ཟླ་11ཚེས་22ཉིན་གྱི་དགོང་མོ་རང་སྐྱོང་ལྗོངས་ཏང་ཨུད་ཀྱི་རྒྱུན་ལས་ཨུ་ཡོན་ལྷ་ས་གྲོང་ཨུད་ཀྱི་ཧྲུའུ་ཅི་ཆེ་དགྲ་ལྷས་རྒྱུན་ལས་ཨུ་ཡོན་གྱི (རྒྱ་ཆེ )ཚོགས་འདུ་གཙོ་སྐྱོང་གནང་ནས་དྲོད་རླངས་མཁོ་འདོན་དང་སོལ་རླངས་མཁོ་འདོན་གྱི་ཚོད་ལྟའི་ལས་གྲྭའི་འབྲེལ་ཡོད་ལས་དོན་ལ་ཆེད་མངགས་ཞིབ་འཇུག་དང་བཀོད་སྒྲིག་གནང་བ་རེད། ཁོང་གིས་གནད་དོན་དང་མི་འདང་ས་སྔར་བས་བཙལ་འཚོལ་བྱས་ནས་དཀའ་ངལ་ཁྱད་བསད་བྱེད་པ་དང་བྱ་ཐབས་ནུས་ལྡན་སྤྱད་ནས་ལས་གྲྭའི་མྱུར་ཚད་ཏན་ཏིག་ངང་མགྱོགས་སུ་བཏང་ཐོག་ལོ་མཇུག་ཏུ་དུད་ཚང་40%ལ་དྲོད་རླངས་མཁོ་འདོན་བྱ་རྒྱུའི་དམིགས་ཚད་དུས་བཀག་ནང་ལེགས་སྒྲུབ་ཐུབ་རྒྱུ་འགན་ལེན་བྱས་ཏེ་གྲོང་ཁྱེར་ཡོངས་ཀྱི་མི་དམངས་ཀྱི་བློ་ཡིད་ཚིམ་པའི་ལན་ཞིག་འདེབས་དགོས་པའི་བླང་བྱ་བཏོན་གནང་བ་རེད།

    ཆེ་དགྲ་ལྷས་བསམ་བློ་དང་ངོས་འཛིན་དེ་ལྗོངས་ཏང་ཨུད་ཀྱི་བླང་བྱ་དང་བཀོད་སྒྲིག་ཐོག་སྔར་བས་གཅིག་གྱུར་དང་། ཏང་གི་ཚོགས་ཆེན་བཅོ་བརྒྱད་པའི་དགོངས་དོན་ལག་བསྟར་དོན་འཁྱོལ་བྱེད་པའི་ཞིབ་ཕྲའི་བྱ་སྤྱོད་ཐོག་གཅིག་གྱུར། དམངས་ཀྱི་ཆེད་དུ་དོན་དངོས་སྒྲུབ་པའི་ཐོག་གཅིག་གྱུར་བཅས་ཡོང་བ་བྱས་ནས་ཧྲུའུ་ཅི་ཁྲེན་ཆོན་གོས་དྲོད་རླངས་མཁོ་འདོན་དང་སོལ་རླངས་མཁོ་འདོན་གྱི་ཚོད་ལྟའི་ལས་གྲྭར་གནང་བའི་མཛུབ་སྟོན་གལ་ཆེན་གཞིར་བཟུང་བྱ་བ་བཟང་པོ་ཡག་པོ་སྒྲུབ་པ་དང་དོན་དངོས་ཏན་ཏིག་སྒྲུབ་དགོས། དུས་མཚམས་གོང་མའི་ཚོད་ལྟའི་ལས་གྲྭའི་ཨར་རྒྱག་བྱེད་རིང་གི་ཉམས་མྱོང་དང་བསླབ་བྱ་ཕྱོགས་སྡོམ་ནན་ཏན་བྱེད་པ་དང་ཨར་རྒྱག་བྱེད་རིང་གནས་པའི་གནད་དོན་དང་དཀའ་གནད་དུས་ཐོག་ཏུ་ཤེས་རྟོགས་ཐུབ་པ་དང་ཐག་གཅོད་བྱས་ནས་ཚོད་ལྟའི་ལས་གྲྭའི་དམིགས་ཚད་དེ་དུས་བཀག་ནང་ལེགས་སྒྲུབ་ཡོང་རྒྱུའི་འགན་ལེན་བྱེད་དགོས། གཙོ་གནད་མངོན་གསལ་དུ་འཛིན་ནས་རྒྱུ་ཆ་མཁོ་འདོན་བྱེད་པ་དང་། གཅིག་གྱུར་འཆར་འགོད་ངང་ཚ་ལ་རྒྱག་པ། མགྱོགས་མྱུར་ས་སྟོང་སྙོམས་པ། མགྱོགས་མྱུར་དུད་ཚང་དུ་ཁྲིད་པ། བདེ་འཇགས་ངང་བེད་སྤྱོད་པ་སོགས་གཙོ་གནད་ལྷུ་ཚིགས་ཀྱི་ལས་ཀའི་དོན་འཁྱོལ་ལ་དམ་འཛིན་བྱས་ནས་ཚན་རིག་དང་མཐུན་པའི་ངང་གཅིག་གྱུར་འཆར་འགོད་ཀྱིས་ལས་ཀའི་མྱུར་ཚད་མགྱོགས་སུ་བཏང་སྟེ་ལོ་མཇུག་གོང་ཏང་ཀྲུང་དབྱང་གི་ཐུགས་ཁུར་དེ་དུད་ཚང་ཁྲི་སྟོང་ལ་ཁྱབ་པ་བྱ་རྒྱུའི་འགན་ལེན་བྱེད་དགོས། དྲིལ་བསྒྲགས་བྱེད་ཤུགས་ཆེ་རུ་བཏང་ནས་རྒྱ་ཆེའི་གྲོང་མིར་བདེ་འཇགས་དང་ཚན་རིག་དང་མཐུན་པའི་ངང་སོལ་རླངས་བེད་སྤྱོད་པའི་རྒྱུན་ཤེས་ཁྱབ་གདལ་གཏོང་བ་དང་གྲོང་ཁྱེར་ཡོངས་ཀྱི་རིམ་པ་གོང་འོག་གིས་གཞོགས་འདེགས་དམ་ཟབ་བྱེད་པ་དང་ཨར་རྒྱག་ཚན་པས་ལས་དུས་འཕར་སྣོན་ངང་ལས་གྲྭའི་མྱུར་ཚད་ལ་སྐུལ་འདེད་གཏོང་བའི་གསོན་ཉམས་ལྡན་པའི་ལག་ལེན་དང་མི་སེམས་འགུལ་བའི་བྱས་རྗེས་དྲིལ་བསྒྲགས་ཤུགས་ཆེན་བྱེད་དགོས། ལྷ་ས་གྲོང་ཨུད་དང་གྲོང་ཁྱེར་སྲིད་གཞུང་གི་འགོ་ཁྲིད་གཙོ་བོས་ལས་བགོས་ཁ་གསལ་བཟོ་བ་དང་། དུམ་བུ་དབྱེ་ནས་ལྟ་ཞིབ་བྱེད་འགན་འཁུར་བ། འགོ་ཁྲིད་ལ་ཤུགས་སྣོན་རྒྱག་པ་བཅས་ཀྱི་ཐོག་ནས་གནས་པའི་གནད་དོན་དུས་ཐོག་ཏུ་ལྡོག་འདྲེན་དང་ཨར་རྒྱག་བྱེད་རིང་གི་དཀའ་ངལ་དུས་ཐོག་ཏུ་ཐག་གཅོད་བྱ་རྒྱུའི་འགན་ལེན་བྱེད་པ་དང་སྤྱི་ཚོགས་ཡོངས་ཀྱི་སྟོབས་ཤུགས་ཚོད་ལྟའི་ལས་གྲྭའི་ནང་ཞུགས་པ་དང་རྒྱབ་སྐྱོར་བྱ་རྒྱུའི་སྐུལ་སློང་གང་ལེགས་བྱས་ནས་གཏན་འཁེལ་བྱས་པའི་ལས་འགན་དུས་བཀག་ནང་ལེགས་སྒྲུབ་ཡོང་རྒྱུའི་འགན་ལེན་བྱས་ཏེ་ཏང་གི་ཚོགས་ཆེན་བཅོ་བརྒྱད་པའི་དགོངས་དོན་གྱི་མཛུབ་ཁྲིད་འོག་དྲོད་རླངས་མཁོ་འདོན་དང་སོལ་རླངས་མཁོ་འདོན་གྱི་ཚོད་ལྟའི་ལས་གྲྭའི་གྲུབ་འབྲས་དངོས་ཀྱི་ཐོག་ནས་གྲོང་ཁྱེར་ཡོངས་ཀྱི་མི་དམངས་ལ་བློ་ཡིད་ཚིམ་པའི་ལན་ཞིག་འདེབས་དགོས་པའི་བླང་བྱ་བཏོན་གནང་བ་རེད།