ཟླ་9ཚེས་20ཉིན་གྱི་སྔ་དྲོ་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཁྲེན་ཆོན་གོས་ལྷ་ས་གྲོང་ཁྱེར་གྱི་དྲོད་རླངས་མཁོ་འདོན་རྣམ་གྲངས་ལ་བརྟག་ཞིབ་གནང་བ།

    ཚེས་20ཉིན་གྱི་སྔ་དྲོ་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཁྲེན་ཆོན་གོས་ལྷ་ས་གྲོང་ཁྱེར་གྱི་དྲོད་རླངས་མཁོ་འདོན་རྣམ་གྲངས་འཛུགས་སྐྲུན་བྱེད་ཚུལ་ལ་བརྟག་ཞིབ་གནང་ཞིང་། ཁོང་གིས་ལྷ་ས་གྲོང་ཁྱེར་གྱི་དྲོད་རླངས་མཁོ་འདོན་ལས་གྲྭའི་གལ་ཆེའི་རང་བཞིན་ལ་ངོས་འཛིན་བྱེད་ཤུགས་སྔར་བས་ཆེ་རུ་གཏོང་བ་དང་འགན་འཁྲིའི་བསམ་པ་དང་དགོས་གཏུགས་ཀྱི་འདུ་ཤེས་ཆེ་རུ་ཏན་ཏིག་བཏང་སྟེ་གཞོགས་འདེགས་དམ་ཟབ་ཀྱིས་ནུས་ཤུགས་ཡོད་རྒུས་ལས་ཡུན་འགན་ལེན་དང་། སྤུས་ཚད་འགན་ལེན། བདེ་འཇགས་འགན་ལེན་བཅས་ཀྱི་ཐོག་ནས་ད་ལོའི་དགུན་དུས་སུ་ལྷ་ས་གྲོང་ཁུལ་གྱི་ཁྱིམ་ཚང་40%དྲོད་རླངས་བེད་སྤྱོད་ཐུབ་རྒྱུའི་དམིགས་ཚད་མངོན་འགྱུར་ཐུབ་པ་བྱེད་དགོས་ཞེས་ནན་བཤད་གནང་བ་རེད།

    ཁྲེན་ཆོན་གོ་དང་བཅས་པ་དང་ཐོག་པེ་ཅིང་དཀྱིལ་ལམ་དང་ཉང་བྲན་ལྷོ་ལམ་གྱི་ཨར་རྒྱག་བྱ་ཡུལ་གཉིས་ལ་ཕེབས་ཏེ་དུས་ཚོད་དམ་འཛིན་གྱིས་ཨར་རྒྱག་བྱེད་བཞིན་ཡོད་པའི་བཟོ་པ་དང་། ལག་རྩལ་མི་སྣར་བྱམས་བརྩེའི་ངང་འཚམས་འདྲི་གནང་བ་དང་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཚབ་ཞུས་ནས་ཁོང་ཚོས་བོད་མི་དམངས་ཀྱི་བདེ་སྐྱིད་ཆེད་དཀའ་སྤྱད་ངལ་རྩོལ་བྱེད་པར་སྙིང་དབུས་ནས་ཐུགས་རྗེ་ཆེ་ཞུས་པ་དང་འབྲེལ་ཚང་མར་ངལ་རྩོལ་དང་ངལ་གསོ་ཟུང་འབྲེལ་གྱིས་གཟུགས་པོར་གཅེས་སྤྲས་དང་། ཚན་རིག་དང་མཐུན་པའི་ངང་ཨར་རྒྱག