འདི་ནི་ཀྲུའུ་ཞི་པད་མ་འཕྲིན་ལས་ཀྱིས་ཞོ་ལེགས་གློག་འབྱེད་ཟངས་ཀྱི་འཁོར་ཁང་དུ་ཟངས་ཀྱི་རྒྱུ་ཆར་གཟིགས་ཞིབ་གནང་བའི་གནས་ཚུལ་ཡིན་པ།

    ཚེས་22ཉིན་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་པད་མ་འཕྲིན་ལས་སྙེ་མོ་རྫོང་ཟངས་ལས་གསར་སྤེལ་ཚད་ཡོད་འགན་འཁྲི་ཀུང་སིའི་བོང་ཁང་གཏེར་ཁུལ་དུ་ཕེབས་ཏེ་གཏེར་ཁུལ་གསར་སྤེལ་དང་འཛུགས་སྐྲུན་གྱི་གནས་ཚུལ་ལ་བརྟག་ཞིབ་གནང་ཞིང་། ཁོང་གིས་ཚན་རིག་དང་མཐུན་པའི་འཆར་འགོད་བྱེད་པ་དང་ལས་ཀའི་མྱུར་ཚད་མགྱོགས་སུ་གཏོང་བའི་ཐོག་ལུགས་མཐུན་དང་གོ་རིམ་ལྡན་པའི་སྒོ་ནས་གཏེར་ཁའི་ཐོན་ཁུངས་གསར་སྤེལ་བྱས་ནས་རྫོང་ཁོངས་ཀྱི་དཔལ་འབྱོར་ཆུ་ཚད་མཐོ་རུ་ཧུར་ཐག་གཏོང་དགོས་ཞེས་བླང་བྱ་བཏོན་གནང་བ་རེད། རང་སྐྱོང་ལྗོངས་སྲིད་གཞུང་ཏང་ཙུའུ་ཡི་ཁོངས་མི་དྲུང་ཆེ་ཀའོ་དབྱང་གིས་ཕེབས་རོགས་ཞུས་ནས་བརྟག་ཞིབ་གནང་བ་རེད།

    བོང་ཁང་གཏེར་ཁུལ་དུ་གནས་པའི་སྙེ་མོ་མཐིང་ཀུང་ཟངས་གཏེར་གློག་འབྱེད་ཟངས་ཏུན་5000གི་འཛུགས་སྐྲུན་རྣམ་གྲངས་ནི་རང་སྐྱོང་ལྗོངས་ཀྱི “ལོ་ལྔ་ཚན་བཅུ་གཉིས་པའི ”འཆར་འགོད་ཀྱི་གཙོ་གནད་འཛུགས་སྐྲུན་རྣམ་གྲངས་ཡིན། པད་མ་འཕྲིན་ལས་དང་བཅས་པ་སྔ་རྗེས་སུ་སྙེ་མོ་མཐིང་ཀུང་ཟངས་གཏེར་གློག་འབྱེད་ཟངས་ཏུན་5000གི་འཛུགས་སྐྲུན་རྣམ་གྲངས་ཀྱི་རྩད་ཞིབ་ས་ཚིགས་དང་ཞོལ་རྭ་གློག་འབྱེད་ཟངས་ཀྱི་འཁོར་ཁང་ནང་དུ་ཕེབས་ཏེ་གཏེར་ཁུལ་གྱི་ཐོན་སྐྱེད་གཉེར་སྐྱོང་དང་གསར་སྤེལ་འཛུགས་སྐྲུན་གྱི་གནས་ཚུལ་ལ་བརྟག་ཞིབ་གནང་བ་དང་འབྲེལ་གཏེར་ཁུལ་གྱི་མི་སེར་གནས་སྤོ་དང་གཏེར་ཁུལ་ཉེ་འགྲམ་གྱི་སྣོད་བཅུད་ཁོར་ཡུག་སྲུང་སྐྱོང་གི་གནས་ཚུལ་ལ་ཡང་མཁྱེན་རྟོགས་ཞིབ་ཕྲ་གནང་བ་རེད། སྙེ་མོའི་ཟངས་ལས་ཀྱི་བོང་ཁང་གཏེར་ཁུལ་འཛུགས་སྐྲུན་ཐད་ཐོབ་པའི་གྲུབ་འབྲས་ལ་གདེང་འཇོག་གང་ལེགས་གནང་རྗེས་ཁོང་གིས་རིམ་པ་ཁག་དང་སྡེ་ཚན་ཁག་གིས་དམངས་འཚོ་འགན་ལེན་དང་ལེགས་སུ་གཏོང་རྒྱུར་ཤུགས་བརྒྱབ་སྟེ་མང་ཚོགས་འབབ་འཕར་ཕྱུག་འགྱུར་ཡོང་རྒྱུར་སྐུལ་འདེད་ཧུར་ཐག་གཏོང་བ་དང་གཏེར་ཁ་གསར་སྤེལ་བྱེད་པའི་ཁྲོད་མང་ཚོགས་ཀྱི་གནས་སྤོ་བཀོད་སྒྲིག་དང་རྩྭ་ར་རྨོ་ཞིང་སོགས་ཀྱི་གནད་དོན་རབ་དང་རིམ་པ་ཐག་གཅོད་ཡག་པོ་བྱས་ནས་མང་ཚོགས་ཀྱི་ཐོན་སྐྱེད་དང་འཚོ་བའི་ཆུ་ཚད་གཏེར་ཐོན་གསར་སྤེལ་ཁྲོད་མཐོ་རུ་འགྲོ་རྒྱུ་འགན་ལེན་བྱེད་དགོས་པ་དང་། “གསར་སྤེལ་ཁྲོད་སྲུང་སྐྱོང་བྱེད་པ་དང་། སྲུང་སྐྱོང་ཁྲོད་གསར་སྤེལ་བྱེད་པའི ”རྩ་དོན་ལ་ནན་པོར་གཞིགས་ནས་སྔ་ཕྱི་བར་གསུམ་དུ་སྣོད་བཅུད་ཁོར་ཡུག་སྲུང་སྐྱོང་བྱ་རྒྱུ་དེ་གཏེར་ཐོན་གསར་སྤེལ་གྱི་གནས་བབ་གལ་ཆེན་དུ་བཞག་ནས་དམ་འཛིན་ལྷོད་མེད་བྱེད་དགོས་པ། འཕེལ་རྒྱས་དང་བརྟན་ལྷིང་གི་འབྲེལ་བ་དང་། ཆ་ཤས་ཀྱི་ཁེ་ཕན་དང་སྤྱི་ཡོངས་ཀྱི་ཁེ་ཕན་གྱི་འབྲེལ་བ། མིག་སྔ་དང་ཕུགས་ཀྱི་འབྲེལ་བ་བཅས་ཐག་གཅོད་ཡག་པོ་བྱས་ཏེ་གཏེར་ཁུལ་ཞི་མཐུན་ཡོང་རྒྱུ་འགན་ལེན་དང་སྤྱི་ཚོགས་བརྟན་ལྷིང་ཡོང་རྒྱུ་འགན་ལེན་བྱེད་པ་དང་འབྲེལ་ཁེ་ལས་ཀྱི་འཕེལ་རྒྱས་ཁྲོད་ནས་མི་སེར་ལ་ཕན་པ་དངོས་ཐོབ་པ་བྱས་ནས་དཔལ་འབྱོར་འཕེལ་རྒྱས་ཁྲོད་ཏང་གི་སྲིད་ཇུས་བཟང་པོ་དང་སྤྱི་ཚོགས་རིང་ལུགས་ལམ་ལུགས་ཀྱི་ཁྱད་འཕགས་རང་བཞིན་ཚོར་ཐུབ་པ་བྱེད་དགོས་པ། ཁེ་ལས་ལ་ཐོན་སྐྱེད་ཀྱི་ཁོར་ཡུག་བཟང་པོ་ཞིག་གཏོད་པ་དང་དུས་མཚུངས་ལྷག་བསམ་རྣམ་དག་གི་རྣམ་འགྱུར་ཐོག་ནས་ཁེ་ལས་དང་ས་གནས་དང་ཁེ་ལས་དང་