ཟླ་9ཚེས་21ཉིན་གྱི་ཕྱི་དྲོ་རང་སྐྱོང་ལྗོངས་སྔོན་གཏོད་ལེགས་བརྩོན་དང་རྨང་བརྟན་དམངས་ཕན་བྱེད་སྒོའི་འགོ་ཁྲིད་ཚོགས་ཆུང་གིས་ཚོགས་འདུ་ཐེངས་བཞི་པ་འཚོགས་པ་རེད། རང་སྐྱོང་ལྗོངས་ཏང་ཨུད་ཀྱི་རྒྱུན་ལས་ཧྲུའུ་ཅི་གཞོན་པ་རང་སྐྱོང་ལྗོངས་སྔོན་གཏོད་ལེགས་བརྩོན་དང་རྨང་བརྟན་དམངས་ཕན་བྱེད་སྒོའི་འགོ་ཁྲིད་ཚོགས་ཆུང་གི་ཙུའུ་ཀྲང་ཧའོ་ཕུང་གིས་ཚོགས་འདུ་གཙོ་སྐྱོང་གནང་བ་མ་ཟད། གསུང་བཤད་ཀྱང་གནང་ཞིང་། ཁོང་གིས་ལྗོངས་ཡོངས་ཀྱི་ས་ཁུལ་དང་གྲོང་ཁྱེར་ཁག་དང་སྡེ་ཚན་ཁག་དང་རྒྱ་ཆེའི་གྲོང་ཚོར་བཅའ་སྡོད་ལས་དོན་རུ་མིས་འགན་འཁྲི་ཁུར་སེམས་དང་ལས་འགན་སྒྲུབ་སེམས་ཆེ་རུ་ཏན་ཏིག་བཏང་ཐོག་གྲོང་ཚོར་བཅའ་སྡོད་ལས་དོན་ཁག་ལ་སྐུལ་འདེད་དང་ཤུགས་སྣོན་སྒོ་ཀུན་ནས་རྒྱག་པ་དང་། རང་ལྗོངས་ཀྱི་གཞི་རིམ་ཞི་མཐུན་བརྟན་ལྷིང་དང་དཔལ་འབྱོར་འཕེལ་རྒྱས་མགྱོགས་སུ་འགྲོ་བའི་ཕུལ་དུ་བྱུང་བའི་གྲུབ་འབྲས་ཀྱི་ཐོག་ནས་ཏང་གི་ཚོགས་ཆེན་བཅོ་བརྒྱད་པ་རྒྱལ་ཁའི་ངང་འཚོག་རྒྱུར་བསུ་བ་ཞུ་དགོས་ཞེས་ནན་བཤད་གནང་བ་རེད།
བློ་བཟང་རྒྱལ་མཚན་དང་། ཆེ་དགྲ་ལྷ། ཏེང་ཞའོ་ཀང་། ལེའང་ཐེན་ཀེང་བཅས་ཚོགས་འདུར་ཞུགས་པ་དང་། ཅིན་ཧྲུའུ་པོས་བྱེད་སྒོའི་འགོ་ཁྲིད་ཚོགས་ཆུང་གི་ཚབ་ཞུས་ཏེ་ལས་དོན་བཀོད་སྒྲིག་གནང་བ་རེད།
ཧའོ་ཕུང་གིས་དང་ཐོག་ལྗོངས་ཏང་ཨུད་དང་སྲིད་གཞུང་གི་ཚབ་ཞུས་ནས་རྒྱ་ཆེའི་གྲོང་ཚོར་བཅའ་སྡོད་རུ་མི་དང་ཁོང་ཚོའི་ཁྱིམ་མི་གཉེན་ཉེར་བླ་ན་མེད་པའི་གུས་འདུད་ཞུས་པ་དང་། རྨང་བརྟན་དམངས་ཕན་བྱེད་སྒོར་རྒྱབ་སྐྱོར་དང་དེའི་ནང་ཞུགས་མཁན་མི་རིགས་ཁག་གི་ལས་བྱེད་པ་དང་མང་ཚོགས་ལ་སྙིང་དབུས་ནས་ཐུགས་རྗེ་ཆེ་ཞུས་ཤིང་། རྨང་བརྟན་དམངས་ཕན་བྱེད་སྒོ་བདེ་