ཟླ་11ཚེས་19ཉིན་གྱི་སྔ་དྲོ་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན་གཞོན་པ་སུང་ཧྲན་ལིས་འཕེལ་སྒྱུར་ཨུ་ལྷན་དང་། ཚོང་དོན་ཐིང་། ཁྲལ་དོན་ཅུས་སོགས་སྡེ་ཚན་ལས་གྲུབ་པའི་མཉམ་འབྲེལ་སྐུལ་འདེད་ཞིབ་བཤེར་ཚོགས་ཆུང་གི་སྣེ་འཁྲིད་དེ་ལྷ་སའི་གློག་ཤུགས་མཁོ་འདོན་ཀུང་སིའི་ལས་གཉེར་ཚོམས་ཆེན་དང་། ར་མོ་ཆེའི་ཉེ་འགྲམ་གྱི་རྩམ་པ་ཆེད་ཚོང་ཁང་ཁག ཉི་འོད་གླིང་ཕྲན་གྱི་ཚོང་ཟོག་ཙག་ཙིག་ཁྲོམ་ར་བཅས་སུ་ཕེབས་ནས་ཁྲོམ་རའི་མཁོ་སྤྲོད་དང་། ཚོང་ཟོག་གི་རིན་གོང་། ཟས་རིགས་ཀྱི་བདེ་འཇགས་ལྟ་སྐུལ་དོ་དམ་ལས་དོན་བཅས་ལ་གཟིགས་ཞིབ་གནང་བ་རེད།
ཞིབ་བཤེར་གནང་རིང་སུང་ཧྲན་ལིས་འབྲེལ་ཡོད་སྡེ་ཚན་ཁག་ལ་ཚོགས་ཆེན་བཅོ་བརྒྱད་པའི་དགོངས་དོན་སྔར་བས་སློབ་སྦྱོང་དང་གོ་བ་ཡག་པོ་ལེན་པ་དང་ལྷག་པར་དུ་དམངས་འཚོ་དང་འབྲེལ་བ་ཡོད་པའི་ནང་དོན་ལག་བསྟར་དོན་འཁྱོལ་ཡག་པོ་བྱེད་དགོས། ངེས་པར་དུ་བསམ་བློ་སྔར་བས་གཅིག་གྱུར་དང་། ངོས་འཛིན་མཐོ་རུ་གཏོང་བ། མཐུན་སྦྱོར་ངང་གཞོགས་འདེགས་བཅས་བྱས་ཐོག་ཚད་མཐོའི་ཆབ་སྲིད་ཀྱི་འགན་འཁྲི་འཁུར་སེམས་དང་ལས་ཀའི་ཁ་ཚ་དགོས་གཏུགས་ཀྱི་བསམ་པའི་ཐོག་ནས་ལས་དོན་ཏན་ཏིག་ངང་ཡག་པོ་བསྒྲུབ་དགོས། འགོ་ཁྲིད་ལ་མུ་མཐུད་ཤུགས་སྣོན་རྒྱག་པ་དང་། ལམ་ལུགས་འཐུས་ཚང་དུ་གཏོང་བ། བྱ་ཐབས་གནས་ལ་འཁེལ་བ། བདེ་འཇགས་བདེ་སྲུང་གི་འདུ་ཤེས་ཟབ་ཏུ་གཏོང་བ་བཅས་བྱས་ནས་སྔར་རྒྱུན་བཞིན་བདེ་འཇགས་བདེ་སྲུང་གི་ལས་དོན་ཁག་ཡག་པོ་བསྒྲུབ་དགོས་པའི་བླང་བྱ་བཏོན་གནང་བ་རེད།