བོད་ལྗོངས་ཁྲིམས་ལུགས་ཚགས་པར་ཁང་དུ་ལྷ་ས་ནས་གནས་ཚུལ་འབྱོར་གསལ། ཟླ་11ཚེས་13ནས་ཚེས་16ཉིན་བར་རང་སྐྱོང་ལྗོངས་སྲིད་གྲོས་ཀྱི་ཏང་ཙུའི་ཧྲུའུ་ཅི་གཞོན་པ་ཀྲུའུ་ཞི་གཞོན་པ་པ་སངས་དོན་གྲུབ་ཀྱིས་ལྷ་ས་གྲོང་ཁྱེར་གྱི་བརྟན་ལྷིང་སྲུང་སྐྱོང་ལས་དོན་ལ་ལྟ་སྐུལ་ཞིབ་བཤེར་གནང་སྐབས་མི་འདང་བའི་ཆ་དང་མི་མངོན་པའི་རྐྱེན་རྩ་སེལ་ནས་སྤྱི་ཚོགས་ཞི་མཐུན་བདེ་འཇགས་ལ་སྐུལ་འདེད་ཧུར་ཐག་བཏང་སྟེ་བརྟན་ལྷིང་སྲུང་སྐྱོང་ལས་དོན་ལ་རྒྱལ་ཁ་གསར་པ་ལེན་དགོས་པའི་བླང་བྱ་བཏོན་གནང་བ་རེད།
པ་སངས་དོན་གྲུབ་ཀྱིས་སྔ་རྗེས་སུ་གཙུག་ལག་ཁང་ཐང་ཆེན་དང་། ལྷ་ས་སྐྱིད་ཆུའི་ཟམ་ཆེན། སེ་ར་ལྷོ་ལམ་དམངས་ཕན་ཉེན་རྟོག་ཞབས་ཞུའི་ས་ཚིགས། དེ་བཞིན་ལྷ་ས་མེ་འཁོར་བབས་ཚུགས་ཞིབ་བཤེར་ས་ཚིགས་དང་། མལ་གྲོ་གུང་དཀར་རྫོང་རྒྱ་མ་ཤང་ཞིབ་བཤེར་ས་ཚིགས། རུ་ཐོག་ཞིབ་བཤེར་ས་ཚིགས། སྟག་རྩེ་རྫོང་བྲག་ཡེར་པ་ཞིབ་བཤེར་ས་ཚིགས་བཅས་སུ་ཕེབས་ནས་ལས་དོན་སྙན་ཞུ་ནན་ཏན་ངང་གསན་པ་དང་ཉེན་སྤྱོད་སྒྲིག་ཆས་སྤྱོད་ཚུལ་ལ་གཟིགས་ཤིང་། ཁོང་གིས་གཞི་རིམ་གྱི་འཐབ་ས་དང་པོའི་སྤྱི་བདེའི་མི་དམངས་ཉེན་རྟོག་པ་དང་། དྲག་ཆས་ཉེན་རྟོག་དཔོན་དམག ལས་བྱེད་པ་དང་མང་ཚོགས་བཅས་ཀྱིས་ཏང་གི་ཚོགས་ཆེན་བཅོ་བརྒྱད་པ་འཚོག་རིང་གི་སྤྱི་ཚོགས་དུས་བབ་བརྟན་ལྷིང་སྲུང་སྐྱོང་ཐད་ཕུལ་བའི་ལེགས་སྐྱེས་ལ་ཁས་ལེན་གང་ལེགས་གནང་བ་མ་ཟད། རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཚབ་ཞུས་ནས་ཁོང་ཚོར་ཐུགས་རྗེ་ཆེ་ཞུས་པ་དང་འཚམས་འདྲིའང་གནང་བ་རེད།
གཙུག་ལག་ཁང་དམངས་ཕན་ཉེན་རྟོག་ཞབས་ཞུའི་ས་ཚིགས་སུ་དམག་ཉེན་དམངས་གསུམ་གྱིས་མཉམ་སྒྲུབ་དང་། མཉམ་འགོག མཉམ་འགུལ། མཉམ་གཤིབ་བཅས་ཀྱི་ལས་དོན་སྒྲུབ་ཚུལ་གྱི་སྙན་ཞུ་གསན་རྗེས་པ་སངས་དོན་གྲུབ་ཀྱིས་རྒྱ་ཆེའི་སྤྱི་བདེའི་མི་དམངས་ཉེན་རྟོག་པ་དང་། དྲག་ཆས་ཉེན་རྟོག་དཔོན་དམག