བླག་ངང་སྤེལ་བར་རྩ་ཆེའི་ཚེ་སྲོག་ཕུལ་བའི་བློ་མཐུན་ལ་རྗེས་དྲན་ཟབ་མོ་གནང་བ་རེད། ཁོང་གིས་ལོ་གཅིག་ཙམ་རིང་ལྗོངས་ཡོངས་སུ་སྔོན་གཏོད་ལེགས་བརྩོན་དང་རྨང་བརྟན་དམངས་ཕན་གྱི་བྱེད་སྒོ་གཏིང་ཟབ་སྤེལ་ཚུན་གྲོང་ཚོར་བཅའ་སྡོད་ལས་དོན་རུ་ཁག་ཁག་དང་གྲོང་ཚོར་བཅའ་སྡོད་རུ་མི་ཡོངས་ཀྱིས་ལས་དོན་ཏན་ཏིག་དང་འབད་བརྩོན་ལྷོད་མེད་བྱས་པར་བརྟེན་ནས་རང་ལྗོངས་ཀྱི་གཞི་རིམ་སྤྱི་ཚོགས་ཀྱི་ཁོར་ཡུག་དེ་སྔར་བས་ཞི་མཐུན་བརྟན་ལྷིང་དང་། གཞི་རིམ་འཕེལ་རྒྱས་ཀྱི་དུས་བབ་སྔར་བས་ཉམས་དགའ་བ། གཞི་རིམ་མང་ཚོགས་ཀྱི་རྨང་གཞི་སྔར་བས་སྲ་ཞིང་བརྟན་པ། ཏང་ཡོན་མང་ཚོགས་དང་ལས་བྱེད་མང་ཚོགས་དབར་གྱི་འབྲེལ་བ་སྔར་བས་དམ་ཟབ་མཉམ་འདྲེས། ཏང་གི་སྲིད་སྐྱོང་རྨང་གཞི་སྔར་བས་སྲ་བརྟན་བློས་འཁེལ་བཅས་ཡིན་པར་བརྟེན། ཀྲུང་དབྱང་འགོ་ཁྲིད་བློ་མཐུན་གྱིས་ཁས་ལེན་གང་ལེགས་ཐོབ་པ་དང་སྤྱི་ཚོགས་ལས་རིགས་ཁག་གིས་ཡོངས་ཁྱབ་ཏུ་གདེང་འཇོག་བཟང་པོ་བྱས་ལ་མི་རིགས་ཁག་གི་ལས་བྱེད་མང་ཚོགས་ཀྱི་སྤྲོ་སེམས་འཁོལ་བའི་དགའ་བསུ་ཐོབ་པ་རེད། ལག་ལེན་ལས་ལྗོངས་ཏང་ཨུད་ཀྱི་ཐབས་ཇུས་གལ་ཆེན་དེ་ནི་རྦད་དེ་ཡང་དག་པ་དང་ཀྲུང་དབྱང་གི་དགོངས་དོན་དང་མཐུན་ལ་རང་ལྗོངས་ཀྱི་དོན་དངོས་དང་འཚམ་པ། མི་དམངས་ཀྱི་བསམ་འདུན་དང་མཐུན་པ་བཅས་ཡིན་ཚུལ་ར་འཕྲོད་བྱུང་ཡོད་ཅེས་བསྟན་གནང་བ་རེད།
ཧའོ་ཕུང་གིས་རྨང་བརྟན་དམངས་ཕན་བྱེད་སྒོ་སྤེལ་རྒྱུ་དེ་དེང་སྐབས་ཀྱི་ཕན་འབྲས་གཉེར་བ་དང་མ་འོངས་པར་རྒྱང་ལྟ་བྱས་ནས་རྨང་གཞི་འདིང་རྒྱུར་གཞི་འཛུགས་དགོས་པས་ངེས་པར་དུ་གཤམ་གྱི་ཕྱོགས་ལྔའི་ལས་དོན་ཡག་པོར་བསྒྲུབ་དགོས་པ་སྟེ། དང་པོ་ནི་ཏང་གི་ཚོགས་ཆེན་བཅོ་བརྒྱད་པར་དགའ་སྤྲོའི་ངང་བསུ་བ་དང