ཚེས་19ཉིན་གྱི་སྔ་དྲོ་ལྗོངས་ཏང་ཨུད་ཀྱི་རྒྱུན་ཨུ་དྲིལ་བསྒྲགས་པུའི་པུའུ་ཀྲང་ཏུང་ཡུན་ཧུའུ་ཡིས་རླུང་འཕྲིན་བཪྙན་འཕྲིན་ཁོངས་གཏོགས་སུ་བརྟག་ཞིབ་གནང་བ་དང་རླུང་འཕྲིན་བཪྙན་འཕྲིན་ཁོངས་གཏོགས་ཀྱིས་ལྗོངས་ཡོངས་ཀྱི་བརྟན་ལྷིང་སྲུང་སྐྱོང་ལས་དོན་གྱི་བཪྙན་འཕྲིན་ཁ་པར་ཚོགས་འདུའི་དགོངས་དོན་སློབ་སྦྱོང་དང་ལག་བསྟར་བྱས་ཚུལ་དང་དེ་བཞིན་ཏང་གི་ཚོགས་ཆེན་བཅོ་བརྒྱད་པར་བསུ་བ་ཞུ་བའི་གསར་འགྱུར་དྲིལ་བསྒྲགས་དང་གནས་ཚུལ་ལས་དོན་སྤེལ་ཚུལ་ལ་ཞིབ་བཤེར་གནང་བ་མ་ཟད་ལས་བྱེད་ལས་བཟོ་ཚོར་གཟིགས་པ་དང་འཚམས་འདྲི་ཡང་གནང་བ་རེད།
འབྲེལ་ཡོད་གནས་ཚུལ་སྙན་སེང་གསན་རྗེས་ཏུང་ཡུན་ཧུའུ་ཡིས་ལྗོངས་ཡོངས་ཀྱི་གསར་འགྱུར་འཐབ་ཕྱོགས་ཀྱིས་ལྗོངས་ཡོངས་ཀྱི་བརྟན་ལྷིང་སྲུང་སྐྱོང་ལས་དོན་གྱི་བཪྙན་འཕྲིན་ཁ་པར་ཚོགས་འདུའི་ཐོག་ཧྲུའུ་ཅི་ཁྲེན་ཆོན་གོ་དང་རྒྱུན་ལས་ཧྲུའུ་ཅི་གཞོན་པ་ཧའོ་ཕུང་གིས་གནང་བའི་གསུང་བཤད་གལ་ཆེན་གྱི་དགོངས་དོན་ལག་བསྟར་དོན་འཁྱོལ་གཏིང་ཟབ་བྱས་ནས་ངར་ཤུགས་ཆེར་བསྐྱེད་དང་ནུས་ཤུགས་ཡོད་རྒུས་གསར་འགྱུར་དྲིལ་བསྒྲགས་ལས་དོན་ཏན་ཏིག་ངང་ཡག་པོ་སྒྲུབ་པ་དང་ནང་ཁུལ་དུ་སྟོབས་ཤུགས་ལྡན་པ་དང་ཕྱི་ཕྱོགས་སུ་གཟུགས་བཪྙན་བཟང་པོ་ཧུར་ཐག་གཏོད་དེ་ཏང་གི་ཚོགས་ཆེན་བཅོ་བརྒྱད་པ་རྒྱལ་ཁའི་ངང་འཚོག་ཆེད་བཀྲ་ཤིས་འཆམ་མཐུན་དང་། མཐུན་སྒྲིལ་ཡར་ཐོན། ཞི་མཐུན་བརྟན་ལྷིང་བཅས་ཀྱི་རྣམ་པ་བཟང་པོ་ཞིག་གཏོད་དགོས་པ་སྟེ། གཅིག་ནས་ཏང་གི་ཚོགས་ཆེན་བཅོ་བརྒྱད་པ་རྒྱལ་ཁའི་ངང་འཚོག་རྒྱུར་བསུ་བ་ཞུ་བའི་གསར་འགྱུར་དྲིལ་བསྒྲགས་དང་གནས་ཚུལ་སྤེལ་བའི་ལས་དོན་ནུས་ཤུགས་ཡོད་རྒུས་ཡག་པོ་སྒྲུབ་ནས་གསོན་ཉམས་ལྡན་པ་དང་། གཟུགས་བཪྙན་ལྡན་པ། ཞིབ་ཅིང་ཕྲ་བ། ཆ་ལག་ཚང་བ་བཅས་ཀྱི་ཐོག་ནས་རང་ལྗོངས་ཀྱི་དཔལ་འབྱོར་དང་། ཆབ་སྲིད། རིག་གནས། སྤྱི