ཟླ་9ཚེས་24ཉིན་གྱི་སྔ་དྲོ་རང་སྐྱོང་ལྗོངས་ཀྱི་སྔོན་གཏོད་ལེགས་བརྩོན་དང་རྨང་བརྟན་དམངས་ཕན་བྱེད་སྒོའི་དཔའ་བོ་དཔེ་བཟང་མི་སྣའི་སྔོན་ཐོན་བྱས་རྗེས་ཀྱི་སྙན་ཞུའི་ཚོགས་འདུ་ལྷ་སར་འཚོགས་ཤིང་། ཁྲེན་ཆོན་གོ་སོགས་ཀྱིས་སྙན་ཞུ་ཚོགས་པའི་ཁོངས་མིར་བྱམས་བརྩེའི་ངང་མཇལ་འཕྲད་གནང་བ།

    ཟླ་9ཚེས་24ཉིན་གྱི་སྔ་དྲོ་རང་སྐྱོང་ལྗོངས་ཀྱི་སྔོན་གཏོད་ལེགས་བརྩོན་དང་རྨང་བརྟན་དམངས་ཕན་བྱེད་སྒོའི་དཔའ་བོ་དཔེ་བཟང་མི་སྣའི་སྔོན་ཐོན་བྱས་རྗེས་ཀྱི་སྙན་ཞུའི་ཚོགས་འདུ་ལྷ་སར་འཚོགས་པ་རེད།

    རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཁྲེན་ཆོན་གོ་དང་། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཀྲུའུ་རེན་བྱམས་པ་ཕུན་ཚོགས། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་པད་མ་འཕྲིན་ལས། རང་སྐྱོང་ལྗོངས་ཏང་ཨུད་ཀྱི་རྒྱུན་ལས་ཧྲུའུ་ཅི་གཞོན་པ་ཧའོ་ཕུང་སོགས་སྙན་ཞུའི་ཚོགས་འདུར་ཞུགས་པ་མ་ཟད་སྙན་ཞུ་ཚོགས་པའི་ཁོངས་མི་ཚོ་དང་བྱམས་བརྩེའི་ངང་མཇལ་འཕྲད་གནང་བ་རེད།

    རང་སྐྱོང་ལྗོངས་ཀྱི་འགོ་ཁྲིད་བློ་བཟང་རྒྱལ་མཚན་དང་། མགོན་པོ་བཀྲ་ཤིས། ཆེ་དགྲ་ལྷ། ཏེང་ཞའོ་ཀང་། ལེའང་ཐེན་ཀེང་བཅས་སྙན་ཞུའི་ཚོགས་འདུར་ཞུགས་པ་དང་། རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་སྒྲིག་ཨུད་ཀྱི་ཧྲུའུ་ཅི་ཅིན་ཧྲུའུ་པོས་སྙན་ཞུའི་ཚོགས་འདུར་གཙོ་སྐྱོང་གནང་བ་རེད།

    ཁྲེན་ཆོན་གོས་མཇལ་འཕྲད་གནང་སྐབས་རང་སྐྱོང་ལྗོངས་ཏང་ཨུད་དང་། མི་དམངས་འཐུས་ཚོགས། སྲིད་གཞུང་། སྲིད་གྲོས་བཅས་ཀྱི་ཚབ་ཞུས་ཏེ་ལྗོངས་ཡོངས་ཀྱི་སྔོན་གཏོད་ལེགས་བརྩོན་དང་རྨང་བརྟན་དམངས་ཕན་བྱེད་སྒོའི་ཁྲོད་ཐོན་པའི་དཔའ་བོ་དཔེ་བཟང་མི་སྣའི་ཁྱིམ་མིར་སྙིང་ཉེ་བའི་འཚམས་འདྲི་དང་། སྙན་ཞུ་ཚོགས་པའི་བློ་མཐུན་ཡོངས་ལ་ལྷག་བསམ་ཟོལ་མེད་ཀྱི་འཚམས་འདྲི། གཞི་རིམ་གྱི་འཐབ་ཕྱོགས་དང་པོར་འབད་འཐབ་བྱེད་པའི་རྒྱ་ཆེའི་གྲོང་ཚོར་བཅའ་སྡོད་ཀྱི་ལས་བྱེད་པར་བླ་ན་མེད་པའི་གུས་འདུད་བཅས་ཞུས་པ་རེད།

