ཚེས་7ཉིན་གྱི་སྔ་དྲོ་ལྗོངས་ཏང་ཨུད་ཀྱི་རྒྱུན་ལས་ཧྲུའུ་ཅི་གཞོན་པ་རང་སྐྱོང་ལྗོངས་བརྟན་ལྷིང་སྲུང་སྐྱོང་ལས་དོན་བཀོད་འདོམས་པུའི་སྤྱི་ཁྱབ་བཀོད་འདོམས་པ་ཧའོ་ཕུང་གིས་དུས་ཆེན་རིང་ལས་གནས་བརྟན་སྲུང་བྱེད་མཁན་ལས་རེས་དཔོན་དམག་དང་སྤྱི་བདེ་མི་དམངས་ཉེན་རྟོག་པ་ཚོར་ཆེད་མངགས་གཟིགས་པ་དང་འཚམས་འདྲི་གནང་སྟེ་ཁོང་ཚོར་རང་སྐྱོང་ལྗོངས་ཏང་ཨུད་དང་སྲིད་གཞུང་གི་བྱམས་བརྩེའི་ཐུགས་ཁུར་གནང་ལུགས་མཚོན་པར་བྱས་ཤིང་། ཁོང་གིས་རྒྱ་ཆེའི་ལས་རེས་དཔོན་དམག་དང་སྤྱི་བདེ་མི་དམངས་ཉེན་རྟོག་པ་ཚོར་དོགས་ཟོན་ཆེར་བསྐྱེད་དང་སྲུང་སྡོམ་ནན་པོ་བྱས་ཏེ་རྒྱལ་ཁབ་ཀྱི་བདེ་འཇགས་དང་སྤྱི་ཚོགས་བརྟན་ལྷིང་ལ་གནོད་འཚེ་བཟོ་མཁན་གྱི་ཁ་ཕྲལ་གཏོར་བཤིག་བྱེད་སྤྱོད་མཐའ་དག་ལ་རྡུང་རྡེག་ནན་པོ་བཏང་ནས་རང་ལྗོངས་ཀྱི་སྤྱི་ཚོགས་ཞི་མཐུན་བརྟན་ལྷིང་ལ་འགན་ལེན་བྱེད་པའི་ཁར་ཕུལ་བྱུང་གྲུབ་འབྲས་ཐོག་ནས་ཏང་གི་ཚོགས་ཆེན་བཅོ་བརྒྱད་པ་སྐོང་ཚོགས་བྱ་རྒྱུར་བསུ་བ་ཞུ་དགོས་པའི་ནན་བཤད་གནང་བ་རེད།
བློ་བཟང་རྒྱལ་མཚན་དང་ཆེ་དགྲ་ལྷས་གཟིགས་པ་དང་འཚམས་འདྲི་གནང་བར་ལྷན་དུ་ཕེབས་ཡོད་པ་རེད།
སེ་ར་ལམ་དང་གླིང་སྐོར་ཤར་ལམ་དུ་བཅའ་སྡོད་ལས་རེས་དཔོན་དམག་ཚོར་གཟིགས་པ་དང་འཚམས་འདྲི་གནང་སྐབས་ཧའོ་ཕུང་གིས་བརྟན་ལྷིང་སྲུང་སྐྱོང་གི་ལས་འགན་ཕྲག་ཐོག་ཏུ་འཁུར་ཚུན་རྒྱ་ཆེའི་དཔོན་དམག་ཚོས་འགན་འཁྲི་བློ་ལ་བརྟན་པོར་ངེས་པ་དང་མངགས་བཅོལ་གལ་ཆེན་ཆུད་ཟོས་སུ་མ་བཏང་བར་ངལ་དུབ་ལ་མ་འཛེམས་པ་དང་བསྟུད་མར་དམག་འཐབ་བྱེད་པའི་སྤྱོད་ཚུལ་བཟང་པོ་དར་སྤེལ་གཏོང་བ་དང་། ཁྲིམས་ལྟར་ལས་སྒྲུབ་དང་ཡ་རབས་ངང་ལས་སྒྲུབ་བྱས་ཏེ་བརྟན་ལྷིང་སྲུང་སྐྱོང་གི་འཐབ་ས་མདུན་མ་ཐོག་མཐའ་བར་གསུམ་དུ་བརྟན་སྲུང་བྱེད་པ།
