ཟླ་9ཚེས་17ཉིན་གྱི་སྔ་དྲོ་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཝུའུ་དབྱིང་ཅེས་ལྷ་སར་རྒྱལ་སྲིད་སྤྱི་ཁྱབ་ཁང་གི་ཕྱིར་སྡོད་རང་མིའི་ལས་དོན་གཞུང་དོན་ཁང་གི་ཀྲུའུ་རེན་གཞོན་པ་མ་རུའུ་ཕེ་སོགས་བོད་ཀྱི་ཕྱི་དོན་སྒྲིག་གཞི་བཙུགས་ནས་ལོ་60འཁོར་བར་རྟེན་འབྲེལ་ཞུ་བའི་མཛད་སྒོར་ཞུགས་མཁན་རྒྱལ་ཁབ་ཀྱི་འབྲེལ་ཡོད་པུའུ་ཨུད་ཀྱི་འགོ་ཁྲིད་བློ་མཐུན་དང་མཇལ་འཛོམས་གནང་བ་རེད།

    ཝུའུ་དབྱིང་ཅེས་དང་ཐོག་རང་སྐྱོང་ལྗོངས་ཏང་ཨུད་དང་སྲིད་གཞུང་དང་ཧྲུའུ་ཅི་ཁྲེན་ཆོན་གོ་དང་ཀྲུའུ་ཞི་པད་མ་འཕྲིན་ལས་བཅས་ཀྱི་ཚབ་ཞུས་ནས་མ་རུའུ་ཕེ་དང་བཅས་པ་རང་ལྗོངས་སུ་རྟོག་ཞིབ་གནང་བར་ཕེབས་པ་དང་འབྲེལ་བོད་ཀྱི་ཕྱི་དོན་སྒྲིག་གཞི་བཙུགས་ནས་ལོ་60འཁོར་བའི་རྟེན་འབྲེལ་ཚོགས་ཆེན་དང་། རང་སྐྱོང་ལྗོངས་ཀྱི་ཕྱི་དོན་དང་ཕྱིར་སྡོད་རང་མིའི་ལས་དོན་གཞུང་དོན་ཁང་གི་སྒོ་བྱང་གི་ཡོལ་ཁེབས་འབྱེད་པའི་མཛད་སྒོར་ཞུགས་པར་དགའ་བསུ་ཞུས་གནང་བ་དང་འབྲེལ་རྒྱལ་སྲིད་སྤྱི་ཁྱབ་ཁང་གི་ཕྱིར་སྡོད་རང་མིའི་ལས་དོན་གཞུང་དོན་ཁང་དང་། ཕྱི་འབྲེལ་པུའུ། ཀྲུང་གུང་ཀྲུང་དབྱང་ཕྱི་ཕྱོགས་འབྲེལ་གཏུག་པུའུ་སོགས་རྒྱལ་ཁབ་པུའུ་ཨུད་ཀྱིས་དུས་ཡུན་རིང་པོའི་ནང་རང་ལྗོངས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་དང་ལྷག་པར་དུ་ཕྱི་འབྲེལ་ལས་དོན་ལ་ཐུགས་ཁུར་དང་རྒྱབ་སྐྱོར་གནང་བར་ཐུགས་རྗེ་ཆེ་ཞུས་གནང་བ་རེད།

