ཟླ་11ཚེས་28ཉིན་གྱི་སྔ་དྲོ་ལྗོངས་ཏང་ཨུད་ཀྱི་རྒྱུན་ཨུ་ལྷ་ས་གྲོང་ཨུད་ཀྱི་ཧྲུའུ་ཅི་ཆེ་དགྲ་ལྷ་མཚུར་ཕུ་དགོན་དུ་ཕེབས་ནས་དགོན་པའི་རྨང་གཞིའི་སྒྲིག་བཀོད་དང་མེ་འགོག་མེ་གསོད་སོགས་རིག་དངོས་སྲུང་སྐྱོབ་ལས་གྲྭའི་འཆར་འགོད་ཀྱི་གནས་ཚུལ་རྟོག་ཞིབ་དང་དགོན་པའི་དོ་དམ་ཨུ་ཡོན་ལྷན་ཁང་གི་ལས་བྱེད་མི་སྣ་དང་དགོན་པར་བཅའ་སྡོད་ལས་བྱེད་པ་དང་དེ་བཞིན་དགོན་པའི་དགེ་འདུན་པར་བྱམས་བརྩེའི་ངང་འཚམས་འདྲི་གནང་ནས་ཁོང་ཚོར་ཁ་བཏགས་སྒྲོན་པ་དང་འཚམས་འདྲིའི་དངུལ་ཡང་གནང་བ་རེད།
རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་ལྕགས་རྭ་བློ་བཟང་བསྟན་འཛིན་ལྷན་དུ་ཕེབས་ཡོད་པ་རེད།
སྔ་རྗེས་སུ་མཚུར་ཕུ་དགོན་གྱི་རུང་ཁང་དང་། ཚོགས་ཆེན། ལྷ་ཁང་བཅས་ཀྱི་དགོན་པའི་རྨང་གཞིའི་སྒྲིག་བཀོད་དང་རིག་དངོས་སྲུང་སྐྱོབ་ཀྱི་ད་ཡོད་གནས་ཚུལ་ལ་གཟིགས་ཞིབ་གནང་བ་དང་དགོན་པའི་རིག་དངོས་སྲུང་སྐྱོབ་ལས་གྲྭའི་འཆར་འགོད་གནས་ཚུལ་དང་ཏང་གི་ཚོགས་ཆེན་བཅོ་བརྒྱད་པའི་དགོངས་དོན་སློབ་སྦྱོང་དང་། དྲིལ་བསྒྲགས། ལག་བསྟར་བཅས་བྱ་ཚུལ་ཤེས་རྟོགས་ཞིབ་ཕྲ་གནང་རྗེས་ཆེ་དགྲ་ལྷས་སྟོད་ལུང་བདེ་ཆེན་རྫོང་དང་མཚུར་ཕུ་དགོན་དོ་དམ་ཨུ་ཡོན་ལྷན་ཁང་གི་ལས་དོན་ལ་ཁས་ལེན་གང་ལེགས་གནང་བ་རེད།
ཆེ་དགྲ་ལྷས་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་ལྷ་ས་གྲོང་ཁྱེར་རིག་དངོས་སྲུང་སྐྱོབ་ལས་དོན་ལ་ཚད་མཐོའི་མཐོང་ཆེན་གནང་བ་དང་འབྲེལ་རྒྱབ་སྐྱོར་དང་རོགས་རམ་ཡང་གནང་གི་ཡོད། དགོན་སྡེའི་རིག་དངོས་ཉམས་གསོ་དང་སྲུང་སྐྱོབ་ལས་གྲྭར་ཤུགས་སྣོན་རྒྱག་རྒྱུ་ནི་ཏང་ཀྲུང་དབྱང་གི་ཐུགས་ཁུར་དང་ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པའི་ཐོག་བཏོན་པའི་ཀྲུང་ཧྭ་མི་རིགས་ཀྱི་ཁྱད་ཆོས་ལྡན་པའི་རིག་གནས་སྲུང་སྐྱོབ་བྱ་ཡུལ་གལ་ཆེན་སྐྲུན་པའི་ཐབས་ཇུས་ལག་བསྟར་དོན་འཁྱོལ་བྱེད་པའི་བྱ་ཐབས་གལ་ཆེན་ཞིག་རེད། ལྷ་ས་གྲོང་ཁྱེར་གྱིས་ཀྲུའུ་ཞི་གཞོན་པ་ལྕགས་རྭ་བློ་བཟང་བསྟན་འཛིན་དང་འབྲེལ་ཡོད་ཚན་པ་ཁག་གི་བླང་བྱ་གཞིར་བཟུང་ནུས་ཤུགས་ཡོད་རྒུས་མཚུར་ཕུ་དགོན་གྱི་རིག་དངོས་སྲུང་སྐྱོབ་ལས་གྲྭའི་དུས་འགོའི་ལས་དོན་ཁག་ལེགས་སྒྲུབ་བྱེད་དགོས་ཞེས་མཛུབ་སྟོན་གནང་བ་རེད།