ཏང་དང་མི་དམངས་ཀྱིས་དཀྲིས་པའི་ལས་འགན་ཁག་གཟེངས་སུ་ཐོན་པའི་སྒོ་ནས་ལེགས་སྒྲུབ་བྱེད་པ་བཅས་ཀྱི་ཐོག་ནས་བོད་ཀྱི་ཞི་མཐུན་བརྟན་ལྷིང་འགན་ལེན་བྱ་ཆེད་ལེགས་སྐྱེས་མངོན་གསལ་དོད་པོ་ཕུལ་ཡོད། རྒྱ་ཆེའི་དཔོན་དམག་ཚོས་བཅའ་སྡོད་བྱ་ཡུལ་ཕ་ཡུལ་ལྟ་བུར་བརྩི་བ་དང་བོད་ཀྱི་མི་རིགས་ཁག་གི་མི་དམངས་རྣམས་ཕ་མ་ལྟ་བུར་བརྩིས་ནས་མི་དམངས་ལ་ཞབས་འདེགས་ཞུ་བའི་དམིགས་ཡུལ་ལག་བསྟར་ཧུར་ཐག་བྱས་པ་དང་མི་རིགས་མཐུན་སྒྲིལ་གྱི་དཔེ་བཟང་བ་ཞིག་དང་དམངས་ཉེ་དམངས་གཅེས་ཀྱི་དཔེ་མཚོན་པ་ཞིག་བྱས་པར་མི་རིགས་ཁག་གི་མང་ཚོགས་ཚོའི་བསྔགས་བརྗོད་རྒྱ་ཁྱབ་ངང་ཐོབ་ཡོད་ཅེས་མཛུབ་སྟོན་གནང་བ་རེད། ཁོང་གིས་ཧྲུའུ་ཅི་ཁྲེན་ཆོན་གོ་དང་ཀྲུའུ་ཞི་པད་མ་འཕྲིན་ལས་རྣམ་གཉིས་དང་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཚབ་ཞུས་ནས་ཚང་མར་བྱམས་བརྩེའི་འཚམས་འདྲི་དང་བླ་ན་མེད་པའི་གུས་འདུད་ཞུས་གནང་བ་རེད།
ཧའོ་ཕུང་དང་བཅས་པས་དེ་རྗེས་ལྷ་ས་གྲོང་ཁྱེར་མེ་ཟོན་མེ་གསོད་ཉིང་ལག་རུ་ཁག་དམིགས་བསལ་ལས་སྒྲུབ་རུ་ཆེན་དུ་ཕེབས་ནས་མེ་ཟོན་མེ་གསོད་དཔོན་དམག་ཚོར་གཟིགས་པ་དང་འཚམས་འདྲི་གནང་བ་དང་འབྲེལ་ཁོང་ཚོས་དུས་ཆེན་རིང་ལྷ་ས་གྲོང་ཁྱེར་གྱི་དུས་བདེ་བདེ་འཇགས་འགན་ལེན་བྱ་ཆེད་འབད་བརྩོན་ཧུར་ཐག་བྱས་པར་ཐུགས་རྗེ་ཆེ་ཡང་ཞུས་པ་དང་། ཧའོ་ཕུང་གིས་མེ་ཟོན་མེ་གསོད་དཔོན་དམག་ཡོངས་ལ་བློ་གཅིག་སེམས་གཅིག་གིས་མི་དམངས་ལ་ཞབས་འདེགས་ཞུ་