ཟླ་9ཚེས་26ཉིན་གྱི་སྔ་དྲོར་བོད་རང་སྐྱོང་ལྗོངས་མེས་རྒྱལ་དུ་ཚུར་ལོག་ཕྱིར་སྡོད་རང་མིའི་མཉམ་འབྲེལ་ལྷན་ཚོགས་བཙུགས་ནས་སྒོ་བྱང་བཀལ་དེ་ལས་རང་ལྗོངས་ཀྱི་ཕྱིར་སྡོད་རང་མིའི་མཉམ་འབྲེལ་ལྷན་ཚོགས་ཀྱི་ལས་དོན་དེ་ཚད་ལྡན་ཅན་དུ་གྱུར་ནས་འཕེལ་རྒྱས་ཀྱི་དུས་སྐབས་གསར་པ་སླེབས་པ་མཚོན་གྱི་ཡོད་པ་རེད།
རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་རང་སྐྱོང་ལྗོངས་ཀྱི་ཀྲུའུ་ཞི་པད་མ་འཕྲིན་ལས་དང་། ཀྲུང་གོ་ཕྱིར་སྡོད་རང་མིའི་མཉམ་འབྲེལ་ལྷན་ཚོགས་ཀྱི་ཏང་ཙུའི་ཧྲུའུ་ཅི་ཀྲུའུ་ཞི་ལིན་ཅུན་རྣམ་གཉིས་ཀྱིས་བོད་རང་སྐྱོང་ལྗོངས་མེས་རྒྱལ་དུ་ཚུར་ལོག་ཕྱིར་སྡོད་རང་མིའི་མཉམ་འབྲེལ་ལྷན་ཚོགས་ཀྱི་སྒོ་བྱང་གི་ཡོལ་ཁེབས་ཕྱེ་གནང་བ་དང་། རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་དང་། ལྗོངས་སྲིད་གྲོས་ཀྱི་ཏང་ཙུའི་ཧྲུའུ་ཅི། ཀྲུའུ་ཞི་གཞོན་པ། ལྗོངས་ཏང་ཨུད་འཐབ་ཕྱོགས་གཅིག་གྱུར་པུའི་པུའུ་ཀྲང་བཅས་ཡིན་པའི་མགོན་པོ་བཀྲ་ཤིས་ཀྱིས་སྒོ་བྱང་འགེལ་བའི་མཛད་སྒོ་གཙོ་སྐྱོང་གནང་བ་རེད།
མགོན་པོ་བཀྲ་ཤིས་ཀྱིས་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཚབ་ཞུས་ཏེ་གསུང་བཤད་གནང་སྐབས་བོད་རང་སྐྱོང་ལྗོངས་ཕྱིར་སྡོད་རང་མིའི་མཉམ་འབྲེལ་ལྷན་ཚོགས་སྒོ་བྱང་བཀལ་ནས་བཙུགས་པ་འདིས་ཏང་ཀྲུང་དབྱང་དང་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་ཕྱིར་སྡོད་རང་མིའི་ལས་དོན་ཐད་ཚད་མཐོའི་མཐོང་ཆེན་གནང་ལུགས་སྔར་བས་མཚོན་པའི་ཁར་རྒྱ་ཆེའི་ཕྱིར་སྡོད་སྤུན་ཟླ་དང་ཁོང་ཚོའི་ཁྱིམ་མི་དབར་འབྲེལ་བ་ཟབ་མོ་བྱེད་པ་དང་། མི་སེམས་གོང་བུར་འགྲིལ་བ། རྒྱལ་གཅེས་ཀྱི་སྟོབས་ཤུགས་ཆེ་རུ་གཏོང་བ་བཅས་ཀྱི་ཐད་སྟེགས་བུ་གཏོད་ཐོག་ཐབས་ལམ་ཡང་རྒྱ་ཆེར་བཏང་ཡོད་ཅེས་གསུངས་པ་རེད།
མགོན་པོ་བཀྲ་ཤིས་ཀྱིས་རང་སྐྱོང་ལྗོངས་ཕྱིར་སྡོད་རང་མིའི་མཉམ་འབྲེལ་ལྷན་ཚོགས་ལ་ཏང་གིས་འགོ་ཁྲིད་བྱེད་རྒྱུ་བློ་བརྟན་འགྱུར་མེད་ངང་རྒྱུན་འཁྱོངས་བྱེད་པ་དང་། ཕྱིར་སྡོད་རང་མིའི་ལས་དོན་གྱི་ཡང་དག་པའི་ཆབ་སྲིད་ཁ་ཕྱོགས་ཐོག་མཐའ་བར་གསུམ་དུ་རྒྱུན་འཁྱོངས་བྱེད་པ། ཀྲུང་དབྱང་གི་དགོངས་དོན་དང་རང་སྐྱོང་ལྗོངས་ཀྱི་བླང་བྱ་ལྟར་དངོས་ཡོད་ལ་གཞི་འཛུགས་པ་དང་། བསམ་བློར་བཅིངས་འགྲོལ་གཏོང་བ། གསར་འབྱེད་གསར་གཏོད་བཅས་བྱེད་པའི་ཁར 