ཟླ་11ཚེས་28ཉིན་གྱི་ཕྱི་དྲོ་རང་སྐྱོང་ལྗོངས་མི་དམངས་འཐུས་ཚོགས་སྐབས་དགུ་པའི་རྒྱུན་ལས་ཨུ་ཡོན་ལྷན་ཁང་གི་ཚོགས་འདུ་ཐེངས་སོ་གཅིག་པའི་གྲོས་རིམ་ཁག་ཐུགས་གྲ་ལེགས་འགྲིག་ངང་ལེགས་གྲུབ་བྱུང་ནས་བདེ་བླག་ངང་མཇུག་སྒྲིལ་བ་རེད།
ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་ལྗོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན་བྱམས་པ་ཕུན་ཚོགས་ཀྱིས་གཙོ་སྐྱོང་གནང་བ་དང་འབྲེལ་གསུང་བཤད་ཀྱང་གནང་བ་རེད།
ཚོགས་འདུའི་ཐོག་འབྲེལ་ཡོད་ཀྱི་མི་དོན་བསྐོ་འཐེན་དོན་ཚན་ལ་བརྡས་ཐག་བཅད་ནས་གྲོས་འཆམ་བྱུང་བ་དང་བསྐོ་གཞག་ཡིག་ཆ་སྤྲད་པ་རེད། བྱམས་པ་ཕུན་ཚོགས་ཀྱི་གསུང་བཤད་ནང་ད་ཐེངས་ཀྱི་ཚོགས་འདུའི་ཐོག་གྲོས་ཞིབ་གནང་བའི་ཆུའི་བཅའ་ཁྲིམས་ལག་བསྟར་བྱ་ཐབས་དེ་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་དང་སྲིད་གཞུང་གི་འབྲེལ་ཡོད་སྡེ་ཚན་གྱིས་བརྟག་ཞིབ་དང་རིགས་པས་ཁུངས་སྐྱེལ་བྱས་པ་བརྒྱུད་ཆུའི་ཐོན་ཁུངས་འཆར་འགོད་དང་། གསར་སྤེལ་བེད་སྤྱོད། ཆུ་རིན་བསྡུ་རྒྱུ། སྣོད་བཅུད་སྲུང་སྐྱོབ་སོགས་ཐད་ཀྱི་གཏན་འབེབས་ལ་བཟོ་བཅོས་དང་འཐུས་ཚང་དུ་གཏོང་རྒྱུའི་རེ་འདུན་ཞུས་པར་ཚོགས་འདུའི་རིང་རྒྱུན་ལས་ཨུ་ལྷན་གྱི་གྲུབ་ཆའི་མི་སྣས་སླར་ཡང་བསམ་འཆར་དང་གྲོས་འགོ་ཡག་པོ་གང་མང་བཏོན་ཡོད། འབྲེལ་ཡོད་སྡེ་ཚན་གྱིས་ད་ཡོད་ཀྱི་བཟོ་བཅོས་འཆར་ཟིན་གྱི་རྨང་གཞིའི་ཐོག་ཆུའི་ཐོན་ཁུངས་གྲོན་ཆུང་དང་བསྲི་ཚགས་ཀྱི་སྒོ་ནས་བེད་སྤྱོད་གཏོང་བའི་སྐོར་ལ་ཆུའི་ཐོན་ཁུངས་རིན་ལྡན་ངང་བེད་སྤྱོད་གཏོང་བ་དང་ཁོར་ཡུག་སྲུང་སྐྱོང་གི་འགན་འཁྲི་རྗེས་འདེད་དང་ཁོར་ཡུག་གནོད་འཚེ་གཏོང་བར་དངུལ་ཚབ་སྤྲོད་པའི་ལམ་ལུགས་འཛུགས་པ་དང་འཐུས་ཚང་དུ་བཏང་བ་དང་སྣོད་བཅུད་ཤེས་དཔལ་དྲིལ་བསྒྲགས་སློབ་གསོར་ཤུགས་སྣོན་བརྒྱབ་ནས་བརྟག་ཞིབ་དང་རིགས་པས་ཁུངས་སྐྱེལ་སྔར་བས་གཏིང་ཟབ་བྱས་ཏེ་བཅའ་ཁྲིམས་བཟོ་སྐབས་ཏང་གི་ཚོགས་ཆེན་བཅོ་བརྒྱད་པའི་དགོངས་དོན་ལག་བསྟར་དོན་འཁྱོལ་མཐའ་གཅིག་ཏུ་བྱས་པར་བརྟེན་ཆུའི་བཅའ་ཁྲིམས་ལག་བསྟར་བྱ་ཐབས་བཟོ་བཅོས་ལས་དོན་དེ་ཚོགས་ཆེན་བཅོ་བརྒྱད་པའི་དགོངས་དོན་ལག་བསྟར་དོན་འཁྱོལ་བྱེད་པའི་ཞིབ་ཕྲའི་བྱ་སྤྱོད་ངོ་མ་ཞིག་ཏུ་འགྱུར་བ་བྱེད་དགོས་ཞེས་གསུངས་པ་རེད།
