ཟླ་10ཚེས་20ནས་24ཉིན་བར་ལྗོངས་ཏང་ཨུད་ཀྱི་རྒྱུན་ཨུ་དང་། རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ། རང་སྐྱོང་ལྗོངས་ཀྱི་བརྟན་ལྷིང་སྲུང་སྐྱོང་བཀོད་འདོམས་པུའི་རྒྱུན་ལས་བཀོད་འདོམས་པ་གཞོན་པ་བཅས་ཡིན་པའི་བློ་བཟང་རྒྱལ་མཚན་གྱིས་ནག་ཆུ་གྲོང་རྡལ་དར་ཆ་ལྷ་མོ་ཨུ་ཡོན་ལྷན་ཁང་དུ་ཕེབས་ནས་སྤྱི་ཚོགས་དོ་དམ་ལ་ཤུགས་སྣོན་དང་གསར་གཏོད་བྱེད་པ་དང་གྲོང་ཁྱེར་དང་གྲོང་རྡལ་གྱི་དྲ་མིག་ཅན་འཛུགས་སྐྱོང་ལ་སྐུལ་འདེད་གཏོང་བའི་ཐད་མཛུབ་ཁྲིད་ཞིབ་བཤེར་གནང་བ་མ་ཟད། འབྲི་རུ་རྫོང་དང་སྙན་རོང་རྫོང་དུ་བརྟན་ལྷིང་སྲུང་སྐྱོང་གི་ལས་དོན་ཁག་ལ་བཀོད་འདོམས་དང་ལྟ་སྐུལ་མཛུབ་ཁྲིད་དང་ཞིབ་བཤེར་གནང་བ་རེད།

    ནག་ཆུ་གྲོང་རྡལ་དར་ཆ་ལྷ་མོ་ཨུ་ཡོན་ལྷན་ཁང་དུ་གྲོང་ཁྱེར་དང་གྲོང་རྡལ་གྱི་དྲ་མིག་ཅན་འཛུགས་སྐྱོང་གི་གྲབས་འཛུགས་ལས་དོན་དུས་ཚོད་དམ་འཛིན་གྱིས་སྒྲུབ་བཞིན་ཡོད་པ་དང་བློ་བཟང་རྒྱལ་མཚན་དང་བཅས་པས་ལས་དོན་ཁག་གི་འཕེལ་ཚུལ་མཁྱེན་རྟོགས་ཞིབ་ཕྲ་གནང་བ་མ་ཟད་ཕྱོགས་གཅིག་ནས་སྤྱི་ཚོགས་བརྟན་ལྷིང་གི་ལས་དོན་ཁག་དམ་འཛིན་བྱེད་པ་དང་ཕྱོགས་གཞན་ཞིག་ནས་གྲོང་ཁྱེར་དང་གྲོང་རྡལ་གྱི་དྲ་མིག་ཅན་འཛུགས་སྐྱོང་ལ་དམ་འཛིན་བྱས་ནས་ཐུན་མོང་ཐོག་སྐུལ་འདེད་གཏོང་བ་དང་ཕན་ཚུན་སྐུལ་འདེད་གཏོང་རྒྱུ་མཐའ་འཁྱོངས་བྱེད་དགོས་པ་སྟེ། གཅིག་ནས་བྱ་ཐབས་ཞིབ་ཕྲ་བཟོ་དགོས་ཤིང་། ལས་ཀའི་བསམ་ཕྱོགས་གསལ་བཟོ་དང་། སྔོག་འདོན་བྱེད་ཚད་སྔར་བས་ཟབ་ཏུ་གཏོང་བ། ཁྱབ་རྒྱ་ཆེ་རུ་དང་སྤེལ་ཤུགས་ཆེ་རུ་གཏོང་བ། དོན་དངོས་དང་ཟུང་འབྲེལ་བྱེད་པ་བཅས་ཀྱི་སྒོ་ནས་གྲོང་ཁྱེར་དང་གྲོང་རྡལ་གྱི་དྲ་མིག་ཅན་ལ་སྒོ་ཀུན་ནས་སྐུལ་འདེད་གཏོང་བ་དང་། འབྲེལ་མཐུད་ལ་ཤུགས་སྣོན་བརྒྱབ་ནས་སྤྱི་ཚོགས་དོ་དམ་བྱེད་ལེགས་སུ་གཏོང་བ། མཐིལ་རྟོགས་པ་བྱས་ནས་གྲལ་བཤེར་དང་གཙང་བཤེར་རྒྱུན་གཏན་ཅན་དུ་འགྱུར་བ་བྱེད་