ཟླ་11ཚེས་29ཉིན་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་བོད་དམག་ཁུལ་ཁང་ཏང་ཨུད་ཀྱི་ཧྲུའུ་ཅི་དང་པོ་ཁྲེན་ཆོན་གོ་དྲག་ཆས་ཉེན་རྟོག་བོད་ལྗོངས་སྤྱི་ཁྱབ་རུ་ཁག་ལྷ་ས་ཉིང་ལག་རུ་ཁག་གི་རུ་འབྲིང་དང་པོར་ཕེབས་ཏེ་དམག་ཞབས་ཐིམ་པའི་དམག་མིར་དགའ་སྐྱེལ་ཞུས་པ།

    ཟླ་11ཚེས་29ཉིན་གྱི་སྔ་དྲོ་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་བོད་དམག་ཁུལ་ཁང་ཏང་ཨུད་ཀྱི་ཧྲུའུ་ཅི་དང་པོ་ཁྲེན་ཆོན་གོ་དྲག་ཆས་ཉེན་རྟོག་བོད་ལྗོངས་སྤྱི་ཁྱབ་རུ་ཁག་ལྷ་ས་ཉིང་ལག་རུ་ཁག་གི་རུ་འབྲིང་དང་པོར་ཕེབས་ནས་དམག་ཞབས་ཐིམ་པའི་དམག་མིར་དགའ་སྐྱེལ་ཞུས་པ་རེད།

    རང་སྐྱོང་ལྗོངས་ཏང་ཨུད་ཀྱི་རྒྱུན་ལས་ཧྲུའུ་ཅི་གཞོན་པ་ཧའོ་ཕུང་དང་། རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཀྲུའུ་རེན་གཞོན་པ་ཉི་མ་ཚེ་རིང། རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་རྡོ་རྗེ་ཚེ་རིང་། རང་སྐྱོང་ལྗོངས་སྲིད་གྲོས་ཀྱི་ཀྲུའུ་ཞི་གཞོན་པ་ཆའོ་ཡོན་ཀྲུང་། དྲག་ཆས་ཉེན་རྟོག་བོད་ལྗོངས་སྤྱི་ཁྱབ་རུ་ཁག་གི་ཆབ་སྲིད་ཨུ་ཡོན་ཝང་ཤང་ཧྭ། རང་སྐྱོང་ལྗོངས་ཏང་ཨུད་ཀྱི་དྲུང་ཆེ་ཝང་རུའེ་ལན་བཅས་མཉམ་དུ་ཕེབས་ཡོད་པ་རེད།

    ཁྲེན་ཆོན་གོས་རང་སྐྱོང་ལྗོངས་ཏང་ཨུད་དང་། མི་དམངས་འཐུས་ཚོགས། སྲིད་གཞུང་། སྲིད་གྲོས། བོད་དམག་ཁུལ་ཁང་། དྲག་ཆས་ཉེན་རྟོག་བོད་ལྗོངས་སྤྱི་ཁྱབ་རུ་ཁག་བཅས་ཀྱི་ཚབ་ཞུས་ཏེ་ལྗོངས་ཡོངས་ཀྱི་བོད་སྡོད་དཔུང་སྡེ་དང་། དྲག་ཆས་ཉེན་རྟོག་དཔུང་སྡེ། སྤྱི་བདེ་བཅས་སུ་དམག་ཞབས་དང་ལེན་ཞུ་བཞིན་པའི་དམག་མི་དང་དམག་ཞབས་ཐིམ་པའི་དམག་མི་ཚོས་ལོ་མང་རིང་དམག་དཔུང་འཛུགས་སྐྱོང་དང་། དཔལ་འབྱོར་འཕེལ་རྒྱས། སྤྱི་ཚོགས་ཡར་ཐོན། ཞི་མཐུན་བརྟན་ལྷིང་། མཐའ་མཚམས་བདེ་འཇགས། མི་རིགས་མཐུན་སྒྲིལ་བཅས་ཀྱི་ཆེད་དཀའ་སྤྱད་ཀྱི་རྔུལ་ཆུ་དང་ལེགས་སྐྱེས་མངོན་གསལ་དོད་པོ་ཕུལ་བར་སྙིང་དབུས་ནས་ཐུགས་རྗེ་ཆེ་ཞུ་རྒྱུ་དང་བླ་ན་མེད་པའི་གུས་བཏུད་ཀྱང་ཞུ་རྒྱུ་ཡིན། དམག་ཞབས་ཐིམ་པའི་དམག་མི་ཡོངས་ཀྱིས་ཏང་དང་རྒྱལ་ཁབ་ཀྱི་འབོད་སྐུལ་དང་ལེན་ཧུར་ཐག་ཞུས་ནས་གཟི་བརྗིད་ལྡན་པའི་ངང་དམག་ཁོངས་ནས་དོན་ཏེ་སྒྱུར་བཅོས་སྒོ་དབྱེ་དང་དེང་རབས་ཅན་འཛུགས་སྐྲུན་གྱི་བྱ་གཞག་རླབས་པོ་ཆེའི་ནང་ཞུགས་པར་སྤྲོ་སེམས་འཁོལ་བའི་རྟེན་འབྲེལ་ཞུས་པ་རེད།