    ཁྲེན་ཆོན་གོས་ལོ་གཅིག་རིང་སྔོན་གཏོད་ལེགས་བརྩོན་དང་རྨང་བརྟན་དམངས་ཕན་བྱེད་སྒོ་སྤེལ་ཚུན་ལྗོངས་ཡོངས་ཀྱི་གྲོང་ཚོར་བཅའ་སྡོད་ལས་བྱེད་པ་ཁྲི་2ལྷག་ཙམ་གྱིས་ཁྱིམ་ཚང་བློས་བཏང་སྟེ་ཚང་མ་བསམས་པ་དང་། མི་རིགས་ཁག་གི་མང་ཚོགས་དང་ལྷན་དུ་མཉམ་ཟ་མཉམ་འཐུང་དང་། མཉམ་དུ་སློབ་སྦྱོང་། མཉམ་དུ་ངལ་རྩོལ་བཅས་བྱས་པ་དང་། རྩ་འཛུགས་བརྟན་སྐྲུན་དང་། བརྟན་ལྷིང་སྲུང་སྐྱོང་། ཕྱུག་འགྱུར་བྱེད་རོགས། སློབ་གསོར་དྲིན་གཟོ། དོན་དངོས་ལེགས་སྒྲུབ་བཅས་ལས་འགན་ལྔར་དམ་པོར་དམིགས་ཏེ་རང་འགན་ནན་སྒྲུབ་དང་རང་དོན་རྒྱབ་བསྐྱུར་ངང་ལས་ཀ་སྒྲུབ་པ་དང་། མི་རིགས་ཁག་གི་མི་དམངས་ཀྱི་བདེ་སྐྱིད་ཁམས་བདེ་དང་ལྗོངས་ཡོངས་ཀྱི་ཞི་མཐུན་བརྟན་ལྷིང་གི་སྤྱི་ཡོངས་ཆེད་དཀའ་བ་སྤྱད་པ་དང་རྔུལ་ཆུ་བཏོན་པ་དང་ཐ་ན་རྩ་ཆེ་བའི་ཚེ་སྲོག་ཀྱང་ཕུལ་བ་རེད། གྲོང་ཚོར་བཅའ་སྡོད་ལས་དོན་རུ་ཁག་གི་རུ་མི་ཚོས་ལས་དོན་རྩེ་གྲ་བསྒྲུབས་པ་ལས་ལྗོངས་ཡོངས་ཀྱི་རྒྱ་ཆེའི་ལས་བྱེད་པའི་ཆབ་སྲིད་བརྟན་པོ་དང་། མི་དམངས་ལ་ཞབས་ཞུ། སྒེར་སེམས་མེད་པའི་སྐྱེས་འབུལ། ཁུར་ཆེན་ཕྲག་ཏུ་དཔའ་ངར་ལྡན་པའི་ངང་ལེན་པ་བཅས་ཀྱི་བྱང་ཚད་ཕུལ་བྱུང་གཅིག་སྡུད་ཐོག་མཚོན་པ་དང་། དེང་རབས་ཀྱི་མི་རིགས་ཁག་གི་ལས་བྱེད་པའི་བསམ་པའི་ཉམས་འགྱུར་བཟང་པོ་གསོན་ཉམས་ལྡན་པའི་ངང་མངོན་པ་དང་། ཏང་ཨུད་དང་སྲིད་གཞུང་གི་ཐབས་ཇུས་བཀོད་སྒྲིག་ནི་རྦད་དེ་ཡང་དག་ཚུལ་སྒོ་ཀུན་ནས་མཚོན་ཞིང་། མི་རིགས་ཁག་གི་མི་དམངས་མང་ཚོགས་ཀྱིས་ཏང་དྲིན་ཚོར་བ་དང་། ཏང་གི་བཀའ་ལ་ཉན་པ། ཏང་གི་རྗེས་སུ་འབྲངས་བའི་ཡིད་ཆེས་དང་ཆོད་སེམས་སྔར་བས་བརྟན་དུ་སོང་ཡོད་ཅེས་གསུངས་པ་རེད།

