ཟླ་9ཚེས་18ཉིན་གྱི་ཕྱི་དྲོ་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཁྲེན་ཆོན་གོ་དང་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཀྲུའུ་རེན་བྱམས་པ་ཕུན་ཚོགས་ཀྱིས་ལྷ་སར་རྒྱལ་ཡོངས་མི་དམངས་འཐུས་ཚོགས་བཅའ་ཁྲིམས་ཨུ་ལྷན་གྱི་ཀྲུའུ་རེན་ཨུ་ཡོན་ཧུའུ་ཁང་ཧྲེང་དང་ཀྲུའུ་རེན་ཨུ་ཡོན་གཞོན་པ་ཧུང་ཧུའུ་བཅས་པ་དང་མཇལ་འཛོམས་གནང་བ་དང་། ཧུའུ་ཁང་ཧྲེང་དང་ཧུང་ཧུའུ་བོད་དུ་ཕེབས་རིང་རྒྱལ་ཡོངས་མི་དམངས་འཐུས་ཚོགས་སྐབས་བཅུ་པའི་རྒྱུན་ལས་ཨུ་ཡོན་ལྷན་ཁང་གི་ཨུ་ཡོན་ཀྲང་གཞོན་པ་རག་སྡིས་ཀྱིས་ཀྱང་ཁོང་རྣམ་གཉིས་དང་བཅས་པ་དང་མཇལ་འཛོམས་གནང་བ་རེད།
ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཀྲུའུ་རེན་གཞོན་པ་མ་རུའུ་ལུང་དང་ལྗོངས་ཏང་ཨུད་ཀྱི་དྲུང་ཆེ་ཝང་རུའེ་ལན་མཉམ་དུ་ཕེབས་ཡོད།
ཁྲེན་ཆོན་གོས་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཚབ་ཞུས་ནས་ཧུའུ་ཁང་ཧྲེང་དང་ཧུང་ཧུའུ་དང་བཅས་པ་བོད་དུ་ལས་དོན་རྟོག་ཞིབ་དང་མཛུབ་ཁྲིད་གནང་བར་ཕེབས་པར་དགའ་བསུ་ཞུས་པ་དང་འབྲེལ་རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱིས་ལོ་མང་ནང་བོད་ལ་ཐུགས་ཁུར་དང་། མཛུབ་ཁྲིད། རྒྱབ་སྐྱོར་བཅས་ཡུན་རིང་གནང་བར་ཐུགས་རྗེ་ཆེ་ཞུས་པ་རེད།
ཁྲེན་ཆོན་གོས་རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱིས་བོད་ཀྱི་ལས་དོན་ལ་སྔ་བར་ཕྱི་གསུམ་དུ་མཐོང་ཆེན་དང་བོད་ཀྱི་མི་དམངས་ལ་བྱམས་བརྩེའི་ཐུགས་ཁུར་གནང་ནས་བོད་ཀྱི་འཕེལ་རྒྱས་དང་བརྟན་ལྷིང་ལས་དོན་ཁག་ལ་མཛུབ་ཁྲིད་དང་རྒྱབ་སྐྱོར་ཤུགས་ཆེན་གནང་ཡོད་ཅེས་གསུངས།
ཁོང་གིས་ཉེ་བའི་ལོ་ཤས་རིང་རྒྱལ་ཡོངས་མི་དམངས་འཐུས་ཚོགས་ཀྱིས་བོད་ཀྱི་ཁྲིམས་འཛུགས་སྐྱོང་ལ་མཛུབ་ཁྲིད་དང་རྒྱབ་སྐྱོར་གནང་བ་དང་སྦྲགས་རྒྱལ་སྲིད་སྤྱི་ཁྱབ་ཁང་གིས 《བོད་ཀྱི་སྣོད་བཅུད་བདེ་འཇགས་སྲུང་ཡོལ་སྲུང་སྐྱོང་དང་འཛུགས་སྐྱོང་གི་འཆར་འགོད (2008ལོ་ནས་2030ལོ་བར )》ལ་ཆོག་མཆན་སྤྲོད་རྒྱུར་སྐུལ་མ་བཏང་བ་དང་། རྩྭ་རའི་སྣོད་བཅུད་ཁ་གསབ་སྤྲོད་ལམ་ལག་ལེན་བསྟར་བ། རྒྱལ་ཁབ་ཀྱི་འབྲེལ་ཡོད་སྡེ་ཚན་དང་མཐུན་སྦྱོར་བྱས་ནས་བོད་ཀྱི་བཅའ་ཁྲིམས་ལས་རིགས་ཀྱི་ཤེས་ལྡན་པ་མི་འདང་བའི་གནད་དོན་སེལ་རོགས་བྱས་པ།