    ཁྲེན་ཆོན་གོས་ལོ་མང་རིང་བློ་མཐུན་ཚོས་དཔུང་སྡེའི་དམག་ཞབས་དང་ལེན་བྱེད་རིང་དམིགས་ཡུལ་བློ་ལ་བརྟན་པོ་བཅངས་བ་དང་། ལེགས་སྐྱེས་འབུལ་ཕོད་པ། བཀའ་ལ་ཉན་པ། སྒྲིག་ཁྲིམས་སྲུང་བ་བཅས་ཀྱི་ཐོག་ནས་ཏང་ཀྲུང་དབྱང་དང་ཀྲུང་དབྱང་དམག་ཨུད་ཀྱིས་གནང་བའི་ལས་འགན་ཁག་ལེགས་པར་བསྒྲུབས་པ་དང་། བོད་ཀྱི་འཕེལ་རྒྱས་དང་བརྟན་ལྷིང་གི་སྤྱི་ཡོངས་ལ་ཞབས་འདེགས་ཧུར་ཐག་ཞུས་ཡོད། ལྷག་པར་དུ་སྤྱི་ཚོགས་བརྟན་ལྷིང་སྲུང་སྐྱོང་དང་། ཉེན་སྐྱོབ་གེགས་སེལ་སོགས་ཛ་དྲག་ལ་དཀའ་ཚེགས་ཆེ་བ་དང་ཉེན་ཁ་ཆེ་བའི་ལས་འགན་ལྕི་པོ་འཁུར་བའི་ཁྲོད་གྲུབ་འབྲས་གཟེངས་སུ་ཐོན་པ་བླངས་ནས་རྔམ་བརྗིད་ལྡན་པའི་དཔུང་སྡེ་དང་ཤེས་དཔལ་ལྡན་པའི་དཔུང་སྡེའི་གཟུགས་བཪྙན་བཟང་པོ་གང་ལེགས་མངོན་པར་བྱས་པས་ལྗོངས་ཡོངས་ཀྱི་རིམ་ཁག་ཏང་ཨུད་དང་། སྲིད་གཞུང་། ལྗོངས་ཡོངས་ཀྱི་མི་རིགས་ཁག་གི་མང་ཚོགས་ཀྱི་བསྔགས་བརྗོད་བཟང་པོ་ཐོབ་ཡོད། བློ་མཐུན་ཚོས་ཐོག་མཐའ་བར་གསུམ་དུ་དམག་མིའི་གཟི་བརྗིད་ལ་གཅེས་སྤྲས་དང་དམག་མིའི་རང་རྟགས་ནམ་ཡང་གནས་པར་བྱས་ཏེ་ས་གནས་ཁག་ཏུ་སླེབས་རྗེས་ཏང་གི་ཚོགས་ཆེན་བཅོ་བརྒྱད་པའི་དགོངས་དོན་སློབ་སྦྱོང་དང་། དྲིལ་བསྒྲགས། ལག་བསྟར་ནན་ཏན་བྱས་ཏེ་ཏེང་ཞའོ་ཕིང་གི་རིགས་པའི་གཞུང་ལུགས་དང་། “མཚོན་བྱེད་གསུམ ”གྱི་དགོངས་པ་གལ་ཆེན། ཚན་རིག་དང་མཐུན་པའི་གོང་འཕེལ་ལྟ་བ་བཅས་མཛུབ་ཁྲིད་དུ་བྱ་རྒྱུ་མཐའ་འཁྱོངས་བྱས་ནས་བློ་མཐུན་ཞིས་ཅིང་ཕིང་གིས་སྤྱི་ཁྱབ་ཧྲུའུ་ཅི་གནང་བའི་ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག “ཏང་གི་བཀའ་ལ་ཉན་པ་དང་། མི་དམངས་ལ་ཞབས་འདེགས་ཞུ་བ། དམག་འཐབ་ལ་འཇོན་པ ”བཅས་ཀྱི་སྲོལ་རྒྱུན་བཟང་པོ་མུ་མཐུད་དར་སྤེལ་གཏོང་བ་དང་། གསར་བརྗེའི་དམག་མིའི “དཀའ་སྡུག་ཁྱད་པར་མྱོང་ཐུབ་པ་དང་། དམག་འཐབ་ཁྱད་པར་འཇོན་པ། ལེགས་སྐྱེས་ཁྱད་པར་འབུལ་བ ”བཅས་ཀྱི་སྲོལ་རྒྱུན་བཟང་པོ་རྒྱུན་འཁྱོངས་བྱས་ཏེ་ས་གནས་ཀྱི་དཔལ་འབྱོར་དང་སྤྱི་ཚོགས་འཛུགས་སྐྲུན་གྱི་ལག་ལེན་དངོས་ནང་ཧུར་ཐག་ཞུགས་ནས་འབྱོར་འབྲིང་སྤྱི་ཚོགས་སྒོ་ཀུན་ནས་བསྐྲུན་ཐུབ་པ་དང་ཀྲུང་ཧྭ་མི་རིགས་ཀྱི་རླབས་ཆེན་བསྐྱར་དར་ཆེད་སླར་ཡང་ལེགས་སྐྱེས་འབུལ་བ་དང་བྱས་རྗེས་གསར་པ་འཇོག་རྒྱུའི་རེ་བ་ཡོད་ཅེས་གསུངས་པ་རེད།

    ཁྲེན་ཆོན་གོ་སོགས་ཀྱིས་འཐབ་འཛིང་པ་ཪྙིང་པ་རེ་རེ་བཞིན་ལ་དཀར་གཙང་མཇལ་དར་བསྒྲོན་ནས་ལམ་ཁར་བདེ་ཐང་ཡོང་བ་དང་བྱ་བ་ལམ་ལྷོངས་ཡོང་བའི་སྨོན་འདུན་ཞུས་པ་རེད།