ཟླ་9ཚེས་15ཉིན་གྱི་ཕྱི་དྲོ་རང་སྐྱོང་ལྗོངས་ཏང་ཨུད་ཀྱི་རྒྱུན་ལས་ཧྲུའུ་ཅི་གཞོན་པ་ཧའོ་ཕུང་གིས་ཨན་ཧུའེ་ཞིང་ཨུད་ཀྱི་རྒྱུན་ལས་ཨུ་ཡོན་རྩ་འཛུགས་པུའི་པུའུ་ཀྲང་ཝང་ཅུང་གིས་རུ་སྣེ་ཁྲིད་པའི་ཨན་ཧུའེ་ཞིང་ཆེན་གྱི་བོད་སྐྱོད་རྟོག་ཞིབ་ཚོགས་པ་དང་མཇལ་འཛོམས་གནང་བ་རེད།
རང་སྐྱོང་ལྗོངས་ཏང་ཨུད་ཀྱི་རྒྱུན་ལས་ཨུ་ཡོན་སྒྲིག་ཨུད་ཀྱི་ཧྲུའུ་ཅི་ཅིན་ཧྲུའུ་པོ་དང་རང་སྐྱོང་ལྗོངས་ཏང་ཨུད་ཀྱི་རྒྱུན་ལས་ཨུ་ཡོན་རྩ་འཛུགས་པུའི་པུའུ་ཀྲང་ལེའང་ཐེན་ཀེང་མཇལ་འཛོམས་ནང་ཞུགས་ཡོད་པ་རེད།
ཧའོ་ཕུང་གིས་དང་ཐོག་རང་སྐྱོང་ལྗོངས་ཏང་ཨུད་དང་སྲིད་གཞུང་དང་ལྗོངས་ཡོངས་ཀྱི་མི་རིགས་ཁག་གི་མི་དམངས་ཀྱི་ཚབ་ཞུས་ཏེ་ལོ་མང་རིང་ཨན་ཧུའེ་ཞིང་ཆེན་གྱིས་བོད་ཀྱི་འཕེལ་རྒྱས་བརྟན་ལྷིང་གི་ལས་དོན་ཁག་ལ་ཐུགས་ཁུར་རྒྱབ་སྐྱོར་དང་ལྷག་པར་དུ་ལྷོ་ཁ་ས་ཁུལ་ལ་སྒེར་སེམས་མེད་པའི་རོགས་སྐྱོར་ཆེན་པོ་གནང་བར་སྙིང་དབུས་ནས་ཐུགས་རྗེ་ཆེ་ཞུས་ཤིང་། ཧའོ་ཕུང་གིས་2002ལོར་ལྷོ་ཁ་ས་ཁུལ་དུ་ཁ་གཏད་རོགས་སྐྱོར་བྱས་ཚུན་ཨན་ཧུའེ་ཞིང་ཆེན་གྱིས་ཞིང་ཆེན་དེ་ཡོངས་ཀྱི་ནུས་པར་བརྟེན་ནས་བོད་སྐྱོར་ལས་དོན་ཤུགས་ཆེར་བསྒྲུབས་ནས་བོད་སྐྱོར་ལས་དོན་བྱེད་སྟངས་དང་བྱེད་ཐབས་རྒྱུན་ཆད་མེད་པར་གསར་གཏོད་བྱེད་པ་དང་ཐོན་ལས་ཀྱི་བོད་སྐྱོར་བྱེད་ཤུགས་ཆེ་རུ་བཏང་ནས་མང་ཚོགས་ཀྱི་བདེ་རྩར་ཐུག་པའི་རྨང་གཞིའི་རང་བཞིན་གྱི་རྣམ་གྲངས་ཁག་གཅིག་ལག་ལེན་བསྟར་སྟབས་ས་གནས་དེ་གའི་དཔལ་འབྱོར་དང་སྤྱི་ཚོགས་འཕེལ་རྒྱས་དང་མི་དམངས་ཀྱི་འཚོ་བའི་ཆུ་ཚད་ལེགས་སུ་འགྲོ་རྒྱུར་སྐུལ་མ་ནུས་ལྡན་ཐེབས་ཡོད། དེའི་རིང་སྔ་རྗེས་སུ་བོད་སྐྱོར་ལས་བྱེད་པ་ཁག་བཞི་བཏང་སྟེ་བོད་ཀྱི་མི་རིགས་ཁག་གི་མི་དམངས་ཀྱི་བདེ་སྐྱིད་འཚོ་བའི་ཆེད་དུ་རང་ཉིད་ཀྱི་བློ་གྲོས་དང་སྟོབས་ཤུགས་ལེགས་སྐྱེས་ཕུལ་བར་བརྟེན་མི་རིགས་ཁག་གི་ལས་བྱེད་པ་དང་མང་ཚོགས་ཚོའི་བསྔགས་བརྗོད་ཐོབ་ཡོད།