བོད་ཀྱི་གྲོང་ཁྱེར་དུ་རླངས་འབར་འདུ་འགོད་ལག་ལེན་བསྟར་བ། ཉིང་ཁྲི་ས་ཁུལ་གྱི་སྨན་རུ་གཞུང་ལམ་བཟོ་མགྱོགས་སུ་བཏང་བ། རང་སྐྱོང་ལྗོངས་མི་དམངས་འཐུས་ཚོགས་ལས་ཁུངས་ཀྱི་ཕྱོགས་བསྡུས་ལས་སྒོའི་ཁང་པ་སྒྱུར་བཀོད་རྒྱ་བསྐྱེད་ལས་གྲྭ་ལག་ལེན་བསྟར་བ། ལྗོངས་མི་དམངས་འཐུས་ཚོགས་ལས་ཁུངས་ཀྱི་ནང་སའི་བདེ་སྡོད་ཁང་པའི་གནད་དོན་ཐག་གཅོད་བྱས་པ། རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱིས་རང་སྐྱོང་ལྗོངས་སུ་དེབ་ངོ་གྲངས་ཁྲི་1.2ཞལ་འདེབས་བརྒྱབ་པ། མ་དངུལ་ཐོག་ནས་རོགས་སྐྱོར་དང་སྦྲགས་འབྲེལ་ཡོད་ཁེ་ལས་དང་མཐུན་སྦྱོར་གྱིས་བོད་ཀྱི་ཡུལ་སྐོར་གྱི་རྨང་གཞིའི་སྒྲིག་བཀོད་མཉམ་དུ་བརྒྱབ་པ་བཅས་ལས་དོན་དེ་དག་གིས་བོད་ཀྱི་དཔལ་འབྱོར་དང་སྤྱི་ཚོགས་ལེགས་ལ་མྱུར་བའི་སྒོ་ནས་འཕེལ་རྒྱས་འགྲོ་རྒྱུར་སྐུལ་མ་ནུས་ལྡན་ཐེབས་པ་མ་ཟད། མི་རིགས་ཁག་གི་ལས་བྱེད་དང་མང་ཚོགས་རྣམས་ལ་ཕན་པའང་ཐོབ་ཡོད་པས་བོད་ཀྱི་མི་རིགས་ཁག་གི་མི་དམངས་ཀྱིས་ནམ་ཡང་བརྗེད་མི་སྲིད་ཅེས་གསུངས་པ་དང་། ཡང་ཁོང་གིས་རྒྱལ་ཡོངས་མི་དམངས་འཐུས་ཚོགས་བཅའ་ཁྲིམས་ཨུ་ལྷན་ལ་བོད་ཀྱི་ཁྲིམས་འཛུགས་ལས་དོན་ཐད་བཀའ་སློབ་དང་རྩ་ཆེའི་བསམ་འཆར་མང་ཙམ་བཏོན་ནས་རང་སྐྱོང་ལྗོངས་ཀྱི་ཁྲིམས་འཛུགས་བྱ་བར་རྒྱུན་ཆད་མེད་པར་ཤུགས་སྣོན་དང་ལེགས་སུ་འགྲོ་རྒྱུར་མཛུབ་ཁྲིད་རོགས་རམ་གནང་སྟེ་བོད་འདི་ཉིད་འབྱོར་འབྲིང་དང་། དུས་བདེ། ཞི་མཐུན། སྣོད་བཅུད་བཟང་བ་བཅས་འགན་ལེན་ཡོང་བའི་ཐུགས་རེའང་གནང་བ་རེད།
ཧུའུ་ཁང་ཧྲེང་གིས་ད་རེས་བོད་དུ་ལས་དོན་རྟོག་ཞིབ་དང་བརྟག་ཞིབ་བྱེད་པར་ཡོང་དོན་ངོ་སྤྲོད་མདོར་བསྡུས་གནང་ཞིང་། ཁོང་གིས་བོད་ཀྱི་དཔལ་འབྱོར་དང་སྤྱི་ཚོགས་ལ་གྲུབ་འབྲས་མངོན་གསལ་དོད་པོ་ཐོབ་པར་བཀྲ་ཤིས་བདེ་ལེགས་ཞུས་པ་དང་འབྲེལ་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་དུས་ཡུན་རིང་པོའི་ནང་ས་གནས་ཀྱི་ཁྲིམས་འཛུགས་ལས་དོན་ལ་མཐོང་ཆེན་པོ་གནང་བར་ཐུགས་རྗེ་ཆེ་ཞུས་པ་རེད།