སྔ་ས་ནས་སྣེ་གདོང་རྫོང་བྱ་ས་ཡུལ་མི་ཨུ་ལྷན་ཧ་ཅང་ཕྱུག་པོ་ཡོད་པ་གོ་ཐོས་བྱུང་། 2007ལོའི་བསྡོམས་རྩིས་གཞི་གྲངས་ནས་མངོན་པར་གཞིགས་ན། ཡུལ་མི་ཨུ་ལྷན་གྱི་ཡོང་འབབ་ཁེ་གཙང་སྒོར་ཁྲི་351.1དང་མི་རེའི་ཆ་སྙོམས་ཡོང་འབབ་སྒོར་5990ལོན་པ་དེའི་ནང་དངུལ་སྨར་ཡོང་འབབ་སྒོར་4732ཟིན་གྱི་ཡོད། བྱ་ས་ཨུ་ལྷན་གྱི་དཔལ་འབྱོར་མགྱོགས་མྱུར་ངང་འཕེལ་རྒྱས་དེ་འདྲ་འགྲོ་དོན་ཅི་ཡིན་ནམ། གནད་དོན་དེར་དམིགས་ཏེ་གསར་འགོད་པ་བྱ་ས་ཨུ་ལྷན་དུ་བཅར་འདྲི་བྱེད་པར་སྐྱོད་པ་ཡིན།

    བྱ་ས་ཨུ་ལྷན་དུ་སྐྱོད་སྐབས་ཨུ་ལྷན་གྱི་ཀྲུའུ་རེན་ངག་དབང་སྐལ་ལྡན་གྱིས་མང་ཚོགས་ལ་དངུལ་སྨར་སྤྲོད་བཞིན་ཡོད་པ་མཐོང་བྱུང་། ལག་ཏུ་དངུལ་བྱུང་བའི་ཚོགས་ཆུང་གཉིས་པའི་གྲོང་མི་ཉི་མ་ཚེ་རིང་གིས་གསར་འགོད་པར་“ད་ཆ་ང་ཚོའི་ས་ཞིང་ནོར་བུ་ལྟ་བུར་འགྱུར་བ་དང་འདི་ལོར་ང་ལ་སླར་ཡང་ས་ཆ་ཤོར་བའི་རོགས་དངུལ་སྒོར་9000ལྷག་ཙམ་ཐོབ་བྱུང་། ངས་དངུལ་དེ་དག་སྤྱད་ནས་ངའི་ཚོང་རྒྱ་ཆེ་རུ་གཏོང་གི་ཡིན ”ཞེས་ཤོད་ཀྱི་འདུག ངག་དབང་སྐལ་ལྡན་གྱིས “ང་ཚོ་ཡུལ་མི་ཨུ་ལྷན་དུ་ས་ཆ་ཤོར་བའི་མང་ཚོགས་མང་ཙམ་ཡོད་པ་དང་ས་ཆ་ཤོར་བའི་མང་ཚོགས་ཀྱི་ཁེ་ཕན་འགན་ལེན་བྱེད་ཆེད་མང་ཚོགས་ཀྱི་མོས་མཐུན་ཐོབ་རྗེས་ང་ཚོས་ས་ཆ་ཤོར་བའི་མང་ཚོགས་ཀྱི་བཀོད་སྒྲིག་འགྲོ་གྲོན་དེ་མ་རྐང་ནང་ཞུགས་པའི་ཐོག་ནས་མཉམ་སྡེབ་དཔལ་འབྱོར་ནང་བཞག་ཡོད ”ཅེས་ཤོད་ཀྱི་འདུག

    གྲོང་རྡལ་གྱི་འཛུགས་སྐྲུན་རྒྱུན་ཆད་མེད་པར་ཆེ་རུ་འགྲོ་བ་དང་ཆབས་ཅིག་བྱ་ས་ཨུ་ལྷན་ལ་ས་ཆ་བསྡུ་བའི་ནང་ནས་ཡོང་འབབ་མང་པོ་བྱུང་ཡོད། འོན་ཏེ་ཡུལ་མི་ཨུ་ལྷན་དུ་སྐར་དམར་འཛུགས་སྐྲུན་ཀུང་སི་ཕུད་དཔལ་འབྱོར་གྱི་གདོས་བཅས་གང་ཡང་མེད་པ་དེ་བྱ་ས་ཨུ་ལྷན་གྱི་མདུན་དུ་འཕྲད་པའི་དཀའ་གནད་ཅིག་ཡིན།

