ཟླ་10ཚེས་10ནས་ཚེས་12ཉིན་བར་ལྗོངས་ཏང་ཨུད་ཀྱི་རྒྱུན་ཨུ་དང་། རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ། རང་སྐྱོང་ལྗོངས་བརྟན་ལྷིང་སྲུང་སྐྱོང་ལས་དོན་འགོ་ཁྲིད་ཚོགས་ཆུང་གི་རྒྱུན་ལས་ཙུའུ་ཀྲང་གཞོན་པ་བཅས་ཡིན་པའི་བློ་བཟང་རྒྱལ་མཚན་ནག་ཆུ་ས་ཁུལ་དུ་ཕེབས་ཏེ་བརྟན་ལྷིང་སྲུང་སྐྱོང་གི་ལས་དོན་ཁག་ལ་ཞིབ་བཤེར་དང་ཁྲིད་སྟོན་གནང་བ་རེད།

    ཟླ་10ཚེས་10དང་ཚེས་11ཉིན་གྱི་མཚན་མོར་ནག་ཆུ་ས་ཁུལ་དུ་གངས་བབས་ནས་གནམ་གཤིས་ཧ་ཅང་གྲང་མོ་ཡོད། བློ་བཟང་རྒྱལ་མཚན་དང་བཅས་པ་སྔ་རྗེས་སུ་ས་ཁུལ་བརྟན་ལྷིང་སྲུང་སྐྱོང་བཀོད་འདོམས་པུའུ་རུ་ཕེབས་ཏེ་བཪྙན་བརྡའི་འགུལ་ཚད་ཀྱི་ཐོག་ནས་རྫོང (ཆུས )གི་འགོ་ཁྲིད་ཀྱིས་ལས་སྣེ་ཁྲིད་ཚུལ་དང་སྡོད་བྱའི་གནས་ཚུལ་ལ་མིང་འདོན་འཐེན་བཤེར་གནང་བ་དང་དེ་རྗེས་གྲང་ངར་ལ་མི་འཛེམ་པར་ནག་ཆུ་གྲོང་རྡལ་གྱི་ལམ་དུམ་བུ་གཙོ་བོར་ཕེབས་ཏེ་དམངས་ཕན་ཉེན་རྟོག་ཞབས་ཞུའི་ས་ཚིགས་ཀྱི་སྡོད་བྱའི་སྐོར་གཡེང་གནས་ཚུལ་ལ་གློ་བུར་ཞིབ་བཤེར་གནང་བ་རེད།

    ཚེས་12ཉིན་གྱི་སྔ་དྲོ་བློ་བཟང་རྒྱལ་མཚན་ནག་ཆུ་གྲོང་རྡལ་གླིང་བསྐོར་གྲོང་ལྷན་དང་ཞབས་བརྟན་དགོན་པའི་དོ་དམ་ཨུ་ཡོན་ལྷན་ཁང་དུ་ཕེབས་ཏེ་འཐབ་ཕྱོགས་དང་པོར་བརྟན་སྲུང་བྱེད་མཁན་ལས་བྱེད་ལས་བཟོ་དང་། འོས་འགན་སྐོར་གཡེང་རུ་ཁག་གི་རུ་མི། དགོན་སྡེར་བཅའ་སྡོད་ལས་བྱེད་པ་བཅས་ལ་བྱམས་བརྩེའི་ངང་གཟིགས་པ་རེད།

    ཁྲིད་སྟོན་ཞིབ་བཤེར་བྱེད་པའི་ཁྲོད་བློ་བཟང་རྒྱལ་མཚན་གྱིས་ནག་ཆུ་ས་ཁུལ་དང་ནག་ཆུ་རྫོང་གི་བརྟན་ལྷིང་སྲུང་སྐྱོང་ལས་དོན་གྱི་སྙན་ཞུ་གསན་ཞིང་། ཁོང་གིས་ཚོགས་ཆེན་བཅོ་བརྒྱད་པ་འཚོག་ཉེར་ཡོད་པ་དང་ཚོགས་ཆེན་བཅོ་བརྒྱད་པའི་བདེ་འཇགས་སྲུང་སྐྱོབ་ཀྱི་ལས་དོན་སྒོ་ཀུན་ནས་སྤེལ་འགོ་ཚུགས་པས་རིམ་པ་ཁག་དང་སྡེ་ཚན་ཁག་གིས་སྤྱི་ཚོགས་བརྟན་ལྷིང་ལ་སྲུང་སྐྱོང་བྱ་རྒྱུ་དེ་མིག་སྔའི་ཐམས་ཅད་ལས་ལྷག་པའི་ལས་འགན་གཙོ་བོར་བརྩིས་ནས་སྐུལ་སློང་དང་བྱ་སྤྱོད་ཛ་དྲག་ངང་སྤེལ་བ་དང་ནག་ཆུའི་བརྟན་ལྷིང་སྲུང་སྐྱོང་གི་ལས་དོན་ཁག་ཕྱོགས་ཡོངས་ནས་ཡག་པོ་སྒྲུབ་སྟེ “གནས་ཚུལ་ཆེ་འབྲིང་ཆུང་གསུམ་གང་ཡང་མི་ཐོན་པ་བྱེད་པའི ”དམིགས་ཚད་འགན་ལེན་བྱེད་དགོས་ཞེས་ནན་བཤད་གནང་བ་རེད།

    ཚེས་12ཉིན་གྱི་ཕྱི་དྲོ་ནག་ཆུ་ས་ཁུལ་གྱིས་བརྟན་ལྷིང་སྲུང་སྐྱོང་ལས་དོན་གྱི་བཪྙན་འཕྲིན་ཁ་པར་ཚོགས་འདུ་འཚོགས་ནས་ཚོགས་ཆེན་བཅོ་བརྒྱད་པར་བསུ་བ་ཞུ་བའི་བརྟན་ལྷིང་སྲུང་སྐྱོང་གི་ལས་དོན་ཐད་ཁྱོན་ཡོངས་ནས་སྐུལ་སློང་བྱས་པ་དང་བློ་བཟང་རྒྱལ་མཚན་གྱིས་གསུང་བཤད་གནང་བ་རེད།

    བློ་བཟང་རྒྱལ་མཚན་གྱིས་གཅིག་ནས་བསམ་བློའི་ཐོག་ཚད་མཐོའི་གཅིག་གྱུར་ཡོང་བ་བྱེད་དགོས་ཤིང་། ས་ཁུལ་དེ་ཡོངས་ཀྱི་གོང་འོག་ཚང་མས་བསམ་བློ་ལྗོངས་ཏང་ཨུད་ཀྱི་དགོངས་དོན་དང་ཧྲུའུ་ཅི་ཁྲེན་ཆོན་གོའི་མཛུབ་སྟོན་གལ་ཆེན་གྱི་དགོངས་དོན་རབ་དང་རིམ་པའི་ཐོག་གཅིག་གྱུར་ཡོང་བ་བྱས་ཏེ་ཚོགས་ཆེན་བཅོ་བརྒྱད་པ་མ་འཚོག་གོང་དང་འཚོགས་རྗེས་ཀྱི་བརྟན་ལྷིང་སྲུང་སྐྱོང་ལས་དོན་གྱི་གལ་ཆེའི་རང་བཞིན་ལ་ངོས་འཛིན་གང་ལེགས་བྱེད་པ་དང་ཐམས་ཅད་བརྟན་ལྷིང་དང་བསྟུན་པ་དང་ཐམས་ཅད་བརྟན་ལྷིང་ལ་ཞབས་འདེགས་ཞུ་ཐུབ་པ་བྱས་ནས་སེམས་ནུས་ཡོད་རྒུས་ནག་ཆུ་ས་ཁུལ་གྱི་མཐུན་སྒྲིལ་དང་ཞི་མཐུན་བརྟན་ལྷིང་གི་རྣམ་པ་བཟང་པོ་སྲུང་སྐྱོང་བྱེད་དགོས་པ་དང་། གཉིས་ནས་བརྟན་ལྷིང་ཐད་འགོག་སྲུང་ནན་པོ་བྱེད་དགོས་ཤིང་། སྔོན་ལ་དམ་འཛིན་དང་། ཆུང་ས་ནས་དམ་འཛིན། མགྱོགས་མྱུར་དམ་འཛིན། དམ་འཛིན་ཡག་པོ་བཅས་བྱ་རྒྱུ་མཐའ་འཁྱོངས་བྱས་ཏེ་དམག་ཉེན་དམངས་ཀྱིས་མཉམ་འབྲེལ་ཐོག་སྔོན་འགོག་ཚོད་འཛིན་བྱ་རྒྱུར་སྔར་བས་ཤུགས་སྣོན་རྒྱག་པ་དང་། རིམ་པ་ཁག་དང་སྡེ་ཚན་ཁག་གི་འགན་འཁྲི་དང་ལས་འགན་སྔར་བས་ཞིབ་ཕྲ་རུ་གཏོང་བ། བརྟན་ལྷིང་སྲུང་སྐྱོང་གི་ཁྱབ་རྒྱ་སྔར་བས་ཆེ་རུ་གཏོང་བ། ཕྱོགས་མང་དང་ལངས་གཟུགས་ཅན་གྱི་བརྟན་ལྷིང་སྲུང་སྐྱོང་གི་སྔོན་འགོག་ཚོད་འཛིན་མ་ལག་ཞིག་དངོས་འབྲེལ་ཆགས་པ་བཅས་བྱས་ཏེ་སྲུབས་ཁ་མ་ལུས་པ་དང་། གྲིབ་ཆ་མེད་པ། སྟོང་ཆ་མ་ལུས་པ་བཅས་འགན་ལེན་བྱེད་པ་དང་ཚོགས་ཆེན་བཅོ་བརྒྱད་པའི་རིང་གི་བརྟན་ལྷིང་སྲུང་སྐྱོང་དང་བདེ་འཇགས་འགག་སྒྲོལ་གྱི་དམག་འཐབ་ལ་རྒྱལ་ཁ་མཐའ་གཅིག་ཏུ་ཐོབ་པ་བྱེད་དགོས་པ། གསུམ་ནས་སྤྱོད་ཚུལ་ཐད་ཏན་ཏིག་དང་གཏིང་ཟབ་ཏུ་བཏང་སྟེ་གཏན་འཁེལ་བྱས་པའི་དམིགས་ཚད་ཁག་དམ་འཛིན་དང་དམ་འཛིན་མཐའ་གཅིག་ཏུ་བྱེད་པ་དང་། ཤེས་རྟོགས་བྱུང་བའི་གནད་དོན་དང་མངོན་མེད་རྐྱེན་ངན་དེ་ག་རང་དུ་ཐག་གཅོད་དང་འཕྲལ་མར་ཐག་གཅོད་བྱེད་པ། གཙོ་གནད་མི་ཚོགས་དང་གཙོ་གནད་ཁུལ་གྱི་དོ་དམ་ཚོད་འཛིན་ལ་ངེས་པར་དུ་དམ་འཛིན་ནན་པོ་དང་སྲུབས་ཁ་མ་ལུས་པ་བཅས་བྱས་ནས་བྱེད་ཐབས་ཁག་དངོས་སུ་དོན་ཐོག་ཏུ་འཁྱོལ་རྒྱུ་འགན་ལེན་བྱེད་དགོས་པ། བཞི་ནས་འགན་འཁྲི་ཁ་གསལ་བཟོ་བ་དང་སྒྲིག་ཁྲིམས་ནན་པོ་སྲུང་ནས་དོན་འཁྱོལ་བྱས་མེད་པའི་བྱ་བ་དང་མིར་དམ་འཛིན་ཡག་པོ་བྱེད་པ་དང་། ལས་གནས་བརྟན་སྲུང་མི་བྱེད་མཁན་དང་། ལས་དོན་གྱི་འགན་མི་ཁུར་མཁན། བྱེད་ཐབས་དོན་འཁྱོལ་མི་བྱེད་མཁན། བརྟན་ལྷིང་སྲུང་སྐྱོང་ཐད་གནས་ཚུལ་ཐོན་མཁན་བཅས་ལ་ཞིབ་བཤེར་ཐག་གཅོད་དང་ཆད་པ་ནན་པོ་བཅད་དེ་སྒྲིག་ཁྲིམས་ནན་པོའི་ཐོག་ནས་ཏང་ཀྲུང་དབྱང་དང་རང་སྐྱོང་ལྗོངས་ཀྱི་ཐབས་ཇུས་བཀོད་སྒྲིག་ཁག་དོན་ཐོག་ཏུ་འཁྱོལ་རྒྱུ་འགན་ལེན་བྱེད་དགོས་པ་བཅས་ཀྱི་བླང་བྱ་བཏོན་གནང་བ་རེད།