    ཁྲེན་ཆོན་གོས་ད་རེས་ཀྱི་སྙན་ཞུའི་ཚོགས་འདུ་དེ་གོ་སྐབས་བཟང་པོ་དང་སྒུལ་ཤུགས་སུ་བརྩིས་ནས་འགོ་ཁྲིད་ལ་ཤུགས་སྣོན་རྒྱག་པ་དང་སྒྲིག་འཛུགས་ཞིབ་ཚགས་སྔར་བས་བྱས་ཏེ་ཏང་གི་ཚོགས་ཆེན་བཅོ་བརྒྱད་པར་བསུ་བ་དང་། ཏང་གི་ཚོགས་ཆེན་བཅོ་བརྒྱད་པར་སློབ་སྦྱོང་། ཏང་གི་ཚོགས་ཆེན་བཅོ་བརྒྱད་པ་དྲིལ་བསྒྲགས། ཏང་གི་ཚོགས་ཆེན་བཅོ་བརྒྱད་པ་ལག་བསྟར་བཅས་བྱ་རྒྱུར་དམ་པོར་དམིགས་ནས་རྨང་བརྟན་དམངས་ཕན་བྱེད་སྒོ་དེ་གཏིང་ཟབ་སར་རྒྱུན་ཆད་མེད་པར་སྤེལ་ནས་གྲོང་ཁྱེར་དང་གྲོང་གསེབ་ཀྱི་འཕེལ་རྒྱས་དང་བརྟན་ལྷིང་གི་ཕུགས་ཕན་ལམ་སྲོལ་ཏན་ཏིག་ངང་བཟོ་བ། ཚན་རིག་དང་མཐུན་པའི་གོང་འཕེལ་དང་། མི་རིགས་མཐུན་སྒྲིལ་ལ་སྐུལ་གཏོང་། སྤྱི་ཚོགས་བརྟན་ལྷིང་སྲུང་སྐྱོང་། དམངས་འཚོ་ལེགས་སུ་གཏོང་བར་འགན་ལེན་བཅས་བྱ་རྒྱུར་སྐུལ་མ་གཏོང་བའི་སྒྲིལ་ཤུགས་སྟོབས་ཆེན་ཆགས་པར་བྱས་ཏེ་བློ་མཐུན་ཧུའུ་ཅིན་ཐའོ་ཡིས་སྤྱི་ཁྱབ་ཧྲུའུ་ཅི་གནང་བའི་ཏང་ཀྲུང་དབྱང་གི་བྱམས་བརྩེའི་ཐུགས་ཁུར་ཆུད་ཟོས་སུ་མི་གཏོང་བ་དང་མི་རིགས་ཁག་གི་མང་ཚོགས་ཀྱི་བསམ་འདུན་ཆེན་པོ་ཆུད་ཟོས་སུ་མི་གཏོང་བ་བཅས་ཀྱི་ནན་བཤད་གནང་བ་རེད།

    སྙན་ཞུའི་ཚོགས་འདུའི་ཐོག་སྙན་ཞུ་ཚོགས་པའི་ཁོངས་མིས་རང་ཉིད་ཀྱི་མྱོང་བརྒྱུད་ངོ་མ་དང་ཚོར་སྣང་རྣལ་མར་བརྟེན་ནས་ཟུར་ངོས་མི་འདྲ་བའི་ཐོག་ནས་ལྗོངས་ཡོངས་ཀྱི་གྲོང་ཚོར་བཅའ་སྡོད་ལས་དོན་གྱི་དཔའ་བོ་དཔེ་བཟང་མི་སྣ་བཀྲ་ཤིས་ཕུན་ཚོགས་དང་། ཚེ་བརྟན་སྒྲོལ་མ། ཝང་ཅན། ལི་ཧྥེན་ཡུས། འཆི་མེད། ངག་དབང་སྒྲོལ་དཀར། ལི་ཅང་ལུང་བཅས་བློ་མཐུན་7གྱི་སྔོན་ཐོན་བྱས་རྗེས་དང་བླ་ན་མེད་པའི་སྙིང་སྟོབས་དེ་བརྩེ་དུང་ཟབ་མོའི་ངང་བཤད་པས་དེ་གའི་ཉན་མཁན་རྣམས་ལ་སེམས་འགུལ་ཟབ་མོ་ཐེབས།