མང་ཚོགས་དབར་གྱི་འབྲེལ་གཏུགས་སྤེལ་རེས་ལ་སྐུལ་འདེད་བཏང་སྟེ་ཞི་མཐུན་རོགས་རེས་ཀྱི་རྣམ་པ་བཟང་པོ་ཞིག་སྐྲུན་དགོས་པ། རང་སྐྱོང་ལྗོངས་ཀྱི་འབྲེལ་ཡོད་སྡེ་ཚན་ཁག་གིས་གོ་རིམ་ཚད་ལྡན་དུ་གཏོང་བ་དང་། འགྲོ་ལུགས་སྟབས་བདེ་རུ་གཏོང་བ། ལྟ་སྐུལ་དོ་དམ་ལ་ཤུགས་སྣོན་རྒྱག་པ་བཅས་བྱས་ཏེ་དུས་ཐོག་ཏུ་གནས་ཚུལ་ཤེས་རྟོགས་ཐུབ་པ་དང་། དུས་ཐོག་ཏུ་བཅོས་སྒྲིག་ཐུབ་པ་བྱེད་པ། རྦད་དེ་བདེ་འཇགས་ཡོང་རྒྱུ་བཅས་འགན་ལེན་བྱེད་དགོས་ཞེས་ནན་བཤད་གནང་བ་དང་འབྲེལ་རང་སྐྱོང་ལྗོངས་ཀྱི་སྡེ་ཚན་ཁག་དང་། ལྷ་ས་གྲོང་ཁྱེར། སྙེ་མོ་རྫོང་། ཁེ་ལས་བཅས་བཞི་ཡིས་མཉམ་འགུལ་གྱི་ཐོག་ནས་ཐོན་ཁུངས་ཀྱི་ལེགས་ཆར་བརྟེན་ཏེ་གཏེར་ལས་གསར་སྤེལ་ཡག་པོ་དང་། འཛུགས་སྐྲུན་ཡག་པོ། གཉེར་སྐྱོང་ཡག་པོ་བཅས་བྱས་ནས་རྫོང་ཁོངས་ཀྱི་དཔལ་འབྱོར་འཕེལ་རྒྱས་ཀྱི་ཆུ་ཚད་མཐོ་རུ་ཧུར་ཐག་གཏོང་རྒྱུའི་ཐུགས་རེ་གནང་བ་རེད།

    པད་མ་འཕྲིན་ལས་དང་བཅས་པ་ད་དུང་སྙེ་མོ་རྫོང་མི་དམངས་ལམ་གྱི་དམངས་ཕན་ཉེན་རྟོག་ཞབས་ཞུའི་ས་ཚིགས་དང་རབ་རྒྱས་དགོན་དོ་དམ་ཨུ་ཡོན་ལྷན་ཁང་དང་དེ་བཞིན་སྙེ་མོ་རྫོང་དར་རོང་གྲོང་རྡལ་ལྷུན་སྒང་གྲོང་ཚོར་བཅའ་སྡོད་རང་སྐྱོང་ལྗོངས་བུད་མེད་མཉམ་འབྲེལ་ལྷན་ཚོགས་ཀྱི་ལས་དོན་རུ་ཁག་བཅས་སུ་ཕེབས་ནས་ལས་སྒྲུབ་མི་དམངས་ཉེན་རྟོག་པ་དང་། དགོན་པའི་དོ་དམ་ཨུ་ཡོན་ལྷན་ཁང་། གྲོང་ཚོར་བཅའ་སྡོད་ལས་བྱེད་པ་བཅས་ལ་གཟིགས་པ་དང་འབྲེལ་འཚམས་འདྲི་ཡང་གནང་བ་རེད།

    བརྟག་ཞིབ་གནང་རིང་པད་མ་འཕྲིན་ལས་སྙེ་མོ་རྫོང་རུས་པ་ཚིགས་ཆེན་ནད་ཕོག་མཁན་གནས་སྤོ་བྱེད་ཡུལ་དུ་ཕེབས་ཏེ་དུད་ཚང་དབུལ་པོར་གཟིགས་པ་དང་འབྲེལ་འཚམས་འདྲི་ཡང་གནང་བ་རེད།