བའི་དམིགས་ཡུལ་བློ་ལ་བརྟན་པོར་ངེས་པ་དང་མེ་ཟོན་མེ་གསོད་ཀྱི་དམག་མིའི་རང་རྟགས་ཐོག་མཐའ་བར་གསུམ་དུ་མཐའ་འཁྱོངས་བྱས་ནས་ལྗོངས་ཡོངས་ཀྱི་འཕེལ་རྒྱས་དང་བརྟན་ལྷིང་ཆེད་མེ་ཟོན་མེ་གསོད་བདེ་འཇགས་ཀྱི་ཁོར་ཡུག་ཡག་པོ་ཞིག་གཏོད་དགོས་པའི་བླང་བྱ་བཏོན་གནང་བ་རེད།
ལྷ་ས་ཟམ་ཆེན་དམངས་ཕན་ཉེན་རྟོགས་ཞབས་ཞུ་ས་ཚིགས་སུ་ཧའོ་ཕུང་དང་བཅས་པས་ལས་རེས་མི་དམངས་ཉེན་རྟོག་པ་ཚོ་དང་བྱམས་བརྩེའི་ངང་ཕྱག་བཏང་གནང་བ་དང་འབྲེལ་ལས་རེས་བཀོད་སྒྲིག་དང་ལས་སྒྲུབ་གྲ་སྒྲིག་བྱས་ཚུལ་སོགས་ཀྱི་གནས་ཚུལ་མཁྱེན་རྟོགས་ཞིབ་ཕྲ་གནང་ཞིང་། ཧའོ་ཕུང་གིས་རྒྱལ་སྟོན་དུས་ཆེན་དང་བརྒྱད་པའི་བཅོ་ལྔའི་ངལ་གསོའི་རིང་རང་ལྗོངས་སུ་ཡུལ་སྐོར་དུ་ཡོང་མཁན་མང་བའི་དུས་ཚོད་ཤར་ནས་ལྷ་ས་གྲོང་ཁྱེར་དུ་ཡུལ་སྐོར་བའི་གྲངས་འབོར་མང་དུ་སོང་བས་སྤྱི་ཚོགས་ཞི་མཐུན་བརྟན་ལྷིང་ལ་སྲུང་སྐྱོང་བྱེད་པའི་གནོན་ཤུགས་ཆེ་རུ་སོང་བ་དང་དམངས་ཕན་ཉེན་རྟོག་ཞབས་ཞུའི་ལས་དོན་གྱི་ལས་འགན་ལྕི་རུ་སོང་བས་དེའི་རིང་རྒྱ་ཆེའི་དམངས་ཕན་ཉེན་རྟོག་ཞབས་ཞུའི་ས་ཚིགས་ཀྱི་རྒྱ་ཆེའི་ལས་སྒྲུབ་མི་དམངས་ཉེན་རྟོག་པ་དང་དྲག་ཆས་ཉེན་རྟོག་དཔོན་དམག་ཚོས་ལས་གནས་བརྟན་སྲུང་བྱས་ཏེ་དོ་དམ་དང་སྐོར་ཞིབ་བྱ་ཐབས་སྔར་བས་ཤུགས་ཆེར་བཏང་བ་དང་ལྷག་བསམ་རྣམ་དག་ངང་མི་དམངས་ལ་ཞབས་འདེགས་ཞུས་ནས་ལྗོངས་ཡོངས་ཀྱི་མི་རིགས་ཁག་གི་མང་ཚོགས་རྣམས་དུས་བདེ་ལྷིང་འཇགས་ཀྱི་རྒྱལ་སྟོན་དུས་ཆེན་དང་བརྒྱད་པའི་བཅོ་ལྔའི་དུས་ཆེན་ཞིག་གཏོང་རྒྱུ་ཡོང་བ་དང་ལྗོངས་ཡོངས་ཀྱི་སྤྱི་ཚོགས་དུས་བབ་རྒྱུན་བསྲིང་བརྟན་ལྷིང་དང་ཁྱོན