    འཕེལ་རྒྱས་ཀྱི་འཆར་འགོད་ལྟར་རྩེད་ཐང་གྲོང་རྡལ་གྱིས་བྱ་ས་ཨུ་ལྷན་ཁོངས་གཏོགས་ཁུལ་དུ་ཞིང་ཞོར་ཐོན་རྫས་ཁྲོམ་ར་ཆེན་པོ་ཞིག་བརྒྱབ་པ་དང་འབྲེལ་ལྷོ་ཁ་ས་ཁུལ་འཕེལ་སྒྱུར་ཨུ་ལྷན་གྱིས་མ་དངུལ་བཏང་ནས་བསྐྲུན་རྒྱུའི་གཏན་འཁེལ་རགས་ཙམ་བྱས་ཤིང་། བྱ་ས་ཨུ་ལྷན་གྱི་ཏང་ཀྲི་པུའི་འགོ་ཁྲིད་ཚན་ཁག་གིས་ཐོས་སྐབས་ཁོང་ཚོས “ང་ཚོ་སོ་སོའི་མ་དངུལ་བཏང་ནས་སྐྲུན་པ་དང་དེ་རྗེས་ཡུལ་མིར་ཕན་འབྲས་ཐོབ་པ་མི་བྱེད་པ་ཅི་ཡིན་ནམ ”ཞེས་ཤོད་ཀྱི་ཡོད། ཡུལ་མིར་བསམ་བློའི་ལས་དོན་འབོར་ཆེན་སྒྲུབ་པ་དང་ཡུལ་མིའི་མོས་མཐུན་ཐོབ་རྗེས་2003ལོའི་ཟླ་11པར་བྱ་ས་ཨུ་ལྷན་གྱིས་མ་དངུལ་སྒོར་ཁྲི་1338.6（དེའི་ནང་དངུལ་བུན་སྒོར་ཁྲི་500ཡིན་པ ）བཏང་ནས་སྐྲུན་པའི་རྩེད་ཐང་གྲོང་རྡལ་གྱི་ནུབ་ཁུལ་ཞིང་ཞོར་ཐོན་རྫས་ཁྲོམ་ར་སྐྲུན་པ་དང་འབྲེལ་བེད་སྤྱོད་གཏོང་འགོའང་ཚུགས།

    ལོ་དེར་ཡུལ་མི་ཨུ་ལྷན་ལ་ཞིང་ཞོར་ཁྲོམ་ར་ནས་ཡོང་འབབ་སྒོར་ཁྲི་40བྱུང་བ་དང་། 2007ལོར་ཞིང་ཞོར་ཁྲོམ་ར་ནས་ཡོང་འབབ་སྒོར་ཁྲི་92བྱུང་སྟེ་བྱ་ས་ཨུ་ལྷན་གྱི་ཡོང་འབབ་ཡོང་ཁུངས་གཙོ་བོ་ཞིག་ཏུ་འགྱུར་བ་དང་སྦྲགས་ཡུལ་མི་ཨུ་ལྷན་གྱི་ཞིང་འབྲོག་མང་ཚོགས་8ཀྱི་ལས་ཞུགས་གནད་དོན་ཡང་ཐག་གཅོད་བྱུང་ཡོད།

