ཚེས་16ནས་ཚེས་19ཉིན་བར་རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་དང་། རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ། རང་སྐྱོང་ལྗོངས་བརྟན་ལྷིང་སྲུང་སྐྱོང་བཀོད་འདོམས་པུའི་རྒྱུན་ལས་བཀོད་འདོམས་པ་གཞོན་པ་བཅས་ཡིན་པའི་བློ་བཟང་རྒྱལ་མཚན་གྱིས་ནག་ཆུ་ས་ཁུལ་འབྲི་རུ་རྫོང་དུ་ཕེབས་ནས་བརྟན་ལྷིང་སྲུང་སྐྱོང་གི་ལས་དོན་ཁག་ལ་བཀོད་འདོམས་དང་། ལྟ་སྐུལ་མཛུབ་ཁྲིད། ཞིབ་བཤེར་བཅས་གནང་བ་རེད།
ཉིན་བཞིའི་རིང་། བློ་བཟང་རྒྱལ་མཚན་དང་བཅས་པས་འབྲི་རུ་རྫོང་རྩ་ལ་ཤང་དང་། ཟླ་ཐང་ཤང་། ཆགས་རྩེ་ཤང་། ཚྭ་ཆུ་ཤང་། རླན་ཆུ་ཤང་། འབྲི་རུ་གྲོང་རྡལ་བཅས་སུ་ཕེབས་ཏེ་གློ་བུར་དུ་ཞིབ་བཤེར་གནང་བའམ་ཡང་ན་སྙན་ཞུ་གསན་པ་དང་། རྫོང་དང་ཤང་གི་ལས་བྱེད་པ་དང་ལྷན་དུ་གནད་དོན་དབྱེ་ཞིབ་དང་། ཡོད་མེད་ཞིབ་བཤེར་དང་ཆད་ལུས་ཁ་གསབ། གདོང་གཏུག་མཛུབ་ཁྲིད་བཅས་ཀྱི་ལས་དོན་སྤེལ་སྐབས་བློ་བཟང་རྒྱལ་མཚན་གྱིས་སྤྱི་ཚོགས་བརྟན་ལྷིང་སྲུང་སྐྱོང་བྱ་རྒྱུ་དེ་མིག་སྔའི་ཐམས་ཅད་ལས་ལྷག་པའི་ལས་འགན་གལ་ཆེན་ཞིག་ཏུ་བརྩིས་ཏེ་ནུས་ཤུགས་ཡོད་རྒུས་ཚོགས་ཆེན་བཅོ་བརྒྱད་པའི་བདེ་འཇགས་སྲུང་སྐྱོང་གི་དམག་འཐབ་ཡག་པོ་ཞིག་རྒྱག་རྒྱུ་དེ་ལས་བྱེད་པའི་ནུས་པར་ཉམས་སད་ཆེ་ཤོས་བྱེད་པར་བརྩི་དགོས་པ་དང་། ནུས་ཤུགས་ཡོད་རྒུས་ཚོགས་ཆེན་བཅོ་བརྒྱད་པའི་རིང་གི་གཡུལ་འགྱེད་ཆེན་པོ་གསུམ་ལ་རྒྱལ་ཁ་ཐོབ་པ་བྱེད་པའི་གྲུབ་འབྲས་དེ་ལས་ཀར་ཚད་འཇོག་བྱེད་སའི་བརྟག་བཤེར་ཆེ་ཤོས་སུ་བྱེད་པ། “མི་ཐོན་པ་གསུམ ”གྱི་ཕུལ་བྱུང་གི་གྲུབ་འབྲས་དེ་ཚོགས་ཆེན་བཅོ་བརྒྱད་པར་བསུ་བ་ཞུ་བའི་ལེགས་སྐྱེས་ཆེ་ཤོས་སུ་བརྩི་དགོས་ཞེས་ནན་བཤད་གནང་བ་དང་ཡང་ཁོང་གིས་བླང་བྱ་བསྟན་དོན། གཅིག་ནས་བསམ་བློའི་ངོས་འཛིན་སྔར་བས་གསལ་དུ་གཏོང་དགོས་ཤིང་། གནས་ཚུལ་ལ་ཚོད་དཔག་ནན་ཙམ་བྱེད་དགོས་པ་དང་། དུས་བབ་ལ་དབྱེ་ཞིབ་ཛ་དྲག་ཙམ་བྱེད་དགོས་པ། གནད་དོན་ལ་བསམ་གཞིག་ཆེ་ཙམ་བྱེད་དགོས་པ་བཅས་དང་དོགས་ཟོན་མཐོར་འདེགས་དང་ཚོར་བ་རྣོ་པོའི་སྒོ་ནས་བརྟན་ལྷིང་སྲུང་སྐྱོང་གི་ལས་དོན་གཏིང་ཟབ་དང་། ཞིབ་ཕྲ། ངོ་མ། ལེགས་པོ་བཅས་ཀྱི་སྒོ་ནས་སྒྲུབ་དགོས་པ་དང་། གཉིས་ནས་ལས་ཀའི་བྱ་ཐབས་དེ་བས་ཏན་ཏིག་ཏུ་གཏོང་དགོས་ཤིང་། བསམ་ཕྱོགས་བསལ་བ་དང་། གནད་དོན་ཚོད་ཐེག་པོ། མི་མངོན་པའི་རྐྱེན་ངན་གྲལ་