བདེ་འཇགས་ལ་སྣང་ཆེན་བཅས་བྱེད་དགོས་ཞེས་ཐུགས་ཁུར་ཆེན་པོའི་ངང་མངགས་བཅོལ་ཀྱང་གནང་བ་རེད། ཁྲེན་ཆོན་གོས་ལྷ་ས་གྲོང་ཁྱེར་གྱི་དྲོད་རླངས་མཁོ་འདོན་ལས་གྲྭའི་འཕེལ་རིམ་གྱི་སྙན་ཞུ་ནན་ཏན་ངང་གསན་རྗེས་ཁོང་གིས་ལྗོངས་ཏང་ཨུད་དང་སྲིད་གཞུང་གི་འགོ་ཁྲིད་འོག་ལྷ་ས་གྲོང་ཁྱེར་དང་འབྲེལ་ཡོད་སྡེ་ཚན་གྱིས་གཞོགས་འདེགས་དམ་ཟབ་བྱེད་པ་དང་ནུས་ཤུགས་ཡོད་རྒུས་སྐུལ་འདེད་བཏང་བས་དྲོད་རླངས་མཁོ་འདོན་ལས་གྲྭར་བདེ་བླག་ངང་སྐུལ་མ་ཐེབས་པས་དུས་བཀག་ནང་དྲོད་རླངས་མཁོ་འདོན་བྱ་རྒྱུའི་དམིགས་ཚད་མངོན་འགྱུར་བྱེད་རེ་ཡོད། དེང་སྐབས་ཨར་རྒྱག་གྱི་དུས་ཚོད་ཡག་ཤོས་དེ་དམ་འཛིན་བྱས་ནས་སྒྲིག་འཛུགས་དང་འགོ་ཁྲིད་ལ་ཤུགས་སྣོན་རྒྱག་པ་དང་། མཐུན་སྦྱོར་དང་གཞོགས་འདེགས་ལ་ཤུགས་སྣོན་རྒྱག་པ། ཨར་རྒྱག་སྒྲིག་འཛུགས་ལ་ཤུགས་སྣོན་རྒྱག་པ། ཆ་ལག་ཚང་བའི་ལས་དོན་ལ་ཤུགས་སྣོན་རྒྱག་པ་བཅས་ཀྱི་ཐོག་ནས་ད་ལོའི་དགུན་ཁ་ལྷ་སའི་ཁྱིམ་ཚང་40%ལ་དྲོད་རླངས་མཁོ་འདོན་ཐུབ་པའི་དམིགས་ཚད་མངོན་འགྱུར་ཡོང་རྒྱུའི་འགན་ལེན་བྱེད་དགོས་ཞེས་གསུངས་པ་རེད།

    བརྟག་ཞིབ་གནང་རིང་ཁྲེན་ཆོན་གོས་ཚན་རིག་དང་མཐུན་པའི་ངང་བཀོད་སྒྲིག་བྱེད་པ་དང་སྐུལ་འདེད་མགྱོགས་སུ་བཏང་ནས་མི་རིགས་ཁག་གི་མི་དམངས་ཀྱི་བདེ་སྐྱིད་དང་འབྲེལ་བ་ཡོད་ལ་ཞི་མཐུན་དང་བརྟན་ལྷིང་སྲུང་སྐྱོང་བྱེད་པར་ཕན་ཐོགས་ཀྱང་ཡོད་པའི་དགུན་དུས་སུ་དྲོད་རླངས་མཁོ་འདོན་བྱ་རྒྱུའི་ལས་གྲྭ་ཆེན་པོ་དེར་དམ་འཛིན་ཡག་པོ་དང་ནན་པོ་བྱས་ཏེ་དགུན་དུས་སུ་དྲོད་རླངས་མཁོ་འདོན་བྱ་རྒྱུའི་དམིགས་ཚད་དེ་དུས་བཀག་ལྟར་མངོན་འགྱུར་ཡོང་རྒྱུའི་འགན་ལེན་བྱེད་དགོས་ཞེས་ནན་བཤད་གནང་བ་རེད།