བྱམས་པ་ཕུན་ཚོགས་ཀྱིས་ཚོགས་ཆེན་བཅོ་བརྒྱད་པའི་དགོངས་དོན་སློབ་སྦྱོང་དང་དྲིལ་བསྒྲགས་ཡག་པོ་དང་ལག་བསྟར་དོན་འཁྱོལ་ཡག་པོ་བྱ་རྒྱུ་ནི་ད་སྐབས་དང་སླད་ཕྱིན་དུས་སྐབས་ཤིག་རིང་གི་ཆབ་སྲིད་ཀྱི་ལས་འགན་གཙོ་བོ་ཡིན། རང་སྐྱོང་ལྗོངས་མི་དམངས་འཐུས་ཚོགས་ལས་ཁུངས་ཀྱིས་དེ་སྔོན་སློབ་སྦྱོང་བྱས་པའི་རྨང་གཞིའི་ཐོག་སློབ་སྦྱོང་གི་འཆར་གཞི་ཞིབ་ཚགས་འགོད་པ་དང་སློབ་སྦྱོང་གི་བྱེད་སྒོ་སྒྲིག་འཛུགས་བྱས་ནས་ཚོགས་ཆེན་བཅོ་བརྒྱད་པའི་དགོངས་དོན་སློབ་སྦྱོང་དང་དྲིལ་བསྒྲགས་ཡག་པོ་དང་ལག་བསྟར་དོན་འཁྱོལ་ཡག་པོ་བྱེད་དགོས། ལྷག་དོན་དུ་ཚོགས་ཆེན་བཅོ་བརྒྱད་པས་དམངས་གཙོའི་ཁྲིམས་ལུགས་འཛུགས་སྐྱོང་དང་མི་དམངས་འཐུས་ཚོགས་ཀྱི་ལས་ཀའི་བླང་བྱ་གསར་པ་སློབ་སྦྱོང་དང་གོ་བ་གཏིང་ཟབ་ལོན་པ་བྱས་ནས་རང་འགུལ་ངང་ཚོགས་ཆེན་བཅོ་བརྒྱད་པའི་བསམ་བློ་གསར་པ་དང་། ལྟ་བ་གསར་པ། ཆོད་གཏམ་གསར་པ་བཅས་ཀྱིས་བསམ་བློར་དྲག་ཆས་སྤྲས་པ་དང་ལག་ལེན་དངོས་ལ་མཛུབ་སྟོན་བྱས་ཏེ་མི་དམངས་འཐུས་ཚོགས་ཀྱི་ལས་དོན་གསར་གཏོད་འཕེལ་རྒྱས་གཏོང་རྒྱུར་སྐུལ་མ་ཧུར་ཐག་བཏང་ཐོག་མི་དམངས་འཐུས་ཚོགས་ཀྱི་ལས་དོན་ཆུ་ཚད་གསར་པ་ཞིག་གི་ཐོག་སླེབས་ཐུབ་པར་བརྩོན་ལེན་བྱེད་དགོས་པའི་ནན་གསུངས་གནང་བ་རེད།
མཇུག་ཏུ་བྱམས་པ་ཕུན་ཚོགས་ཀྱིས་ད་རེས་རྒྱུན་ལས་ཨུ་ལྷན་གྱིས་སྐབས་བཅུ་པའི་བོད་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་གྱི་ཚོགས་འདུ་ཐེངས་དང་པོ་སྐོང་ཚོགས་བྱ་རྒྱུའི་སྐོར་གྱི་གཏན་འབེབས་ལ་གྲོས་འཆམ་བྱུང་ཡོད། ད་ལྟ་སྐབས་བཅུ་པའི་མི་དམངས་འཐུས་ཚོགས་ཀྱི་ཚོགས་འདུ་ཐེངས་དང་པོ་འཚོག་པར་ཟླ་བ་གཅིག་ལྷག་གི་དུས་ཚོད་ལས་མེད་པས་གྲ་སྒྲིག་གི་ལས་དོན་ཁག་ངེས་པར་དུ་དམ་འཛིན་ཡག་པོ་བྱེད་དགོས་པའི་བླང་བྱ་བཏོན་གནང་བ་རེད།