ཟླ་10ཚེས་3ཉིན་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་པད་མ་འཕྲིན་ལས་བོད་ལྗོངས་འབྲུག་ཆེན་ཟངས་ལས་ཚད་ཡོད་ཀུང་སི་ཆུ་ལུང་ཟངས་གཏེར་གྱི་ལྕགས་རིགས་མང་འདུས་གཏེར་ཁུལ་དུ་ཕེབས་ནས་གཏེར་ཁུལ་གསར་སྤེལ་འཛུགས་སྐྲུན་གྱི་འཕེལ་ཚུལ་ལ་བརྟག་ཞིབ་གནང་བ་དང་འབྲེལ་གཏེར་ཁུལ་གྱི་ལས་མིར་གཟིགས་པ་དང་འཚམས་འདྲིའང་གནང་ཞིང་། འདི་ནི་ཀྲུའུ་ཞི་པད་མ་འཕྲིན་ལས་ཀྱིས་གཏེར་ཁུལ་འགན་ཁུར་བའི་གཏེར་ཁུལ་འཛུགས་སྐྲུན་སྐོར་གྱི་གནས་ཚུལ་ངོ་སྤྲོད་གསན་པའི་གནས་ཚུལ་ཡིན་པ།

    ཟླ་10ཚེས་3ཉིན་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་པད་མ་འཕྲིན་ལས་ལྷ་ས་གྲོང་ཁྱེར་མལ་གྲོ་གུང་དཀར་རྫོང་དུ་ཡོད་པའི་བོད་ལྗོངས་འབྲུག་ཆེན་ཟངས་ལས་ཚད་ཡོད་ཀུང་སི་ཆུ་ལུང་ཟངས་གཏེར་གྱི་ལྕགས་རིགས་མང་འདུས་གཏེར་ཁུལ་དུ་ཕེབས་ནས་གཏེར་ཁུལ་གསར་སྤེལ་འཛུགས་སྐྲུན་གྱི་འཕེལ་ཚུལ་ལ་བརྟག་ཞིབ་གནང་བ་དང་སྦྲགས་གཏེར་ཁུལ་གྱི་ལས་མིར་གཟིགས་པ་དང་འཚམས་འདྲི་ཡང་གནང་བ་རེད།

    པད་མ་འཕྲིན་ལས་དང་བཅས་པ་སྔ་རྗེས་སུ་ཆུ་ལུང་གཏེར་ཁུལ་ཁག་ཏུ་ཕེབས་ནས་བརྟག་ཞིབ་གནང་བ་དང་སྦྲགས་འབྲེལ་ཡོད་འགན་ཁུར་བའི་གནས་ཚུལ་ངོ་སྤྲོད་གསན་པ་རེད།