《ཕྱིར་སྡོད་རང་མིའི་མཉམ་འབྲེལ་ལྷན་ཚོགས་ཀྱི་སྒྲིག་ཡིག 》ལྟར་རང་འགུལ་ངང་ལས་དོན་ཧུར་ཐག་སྤེལ་ནས་ཕྱིར་སྡོད་རང་མིའི་མཉམ་འབྲེལ་ལྷན་ཚོགས་ཀྱི་ཚོགས་ཆེན་འཚོག་རྒྱུར་གྲ་སྒྲིག་ཡག་པོ་བྱས་ནས་ཕྱིར་སྡོད་རང་མིའི་མཉམ་འབྲེལ་ལྷན་ཚོགས་རྩ་འཛུགས་ཀྱི་ཐུན་མོང་མ་ཡིན་པའི་ནུས་པ་འདོན་སྤེལ་གང་ལེགས་བྱེད་རྒྱུ་དང་། ཕྱིར་སྡོད་སྤུན་ཟླའི་དགེ་མཚན་ལྡན་པའི་ནུས་པ་དང་ཤན་ཤུགས་འདོན་སྤེལ་གང་ལེགས་བྱེད་རྒྱུ། ཕྱིར་སྡོད་སྤུན་ཟླ་དང་ཁོང་ཚོའི་ཁྱིམ་མིར་ཞབས་ཞུ་དང་ཁྲིད་སྟོན་བྱེད་པའི་ལས་དོན་མུ་མཐུད་གཏིང་ཟབ་སྤེལ་བ་དང་། མེས་རྒྱལ་དུ་ཚུར་ལོག་བོད་རིགས་སྤུན་ཟླར་སྣེ་ལེན་དང་རོགས་སྐྱོར་བྱེད་པའི་ལས་དོན་ཧུར་ཐག་སྤེལ་བ། ཕྱིར་སྡོད་རང་མིའི་ཁྲིམས་མཐུན་ཁེ་དབང་སྲུང་སྐྱོང་ཏན་ཏིག་བཅས་བྱས་ནས་བོད་ཀྱི་ཕྱིར་སྡོད་རང་མིའི་མཉམ་འབྲེལ་ལྷན་ཚོགས་ལས་དོན་གྱི་རྣམ་པ་གསར་པ་གཏོད་རྒྱུ་བཅས་ཀྱི་བླང་བྱ་བཏོན་གནང་བ་རེད།
ལིན་ཅུན་གྱིས་སྒོ་བྱང་གི་ཡོལ་ཁེབས་འབྱེད་པའི་མཛད་སྒོའི་ཐོག་རྒྱལ་ཁབ་དང་ས་ཁུལ་50ཙམ་དུ་ཁྱབ་པའི་ཕྱིར་སྡོད་བོད་རིགས་སྤུན་ཟླ་ནི་དམིགས་བསལ་གྱི་ལོ་རྒྱུས་ཆ་རྐྱེན་འོག་གྲུབ་པའི་ཕྱི་རྒྱལ་དུ་སྡོད་མཁན་རང་རྒྱལ་གྱི་གྲངས་ཉུང་མི་རིགས་ཀྱི་ཚོགས་སྤྱི་ཞིག་ཡིན་ལ་ཕྱིར་སྡོད་རང་མིའི་ཁ་བྲལ་ཐབས་མེད་པའི་གྲུབ་ཆ་གལ་ཆེན་ཞིག་ཀྱང་ཡིན། ཀྲུང་གོ་ཕྱིར་སྡོད་རང་མིའི་མཉམ་འབྲེལ་ལྷན་ཚོགས་ལ་ཕྱིར་སྡོད་བོད་རིགས་སྤུན་ཟླ་དང་བོད་རིགས་ས་ཁུལ་གྱི་མེས་རྒྱལ་དུ་ཚུར་ལོག་ཕྱིར་སྡོད་རང་མི་དང་ཁོང་ཚོའི་ཁྱིམ་མིར་ཞབས་འདེཌ་ཞུ་བའི་གཟི་བརྗིད་འོས་འགན་ཡོད་པས་ཀྲུང་གོ་ཕྱིར་སྡོད་རང་མིའི་མཉམ་འབྲེལ་ལྷན་ཚོགས་ཀྱིས་བོད་ཀྱི་ཕྱིར་སྡོད་རང་མིའི་མཉམ་འབྲེལ་ལྷན་ཚོགས་དང་ཕྱི་རྒྱལ་གྱི་བོད་རིགས་སྤུན་ཟླའི་ལས་དོན་སྐྱོན་བྲལ་ངང་འཕེལ་རྒྱས་གཏོང་རྒྱུར་སྔར་བཞིན་རྒྱབ་སྐྱོར་བྱས་ནས་བོད་ཀྱི་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་དང་། མེས་རྒྱལ་གཅིག་གྱུར་དང་མི་རིགས་མཐུན་སྒྲིལ་ལ་སྲུང་སྐྱོང་བྱེད་པའི་ཐད་ལེགས་སྐྱེས་འབུལ་རྒྱུ་ཞེས་ནན་བཤད་གནང་བ་རེད།