    ཕན་འབྲས་ཐོབ་པའི་བྱ་ས་ཨུ་ལྷན་གྱི་ཏང་ཀྲི་པུའི་འགོ་ཁྲིད་ཚན་ཁག་གིས་མང་ཚོགས་ཀྱི་སྣེ་ཁྲིད་དེ་ཕྱུག་འགྱུར་བྱེད་པའི་གདེང་ཚོད་དེ་བས་ཆེ་རུ་ཕྱིན་ཞིང་། ཁོང་ཚོས་གྲོང་རྡལ་དང་ཉེ་འདབས་ས་སྦྲེལ་ཡིན་པ་དང་ལྷོ་ཁ་ས་ཁུལ་གྱིས་གྲོང་རྡལ་ཅན་གྱི་འཛུགས་སྐྲུན་མགྱོགས་སུ་གཏོང་བའི་གོ་སྐབས་དམ་འཛིན་བྱས་ཏེ་སྔ་རྗེས་སུ་མ་དངུལ་སྒོར་ཁྲི་814.4བཏང་ནས་བྱ་ས་ཚོང་ལས་ཁྲོམ་གཞུང་སྐྲུན་པས་ལོ་ལྟར་ཡོང་འབབ་སྒོར་ཁྲི་57ཡོང་གི་ཡོད་པ་དང་། ཚོང་འགུག་མ་འདྲེན་གྱི་ཁེ་ལས་ཤིག་བཙུགས་པ་དང་མ་དངུལ་ཁྱོན་བསྡོམས་སྒོར་ཁྲི་4874.96བཏང་བ་དེའི་ནང་ཡུལ་མི་ཨུ་ལྷན་གྱི་མ་དངུལ་སྒོར་ཁྲི་2904.96བཏང་བ་དང་ཚོང་འགུག་མ་འདྲེན་སྒོར་ཁྲི་1970བྱས་པ་དང་ཁེ་ལས་བཞི་པོ་དེས་ཡུལ་མི་ཨུ་ལྷན་ལ་ལོ་ལྟར་ཡོང་འབབ་སྒོར་ཁྲི་147ཡོང་བ་དང་འབྲེལ་ལས་ཞུགས་ལས་གནས་168མཁོ་འདོན་བྱས་ཡོད། ཡུལ་མིའི་ཡོང་འབབ་མཐོ་རུ་གཏོང་བ་དང་མང་ཚོགས་སྣེ་ཁྲིད་དེ་ཕྱུག་འགྱུར་གྱིས་འབྱོར་པ་འབྲིང་བའི་ལམ་དུ་སྐྱོད་པའི་གོམ་སྟབས་མགྱོགས་སུ་གཏོང་ཆེད་བྱ་ས་ཨུ་ལྷན་གྱིས་ད་དུང་ཕྱུགས་ལས་ཐད་ཤུགས་སྣོན་བརྒྱབ་པ་དང་ཚད་ལྡན་ཅན་གྱི་གསོ་སྤེལ་ཁུལ་ཆུང་འཛུགས་རྒྱུ་དེ་གྲོང་རྡལ་ཉེ་འདབས་ཀྱི་ཕྱུགས་ལས་འཕེལ་རྒྱས་འགྲོ་རྒྱུར་སྐུལ་ཁྲིད་བྱེད་པའི་བྱ་ཐབས་གལ་ཆེ་ཞིག་ཏུ་བརྩིས་ནས་བཞོན་མ་གསོ་ཚགས་ཀྱི་ཆེད་ལས་དུད་ཚང་འཛུགས་པ་དང་ཕྱུགས་ལས་འཕེལ་རྒྱས་འགྲོ་རྒྱུར་སྐུལ་འདེད་གཏོང་གི་ཡོད། མིག་སྔར་བྱ་ས་ཨུ་ལྷན་ལ་བཞོན་མ་གསོ་ཚགས་དུད་ཚང་190ཡོད་པ་དང་། བ་གླང་380ལྷག་ཙམ་གྱི་རྒྱུད་པ་ལེགས་བཅོས་བྱས་པ། རྩྭ་ར་རྒྱ་ཁྱོན་མུའུ་69389ཡོད་ཅིང་། ཡུལ་མི་ཨུ་ལྷན་གྱི་ཏང་ཀྲི་པུའི་ཧྲུའུ་ཅི་བཀྲ་ཤིས་ཕུན་ཚོགས་ཀྱིས་བ་གསོའི་མཐུན་ཚོགས་ཀྱི་གཞུང་ཐམ་འཁྱེར་བཞིན་དུ “འདི་ལོའི་ལོ་སྨད་ལ་ང་ཚོའི་བ་གསོའི་མཐུན་ཚོགས་འཛུགས་རྒྱུ་ཡིན་པ་དང་བ་གསོའི་དུད་ཚང་གིས་ཀྱང་སེམས་ཁྲལ་བྱེད་དགོས་དོན་མེད ”ཅེས་ཤོད་ཀྱི་འདུག

    ད་ཕན་ལོ་ཤས་རིང་བྱ་ས་ཡུལ་མི་ཨུ་ལྷན་གྱིས་མཉམ་སྡེབ་དཔལ་འབྱོར་གྱི་ཡོང་འབབ་སྤྱད་ནས་སྤྱི་ཕན་བྱ་གཞག་ལ་གཏོང་ཤུགས་ཆེ་རུ་བཏང་བ་སྟེ། ཡུལ་མི་ཨུ་ལྷན་གྱི་མི་1063གྱི་སྨན་བཅོས་མཉམ་ལས་འགྲོ་གྲོན་མི་རེའི་ལོ་རེའི་སྒོར་20འཇལ་བ་དང་རང་ལོ་60ཡན་གྱི་རྒན་རྒོན་101ལ་མི་རེར་ལོ་རེར་འཚོ་བའི་རོགས་དངུལ་སྒོར་500སྤྲོད་པ་སོགས་རེད།