    ཝུའུ་དབྱིང་ཅེས་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་ཐོག་མཐའ་བར་གསུམ་དུ་ཕྱི་འབྲེལ་ལས་དོན་དེ་འཕེལ་རྒྱས་དང་བརྟན་ལྷིང་གི་ལས་དོན་གལ་ཆེན་ཞིག་ལ་བརྩིས་ནས་དམ་འཛིན་བྱས་ཡོད་ལ་སླད་ཕྱིན་གྱི་ལས་ཀའི་ཁྲོད་ང་ཚོས་ནུབ་ཕྱོགས་དགྲ་ཡའི་ཕྱོགས་གཏོགས་དང་ཏཱ་ལའི་ཁ་ཕྲལ་རུ་ཚོགས་ཀྱི་མ་རུངས་ཁོག་བཅུག་ལ་རྡུང་རྡེག་ནུས་ལྡན་བཏང་ནས་ལྗོངས་ཡོངས་ཀྱི་བརྟན་ལྷིང་ལ་ཞབས་འདེགས་ཞུ་བ་དང་སྦྲགས་རང་ལྗོངས་ཀྱི་ཕྱི་འབྲེལ་ལས་དོན་གྱི་དམིགས་སའི་རང་བཞིན་དང་ནུས་ལྡན་རང་བཞིན་རྒྱུན་ཆད་མེད་པར་ཆེ་རུ་བཏང་སྟེ་བོད་དང་འབྲེལ་བ་ཡོད་པའི་ཕྱི་ཕྱོགས་དྲིལ་བསྒྲགས་ལས་དོན་ཡག་པོ་སྒྲུབ་པ་དང་། ཁྱབ་ཁོངས་ཁག་གི་ཕྱི་ཕྱོགས་སྤེལ་རེས་དང་མཉམ་ལས་ལ་རྒྱབ་སྐྱོར་དང་གཞོགས་འདེགས་ཧུར་ཐག་བྱེད་པ། ཕྱི་ཕྱོགས་སྐར་ཁུང་གི་ནུས་པ་རྒྱུན་ཆད་མེད་པར་ཆེ་རུ་གཏོང་བ་བཅས་བྱས་ཏེ་ལྗོངས་ཡོངས་ཀྱི་མཆོང་སྐྱོད་ལྟ་བུའི་འཕེལ་རྒྱས་ལ་སྟོབས་ཤུགས་ལེགས་སྐྱེས་སུ་འབུལ་རྒྱུ་ཡིན། རེ་བར་རྒྱལ་ཁབ་པུའུ་ཨུད་ཁག་གིས་མུ་མཐུད་བོད་ཀྱིས་ཕྱི་ཕྱོགས་དང་འགྲོ་འོང་བྱེད་པའི་ལས་དོན་ཡག་པོ་སྤེལ་རྒྱུར་རོགས་རམ་རྒྱབ་སྐྱོར་དང་། ཕྱི་ཕྱོགས་སུ་བོད་ལྗོངས་དྲིལ་བསྒྲགས་ཤུགས་ཆེན་བྱས་ཏེ་འཛམ་གླིང་ཡོངས་ལ་ཀྲུང་གོ་གུང་ཁྲན་ཏང་གི་འགོ་ཁྲིད་འོག་བོད་ལ་ཐོན་པའི་གནམ་ས་བླ་འོག་ཏུ་འགྱུར་བ་ལྟ་བུའི་འགྱུར་ལྡོག་གང་ལེགས་མངོན་པར་བྱེད་པ་དང་རྒྱལ་སྤྱིའི་དགྲ་ཡའི་ཕྱོགས་གཏོགས་དང་ཏཱ་ལའི་རུ་ཚོགས་ཀྱི་གཏམ་འཆལ་སྣ་ཚོགས་ལ་དགག་པ་ནུས་ལྡན་བརྒྱབ་སྟེ་འཛམ་གླིང་ཡོངས་ཀྱི་མི་དམངས་ཚོས་དངོས་ཡོད་ཀྱི་བོད་ལྗོངས་དང་། འཕེལ་རྒྱས་ཀྱི་བོད་ལྗོངས། ཡར་ངོའི་ཟླ་ལྟར་འཕེལ་བའི་སྤྱི་ཚོགས་རིང་ལུགས་ཀྱི་བོད་ལྗོངས་གསར་པ་བཅས་དངོས་འབྲེལ་ཤེས་རྟོགས་ཐུབ་པ་བྱེད་དགོས་ཞེས་གསུངས་པ་རེད།

    མཇལ་འཛོམས་གནང་སྐབས་མ་རུའུ་ཕེས་སླད་ཕྱིན་རྒྱལ་སྲིད་སྤྱི་ཁྱབ་ཁང་གི་ཕྱིར་སྡོད་རང་མིའི་ལས་དོན་གཞུང་དོན་ཁང་གིས་སྔར་རྒྱུན་བཞིན་བོད་ཀྱིས་ཕྱི་ཕྱོགས་ཀྱི་ཁྲིད་སྟོན་དང་། མཐུན་འབྲེལ། ཞབས་ཞུ་བཅས་ཀྱི་ལས་དོན་ཡག་པོ་བསྒྲུབ་རྒྱུར་རྒྱབ་སྐྱོར་དང་རོགས་རམ་བྱས་ནས “རྒྱལ་ཁབ་ལ་དགའ་ཞེན་དང་། བོད་ལ་དགའ་ཞེན་བྱེད་པའི ”འབོད་སྒྲ་དེ་ཕྱི་རྒྱལ་དུ་གཙོ་ཕྱོགས་ཤིག་ཏུ་འགྱུར་བ་བྱ་རྒྱུ་ཡིན་ཞེས་གསུངས་པ་དང་། ཕྱི་འབྲེལ་པུའུ་དང་ཀྲུང་གུང་ཀྲུང་དབྱང་ཕྱི་ཕྱོགས་འབྲེལ་གཏུག་པུའུ་སོགས་རྒྱལ་ཁབ་པུའུ་ཨུད་ཀྱི་འགོ་ཁྲིད་བློ་མཐུན་གྱིས་ཀྲུང་དབྱང་པུའུ་ཨུད་ཁག་ལ་རང་འགན་འཁུར་དུ་བླངས་ནས་བོད་ཀྱི་ལས་དོན་ལ་སེམས་ཁུར་དང་རྒྱབ་སྐྱོར་བྱེད་པའི་འགན་འཁྲི་ཡོད་པས་སླད་ཕྱིན་པུའུ་ཨུད་ཁག་གིས་རང་སྐྱོང་ལྗོངས་དང་ཐུན་མོང་ཐོག་འབད་བརྩོན་དང་ཕྱར་བ་གྲུ་འདེགས་བྱས་ནས་བོད་ཀྱི་ཕྱི་འབྲེལ་ལས་དོན་ཡག་པོ་བསྒྲུབས་ཏེ་བོད་ཀྱི་དར་རྒྱས་དང་བརྟན་ལྷིང་ཆེད་ལེགས་སྐྱེས་འབུལ་རྒྱུ་ཡིན་ཞེས་གཅིག་མཇུག་གཉིས་མཐུད་ངང་གསུངས་པ་རེད།

    བོད་ལ་བཞུགས་རིང་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཁྲེན་ཆོན་གོས་ཀྱང་མ་རུའུ་ཕེ་བཅས་པ་དང་མཇལ་འཛོམས་གནང་བ་རེད།