གཞི་རིམ་ལས་བྱེད་པ་དང་མང་ཚོགས། དེ་བཞིན་བདེ་འཇགས་སྲུང་སྐྱོང་མི་སྣས་དཀའ་ངལ་ལ་མི་འཛེམས་པར་ལས་དོན་ནན་ཏན་བསྒྲུབས་པ་དང་། མང་ཚོགས་ལ་ཞབས་འདེགས་ཞུས་ནས་ལྷ་སའི་སྤྱི་ཚོགས་དུས་བབ་རྒྱུན་མཐུད་ངང་བརྟན་ལྷིང་ཡོང་རྒྱུར་འགན་ལེན་བྱས་པ་རེད། གཙུག་ལག་ཁང་རྒྱུད་དུ་མི་ཚོགས་མཐུག་པ་དང་ཚོང་དུད་མང་བས་བརྟན་ལྷིང་སྲུང་སྐྱོང་གི་ལས་འགན་ལྕི་པོ་ཡོད་སྟབས་ཚང་མས་ངེས་པར་དུ་དམག་འཁྲུག་ལ་སུན་སྣང་སྐྱེ་བའི་བསམ་ཚུལ་དང་བག་མེད་ལྷོད་གཡེང་གི་བསམ་བློ་མི་འཆང་བར་རང་སྐྱོང་ལྗོངས་ཏང་ཨུད་དང་སྲིད་གཞུང་དང་དེ་བཞིན་བརྟན་ལྷིང་སྲུང་སྐྱོང་གི་འཐབ་ས་དང་པོའི་བཀོད་འདོམས་པུའུ་ཡི་ཞིབ་ཕྲའི་བླང་བྱ་དང་གཏན་ལ་ཕབ་པའི་སྔོན་ཇུས་གཞིར་བཟུང་ནས་རིམ་པ་སྟར་ཆགས་ཀྱིས་འགན་འཁྲི་དོན་འཁྱོལ་དང་། དོགས་ཟོན་ཚགས་དམ་པོ། ལས་ཀར་དོ་སྣང་བཅས་ཀྱི་བྱ་ཐབས་ཐོག་ནས “གནས་ཚུལ་ཆེ་འབྲིང་ཆུང་གསུམ་གང་ཡང་མི་ལྷགས་པ ”བྱེད་དགོས་ཞེས་གསུངས་པ་རེད།
པ་སངས་དོན་གྲུབ་ཀྱིས་ཞིབ་བཤེར་ས་ཚིགས་ཀྱི་སྒྲིག་བཀོད་ལ་རྟོག་ཞིབ་གནང་བ་དང་དུས་མཚུངས་འབྲེལ་ཡོད་འགན་འཁུར་མི་སྣའི་ལས་ཀའི་སྙན་ཞུ་ནན་ཏན་ངང་གསན་རྗེས་ལྷ་སར་ཡོང་སྐབས་ངེས་པར་དུ་བརྒྱུད་དགོས་པའི་ཞིབ་བཤེར་ས་ཚིགས་ཀྱི་ཁྲིམས་འཛིན་ཞིབ་བཤེར་ལས་འགན་ཧ་ཅང་ལྕི་བས་ཁྲིམས་འཛིན་མི་སྣ་ཡོངས་ཀྱིས་ལས་ཀའི་ཁྲོད་ཡང་འབད་བསྐྱར་འབད་དང་མི་འདང་བའི་ཆ་གསབ་པ་དང་ནན་ཏན་ངང་ཞིབ་བཤེར་བྱས་ཏེ་དོཌ་གནས་གང་ཡང་མི་ལུས་པ་བྱེད་པ་དང་ལས་ཕྱོད་ཆེ་རུ་གཏོང་བ་དང་། མང་ཚོཌ་ལ་སྟབས་བདེ་བསྐྲུན་པ། སེམས་རྩ་འཁོལ་པོས་མང་ཚོཌ་ལ་ཞབས་འདེཌ་ཞུ་བ་བཅས་བྱས་ཏེ་རང་ལྗོངས་ཀྱི་འཕེལ་རྒྱས་དང་བརྟན་ལྷིང་ཆེད་ལེགས་སྐྱེས་གསར་པ་དེ་བས་ཆེ་བ་འབུལ་དགོས་ཞེས་གསུངས་པ་རེད།
ལྟ་སྐུལ་ཞིབ་བཤེར་བྱེད་རིང་རྒྱ་ཆེའི་སྤྱི་བདེའི་མི་དམངས་ཉེན་རྟོག་པ་དང་དྲག་ཆས་ཉེན་རྟོག་དཔོན་དམག་གིས་ངེས་པར་དུ་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཐུགས་ཁུར་དེ་ལས་ཀ་ཧུར་ཐག་བྱེད་པའི་སྒུལ་ཤུགས་སུ་འགྱུར་བ་བྱས་ནས་ལས་ཀའི་བརྩོན་སེམས་དེ་བས་ཆེ་བའི་ངང་ནུས་ཤུགས་ཡོད་རྒུ་དང་ཚུལ་ལྡན་ཁྲིམས་འཛིན་ཐོག་ནས་འགལ་བ་དང་མི་མངོན་པའི་རྐྱེན་རྩ་རྣམས་ཆུང་ས་ནས་མེད་པ་བཟོས་ཏེ་ཏང་གི་ཚོགས་ཆེན་བཅོ་བརྒྱད་པའི་དགོངས་དོན་མཛུབ་སྟོན་དུ་བྱས་ཐོག་སྤྱི་ཚོགས་དོ་དམ་ལ་ཤུགས་སྣོན་དང་གསར་གཏོད་ཆེད་སྟོབས་ཤུགས་སྐྱེས་སུ་འབུལ་རྒྱུ་ཡིན་ཞེས་གཅིག་མཇུག་གཉིས་མཐུད་ངང་བཤད་པ་རེད།