ཟླ་10ཚེས་9ཉིན་གྱི་ཕྱི་དྲོ་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་པད་མ་འཕྲིན་ལས་ཀྱིས་ལྷ་སར་རང་ལྗོངས་སུ་རྟོག་ཞིབ་གནང་བར་ཕེབས་པའི་ཀྲུང་གོ་ཧྭ་ནེང་ཚོགས་པ་ཀུང་སིའི་སྤྱི་ཁྱབ་ཅིང་ལི་ཚའོ་ཕེ་ཤིས་བཅས་པ་དང་མཇལ་འཛོམས་གནང་བ་རེད།
པད་མ་འཕྲིན་ལས་ཀྱིས་དང་ཐོག་རང་སྐྱོང་ལྗོངས་ཏང་ཨུད་དང་སྲིད་གཞུང་དང་ལྗོངས་ཏང་ཨུད་ཀྱི་ཧྲུའུ་ཅི་ཁྲེན་ཆོན་གོ་བཅས་ཀྱི་ཚབ་ཞུས་ཏེ་ཚའོ་ཕེ་ཤིས་དང་བཅས་པ་རང་ལྗོངས་སུ་ལས་དོན་ལ་ཞིབ་བཤེར་དང་མཛུབ་ཁྲིད་གནང་བར་ཕེབས་པར་དགའ་བསུ་ཞུས་པ་དང་འབྲེལ་ཀྲུང་གོ་ཧྭ་ནེང་ཚོགས་པ་ཀུང་སིས་དུས་ཡུན་རིང་པོའི་ནང་རང་ལྗོངས་ཀྱི་ལས་དོན་ཁག་དང་ལྷག་པར་དུ་ནུས་རྒྱུ་འཛུགས་སྐྲུན་ལ་སེམས་ཁུར་དང་རྒྱབ་སྐྱོར་གནང་བར་ཐུགས་རྗེ་ཆེ་ཞུས་གནང་བ་རེད།
པད་མ་འཕྲིན་ལས་ཀྱིས་ཀྲུང་གོ་ཧྭ་ནེང་ཚོགས་པ་ཀུང་སིས་ལོ་མང་རིང་བོད་ཀྱི་ནུས་རྒྱུ་གསར་སྤེལ་དང་འཛུགས་སྐྲུན་ལ་རྔུལ་ཆུ་དང་སེམས་ནུས་མང་པོ་བཏོན་ཏེ་གྲུབ་འབྲས་ལྡན་པའི་ལས་ཀ་འབོར་ཆེན་བྱས་ཤིང་། སྔ་རྗེས་སུ་རང་སྐྱོང་ལྗོངས་མི་དམངས་སྲིད་གཞུང་དང་འཐབ་ཇུས་མཉམ་ལས་ཀྱི་གྲོས་ཡིག་བཞག་ནས་བོད་ཀྱི་ཆུ་གློག་གསར་སྤེལ་སྔར་བས་བྱེད་མགྱོགས་སུ་གཏོང་བ་དང་ལྷ་ས་དང་མངའ་རིས་ལ་འཕྲལ་སྡོམ་གློག་ཁུངས་སྐྲུན་རོགས་བྱེད་པ་སོགས་ཀྱི་ཐད་གྲུབ་འབྲས་ལེགས་པོ་ཐོབ་ཡོད། ད་རེས་སྤྱི་ཁྱབ་ཅིང་ལི་ཚའོ་ཕེ་ཤིས་སླར་ཡང་ཆེད་མངགས་བོད་དུ་ལས་དོན་ལ་ཞིབ་བཤེར་དང་མཛུབ་ཁྲིད་གནང་བར་ཕེབས་པ་དང་འབྲེལ་ཧྭ་ནེང་མེ་ཏོག་གློག་ཤུགས་ཚད་ཡོད་ཀུང་སི་གྲབས་འཛུགས་ཁང་གི་བྱང་བུའི་ཡོལ་ཁེབས་འབྱེད་པའི་མཛད་སྒོར་བཞུགས་པ་དེ་ནི་ཀྲུང་གོ་ཧྭ་ནེང་ཚོགས་པ་ཀུང་སིས་བྱ་སྤྱོད་ངོ་མར་བརྟེན་ནས་ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པའི་དགོངས་དོན་ལག་བསྟར་དོན་འཁྱོལ་བྱེད་པའི་བྱེད་ཐབས་གལ་ཆེན་ཞིག་ཡིན་པ་དང་། དེས་རང་ལྗོངས་ཀྱི་གློག་ཤུགས་བྱ་གཞག་འཕེལ་རྒྱས་ལ་སྒུལ་ཤུགས་ཧ་ཅང་ཆེན་པོ་མཁོ་འདོན་བྱས་ཡོད། ཀྲུང་གོ་ཧྭ་ནེང་ཚོགས་པ་ཀུང་སིས་བོད་དུ་ཡོད་པའི་རྣམ་གྲངས་འཛུགས་སྐྲུན་ལ་སྐུལ་འདེད་ཧུར་ཐག་བཏང་སྟེ་བོད་ཀྱི་ཆུ་གློག་གསར་སྤེལ་གྱི་དཔལ་འབྱོར་དང་སྤྱི་ཚོགས་ཀྱི་ཕན་འབྲས་ལེགས་པོ་ཐོབ་རྒྱུའི་འབད་བརྩོན་བྱས་ནས་བོད་ཀྱི “ནུབ་གློག་ཤར་འདྲེན ”གྱི་སྦྲེལ་མཐུད་ནུས་རྒྱུ་རྟེན་གཞི་སྐྲུན་ཆེད་འདོན་འོས་པའི་ནུས་པ་འདོན་སྤེལ་བྱེད་རྒྱུའི་རེ་བ་ཡོད། རང་སྐྱོང་ལྗོངས་ཀྱིས་ཧྭ་ནེང་ཚོགས་པ་ཀུང་སིའི་བོད་དུ་ཡོད་པའི་ཆུ་གློག་གསར་སྤེལ་དང་ནུས་རྒྱུ་འཛུགས་སྐྲུན་ལ་ཕྱི་ཕྱོགས་ཀྱི་ཁོར་ཡུག་ལེགས་པོ་ཞིག་མུ་མཐུད་གཏོད་དེ་ཐུན་མོང་ཐོག་བོད་ཀྱི་དཔལ་འབྱོར་མཆོང་སྐྱོད་ལྟ་བུའི་འཕེལ་རྒྱས་དང་སྤྱི་ཚོགས་དུས་བབ་ཡུན་རིང་བདེ་འཁོད་ཡོང་རྒྱུར་ལེགས་སྐྱེས་དེ་བས་ཆེ་བ་འབུལ་རྒྱུ་ཡིན་ཞེས་གསུངས་པ་རེད།
ཚའོ་ཕེ་ཤིས་ཀྱིས་སླད་ཕྱིན་ཧྭ་ནེང་ཚོགས་པས་མུ་མཐུད་གློག་ཤུགས་བོད་སྐྱོར་གྱི་ལས་དོན་ཁག་ཡག་པོ་སྒྲུབ་ནས་བོད་ཀྱི་ཐོན་ཁུངས་ལེགས་ཆ་དེ་དཔལ་འབྱོར་གྱི་ལེགས་ཆར་བསྒྱུར་རྒྱུའི་ཐད་སྣེ་ཁྲིད་ཀྱི་ནུས་པ་གལ་ཆེན་བཏོན་ཏེ་ཕྱོགས་གཉིས་པོ་ཐུན་མོང་ཐོག་འཕེལ་རྒྱས་ཡོང་བ་བྱ་རྒྱུ་ཡིན་ཞེས་གསུངས་པ་རེད།
ཕྱི་དྲོ་ད་དུང་ཧྭ་ནེང་མེ་ཏོག་གློག་ཤུགས་ཚད་ཡོད་ཀུང་སི་གྲབས་འཛུགས་ཁང་གི་བྱང་བུའི་ཡོལ་ཁེབས་འབྱེད་པའི་མཛད་སྒོ་སྤེལ་ཞིང་། པད་མ་འཕྲིན་ལས་དང་ཚའོ་ཕེ་ཤིས་རྣམ་གཉིས་ཀྱིས་མཉམ་དུ་གྲབས་འཛུགས་ཁང་གི་བྱང་བུའི་ཡོལ་ཁེབས་ཕྱེ་བ་དང་། ཏེང་ཡེ་ཤན་དང་། ཅིན་ཧྲི་ཤུན། ཀའོ་དབྱང་བཅས་བྱང་བུའི་ཡོལ་ཁེབས་འབྱེད་པའི་མཛད་སྒོར་ཞུགས་པ་རེད།
ལྗོངས་ཏང་ཨུད་ཀྱི་ཧྲུའུ་ཅི་ཁྲེན་ཆོན་གོས་ཀྱང་ཚའོ་ཕེ་ཤིས་དང་བཅས་པར་མཇལ་འཛོམས་གནང་བ་རེད།