བོད་ ལྗོངས་ ཉིན་ རེའི་ཚགས་པར་ཁང་དུ་རྩེད་ཐང་ནས་ཟླ་7ཚེས་1ཉིན་གློག་འཕྲིན་འབྱོར་གསལ། ཉེ་ཆར་ལྷོ་ཁ་ས་ཁུལ་གྱིས་ཏང་ཡོན་རྒན་གྲས་ལ་འཚམས་འདྲི་ཞུ་བ་དང་། ཏང་ནང་ཞུགས་པའི་དམ་བཅའི་ཚིག་བསྐྱར་ཀློག་བྱེད་པ། ཆེད་དོན་ཏང་གི་སློབ་ཚན་འཚོགས་པ་བཅས་ཀྱི་བྱེད་སྒོ་རྣམ་པ་སྣ་ཚོགས་སྤེལ་ཏེ་ཀྲུང་གོ་གུང་ཁྲན་ཏང་དབུ་བཪྙེས་ནས་ལོ་87འཁོར་བར་དྲན་གསོ་ཞུས་པ་རེད།

        གཞི་རིམ་ཏང་ཡོན་ལ་ཏང་རྩ་འཛུགས་ཀྱིས་སེམས་ཁུར་བྱེད་ལུགས་མཚོན་པ་དང་དཀའ་ངལ་ཡོད་པའི་ཏང་ཡོན་གྱིས་ཏང་རྩ་འཛུགས་ཀྱི་དྲོ་སྐྱིད་ཚོར་ཐུབ་པ་བྱེད་ཆེད་ལྷོ་ཁ་ས་ཨུད་ཀྱི་ཧྲུའུ་ཅི། མི་དམངས་འཐུས་ཚོགས་ལས་དོན་ཨུ་ཡོན་ལྷན་ཁང་གི་ཀྲུའུ་རེན་བློ་བཟང་ཚེ་རིང་དང་། སྲིད་འཛིན་ཀུང་ཧྲུའུ་ཡི་ཀྲོན་ཡོན་ཀྲའོ་ཤན་ཀྲུང་། སྲིད་གྲོས་ཀྱི་ཀྲུའུ་ཞི་ཚེ་རིང་ནོར་བུ་བཅས་ཀྱིས་སྣེ་ཁྲིད་པའི་འཚམས་འདྲི་ཚོགས་ཆུང་3གྱིས་ས་ཁུལ་དེའི་ཏང་ཡོན་རྒན་གྲས་ཁ་ཤས་དང་དཀའ་ངལ་ཡོད་པའི་ཏང་ཡོན་ལ་འཚམས་འདྲི་བྱེད་པར་སོ་སོར་བསྐྱོད་དེ་ཁོང་ཚོས་ཏང་དང་སྲིད་གཞུང་གི་ཐུགས་ཁུར་ཚོར་བ་བྱས་ཐོག་ཁོང་ཚོས་ལྷོ་ཁ་ས་ཁུལ་གྱི་སྒྱུར་བཅོས་དང་། འཕེལ་རྒྱས། བརྟན་ལྷིང་ཆེད་ལེགས་སྐྱེས་ཕུལ་བར་ཐུགས་རྗེ་ཆེ་ཞུས་པ་རེད།

        རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གི་དེ་སྔའི་ཀྲུའུ་རེན་གཞོན་པ་ཚེ་རིང་ལྷ་མོས་ལས་འཁྱུར་ངལ་གསོ་རྒྱག་མཁན་ཏང་ཡོན་ཪྙིང་པ་ཞིག་གི་ངོས་ནས་བཤད་ན་ལྷོ་ཁའི་དཔལ་འབྱོར་འཛུགས་སྐྲུན་དང་སྤྱི་ཚོགས་བརྟན་ལྷིང་སོགས་བྱ་གཞག་ཁག་གི་འཕེལ་རྒྱས་ཆེད་དུ་མུ་མཐུད་རང་ཉིད་ཀྱི་སྟོབས་ཤུགས་ལེགས་སྐྱེས་སུ་འབུལ་རྒྱུ་ཡིན་ཞེས་གསུངས་པ་རེད།

        ཤེས་རྟོགས་བྱུང་བར་གཞིགས་ན། ཀྲུང་གོ་གུང་ཁྲན་ཏང་དབུ་བཪྙེས་ནས་ལོ་87འཁོར་བར་དྲན་གསོ་གཟབ་རྒྱས་ཞུ་ཆེད་ལྷོ་ཁ་ས་ཁུལ་གྱིས་ད་དུང་དྲན་གསོའི་ཚོགས་ཆེན་འཚོགས་པ་དང་ཏང་ཡོན་གསར་པ་ཏང་ནང་ཞུགས་པའི་དམ་བཅའ་འཇོག་པ་སོགས་ཀྱི་བྱེད་སྒོ་སྤེལ་བ་དང་དུས་མཚུངས་བྱེད་སྒོའི་ནང་དོན་ཟམ་མི་ཆད་པར་ཕུན་སུམ་ཚོགས་སུ་བཏང་ནས “ཏང་ངའི་སེམས་ནང་གནས ”ཞེས་པའི་ཆེད་དོན་ཏང་གི་སློབ་ཚན་ཁྲིད་ནས་ཏང་གི་འོད་སྟོང་འབར་བའི་ལོ་རྒྱུས་དྲིལ་བསྒྲགས་བྱས་པ་རེད།