པོའི་ངང་བཤད། ངག་དབང་སྐལ་ལྡན་གྱིས “ང་ཚོའི་ཨུ་ལྷན་ལ་ས་ཞིང་ཤོར་བའི་མང་ཚོགས་མང་པོ་ཡོད་པས་ས་ཞིང་ཤོར་བའི་མང་ཚོགས་ཀྱི་ཁེ་ཕན་འགན་ལེན་བྱ་ཆེད་མང་ཚོགས་ཀྱི་མོས་མཐུན་བྱུང་རྗེས་ང་ཚོས་ས་ཞིང་ཤོར་བའི་མང་ཚོགས་ཀྱི་འཚོ་རྟེན་དངུལ་མ་རྐང་ནང་ཞུགས་པའི་རྣམ་པའི་ཐོག་ནས་མཉམ་སྡེབ་དཔལ་འབྱོར་ནང་འཇོག་གི་ཡོད ”ཅེས་བཤད།

    འཕེལ་རྒྱས་ཀྱི་འཆར་འགོད་ལ་གཞིགས་ནས་རྩེད་ཐང་གྲོང་རྡལ་གྱིས་བྱེ་ས་གྲོང་ལྷན་གྱི་ཁོངས་གཏོགས་སུ་ཚལ་ཁྲོམ་ཆེན་པོ་ཞིག་བསྐྲུན་རྒྱུ་དང་སྦྲགས། ལྷོ་ཁ་ས་ཁུལ་འཕེལ་སྒྱུར་ཨུ་ཡོན་ལྷན་ཁང་གིས་མ་འཇོག་བྱས་ནས་འཛུགས་སྐྲུན་བྱ་རྒྱུའི་གཏན་འཁེལ་རགས་ཙམ་ཟིན་ཡོད། བྱེ་ས་གྲོང་ལྷན་ཏང་ཀྲི་པུའི་ཚན་ཁག་གིས “ང་ཚོ་རང་ཉིད་ཀྱི་མ་དངུལ་སྤྱད་དེ་འཛུགས་སྐྲུན་བྱས་ནས་གྲོང་མིར་ཡུན་རིང་ཕན་པ་ཐོབ་པ་མི་བྱེད་པ་ཅི་ཡིན ”སྙམ་པའི་གནད་དོན་འཕྲད་སྐབས་གྲོང་མིར་བསམ་བློའི་སློབ་གསོ་མང་པོ་བཏང་བ་དང་གྲོང་མིའི་མོས་མཐུན་བྱུང་རྗེས་ 2003 ལོའི་ཟླ་11 པར་བྱེ་ས་གྲོང་ལྷན་གྱིས་མ་དངུལ་སྒོར་ཁྲི་1338.6 （དེའི་ནང་དངུལ་བུན་སྒོར་ཁྲི་500ཚུད་ཡོད ）བཏང་ནས་བསྐྲུན་པའི་རྩེད་ཐང་གྲོང་རྡལ་ནུབ་ཁུལ་གྱི་ཚལ་ཁྲོམ་བསྐྲུན་ཟིན་ནས་བེད་སྤྱོད་བྱེད་འགོ་ཚུགས་ཡོད།

    ལོ་དེ་རང་དུ་གྲོང་ལྷན་ལ་ཚལ་ཁྲོམ་ནས་ཡོང་འབབ་སྒོར་ཁྲི་40 བྱུང་བ་དང་2007 ལོར་སླེབས་སྐབས་ཚལ་ཁྲོམ་ནས་ཁེ་བཟང་སྒོར་ཁྲི་92 བྱུང་སྟེ་བྱེ་ས་གྲོང་ལྷན་གྱི་ཡོང་འབབ་ཡོང་ཁུངས་གཙོ་བོར་འགྱུར་བ་དང་སྦྲགས་གྲོང་ལྷན་གྱི་ཞིང་འབྲོག་པ་8 ཀྱི་ལས་ཞུགས་གནད་དོན་ཀྱང་ཐག་གཅོད་ཐུབ་ཡོད།

    ཕན་འབྲས་ཐོབ་པའི་བྱེ་ས་གྲོང་ལྷན་ཏང་ཀྲི་པུའི་ཚན་ཁག་གིས་མང་ཚོགས་སྣེ་འཁྲིད་དེ་ཕྱུག་པོའི་ལམ་དུ་བསྐྱོད་པའི་ཡིད་ཆེས་སྔར་བས་ཆེ་རུ་ཕྱིན་ནས་ཁོང་ཚོས་གྲོང་འདབས་འབྲེལ་གནས་དང་ལྷོ་ཁ་ས་ཁུལ་གྱིས་གྲོང་ཁྱེར་དང་གྲོང་རྡལ་ཅན་འཛུགས་སྐྲུན་བྱེད་པའི་གོ་སྐབས་དམ་འཛིན་ནན་པོ་བྱས་ཏེ་སྔ་རྗེས་སུ་མ་དངུལ་སྒོར་ཁྲི་ 814.4 བཏང་ནས་བྱེ་སའི་ཚོང་ལས་ཁྲོམ་ལམ་བསྐྲུན་པས་ལོ་ལྟར་ཕན་པ་སྒོར་ཁྲི་ 57བྱུང་བ་དང་ཚོང་འགུག་མ་འདྲེན་བྱས་ནས་ཁེ་ལས་ 4བཙུགས་པར་ཁྱོན་མ་འཇོག་སྒོར་ཁྲི་4874.96 བྱས་པའི་ནང་གྲོང་ལྷན་གྱིས་མ་འཇོག་སྒོར་ཁྲི་2904.96 བྱས་པ་དང་ཚོང་འགུག་མ་འདྲེན་སྒོར་ཁྲི་1970 བྱས་པ་དང་ཁེ་ལས་4 པོ་དེས་གྲོང་ལྷན་ལ་ལོར་ཕན་པ་སྒོར་ཁྲི་ 147 གཏོད་པ་དང་སྦྲགས་ལས་ཞུགས་ཀྱི་ལས་གནས་168མཁོ་འདོན་བྱས་ཡོད།