ཟླ་10ཚེས་13ཉིན་ནས་ཚེས་15ཉིན་བར་རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་དང་། རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ། རང་སྐྱོང་ལྗོངས་ཀྱི་བརྟན་ལྷིང་སྲུང་སྐྱོང་བཀོད་འདོམས་པུའི་རྒྱུན་ལས་བཀོད་འདོམས་པ་གཞོན་པ་བཅས་ཡིན་པའི་བློ་བཟང་རྒྱལ་མཚན་དང་བཅས་པས་ནག་ཆུ་ས་ཁུལ་གྱི་ཨ་མདོ་རྫོང་དང་། སོག་རྫོང་། སྦྲ་ཆེན་རྫོང་བཅས་སུ་ཕེབས་ནས་དམངས་འཚོའི་འདུ་འགོད་འཛུགས་སྐྲུན་བྱས་ཚུལ་ལ་གཟིགས་ཞིབ་གནང་བ་དང་བརྟན་ལྷིང་སྲུང་སྐྱོང་གི་ལས་དོན་ཁག་དོན་འཁྱོལ་བྱས་ཚུལ་ལ་མཛུབ་ཁྲིད་དང་ཞིབ་བཤེར་གནང་བ་མ་ཟད་གཞི་རིམ་གྱི་ལས་བྱེད་ལས་བཟོ་དང་། ཏང་ཡོན་རྒན་གྲས། ལས་བྱེད་པ་རྒན་གྲས། དཀའ་ངལ་ཡོད་པའི་མང་ཚོགས། ལས་སྒྲུབ་ལས་བྱེད་ཉེན་རྟོག་པ། དྲག་ཆས་ཉེན་རྟོག་གི་དཔོན་དམག མཚོ་བོད་ལྕགས་ལམ་གྱི་ལམ་སྲུང་མཉམ་འགོག་གི་རུ་མི་བཅས་ལ་བྱམས་བརྩེའི་འཚམས་འདྲི་གནང་བ་རེད།

    བློ་བཟང་རྒྱལ་མཚན་གྱིས་ད་དུང་རྩྭ་རིང་གྲོང་རྡལ་དང་། བྲག་སྨུག་གྲོང་རྡལ། ཨ་མདོ་རྫོང་། སོག་རྫོང་། གླ་ཤི་གྲོང་རྡལ། སྦྲ་ཆེན་རྫོང་བཅས་ཀྱི་བརྟན་ལྷིང་སྲུང་སྐྱོང་གི་ལས་དོན་སྒྲུབ་ཚུལ་གྱི་སྙན་སེང་གསན་ཞིང་། ཁོང་གིས་དུས་བབ་ལ་ཞིབ་བསྡུར་བྱེད་པའི་ཐད་ལས་དོན་སྒྲུབ་ནས་དོན་འཁྱོལ་ཡོང་བ་བྱེད་པ་དང་། ལས་དོན་ཏན་ཏིག་སྒྲུབ་རྒྱུའི་ཐད་དོ་ནན་བྱས་ནས་དོན་འཁྱོལ་ཡོང་བ་བྱེད་པ། སྤྱོད་ཚུལ་ལེགས་གཏོང་ཐད་ལས་དོན་སྒྲུབ་ནས་དོན་འཁྱོལ་ཡོང་བ་བྱེད་པ། སྒྲིག་ཁྲིམས་ནན་པོ་ཡོང་རྒྱུའི་ཐད་ལས་དོན་སྒྲུབ་ནས་དོན་འཁྱོལ་ཡོང་བ་བྱེད་པ། མི་སེམས་འགུགས་པའི་ཐད་ལས་དོན་སྒྲུབ་སྟེ་དོན་འཁྱོལ་ཡོང་བ་བཅས་བྱས་ནས་ལས་དོན་ཏན་ཏིག་དང་ཧུར་ཐག་སྒྲུབ་དགོས། གཅིག་གྱུར་འཆར་འགོད་དང་ཕྱོགས་ཡོངས་ལ་ལྟ་རྟོག་བྱེད་པ་དང་། གཙོ་གནད་མངོན་གསལ་དོད་པོ་ཡོང་བ་བྱེད་པ། ལས་དོན་ཏན་ཏིག་སྒྲུབ་པ། དཀའ་སྤྱད་འབད་འཐབ་བཅས་བྱས་ཏེ་རྫོང་དང་ཤང་གི་དོན་དངོས་དང་ཟུང་འབྲེལ་བྱས་ནས་དེང་སྐབས་ཀྱི་བརྟན་ལྷིང་སྲུང་སྐྱོང་གི་ལས་དོན་ཁག་སྔར་བས་ཡག་པོ་བསྒྲུབ་རྒྱུའི་སྐོར་གྱི་ལྗོངས་ཏང་ཨུད་དང་ནག་ཆུ་ས་ཁུལ་གྱི་བཀོད་སྒྲིག་རབ་དང་རིམ་པ་ལག་བསྟར་དོན་འཁྱོལ་བྱས་ཏེ་ཆོད་སེམས་བརྟན་པོ་དང་ལས་དོན་ཏན་ཏིག་སྒྲུབ་ནས་དུས་བདེ་དང་། ཞི་མཐུན། བརྟན་ལྷིང་བཅས་ཀྱི་རྣམ་པ་བཟང་པོ་བཏོད་ཐོག “གནས་ཚུལ་ཆེ་འབྲིང་ཆུང་གསུམ་གང་ཡང་མི་ཐོན་པའི ”དམིགས་ཚད་མངོན་འགྱུར་ཡོང་རྒྱུའི་འགན་ལེན་བྱས་ནས་གཡུར་ཟའི་གྲུབ་འབྲས་ལ་བརྟེན་ཏེ་ཚོགས་ཆེན་བཅོ་བརྒྱད་པ་རྒྱལ་ཁའི་ངང་འཚོག་རྒྱུར་བསུ་བ་ཞུ་དགོས་པའི་བླང་བྱ་བཏོན་གནང་ཞིང་། བློ་བཟང་རྒྱལ་མཚན་གྱིས་ས་ཁུལ་ཡོངས་ཀྱི་རིམ་ཁག་སྡེ་ཚན་ཁག་དང་། རྫོང་ཁག་དང་ཤང་གྲོང་ཁག གྲོང་ཚོར་བཅའ་སྡོད་ལས་དོན་རུ་ཁག་ཁག གྲོང་ཚོར་བཅའ་སྡོད་ལས་བྱེད་པ་བཅས་ཀྱིས་དམངས་འཚོར་དོ་ཁུར་བྱས་ཏེ་དབུལ་དུད་ལ་བདེ་སྡུག་སྐད་ཆ་དྲིས་ནས་དྲོ་སྐྱིད་མཚོན་པའི་བྱེད་སྒོ་གཏིང་ཟབ་སྤེལ་ཏེ་དཀའ་ངལ་ཡོད་པའི་མང་ཚོགས་ཀྱི་ཐོན་སྐྱེད་དང་འཚོ་བ་སོགས་ཀྱི་དཀའ་ངལ་ཐག་གཅོད་ཏན་ཏིག་བྱེད་པ་དང་མང་ཚོགས་རྣམས་བདེ་བླག་ངང་དགུན་ཁ་སྐྱེལ་རྒྱུའི་འགན་ལེན་བྱས་ནས་ཏང་དང་སྲིད་གཞུང་གི་དྲོ་སྐྱིད་ཞིང་འབྲོག་པའི་སེམས་ནང་ཚོར་བ་བྱེད་དགོས་ཞེས་ནན་བཤད་གནང་བ་རེད།