པ། ལས་སྒྲུབ་དང་སློབ་སྦྱོང་ཟུང་འབྲེལ་གྱིས་དམངས་ཕན་ཉེན་རྟོག་ཞབས་ཞུའི་ས་ཚིགས་ཚད་ལྡན་ཅན་དུ་འགྱུར་རྒྱུར་སྐུལ་འདེད་གཏོང་བ་བཅས་བྱེད་དགོས་པ་དང་། གཉིས་ནས་དོན་དངོས་དང་ཟུང་འབྲེལ་བྱེད་དགོས་ཤིང་། དུས་བསྟུན་འཕེལ་རྒྱས་མཐའ་འཁྱོངས་ཀྱིས་ཟམ་མི་ཆད་པར་འགྱུར་ལྡོག་འགྲོ་བའི་སྤྱི་ཚོགས་ཀྱི་དུས་བབ་དང་རང་འགུལ་ངང་འཚམས་པ་བྱས་ཏེ་རྫོང་དང་གྲོང་རྡལ་གྱི་དོན་དངོས་དང་ཟུང་འབྲེལ་གྱིས་གསར་གཏོད་ཀྱི་རང་བཞིན་ལྡན་པའི་སྒོ་ནས་ལས་དོན་བསྒྲུབས་ཏེ་སྤྱི་ཚོགས་དོ་དམ་གྱི་སྔོན་ཐོན་ཉམས་མྱོང་དང་གྲུབ་འབྲས་དེ་ས་གནས་ཅན་དང་། ཁྱད་ལྡན་ཅན། ཞིབ་ཕྲ་ཅན་བཅས་སུ་འགྱུར་བ་བྱས་ཐོག་ཡུལ་དངོས་སུ་ཏན་ཏིག་ངང་བསྐྱོད་པ་དང་དུས་མཚམས་དབྱེ་ནས་ལག་བསྟར་བྱེད་པ་དང་། ལམ་སྲོལ་གསར་གཏོད་དང་སྒྲིག་གཞི་མཐུན་སྦྱོར་ཡོང་བ་བྱེད་པ། འགན་འཁྲི་གསལ་བཟོ་དང་བྱེད་ནུས་ཆེ་རུ་གཏོང་བ་བཅས་བྱས་ནས་ལས་དོན་དེ་དམིགས་སར་དོན་འཁྱོལ་ཡོང་བ་བྱེད་དགོས་པ། གསུམ་ནས་སྟོབས་ཤུགས་གཅིག་ཏུ་སྒྲིལ་དགོས་ཤིང་། འགག་རྩ་ཡིན་པའི་ལས་བྱེད་པར་དམ་འཛིན་ཡག་པོ་བྱས་ནས་གཙོ་གནད་གཤམ་འོག་ཏུ་ཕྱོགས་པ་དང་གྲོང་ཚོར་ཕྱོགས་ཏེ་དྲ་མིག་ཅན་ནང་ལས་ཀ་བྱེད་པ་དང་། དྲ་མིག་ཅན་ནང་སྦྱོང་བརྡར་བྱེད་པ། དྲ་མིག་ཅན་ནང་འཚར་ལོངས་ཡོང་བ་བཅས་བྱེད་དགོས། དེ་དང་ཕྱོགས་མཚུངས་མང་ཚོགས་སྐུལ་སློང་དང་སྒྲིག་འཛུགས་བྱེད་པ་དང་མང་གྲོས་བློ་བསྡུ་དང་མཐུན་སྒྲིལ་རྡོག་རྩ་གཅིག་སྒྲིལ་བྱས་ནས་གྲོང་ཁྱེར་དང་གྲོང་རྡལ་གྱི་དྲ་མིག་ཅན་འཛུགས་སྐྱོང་གི་ལས་དོན་ལ་སྐུལ་འདེད་གཏོང་རྒྱུ་དེ་སྔར་བས་ཏན་ཏིག་དང་ཡག་པོ་སྒྲུབ་དགོས་པ་བཅས་ཀྱི་བླང་བྱ་བཏོན་གནང་བ་རེད།

    བློ་བཟང་རྒྱལ་མཚན་ད་དུང་འབྲི་རུ་རྫོང་གི་ཤག་ཆུ་གྲོང་རྡལ་དང་། གཡང་ཤོད་ཤང་། བན་དཀར་ཤང་། སྙན་རོང་རྫོང་གི་སྙན་རོང་གྲོང་རྡལ་དང་སེ་ཆེན་ཤང་དུ་ལས་དོན་ལ་མཛུབ་ཁྲིད་གནང་བར་ཕེབས་པ་རེད།