བཤེར་བཅས་སྔར་ལས་ལྷག་པ་བྱེད་དགོས་པ་དང་གོམ་གང་མདུན་སྤོས་ཀྱིས་དགེ་མཚན་ལྡན་པའི་སྟོབས་ཤུགས་སྐུལ་སློང་བྱེད་པ་དང་། ཕྱོགས་ཁག་གི་སྟོབས་ཤུགས་གོང་བུར་བསྒྲིལ་བ། སྟོབས་ཤུགས་ལུགས་མཐུན་ངང་བགོ་བཤའ་རྒྱག་པ་བཅས་ཀྱི་ཐོག་ནས་བརྟན་ལྷིང་སྲུང་སྐྱོང་བྱ་ཐབས་ཐད་ཀྱི་བཀོལ་སྤྱོད་རང་བཞིན་དང་། དམིགས་གཏད་རང་བཞིན། གོ་ཆོད་རང་བཞིན་བཅས་སྔར་བས་ཆེ་རུ་བཏང་ནས་དོན་འཁྱོལ་དམ་འཛིན་དང་དངོས་འཛིན་དངོས་སྒྲུབ་ཀྱི་ཐོག་ནས་རྫོང་དང་ཤང་གི་དོན་དངོས་དང་ཟུང་འབྲེལ་གྱིས་གསར་གཏོད་རང་བཞིན་གྱི་སྒོ་ནས་དེང་སྐབས་བརྟན་ལྷིང་སྲུང་སྐྱོང་གི་ལས་དོན་ཁག་ཡག་པོ་སྒྲུབ་དགོས་པའི་སྐོར་གྱི་རང་སྐྱོང་ལྗོངས་དང་ནག་ཆུ་ས་ཁུལ་གྱི་བཀོད་སྒྲིག་ཆེ་ཁག་ལག་བསྟར་དོན་འཁྱོལ་ལེགས་པོ་བྱེད་དགོས་པ། གསུམ་ནས་དམངས་འཚོའི་བྱེད་སྒོ་དེ་བས་གཏིང་ཟབ་ཏུ་སྤེལ་དགོས་ཤིང་། རྨང་བརྟན་དམངས་ཕན་གྱི་བྱེད་སྒོར་སྐུལ་འདེད་མུ་མཐུད་གཏིང་ཟབ་ཏུ་གཏོང་དགོས་པ་དང་། དཀའ་ངལ་ཡོད་པར་འཚམས་འདྲི་དང་དཀའ་ངལ་གང་ཡོད་དྲི་བའི་དྲོ་སྐྱིད་སྦྱིན་པའི་བྱེད་སྒོ་རྒྱ་ཁྱབ་ངང་སྤེལ་ཏེ་དམངས་སེམས་འགུག་པ་དང་ཁོར་ཡུག་བཟང་པོ་ཞིག་བསྐྲུན་ནས་རྒྱ་ཆེའི་ཞིང་འབྲོག་མང་ཚོགས་ཚོར་ཏང་དང་སྲིད་གཞུང་གི་ཐུགས་ཁུར་དང་དྲོ་སྐྱིད་ཏན་ཏིག་ཚོར་དུ་འཇུག་དགོས་པ། བཞི་ནས་བརྟན་ལྷིང་སྲུང་སྐྱོང་གི་དམིགས་ཚད་དེ་བས་ཁ་གསལ་དུ་བཟོ་དགོས་ཤིང་། རིམ་ཁག་ཏང་སྲིད་རྩ་འཛུགས་དང་། གྲོང་ཚོར་བཅའ་སྡོད་ལས་དོན་རུ་ཁག དགོན་སྡེར་བཅའ་སྡོད་ལས་བྱེད་པ་བཅས་ནས་སྤྱི་ཚོགས་བརྟན་ལྷིང་སྲུང་སྐྱོང་བྱ་རྒྱུ་དེ་དེང་སྐབས་ཐམས་ཅད་ལས་ལྷག་པའི་ལྡོག་མེད་ལས་འགན་གྱི་དམིགས་ཚད་ཡིན་པའི་བླང་བྱར་དམ་པོར་དམིགས་ཏེ་ཆབ་སྲིད་ཀྱི་འགན་འཁྲི་ཁུར་སེམས་དྲག་པོ་དང་བསམ་པའི་འཁྱེར་སོ་ལེགས་པོའི་སྒོ་ནས་རྒྱུན་མཐུད་དམག་འཐབ་བྱེད་པའི་སྙིང་སྟོབས་དར་སྤེལ་བཏང་སྟེ་དཀའ་སྤྱད་འབད་འབུངས་ཀྱིས་འགག་གནད་སྒྲོལ་བ་བྱེད་པ་དང་། ཡིད་ཆེས་འགྱུར་མེད་དང་ཏན་ཏིག་ནུས་ལྡན་གྱི་ལས་ཀ་བསྒྲུབས་ནས་ཏང་གི་ཚོགས་ཆེན་བཅོ་བརྒྱད་པའི་རིང་ས་ཁུལ་ཡོངས་སྒོ་ཀུན་ནས་བརྟན་ལྷིང་ཡོང་རྒྱུ་འགན་ལེན་བྱེད་པ། “མི་ཐོན་པ་གསུམ ”གྱི་ཕུལ་བྱུང་གྲུབ་འབྲས་ཀྱི་ཐོག་ནས་ལྗོངས་ཏང་ཨུད་བློ་བདེ་བ་དང་མི་རིགས་ཁག་གི་ལས་བྱེད་དང་མང་ཚོགས་བློ་ཡིད་ཚིམ་དུ་འཇུག་དགོས་པ་བཅས་རེད།