    གཅིག་ནས་དགོས་ངེས་རང་བཞིན་གསལ་འདོན་བྱེད་དགོས། ལྷ་ས་གྲོང་ཁྱེར་གྱི་དྲོད་རླངས་མཁོ་འདོན་ལས་གྲྭ་ལག་ལེན་བསྟར་རྒྱུ་དེ་དམངས་འཚོ་འགན་ལེན་བྱེད་པ་དང་ལེགས་སུ་གཏོང་བ་དང་མི་དམངས་མང་ཚོགས་ཀྱི་འཚོ་བའི་ཆུ་ཚད་མཐོ་རུ་གཏོང་བའི་བྱ་ཐབས་གལ་ཆེན་དང་། ལྷ་ས་གྲོང་ཁྱེར་གྱི་དགུན་དུས་ཀྱི་འཚོ་བའི་ཆ་རྐྱེན་ལེགས་སུ་གཏོང་བ་དང་གྲོང་མིའི་ལུས་ཁམས་བདེ་ཐང་ཡོང་བ་བྱེད་པའི་ཐབས་ལམ་ནུས་ལྡན། མི་རིགས་ཁག་གི་མི་དམངས་མང་ཚོགས་ལ་བདེ་བ་བསྐྲུན་པ་དང་སྤྱི་ཚོགས་ཞི་མཐུན་དང་བརྟན་ལྷིང་སྲུང་སྐྱོང་བྱེད་པའི་འགན་ལེན་ནུས་ལྡན་བཅས་ཡིན་པ་ངོས་འཛིན་གཏིང་ཟབ་བྱེད་དགོས། དེར་བརྟེན་བསམ་བློ་གཅིག་གྱུར་དང་ངོས་འཛིན་མཐོར་གཏོང་གིས་དྲོད་རླངས་མཁོ་འདོན་གྱི་ལས་གྲྭ་དེར་དམ་འཛིན་ནན་པོ་དང་ཡག་པོ་བྱས་ནས་ད་ལོ་ལྷ་ས་གྲོང་ཁྱེར་གྱི་ཁྱིམ་ཚང་40%ལ་དྲོད་རླངས་མཁོ་འདོན་ཐུབ་པ་བྱ་རྒྱུའི་དམིགས་ཚད་དེ་དུས་བཀག་ནང་མངོན་འགྱུར་ཡོང་རྒྱུའི་འགན་ལེན་བྱེད་དགོས།

    གཉིས་ནས་དགོས་གཏུག་གི་འདུ་ཤེས་ཟབ་ཏུ་གཏོང་དགོས། དགུན་དུས་སུ་དྲོད་རླངས་མཁོ་འདོན་བྱ་རྒྱུ་དེ་མང་ཚོགས་ལ་དགོས་མཁོ་ཆེན་པོ་ཡོད་པ་ངོས་འཛིན་གཏིང་ཟབ་བྱེད་དགོས། དགུན་དུས་སུ་དྲོད་རླངས་མཁོ་འདོན་བྱ་རྒྱུ་དེ་བོད་དུ་གནས་པའི་ལོ་མང་གི་དཀའ་གནད་ཅིག་ཡིན་ལ་རྒྱ་ཆེའི་གྲོང་མི་ཚོས་རེ་སྒུག་ཡུན་རིང་བྱས་པའི་དགོས་གཏུགས་ཀྱི་རེ་འདུན་ཞིག་ཀྱང་རེད། ཏང་ཨུད་དང་སྲིད་གཞུང་གི་ཁས་ལེན་ངེས་པར་དུ་སྒྲུབ་ཐུབ་པ་བྱེད་དགོས་པ་དང “ད་ལོའི་དགུན་དུས་སུ་ལྷ་ས་གྲོང་ཁྱེར་གྱི་ཁྱིམ་ཚང་40%ལ་དྲོད་རླངས་མཁོ་འདོན་ཐུབ་པ་བྱེད་དགོས ”ཞེས་པ་དེ་ཏང་ཨུད་དང་སྲིད་གཞུང་གིས་ལྗོངས་ཡོངས་ཀྱི་མི་རིགས་ཁག་གི་མི་དམངས་ལ་བརྗིད་ཉམས་ལྡན་པའི་ངང་ཁས་ལེན་བྱས་པ་ཞིག་ཡིན་པར་བརྟེན་ངེས་པར་དུ་འཕྱུགས་མེད་ངང་ལེགས་གྲུབ་བྱེད་དགོས། ཨར་རྒྱག་གི་དུས་ཚོད་ཛ་དྲག་ཆེ་ཙམ་ཡོད་པ་དང་། མིག་སྔར་ཟླ་11ཚེས་15ཉིན་དྲོད་རླངས་མཁོ་འདོན་བྱ་རྒྱུའི་དུས་ཚད་དང་ད་དུང་ཟླ་བ་གཉིས་ཙམ་ལས་མེད་པས་ལས་དོན་ཁག་ལ་ལྷོད་གཡེང་སྤུ་ཙམ་མི་བྱེད་པར་དམ་འཛིན་བྱེད་དགོས། ལྷ་ས་གྲོང་ཁྱེར་དང་འབྲེལ་ཡོད་སྡེ་ཚན་ཁག་གིས་འགན་འཁྲིའི་བསམ་པ་ཆེ་རུ་བཏང་སྟེ་དུས་ཚོད་སྐར་ཆ་ཙམ་ཡང་བརྩོན་ལེན་བྱེད་པ་དང་གོ་སྐབས་མི་ཤོར་བ་བྱེད་པའི་སྙིང་སྟོབས་ཀྱི་ཐོག་ནས་ནུས་ཤུགས་ཡོད་རྒུས་དྲོད་རླངས་མཁོ་འདོན་ལས་གྲྭའི་འཛུགས་སྐྲུན་ལ་ལེགས་ལ་མྱུར་བའི་ངང་སྐུལ་འདེད་གཏོང་དགོས།

    གསུམ་ནས་ཚན་རིག་དང་མཐུན་པའི་རང་བཞིན་ངོས་འཛིན་ཐུབ་པ་བྱེད་དགོས། རང་བྱུང་རླངས་པ་གཙོ་བོ་བྱས་ནས་དུད་ཚང་ཁག་བགོས་ངང་ཁེར་རྐྱང་དུ་དྲོད་རླངས་མཁོ་འདོན་བྱ་རྒྱུའི་བྱེད་ཐབས་ཀྱི་ཐོག་ནས་དྲོད་རླངས་མཁོ་འདོན་གྱི་གནད་དོན་ཐག་གཅོད་བྱས་ཚེ་ནུས་རྒྱུ་འབེལ་པོ་ཡོད་པ་དང་། འཁོར་སྐྱོད་ཀྱི་མ་གནས་དམའ་ཙམ་ཡོད་པ། འཛུགས་སྐྲུན་གྱི་དུས་འཁོར་རིང་པོ་དེ་ཙམ་མེད་པ། ཁོར་ཡུག་སྲུང་སྐྱོང་གི་བླང་བྱ་དང་མཐུན་པ་བཅས་ཡིན་པ་ངོས་འཛིན་གཏིང་ཟབ་བྱེད་དགོས། ཚན་རིག་དང་མཐུན་པའི་ངང་རིགས་པས་ཁུངས་སྐྱེལ་དང་ཚོད་ལྟ་བྱས་ནས་ར་འཕྲོད་ཡང་ཡང་བྱས་པ་བརྒྱུད་དཔལ་འབྱོར་གྱི་ཕན་འབྲས་དང་སྤྱི་ཚོགས་ཀྱི་ཕན་འབྲས་ཡག་པོ་ཡོད་པས་ལྷ་ས་གྲོང་ཁྱེར་གྱི་དོན་དངོས་དང་རྦད་དེ་མཐུན་པ་ཞིག་རེད། ལྷ་ས་གྲོང་ཁྱེར་དང་འབྲེལ་ཡོད་སྡེ་ཚན་ཁག་གིས་ཡིད་ཆེས་བརྟན་གཏོང་བྱས་ནས་འཆར་གཞི་ཞིབ་ཕྲ་རུ་དང་སྐུལ་འདེད་མགྱོགས་སུ་གཏོང་དགོས།