    པད་མ་འཕྲིན་ལས་ཀྱིས་ལྗོངས་ཡོངས་ཀྱི་རིམ་ཁག་སྡེ་ཚན་ཁག་ལ་ཚན་རིག་དང་མཐུན་པའི་འཕེལ་རྒྱས་ལྟ་བ་དང་ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པའི་དགོངས་དོན་ངེས་པར་དུ་ལག་བསྟར་དོན་འཁྱོལ་གཏིང་ཟབ་བྱས་ནས་བློ་བརྟན་འགྱུར་མེད་ངང་ཚན་རིག་དང་མཐུན་པའི་འཆར་འགོད་དང་། སྟོབས་ཤུགས་གཅིག་སྡུད། ཐོན་ཁུངས་བསྡུ་སྒྲིལ་བཅས་ཀྱི་ལམ་བུའི་ཐོག་ཏུ་བསྐྱོད་དགོས་པ་དང་། ལེགས་ཆ་ཡོད་པ་དང་། ཁྲོམ་ར་ཡོད་པ། ཕན་འབྲས་ཆེ་བ་བཅས་ཀྱི་གཏེར་ཆེན་གཅིག་སྡུད་བྱས་ནས་འབབ་ཆེ་བ་དང་། དངོས་ཤུགས་ཆེ་བ། ཡིད་ཆེས་ལྡན་པ་བཅས་ཀྱི་གཞུང་ཁོངས་ཁེ་ལས་དང་དམངས་གཉེར་ཁེ་ལས་ཆེ་གྲས་ལ་གཏེར་ཁ་འཚོལ་ཞིབ་དང་སྔོག་འདོན་ཐད་གཙོ་ཁྲིད་ནུས་པ་འདོན་སྤེལ་བྱེད་དུ་འཇུག་པ། རང་སྐྱོང་ལྗོངས་ཀྱི་འབྲེལ་ཡོད་སྡེ་ཚན་ཁག་གིས་ཁེ་ལས་དབར་གྱི་འབྲེལ་འདྲིས་ལ་སྔ་ཙམ་ཤུགས་སྣོན་བརྒྱབ་ནས་བརྒྱུད་རིམ་ཚད་ལྡན་དུ་གཏོང་བ་དང་། འགྲོ་ལུགས་སྟབས་བདེར་གཏོང་བ། ལྟ་སྐུལ་དོ་དམ་ལ་ཤུགས་སྣོན་རྒྱག་པ་བཅས་བྱེད་དགོས་པ། འཕེལ་རྒྱས་དང་བརྟན་ལྷིང་དབར་གྱི་འབྲེལ་བ་དང་། ཁག་གཅིག་གི་ཁེ་ཕན་དང་ཁྱོན་ཡོངས་ཀྱི་ཁེ་ཕན་དབར་གྱི་འབྲེལ་བ། མིག་སྔ་དང་ཕུགས་ཀྱི་འབྲེལ་བ་བཅས་ཐག་གཅོད་ཡང་དག་པ་བྱས་ནས་ཁེ་ལས་ལ་ཐོན་སྐྱེད་ཁོར་ཡུག་ཡག་པོ་ཞིག་སྐྲུན་པ་དང་ཆབས་ཅིག་ཁེ་ལས་དེ་དང་ས་གནས་དང་མང་ཚོགས་དབར་གྱི་འབྲེལ་འདྲིས་སྤེལ་རེས་ལའང་སྐུལ་འདེད་ཀྱིས་ཞི་མཐུན་མཉམ་འགུལ་གྱི་རྣམ་པ་ཡག་པོ་ཞིག་གཏོད་དེ་གཏེར་ཁུལ་གྱི་བདེ་འཇགས་འགན་ལེན་བྱེད་པ་བཅས་བྱས་ནས་རང་ལྗོངས་ཀྱི་ཐོན་ཁུངས་ཀྱི་ལེགས་ཆ་དེ་དཔལ་འབྱོར་གྱི་ལེགས་ཆར་གང་མགྱོགས་བསྒྱུར་ནས་བོད་ཀྱི་དཔལ་འབྱོར་དང་སྤྱི་ཚོགས་མཆོང་སྐྱོད་ལྟ་བུའི་འཕེལ་རྒྱས་འགྲོ་རྒྱུ་དང་ཡུན་རིང་བདེ་འཁོད་ཡོང་རྒྱུར་སྐུལ་འདེད་གཏོང་ཆེད་ལེགས་སྐྱེས་འབུལ་དགོས་པའི་བླང་བྱ་བཏོན་གནང་བ་རེད།

    ཁོང་གིས་རང་སྐྱོང་ལྗོངས་དང་། ལྷ་ས་གྲོང་ཁྱེར། མལ་གྲོ་གུང་དཀར་རྫོང་། འབྲེལ་ཡོད་ཁེ་ལས་བཅས་ཀྱིས་མཉམ་དུ་ཕུན་སུམ་ཚོགས་པའི་གཏེར་རྫས་ཐོན་ཁུངས་ཀྱི་ལེགས་ཆར་བརྟེན་ནས་གཏེར་ཁ་གསར་སྤེལ་ཡག་པོ་དང་། འཛུགས་སྐྲུན་ཡག་པོ། གཉེར་སྐྱོང་ཡག་པོ་བཅས་བྱས་ནས་རང་ངོས་འཕེལ་རྒྱས་གཏོང་བའི་ནུས་པ་དང་ཆུ་ཚད་རྒྱུན་ཆད་མེད་པར་མཐོ་རུ་གཏོང་རྒྱུའི་ཐུགས་རེ་གནང་བ་རེད།

    པད་མ་འཕྲིན་ལས་ད་དུང་ཆེད་མངགས་ཆུ་ལུང་གཏེར་ཁུལ་གྱི་གནས་སྤོས་དུད་ཚང་གི་བདེ་སྡོད་ལས་གྲྭའི་ཁང་པ་འཛུགས་སྐྲུན་བྱེད་སར་ཕེབས་ནས་གཏེར་ཁུལ་མི་སེར་གྱི་གནས་སྤོའི་གནས་ཚུལ་དང་ཐོན་སྐྱེད་དང་འཚོ་བའི་གནས་ཚུལ་རྒྱུས་ལོན་གསལ་པོ་གནང་བ་དང་སྦྲགས་མལ་གྲོ་གུང་དཀར་རྫོང་རྒྱ་མ་ཤང་ཙི་ཙི་རོང་གྲོང་གསར་འཛུགས་སྐྲུན་བྱེད་ཚུལ་ལའང་བརྟག་ཞིབ་གནང་བ་རེད།

    རང་སྐྱོང་ལྗོངས་ཀྱི་འབྲེལ་ཡོད་སྡེ་ཚན་ཁག་གི་འགན་འཁུར་བློ་མཐུན་མཉམ་དུ་བརྟག་ཞིབ་གནང་བར་ཕེབས་རོགས་ཞུས་པ་རེད།