    བློ་བཟང་རྒྱལ་མཚན་གྱིས་མཐའ་དག་བརྟན་ལྷིང་ལ་དམིགས་པ་དང་། ལས་གནས་མཐའ་གཅིག་ཏུ་བརྟན་སྲུང་བྱེད་པ། གཟབ་ནན་དང་ཞིབ་ཕྲའི་ངང་དམ་འཛིན་ཡག་པོ་བྱེད་པ། ལྟ་སྐུལ་ཞིབ་བཤེར་དང་འགན་འཁྲི་རྩད་ཆོད་ལ་ཤུགས་སྣོན་ཏན་ཏིག་རྒྱག་པ། དོན་འཁྱོལ་དམ་འཛིན་བྱ་རྒྱུའི་ཐད་གཞོལ་བ། དཔའ་ངར་ཆེར་བསྐྱེད་ངང་རྒྱུན་འཁྱོངས་བྱེད་པ། བསྟུད་མར་དམག་འཐབ་བྱེད་པའི་སྙིང་སྟོབས་དར་སྤེལ་གཏོང་བ། འབད་འབུངས་སྟོབས་བརྩོན། འགག་གནད་སྒྲོལ་བ། དཀའ་ངལ་ཁྱད་བསད་བྱེད་པ་བཅས་བྱས་ནས་ཡིད་ཆེས་བརྟན་པོ་དང་ནུས་ལྡན་ཏན་ཏིག་གི་ལས་དོན་ཐོག་ནས་ཏང་གི་ཚོགས་ཆེན་བཅོ་བརྒྱད་པ་འཚོགས་རིང་ས་ཁུལ་དེ་ཡོངས་བརྟན་ལྷིང་ཡོང་རྒྱུ་འགན་ལེན་བྱས་ཏེ་གཡུར་ཟའི་གྲུབ་འབྲས་ཀྱི་ཐོག་ནས་ཏང་གི་ཚོགས་ཆེན་བཅོ་བརྒྱད་པ་རྒྱལ་ཁའི་ངང་འཚོག་རྒྱུར་བསུ་བ་ཞུ་དགོས་པའི་བླང་བྱ་བཏོན་གནང་བ་རེད།