་ཡོངས་ནས་བརྟན་ལྷིང་ཡོང་བའི་འགན་ལེན་བྱ་ཆེད་ལེགས་སྐྱེས་ཆེན་པོ་ཕུལ་ཡོད་ཅེས་གསུངས་པ་དང་། ཁོང་གིས་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཚབ་ཞུས་ནས་ཚང་མར་སྙིང་དབུས་ནས་ཐུགས་རྗེ་ཆེ་ཞུས་གནང་བ་རེད།
མཇུག་ཏུ་ཧའོ་ཕུང་དང་བཅས་པས་རང་སྐྱོང་ལྗོངས་བརྟན་ལྷིང་སྲུང་སྐྱོང་བཀོད་འདོམས་པུའུ་རུ་ཕེབས་ནས་ལས་རེས་མི་སྣ་རེ་རེ་བཞིན་ལ་ཕྱག་བཏང་གནང་ནས་ཁོང་ཚོར་བྱམས་བརྩེའི་འཚམས་འདྲི་ཞུས་པ་དང་འབྲེལ་བཪྙན་བརྡའི་འགུལ་ཚད་ཀྱི་མ་ལག་བརྒྱུད་ས་ཁུལ་དང་གྲོང་ཁྱེར་ཁག་གི་བརྟན་ལྷིང་སྲུང་སྐྱོང་གི་ལས་རེས་བྱས་ཚུལ་ལ་ཞིབ་བཤེར་ཡང་གནང་ཞིང་། ཁོང་གིས་འདི་ལོའི་རྒྱལ་སྟོན་དུས་ཆེན་དང་བརྒྱད་པའི་བཅོ་ལྔའི་དུས་ཆེན་གྱི་ངལ་གསོའི་དུས་ཚོད་རིང་བས་བརྟན་ལྷིང་སྲུང་སྐྱོང་གི་གནོན་ཤུགས་ཅུང་ཆེ་བ་དང་ལྗོངས་ཡོངས་ཀྱི་བརྟན་ལྷིང་སྲུང་སྐྱོང་བཀོད་འདོམས་པུའི་ལས་འགན་དང་འགན་འཁྲི་ལྕི་པོ་ཡོད། ཡིན་ནའང་རྒྱ་ཆེའི་ལས་རེས་མི་སྣས་རང་ངོས་ཀྱི་ལས་གནས་ཐོག་མཐའ་བར་གསུམ་དུ་བརྟན་སྲུང་དང་རང་འགན་གཙང་སྒྲུབ་ནན་ཏན་ངང་བྱས་ཏེ་རང་ལྗོངས་ཀྱི་རྒྱུན་བསྲིང་བརྟན་ལྷིང་ཆེད་ལེགས་སྐྱེས་ཧུར་ཐག་ཕུལ་ཡོད་ཅེས་གསུངས་པ་རེད། ཁོང་གིས་ལས་རེས་མི་སྣ་ཡོངས་ལ་ཡང་འབད་བསྐྱར་འབད་དང་མིག་རྒྱང་རིང་ཙམ་གྱིས་ཕྱོགས་བསྡུས་མཐུན་སྦྱོར་དང་ལྟ་སྐུལ་ཞིབ་བཤེར་ལ་ཤུགས་སྣོན་བརྒྱབ་ནས་མིག་སྔའི་རང་ལྗོངས་ཀྱི་བརྟན་ལྷིང་སྲུང་སྐྱོང་ལས་དོན་ཡག་པོ་བསྒྲུབ་ཆེད་མུ་མཐུད་རང་འགན་གཙང་སྒྲུབ་དང་སྟོབས་ཤུགས་ལེགས་སྐྱེས་སུ་འབུལ་དགོས་པའི་བླང་བྱ་བཏོན་གནང་བ་རེད།