    བཞི་ནས་རང་རྟོགས་རང་བཞིན་ཆེ་རུ་གཏོང་དགོས། ལྷ་ས་གྲོང་ཁྱེར་གྱི་དྲོད་རླངས་མཁོ་འདོན་བྱ་རྒྱུའི་ལས་གྲྭ་ལག་ལེན་བསྟར་རྒྱུ་དེ་དམངས་འཚོའི་འདུ་འགོད་ཅིག་ཡིན་ལ་དམངས་སེམས་ཀྱི་འདུ་འགོད་ཅིག་ཀྱང་ཡིན་པ་དང་སྲིད་བཟང་གི་འདུ་འགོད་ཅིག་ཡིན་ལ་དམངས་ལ་ཁེ་ཕན་བསྐྲུན་པའི་འདུ་འགོད་ཅིག་ཀྱང་ཡིན་པ་ངོས་འཛིན་གཏིང་ཟབ་བྱེད་དགོས། རང་སྐྱོང་ལྗོངས་ཀྱི་འབྲེལ་ཡོད་སྡེ་ཚན་ཁག་གིས་ལས་གྲྭ་དེ་རང་སོ་སོའི་བྱ་བ་ཞིག་ཏུ་བརྩི་བ་དང་མི་རིགས་ཁག་གི་མང་ཚོགས་རང་གི་གཉེན་ཉེ་ལྟ་བུར་བརྩིས་ཏེ་བརྩེ་སེམས་ཟབ་མོ་བཅངས་པ་དང་འགན་འཁུར་བསམ་པ་ཆེན་པོའི་ཐོག་ནས་ལས་གྲྭ་འཛུགས་སྐྲུན་ལ་རྒྱབ་སྐྱོར་བྱེད་དགོས།

    ལྔ་ནས་འགན་འཁུར་བསམ་པ་ཆེ་རུ་གཏོང་དགོས། ལྷ་ས་གྲོང་ཁྱེར་གྱི་དྲོད་རླངས་མཁོ་དོན་ལས་གྲྭ་དེ་བརྒྱུད་རིམ་ལྡན་པའི་ལས་གྲྭ་ཞིག་ཡིན་པར་བརྟེན་ཕྱོགས་ཁག་གིས་ཕྱར་བ་གྲུ་འདེགས་ངང་གཞོགས་འདེགས་དམ་ཟབ་བྱེད་དགོས་པའི་ངོས་འཛིན་གཏིང་ཟབ་བྱེད་དགོས། ལྷ་ས་གྲོང་ཁྱེར་དང་འབྲེལ་ཡོད་སྡེ་ཚན་ཁག་གིས་ཁྱོན་ཡོངས་ཀྱི་འདུ་ཤེས་དང་འགན་འཁྲིའི་འདུ་ཤེས་ཟབ་ཏུ་གཏོང་བ་དང་ལས་བགོས་འགན་འཁུར་དང་། གཅིག་གྱུར་འཆར་འགོད་མཐུན་སྦྱོར། ཧུར་བརྩོན་རང་འགུལ། རང་འཁྲི་རང་སྒྲུབ་བཅས་ཀྱི་ཐོག་ནས་ལྷ་ས་གྲོང་ཁྱེར་གྱི་དྲོད་རླངས་མཁོ་འདོན་ལས་གྲྭར་སྐུལ་འདེད་གཏོང་བའི་སྒྲིལ་ཤུགས་ཆེན་པོ་ཞིག་ཆགས་པ་བྱས་ཏེ་ད་ལོའི་དགུན་དུས་སུ་ལྷ་ས་གྲོང་ཁྱེར་གྱི་ཁྱིམ་ཚང་40%ལ་དྲོད་རླངས་མཁོ་འདོན་ཐུབ་པའི་དམིགས་ཚད་མངོན་འགྱུར་ཐུབ་རྒྱུའི་འགན་ལེན་བྱེད་པ་དང་། ལྷ་ས་གྲོང་ཁྱེར་གྱི་མི་རིགས་ཁག་གི་ལས་བྱེད་པ་དང་མང་ཚོགས་ཀྱིས་བློ་མཐུན་ཧུའུ་ཅིན་ཐའོ་ཡིས་སྤྱི་ཁྱབ་ཧྲུའུ་ཅི་གནང་བའི་ཏང་ཀྲུང་དབྱང་གི་བྱམས་བརྩེའི་ཐུགས་ཁུར་དང་སྤྱི་ཚོགས་རིང་ལུགས་མེས་རྒྱལ་གྱི་ཁྱིམ་ཚང་ཆེ་མོའི་དྲོ་སྐྱིད་མྱོང་ཚོར་ཐུབ་པ་བྱེད་དགོས་པ་བཅས་རེད།