ཟླ་9ཚེས་26ཉིན་གྱི་ཕྱི་དྲོ་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་པད་མ་འཕྲིན་ལས་ཀྱིས་ལྷ་སར་རང་ལྗོངས་སུ་རྟོག་ཞིབ་གནང་བར་ཕེབས་པའི་ཀྲུང་གོ་རྒྱལ་ཁབ་གློག་དྲ་ཚོགས་པ་ཀུང་སིའི་ཏང་ཙུའི་ཧྲུའུ་ཅི་གཞོན་པ་སྤྱི་ཁྱབ་ཅིང་ལི་ཀྲུའུ་ཡུང་ཕེང་དང་ཀྲུང་གོ་རྒྱལ་ཁབ་གློག་དྲ་ཚོགས་པ་ཀུང་སིའི་ཏང་ཙུའི་ཁོངས་མི་སྤྱི་ཁྱབ་ཅིང་ལི་གཞོན་པ་དབྱང་ཧའེ་པིན་དང་མི་ཧྲུའུ་ཧྭ་བཅས་པ་དང་མཇལ་འཛོམས་གནང་བ་རེད།
པད་མ་འཕྲིན་ལས་ཀྱིས་དང་ཐོག་རང་སྐྱོང་ལྗོངས་ཏང་ཨུད་དང་སྲིད་གཞུང་དང་ལྗོངས་ཏང་ཨུད་ཀྱི་ཧྲུའུ་ཅི་ཁྲེན་ཆོན་གོའི་ཚབ་ཞུས་ཏེ་ཀྲུའུ་ཡུང་ཕེང་དང་བཅས་པ་རང་ལྗོངས་སུ་ལས་དོན་ལ་ཞིབ་བཤེར་དང་མཛུབ་ཁྲིད་གནང་བར་ཕེབས་པར་དགའ་བསུ་ཞུས་པ་དང་། ཀྲུང་གོ་རྒྱལ་ཁབ་གློག་དྲ་ཚོགས་པ་ཀུང་སིས་ལོ་མང་རིང་བོད་ཀྱི་ལས་དོན་ཁག་དང་ལྷག་པར་དུ་ནུས་རྒྱུ་འཛུགས་སྐྲུན་བྱ་རྒྱུར་དོ་ཁུར་དང་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་རེད། རང་ལྗོངས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་འགྲོ་ཚུལ་ངོ་སྤྲོད་མདོར་བསྡུས་གནང་རྗེས་པད་མ་འཕྲིན་ལས་ཀྱིས་ཀྲུང་གོ་རྒྱལ་ཁབ་གློག་དྲ་ཚོགས་པ་ཀུང་སིས་ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པའི་དགོངས་དོན་ལག་བསྟར་དོན་འཁྱོལ་ནན་ཏན་བྱས་ཏེ་བོད་ཀྱི་གློག་ཤུགས་བྱ་གཞག་འཕེལ་རྒྱས་འགྲོ་རྒྱུར་རྒྱབ་སྐྱོར་ཧུར་ཐག་བྱས་པ་དང་བོད་ཀྱི་ཆུ་གློག་དང་། ཉི་འོད་ནུས་པ། ས་འོག་ཚ་ནུས་སོགས་ནུས་རྒྱུ་དང་ཐོན་ཁུངས་གསར་སྤེལ་བེད་སྤྱོད་བྱ་རྒྱུར་སྐུལ་འདེད་མགྱོགས་པོ་བཏང་ནས་བོད་ཀྱི་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ལ་སྒུལ་ཤུགས་ཆེན་པོ་ཞིག་བསྣན་ཡོད། རྒྱལ་ཁབ་གློག་དྲ་ཚོགས་པ་ཀུང་སིས་ལག་རྩལ་གྱི་ལེགས་ཆ་སྔར་བས་འདོན་སྤེལ་བྱས་ཏེ་ལས་ཀའི་སྤྱོད་ཚུལ་བཟང་པོ་དང་། ལག་རྩལ་གྱི་ཆུ་ཚད་མཐོ་པོ། འཛུགས་སྐྲུན་ཉམས་མྱོང་ཕུན་སུམ་ཚོགས་པོ་བཅས་ལ་བརྟེན་ནས་བོད་ཀྱི་ནུས་རྒྱུ་འཛུགས་སྐྲུན་ལ་རྒྱབ་སྐྱོར་བྱ་རྒྱུའི་རེ་བ་ཡོད་ཅེས་གསུངས་པ་རེད།
ཀྲུའུ་ཡུང་ཕེང་གིས་ཀྲུང་གོ་རྒྱལ་ཁབ་གློག་དྲ་ཚོགས་པ་ཀུང་སིས་བོད་ཀྱི་བྱ་གཞག་ཁག་འཕེལ་རྒྱས་གཏོང་རྒྱུར་སྔར་ནས་ད་བར་དོ་ཁུར་བྱེད་པ་དང་འབྲེལ་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྐྱེ་བོ་ཀུན་དགའ་འོས་པའི་གྲུབ་འབྲས་ཐོབ་པ་ལས་སེམས་འགུལ་གཏིང་ཟབ་ཐེབས་བྱུང་། ཀྲུང་གོ་རྒྱལ་ཁབ་གློག་དྲ་ཚོགས་པ་ཀུང་སིས་ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པའི་དགོངས་དོན་མུ་མཐུད་ལག་བསྟར་དང་དོན་འཁྱོལ་བྱས་ཏེ་བོད་དུ་གཞིས་ཆགས་པ་དང་། བོད་ལ་ཞབས་འདེགས་ཞུ་བ། བོད་ལ་ལེགས་སྐྱེས་འབུལ་བ་བཅས་བྱེད་པའི་ཁར་བོད་ཀྱི་ནུས་རྒྱུའི་རྣམ་གྲངས་གསར་སྤེལ་བྱེད་ཤུགས་ཆེ་རུ་གཏོང་བ་དང། མ་དངུལ་དང་། ཤེས་ལྡན་པ། ལག་རྩལ་བཅས་ཀྱི་ཐོག་ནས་མ་འཇོག་བྱེད་ཤུགས་ཆེ་རུ་གཏོང་བ། བོད་ཀྱི་རྒྱ་ཆེའི་མི་སེར་ཚོར་གློག་སྤྱོད་རྒྱུ་ཡོང་བ་དང་གློག་ཡག་པོ་སྤྱོད་རྒྱུ་ཡོང་བ་བཅས་བྱས་ནས་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྐུལ་མ་གཏོང་རྒྱུ་དང་བོད་ཀྱི་མི་རིགས་ཁག་གི་མི་དམངས་ཚོར་བདེ་སྐྱིད་སྐྲུན་ཆེད་ལེགས་སྐྱེས་གསར་པ་དེ་བས་ཆེ་བ་འབུལ་རྒྱུ་ཡིན་ཞེས་གསུངས་པ་རེད།