    ཧའོ་ཕུང་གིས་སྙན་ཞུའི་ཚོགས་འདུའི་ཐོག་ཕྱོགས་སྡོམ་གསུང་བཤད་གནང་ཞིང་། ཁོང་གིས་ལོ་གཅིག་རིང་རྒྱ་ཆེའི་གྲོང་ཚོར་བཅའ་སྡོད་རུ་མི་ཚོས་ལྗོངས་ཏང་ཨུད་ཀྱི་ཐབས་ཇུས་བཀོད་སྒྲིག་ལག་བསྟར་ནན་ཏན་བྱས་ཏེ་དེའི་ནང་ཞུགས་པ་དང་། སེམས་རྣལ་ལ་ཕབ་པ། གཞི་ཚུགས་པ་བཅས་ཀྱི་ངང་མི་རིགས་ཁག་གི་མང་ཚོགས་དང་མཉམ་ཟ་མཉམ་འཐུང་དང་། མཉམ་སྡོད། མཉམ་དུ་སློབ་སྦྱོང་། མཉམ་དུ་ངལ་རྩོལ་བཅས་བྱས་པ་དང་། གཞི་རིམ་མང་ཚོགས་ལ་ཞབས་ཞུ། གཞི་རིམ་གྱི་བརྟན་ལྷིང་སྲུང་སྐྱོང་། གཞི་རིམ་གྱི་འཕེལ་རྒྱས་ལ་སྐུལ་གཏོང་བཅས་བྱས་ཏེ་མཐའ་ཡས་པའི་གངས་ལྗོངས་ས་མཐོར “རྩ་འཛུགས་ཀྱིས་སྔོན་ཐོན་གཏོད་པ་དང་། ཏང་ཡོན་གྱིས་ཕུལ་བྱུང་བར་བརྩོན་པ། ལས་བྱེད་པར་སྦྱོང་བརྡར་ཐེབས་པ། མང་ཚོགས་ལ་དངོས་ཕན་ཐོབ་པ ”བཅས་ཀྱི་ཡིད་དབང་འཕྲོག་པའི་རོལ་དབྱངས་ལེ་ཚན་རེ་རེ་བརྩམས་པ་རེད། བཀྲ་ཤིས་ཕུན་ཚོགས་སོགས་དཔའ་བོ་དཔེ་བཟང་མི་སྣ་7ནི་ལྗོངས་ཡོངས་ཀྱི་གྲོང་ཚོར་བཅའ་སྡོད་རུ་མི་ཁྲི་གཉིས་ལྷག་གི་འཐུས་མི་ཕུལ་བྱུང་ཡིན་ལ་ཁོང་ཚོ་ཏང་ལ་བློ་དཀར་བ་དང་། མི་དམངས་ལ་བློ་དཀར་ལ། ལས་འགན་ཐད་གནོང་འགྱོད་མེད་པ་དང་། ཁོང་ཚོས་དམིགས་ཡུལ་སེམས་ལ་བརྟན་པོར་ངེས་པ་དང་དམངས་ཆེད་སྲིད་བརྩོན་བྱེད་པ། ཁོང་ཚོ་གཞི་རིམ་དུ་རྩ་བ་ཚུགས་པ་དང་བདེན་འཚོལ་དོན་གཉེར་བྱེད་པ། ལས་སྲུང་ལ་བློ་དཀར་བ་དང་སྒེར་སེམས་མེད་པའི་ལེགས་སྐྱེས་འབུལ་བ། ཁོང་ཚོས་རང་གཅུན་ནན་པོ་དང་སྤྱོད་གཙང་གཞུང་དྲང་བྱེད་པ། ལང་ཚོ་དང་། ཁྲག་དྲོན། ཚེ་སྲོག་བཅས་ལ་བརྟེན་ནས་གུང་ཁྲན་ཏང་ཡོན་གྱི་སྔོན་ཐོན་རང་བཞིན་དང་ལྷད་མེད་རང་བཞིན་འགྲེལ་བཤད་བརྒྱབ་པ་དང་། དུས་སྐབས་གསར་པའི་གུང་ཁྲན་ཏང་ཡོན་གྱི་དུས་རབས་ཀྱི་ཉམས་འགྱུར་གསོན་ཉམས་ལྡན་པའི་སྒོ་ནས་མངོན་པ་བཅས་བྱས་ཏེ་རང་ལྗོངས་ཀྱི་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ཡོང་རྒྱུར་སྐུལ་མ་གཏོང་བར་ཚད་རྒྱུག་བསླངས་པ་རེད། ལྗོངས་ཡོངས་ཀྱི་རིམ་ཁག་ཏང་སྲིད་རྩ་འཛུགས་ཀྱིས་ངེས་པར་དུ་ལྗོངས་ཏང་ཨུད་ཀྱི་བཀོད་སྒྲིག་བླང་བྱ་ལྟར་གྲོང་ཚོར་བཅའ་སྡོད་ལས་དོན་གྱི་སྔོན་ཐོན་བྱས་རྗེས་དང་དཔའ་བོ་དཔེ་བཟང་མི་སྣའི་བླ་ན་མེད་པའི་སྙིང་སྟོབས་ལ་སློབ་སྦྱོང་བྱེད་པའི་ཚ་རླབས་མགྱོགས་མྱུར་འཕྱུར་བར་བྱེད་པ་དང་། རྒྱ་ཆེའི་ཏང་ཡོན་ལས་བྱེད་པར་སྔོན་ཐོན་སློབ་སྦྱོང་དང་སྔོན་ཐོན་རྗེས་སྙེགས་བཅས་བྱ་རྒྱུར་སྐུལ་ལྕག་བཏང་ནས་རྨང་བརྟན་དམངས་ཕན་བྱེད་སྒོའི་ལག་ལེན་རླབས་ཆེན་ཁྲོད་རང་ཉིད་ལ་སྦྱོང་བརྡར་དང་། སྟོབས་ཤུགས་འབུལ་བ། བྱས་རྗེས་འཇོག་པ་བཅས་བྱ་དགོས་ཞེས་བསྟན་གནང་བ་རེད།