་ཚོགས། སྣོད་བཅུད། ཏང་འཛུགས་སྐྱོང་བཅས་ལ་ཐོབ་པའི་གྲུབ་འབྲས་ཧ་ཅང་ཆེན་པོ་དང་དེ་བཞིན་མི་རིགས་ཁག་གི་མི་དམངས་ཚོས་བདེ་སྐྱིད་ལྡན་པའི་འཚོ་བ་ལོངས་སྤྱོད་བྱེད་ཚུལ་མཚོན་པ་དང་ཏང་དང་སྲིད་གཞུང་གི་གསུང་སྒྲ་ཁྱིམ་ཚང་ཁྲི་སྟོང་མང་པོར་ཁྱབ་པ་བྱས་ཏེ་སྤྱི་ཚོགས་རིང་ལུགས་ཀྱི་བོད་གསར་འཛུགས་སྐྲུན་བྱེད་པའི་བསམ་པའི་སྟོབས་ཤུགས་ཆེན་པོ་གོང་བུར་འགྲིལ་བ་བྱེད་པ་དང། གཉིས་ནས་འཕྲིན་སྦྲེལ་དྲ་བ་གཏོད་རྒྱུར་སྔར་བས་མཐོང་ཆེན་བྱེད་པ་དང་གསར་འགྱུར་དྲིལ་བསྒྲགས་ལས་དོན་ཁྲོད་ཀྱི་གཙོ་རྒྱུན་གསར་འགྱུར་དྲ་ཚིགས་ཀྱི་གནས་བབ་དང་ནུས་པར་ངོས་འཛིན་གང་ལེགས་བྱས་ནས་དྲ་བ་དེ་གླེང་ཕྱོགས་ལ་ཁྲིད་སྟོན་བྱེད་པའི་གཡུལ་ས་གཙོ་བོ་དང་འདུ་ཤེས་འཛིན་སྟངས་འཐབ་རྩོད་ཀྱི་འཐབ་ས་གཙོ་བོར་བརྩིས་ནས་འཛུགས་སྐྲུན་བྱེད་པ་དང་། གསར་དར་སྨྱན་སྦྱོར་དྲིལ་བསྒྲགས་ཀྱི་མཐོ་ས་བཙན་བཟུང་བྱེད་པ། དྲ་བའི་ཐོག་ཆ་འཕྲིན་བརྒྱུད་སྤེལ་དང་འདུ་ཤེས་འཛིན་སྟངས་འཐབ་རྩོད་ཀྱི་རང་འགུལ་དབང་ཆ་ཁོང་དུ་ཆུད་པ་བཅས་བྱས་ནས་དྲ་ཐོག་གི་བདེ་འཇགས་འགོག་སྲུང་འཛིང་རགས་བརྟན་པོ་ཞིག་དངོས་འབྲེལ་གཏོད་པ། གསུམ་ནས་ཕྱི་ཕྱོགས་སུ་དྲིལ་བསྒྲགས་བྱེད་པའི་ལས་དོན་ལ་སྔར་བས་མཐོང་ཆེན་བྱེད་པ་དང་ཐོན་ཁུངས་ཡོད་དོ་ཅོག་བསྡུ་སྒྲིལ་དང་སྟོབས་ཤུགས་ཡོད་ཚད་སྐུལ་སློང་བྱས་ནས་བོད་ཀྱི་དྲང་ཕྱོགས་དྲིལ་བསྒྲགས་ལ་ཤུགས་སྣོན་ཏན་ཏིག་རྒྱག་པ་དང་། ཏཱ་ལ་སྐྱེ་ཕྲེང་བཅུ་བཞི་པའི་རུ་ཚོགས་ལ་འཛིན་པའི་གླེང་ཕྱོགས་ཀྱི་འཐབ་རྩོད་ནུས་ལྡན་ངང་སྤེལ་བ། རྒྱལ་སྤྱིའི་སྤྱི་ཚོགས་ཀྱིས་དངོས་ཡོད་དང་འཕེལ་རྒྱས་འགྲོ་བཞིན་པའི་བོད་ལྗོངས་ཤེས་རྟོགས་ཐུབ་ཚད་ཟབ་ཏུ་གཏོང་བ་བཅས་བྱས་ནས་སྤྱི་ཚོགས་རིང་ལུགས་བོད་གསར་གྱི་གཟུགས་བཪྙན་བཟང་པོ་སྔར་བས་འཛུགས་པ་བཅས་བྱེད་དགོས་པའི་ནན་བཤད་གནང་བ་རེད།