ཨན་ཧུའེ་ཞིང་ཆེན་གྱིས་སྔོན་ཆད་ལྟར་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་ཐུགས་ཁུར་དང་རྒྱབ་སྐྱོར་གནང་རྒྱུ་དང་ཤེས་ལྡན་པའི་བོད་སྐྱོར་དང་། སློབ་གསོའི་བོད་སྐྱོར། ཚན་རྩལ་བོད་སྐྱོར་བཅས་བྱེད་ཤུགས་སྔར་བས་ཆེ་རུ་བཏང་སྟེ་བོད་ཀྱི་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ལ་སྐུལ་མ་གཏོང་རྒྱུའི་རེ་བ་ཡོད། བོད་རང་སྐྱོང་ལྗོངས་ཀྱིས་ཀྱང་བོད་སྐྱོར་ལས་བྱེད་པར་མུ་མཐུད་སེམས་ཁུར་དང་རྒྱབ་སྐྱོར་དང་ཁོང་ཚོས་ནུས་པ་འདོན་སྤེལ་བྱེད་ཆེད་ཆ་རྐྱེན་དེ་བས་ལེགས་པ་བསྐྲུན་རྒྱུ་ཡིན་ཞེས་གསུངས་པ་རེད།
ཝང་ཅུང་གིས་དང་ཐོག་རང་སྐྱོང་ལྗོངས་ཏང་ཨུད་དང་སྲིད་གཞུང་དང་དེ་བཞིན་ལྷོ་ཁ་ས་ཁུལ་དང་སྲིད་འཛིན་ཀུང་ཧྲུའུ་ཡིས་དུས་ཡུན་རིང་པོའི་ནང་ཨན་ཧུའེ་ཞིང་ཆེན་གྱི་བོད་སྐྱོར་ལས་དོན་ལ་རྒྱབ་སྐྱོར་ཤུགས་ཆེན་གནང་བར་ཐུགས་རྗེ་ཆེ་ཞུས་ཤིང་། ཁོང་གིས་ད་རེས་བོད་དུ་རྟོག་ཞིབ་བྱས་པ་བརྒྱུད་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་ཐོབ་པའི་གྲུབ་འབྲས་ཆེན་པོ་དངོས་སུ་མཐོང་བྱུང་། བོད་ཀྱི་མི་རིགས་ཁག་གི་མི་དམངས་རྣམས་ལས་ལ་བརྩོན་ཞིང་བབ་ཆགས་ཡོད་པ་ཚོར་ནས་སེམས་འགུལ་ཚད་མེད་ཐེབས་བྱུང་། སྤུན་ཟླའི་ཞིང་ཆེན་ཡིན་པའི་ཨན་ཧུའེ་ཞིང་ཆེན་གྱིས་སྔོན་ཆད་ལྟར་ཁ་གཏད་བོད་སྐྱོར་གྱི་ལས་དོན་ལེགས་པར་བསྒྲུབས་ཏེ་རང་སྐྱོང་ལྗོངས་ཏང་ཨུད་དང་སྲིད་གཞུང་གི་བཀོད་སྒྲིག་བླང་བྱ་ལྟར་བོད་སྐྱོར་ལས་ཀའི་ཆུ་ཚད་སྔར་བས་མཐོ་རུ་དང་བོད་སྐྱོར་ལས་དོན་གྱི་བསམ་ཕྱོགས་གསར་གཏོད་བྱས་ཏེ་ལྷོ་ཁ་ས་ཁུལ་དང་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ཆེད་དུ་ལེགས་སྐྱེས་གསར་པ་དེ་བས་ཆེ་བ་འབུལ་རྒྱུ་ཡིན་ཞེས་གསུངས་པ་རེད།
རང་སྐྱོང་ལྗོངས་ཏང་ཨུད་ཀྱི་དྲུང་ཆེ་ལྗོངས་ཐད་གཏོགས་ལས་དོན་ཨུ་ཡོན་ལྷན་ཁང་གི་ཧྲུའུ་ཅི་ཝང་རུའེ་ལན་དང་ལྷོ་ཁ་ས་ཁུལ་གྱི་འགན་ཁུར་བློ་མཐུན་མཇལ་འཛོམས་ནང་ཞུགས་ཡོད་པ་རེད།
བོད་དུ་བཞུགས་རིང་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཁྲེན་ཆོན་གོས་ཀྱང་བོད་སྐྱོད་ཨན་ཧུའེ་ཞིང་ཆེན་གྱི་རྟོག་ཞིབ་ཚོགས་པ་དང་བཅས་པར་མཇལ་འཛོམས་གནང་བ་རེད།