་ཏང་གི་ཚོགས་ཆེན་བཅོ་བརྒྱད་པའི་དགོངས་དོན་སློབ་སྦྱོང་དྲིལ་བསྒྲགས་དང་ལག་བསྟར་བྱ་རྒྱུ་དེ་གཙོ་བོར་བྱས་ཏེ་གྲོང་ཚོར་བཅའ་སྡོད་ལས་དོན་གྱི་བརྒྱུད་རིམ་ཡོངས་སུ་ཁྱབ་པར་བྱ་དགོས། གཉིས་པ་ནི་གཞི་རིམ་ཏང་རྩ་འཛུགས་འཛུགས་སྐྱོང་དང་སྤྱི་ཚོགས་བརྟན་ལྷིང་སྲུང་སྐྱོང་བྱ་རྒྱུ་དེ་གཙོ་གནད་གཉིས་སུ་བརྩིས་ཐོག་གྲོང་ཚོར་བཅའ་སྡོད་ལས་དོན་གྱི་གནས་བབ་གལ་ཆེན་དུ་བཞག་ནས་དམ་འཛིན་ལྷོད་མེད་བྱ་དགོས། གསུམ་པ་ནི་དྲིན་ཚོར་སློབ་གསོ་དང་། ཕྱུག་འགྱུར་བྱེད་རོགས། དམངས་ཆེད་དོན་སྒྲུབ་བཅས་བྱ་རྒྱུ་དེ་གཞི་རྟེན་མངོན་གསལ་དུ་བརྩིས་ནས་གྲོང་ཚོར་བཅའ་སྡོད་ལས་དོན་གྱི་ཕན་འབྲས་ཆེ་རུ་ཧུར་ཐག་གཏོང་དགོས། བཞི་པ་ནི་ཁྱོན་ཡོངས་ལ་ཞབས་ཞུ་དང་། མང་ཚོགས་ཞུགས་པ། ཡུལ་བབ་དང་བསྟུན་པ། ཕུགས་ལ་ཕན་པ་བཅས་གཞི་རྩའི་རྩ་དོན་དུ་བརྩིས་ནས་གྲོང་ཚོར་བཅའ་སྡོད་ལས་དོན་གྱི་ཕྱོགས་ཁག་ལ་དོན་འཁྱོལ་བྱ་དགོས། ལྔ་པ་ནི་ལས་འགན་ལྔ་ལེགས་སྒྲུབ་དང་། མི་སྣ་བཀོད་སྒྲིག་ཐད་ཤུགས་སྣོན་རྒྱག་པ། ཞབས་ཞུ་འགན་སྲུང་བྱེད་པ། རྣམ་གྲངས་ཀྱི་མ་དངུལ་དོན་འཁྱོལ་བྱེད་པ། ཕྱོགས་ཁག་གི་སྟོབས་ཤུགས་ལ་སྐུལ་སློང་བྱ་རྒྱུ་བཅས་དེ་འགག་རྩའི་ལྷུ་ཚིགས་བྱས་ཏེ་གྲོང་ཚོར་བཅའ་སྡོད་ལས་དོན་གྱི་སྤྱིའི་འཆར་འགོད་ཁྲོད་བཅུག་ནས་ཁྱོན་ཡོངས་ནས་བསམ་གཞིག་དང་གཅིག་གྱུར་འཆར་འགོད་ངང་སྐུལ་སྤེལ་གཏོང་དགོས་པའི་བླང་བྱ་བཏོན་གནང་བ་རེད།
ཅིན་ཧྲུའུ་པོས་ལས་དོན་ཞིབ་ཕྲའི་ཐད་བཀོད་སྒྲིག་གནང་བ་རེད།
ཚོགས་འདུར་ཞུགས་མཁན་རང་སྐྱོང་ལྗོངས་ཀྱི་འགོ་ཁྲིད་ཀྱི་གྲས་སུ་ད་དུང་ཚེ་རིང་དང་། རྡོ་ཐོགས། སྐལ་བཟང་ཚེ་རིང་། ལི་ཀྲའོ། ཆའོ་ཡོན་ཀྲུང་། ཝང་རུའེ་ལེན། ཀའོ་དབྱང་སོགས་ཡོད་པ་རེད།