ཟླ་10ཚེས་23ཉིན་གྱི་ཕྱི་དྲོ་བོད་རང་སྐྱོང་ལྗོངས་ཏང་ཨུད་དྲིལ་བསྒྲགས་པུས་ཆེད་དོན་ཚོགས་འདུ་འཚོགས་ཏེ་ཧྲུའུ་ཅི་ཁྲེན་ཆོན་གོ་དང་རྒྱུན་ལས་ཧྲུའུ་ཅི་གཞོན་པ་ཧའོ་ཕུང་གིས 《འདི་ལོ་ཚུན་ལྗོངས་ཡོངས་ཀྱི་དྲིལ་བསྒྲགས་བསམ་བློའི་རིག་གནས་ལས་དོན་གནས་ཚུལ་སྐོར་གྱི་སྙན་ཞུའི 》ནང་བཏོན་པའི་མཆན་འགོད་མཛུབ་སྟོན་གལ་ཆེན་གྱི་དགོངས་དོན་བརྒྱུད་བསྒྲགས་སློབ་སྦྱོང་དང་ལག་བསྟར་དོན་འཁྱོལ་བྱེད་པ་དང་འབྲེལ་དྲིལ་བསྒྲགས་བསམ་བློའི་རིག་གནས་ཁོངས་གཏོགས་ཀྱིས་ལྗོངས་ཡོངས་ཀྱི་བརྟན་ལྷིང་སྲུང་སྐྱོང་ལས་དོན་གྱི་བཪྙན་འཕྲིན་ཁ་པར་ཚོགས་འདུའི་དགོངས་དོན་དོན་འཁྱོལ་བྱས་ཚུལ་ལ་ལྟ་སྐུལ་དང་ཞིབ་བཤེར་བྱས་ནས་ཏང་གི་ཚོགས་ཆེན་བཅོ་བརྒྱད་པར་བསུ་བ་ཞུ་བའི་ལས་དོན་ཁག་བཀོད་སྒྲིག་བྱས་པ་རེད།
བོད་ལྗོངས་ཏང་ཨུད་ཀྱི་རྒྱུན་ཨུ་དྲིལ་བསྒྲགས་པུའི་པུའུ་ཀྲང་ཏུང་ཡུན་ཧུའུ་ཚོགས་འདུར་ཕེབས་པ་དང་འབྲེལ་གསུང་བཤད་ཀྱང་གནང་བ།
ཏུང་ཡུན་ཧུའུ་ཡིས་ལྗོངས་ཡོངས་ཀྱི་དྲིལ་བསྒྲགས་བསམ་བློའི་རིག་གནས་འཐབ་ཕྱོགས་ཀྱིས་ངེས་པར་དུ་ཆབ་སྲིད་ཀྱི་འདུ་ཤེས་དང་། སྤྱི་ཡོངས་ཀྱི་འདུ་ཤེས། འགན་འཁྲིའི་འདུ་ཤེས་བཅས་སྔར་བས་ཆེ་རུ་གཏོང་དགོས་ཤིང་། གཅིག་ནས་ཏང་གི་ཚོགས་ཆེན་བཅོ་བརྒྱད་པ་བསུ་ཞུ་བ་དང་སློབ་སྦྱོང་དང་། དྲིལ་བསྒྲགས། དོན་འཁྱོལ་བཅས་བྱེད་པའི་གཙོ་ཐིག་དེར་དམ་པོར་དམིགས་པའི་ཐོག་སྒྲིག་འཛུགས་ཞིབ་ཚགས་དང་། ནུས་ཤུགས་ཡོད་རྒུ། དོན་འཁྱོལ་ལ་དམ་འཛིན་བཅས་བྱས་ནས་ཏང་གི་ཚོགས་ཆེན་བཅོ་བརྒྱད་པར་བསུ་བ་ཞུ་བའི་དྲིལ་བསྒྲགས་ཀྱི་མཐོ་རླབས་གསར་པ་ཞིག་མགྱོགས་མྱུར་འཕྱུར་བ་བྱེད་དགོས་པ་དང་། གཉིས་ནས་དོ་དམ་ལ་ཤུགས་སྣོན་ཏན་ཏིག་རྒྱག་པ་དང་འགན་འཁྲི་ཆེ་རུ་གཏོང་བའི་ཐོག་སུས་གཙོ་གཉེར་དོ་དམ་བྱས་ན་དེས་འགན་འཁུར་བ་དང་གཏོགས་ཁོངས་ས་ཆའི་དོ་དམ་གྱི་རྩ་དོན་གཞིར་བཟུང་ས་སྲུང་འགན་ཡོད་དང་། ས་སྲུང་འགན་ཁུར། ས་སྲུང་འགན་སྒྲུབ་བཅས་བྱེད་པ་དང་གསར་འགྱུར་གླེང་ཕྱོགས་གྱི་འཕྲལ་སྡོམ་ཐག་གཅོད་ཀྱི་ལམ་ལུགས་འཐུས་སྒོ་ཚང་དུ་བཏང་ནས་ཏང་དང་སྲིད་གཞུང་གི་སྐད་སྒྲ་ཆེ་རུ་གཏོང་བ་དང་དགྲ་ཡའི་ཕྱོགས་གཏོགས་ཀྱི་སྐད་སྒྲ་མཐའ་གཅིག་ཏུ་མནན་ཏེ་འདུ་ཤེས་འཛིན་སྟངས་དང་རིག་གནས་ཀྱི་ཁྱབ་ཁོངས་རྦད་དེ་བདེ་འཇགས་ཡོང་རྒྱུ་འགན་ལེན་བྱེད་དགོས་པ། གསུམ་ནས་གཏན་འཁེལ་བྱས་པའི་ལས་ཀའི་འཆར་གཞིར་བསྡུར་བ་བྱས་ཏེ་སྒོ་ཀུན་ནས་གཙང་གསེད་ནན་ཏན་བྱེད་པ་དང་སྐུལ་འདེད་ཞིབ་བཤེར་བྱེད་ཤུགས་ཆེ་རུ་བཏང་ནས་དུས་ཐོག་ཏུ་སྤུས་འབོར་གཉིས་ལྡན་གྱི་སྒོ་ནས་ལོ་ཧྲིལ་པོའི་ལས་འགན་ལེགས་གྲུབ་ཡོང་རྒྱུ་འགན་ལེན་བྱེད་དགོས། དུས་མཚུངས་སྔ་ཙམ་བཀོད་སྒྲིག་བྱས་ཏེ་འདི་ལོའི་ལས་དོན་སྒོ་ཀུན་ནས་ཕྱོགས་སྡོམ་ཡག་པོ་བྱས་ཏེ་སང་ལོའི་ལས་དོན་འཆར་འགོད་ཡག་པོ་བྱེད་དགོས་པའི་བླང་བྱ་བཏོན་གནང་བ་རེད།