བོད་ལྗོངས་ཉིན་རེའི་ཚགས་པར་ཁང་དུ་གནས་ཚུལ་འབྱོར་གསལ། འདི་ལོར་གོང་དཀར་རྫོང་ཨུད་དང་རྫོང་སྲིད་གཞུང་གིས་དམངས་འཚོའི་གནད་དོན་ཐག་གཅོད་བྱ་རྒྱུ་དེ་རྣམ་ཀུན་ལས་ཀའི་གཙོ་གནད་དུ་བཞག་སྟེ་ཕྱོགས་ཡོངས་ནས་སྤྱི་ཚོགས་གོང་འཕེལ་ཡོང་བར་སྐུལ་སྤེལ་བཏང་བ་རེད།

    གཅིག་ནས་དབུལ་སྐྱོར་རོགས་རམ་ལ་བརྟེན་ནས་ཏན་ཏིག་ངང་མང་ཚོགས་ཀྱི་དཀའ་ངལ་སེལ་བ་སྟེ། རྫོང་དེ་ཡོངས་ཀྱི་འགན་ལེན་ལྔ་དང་མ་མཐའི་འཚོ་བ་འགན་སྲུང་སོགས་ཀྱི་ཐད་མིག་སྔའི་བར་མ་མཐའི་གྲོན་དངུལ་སྒོར་ཁྲི་79དང་། ལོ་ན་མཐོ་བའི་རྒན་རྒོན་ལ་བདེ་ཐང་ཁ་གསབ་རོགས་དངུལ་སྒོར་ཁྲི་7.84སྤྲད་པ། གཟིགས་སྐྱོང་བྱ་ཡུལ་དང་དམག་དཔུང་ནས་ཕྱིར་ལོག་བྱས་པའི་དཀའ་ངལ་ཡོད་པའི་མི་སྣར་རོགས་དངུལ་སྒོར་ཁྲི་1.5ཙམ་སྤྲད་པ། གྲོང་གསེབ་དང་གྲོང་ཁྱེར་སོགས་ཀྱི་སྨན་བཅོས་རོགས་དངུལ་སྒོར་ཁྲི་12དོན་འཁྱོལ་བྱས་པ་དང་། དཀའ་ངལ་ཡོད་པའི་ལས་བཟོ་མི་གྲངས་30དང་ཐེམ་དུད་3ལ་འཚམས་འདྲིའི་དངུལ་སྒོར་ཁྲི་1.9ཙམ་སྤྲད་པ་རེད། གཉིས་ནས་ཞིང་འབྲོག་ཁུལ་གྱི་སློབ་ཁྲིད་ཆ་རྐྱེན་ལེགས་བཅོས་བྱས་ཤིང་། འདི་ལོ་རྫོང་སྲིད་གཞུང་གིས་མ་དངུལ་སྒོར་ཁྲི་120བཏང་སྟེ་འཕྲེང་སྒོ་ཤང་དང་སྟོང་ར་ཤང་གི་སློབ་གྲྭའི་ཟ་ཁང་དང་། ཉལ་ཁང་། སློབ་ཁང་སོགས་འཛུགས་སྐྲུན་བྱས་པ་མ་ཟད། ད་དུང་རྫོང་ནོར་སྲིད་ནས་ཆེད་དངུལ་སྒོར་ཁྲི་15བཏང་སྟེ་རྫོང་དེ་ཁོངས་ནས་ཡིན་པའི་དཀའ་ངལ་ཡོད་པའི་སློབ་ཆེན་སློབ་མར་རོགས་སྐྱོར་བྱས་པ་རེད། གསུམ་ནས་ཞིང་འབྲོག་པའི་རྩལ་ནུས་སྦྱོང་བརྡར་དང་ངལ་ནུས་ཕྱིར་གཏོང་ལ་ཤུགས་སྣོན་བརྒྱབ་པ་སྟེ། འདི་ལོ་རྫོང་དེའི་ངལ་རྩོལ་དང་ཞིང་འབྲོག བདེ་སྡོད། འཛུགས་སྐྲུན་སོགས་ཚན་པས་ཞིང་འབྲོག་པར་འགྲོ་ལམ་བཟོ་རོགས་དང་། ཡུལ་མིའི་སྡོད་ཁང་སྒྱུར་བཅོས། རྫབ་རླངས་བཟོ་སྐྲུན། མི་ཕྱུགས་གཉིས་ཀྱི་འཐུང་ཆུ་སོགས་ཐག་གཅོད་བྱེད་པའི་རྩལ་ནུས་སྦྱོང་བརྡར་གྱི་བྱེད་སྒོ་གཉེར་བར་ཞིང་འབྲོག་པ་མི་གྲངས་910ཙམ་ལ་ཕན་པ་ཐོབ་པ། ངལ་ནུས་ཕྱིར་གཏོང་ཐད་འདི་ལོ་རྫོང་དེས་ཞིང་འབྲོག་པ་མི་གྲངས་331ཉིང་ཁྲི་ས་ཁུལ་དང་ནག་ཆུ་ས་ཁུལ་དུ་ཡུལ་མིའི་སྡོད་ཁང་ཨར་སྐྲུན་བྱེད་པར་བཏང་བ་རེད། མིག་སྔའི་བར་རྫོང་དེར་ངལ་ནུས་ཕྱིར་གཏོང་མི་གྲངས་2100དང་འབབ་འཕར་ཡོང་འབབ་སྒོར་ཁྲི་890མངོན་འགྱུར་བྱུང་བ། བཞི་ནས་རྫོང་ནང་ཁུལ་གྱི་ངལ་ནུས་བཀོད་སྒྲིག་ལ་ཤུགས་སྣོན་བརྒྱབ་པ་སྟེ། འདི་ལོར་གོང་དཀར་རྫོང་གིས་རྫོང་ནང་ཁུལ་གྱི་ཞིང་འབྲོག་པའི་ཨར་ལས་རུ་ཁག་གི་ནུས་པ་འདོན་སྤེལ་གང་ལེགས་བྱས་པ་དང། རྫོང་འབྲེལ་ཡོད་ཚན་པས་རྣམ་གྲངས་ལག་བསྟར་བྱེད་པའི་ནང་ཡུལ་དེའི་ཨར་ལས་རུ་ཁག་དང་ཞིང་འབྲོག་པའི་ལས་མི་བེད་སྤྱོད་བྱེད་པའི་ལས་དོན་ལ་དམ་འཛིན་བྱས་ཤིང་། རྫོང་མཁར་འཛུགས་སྐྲུན་དང་གནམ་གྲུ་བབས་ཐང་གི་གད་སྙིགས་ར་བ་འཛུགས་སྐྲུན་སོགས་ཀྱི་རྣམ་གྲངས་15ཙམ་ནང་རྫོང་ནང་ཁུལ་གྱི་ངལ་ནུས་མི་གྲངས་1400ཙམ་བཀོད་སྒྲིག་བྱས་པར་མི་རེར་ཆ་སྙོམས་ཡོང་འབབ་སྒོར་3642ཟིན་ཡོད་པ་རེད།