ཟླ་9ཚེས་14ཉིན་གྱི་ཕྱི་དྲོ་རང་སྐྱོང་ལྗོངས་ཏང་ཨུད་གྲོང་གསེབ་ལས་དོན་འགོ་ཁྲིད་ཚོགས་ཆུང་གིས་2012ལོ་འཁོར་གྱི་ཚང་འཛོམས་གྲོས་ཚོགས་ཐེངས་དང་པོ་འཚོགས་ནས་རྒྱལ་ཡོངས་གྲོང་གསེབ་ལས་དོན་བཞུགས་མོལ་ཚོགས་འདུའི་དགོངས་དོན་དང་ལྗོངས་ཡོངས་ཀྱི་དཔལ་འབྱོར་དུས་བབ་བརྡ་ཁྱབ་གཏོང་བའི་བཪྙན་འཕྲིན་ཁ་པར་ཚོགས་འདུའི་དགོངས་དོན་བརྒྱུད་བསྒྲགས་དང་སློབ་སྦྱོང་བྱས་པ་དང་ད་ལོ་ཤར་ཚུན་ལྗོངས་ཡོངས་ཀྱི་ཞིང་འབྲོག་ལས་དང་གྲོང་གསེབ་ཀྱི་དུས་བབ་བརྡ་ཁྱབ་བྱས་པ་དང་མིག་སྔ་དང་སླད་ཕྱིན་དུས་སྐབས་ཤིག་རིང་གི་ཞིང་འབྲོག་ལས་དང་གྲོང་གསེབ་ཀྱི་ལས་དོན་ཞིབ་འཇུག་དང་བཀོད་སྒྲིག་བྱས་པ་རེད།
རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ། ལྗོངས་མི་དམངས་འཐུས་ཚོགས་རྒྱུན་ཨུད་ཀྱི་ཀྲུའུ་རེན། ལྗོངས་ཏང་ཨུད་གྲོང་གསེབ་ལས་དོན་འགོ་ཁྲིད་ཚོགས་ཆུང་གི་ཙུའུ་ཀྲང་བཅས་ཡིན་པའི་བྱམས་པ་ཕུན་ཚོགས་ཀྱིས་ཚོགས་འདུ་གཙོ་སྐྱོང་གནང་བ་དང་འབྲེལ་གསུང་བཤད་ཀྱང་གནང་བ་རེད།
ཚོགས་འདུའི་ཐོག་ནན་བཤད་བྱས་དོན། ལོ་མཇུག་བར་ཟླ་བ་གསུམ་ལྷག་ཙམ་ལས་མེད་པས་ལོ་འགོར་གཏན་འཁེལ་བྱས་པའི “ཞིང་གསུམ ”ལས་དོན་གྱི་དམིགས་ཚད་དང་ལས་འགན་ལེགས་སྒྲུབ་བྱེད་པར་དུས་ཚོད་ཐུང་བ་དང་། ལས་འགན་ལྕི་བ། གནོན་ཤུགས་ཆེ་བ་བཅས་ཡོད་པར་བརྟེན་ས་གནས་ཁག་དང་འབྲེལ་ཡོད་སྡེ་ཚན་ཁག་གིས་ངེས་པར་དུ་དུས་ཚོད་དང་གོ་སྐབས་དམ་འཛིན་བྱས་ནས་མིག་སྔའི་ཞིང་འབྲོག་ལས་དང་གྲོང་གསེབ་ཀྱི་ལས་དོན་ཁག་ཏན་ཏིག་ངང་ཡག་པོ་སྒྲུབས་དགོས། གཅིག་ནས་ཞིང་འབྲོག་ལས་ཐོན་སྐྱེད་དམ་འཛིན་ཡག་པོ་བྱེད་དགོས། ནུས་ཤུགས་ཡོད་རྒུས་ཞིང་འབྲོག་མང་ཚོགས་སྒྲིག་འཛུགས་ཡག་པོ་བྱས་ཏེ “སྟོན་ལས་གསུམ ”གྱི་ལས་དོན་སྒྲུབ་ནས་འབྲུ་རིགས་ལོ་ལེགས་དང་འབྲོག་ལས་བརྟན་པོའི་ངང་འཕེལ་རྒྱས་ཡོང་བའི་འགན་ལེན་བྱེད་དགོས་པ་དང་། གཉིས་ནས་ཞིང་འབྲོག་མང་ཚོགས་ཀྱི་འབབ་འཕར་དམ་འཛིན་ཡག་པོ་བྱེད་དགོས། ཞིང་འབྲོག་མང་ཚོགས་ལ་རྒྱུན་མཐུད་དང་མགྱོགས་ཙམ་སྒོ་ནས་འབབ་འཕར་ཡོང་བ་བྱ་རྒྱུ་དེ “ཞིང་གསུམ ”ལས་དོན་གྱི་བརྗོད་དོན་གཙོ་བོར་བརྩི་རྒྱུ་མཐའ་འཁྱོངས་བྱེད་པ་དང་ནུས་ལྡན་གྱི་བྱེད་ཐབས་སྣ་ཚོགས་སྤྱད་དེ་ཞིང་འབྲོག་མང་ཚོགས་ཀྱི་འབབ་འཕར་ལས་དོན་དམ་འཛིན་ཞིབ་ཕྲ་དང་ཏན་ཏིག་བྱེད་དགོས་པ། གསུམ་ནས་ཞིང་འབྲོག་མང་ཚོགས་ཀྱི་བདེ་སྡོད་དམ་འཛིན་ཡག་པོ་བྱེད་དགོས། བདེ་སྡོད་ལས་གྲྭའི་འཛུགས་སྐྲུན་མྱུར་ཚད་མགྱོགས་སུ་གཏོང་བ་དང་ལེ་ལག་ཚང་བའི་སྒྲིག་བཀོད་འཛུགས་སྐྲུན་དོན་འཁྱོལ་བྱས་ཏེ་སྤུས་འབོར་གཉིས་ལྡན་གྱི་སྒོ་ནས་ད་ལོའི་འཛུགས་སྐྲུན་ལས་འགན་ལེགས་སྒྲུབ་བྱེད་དགོས་པ། བཞི་ནས་ཞིང་འབྲོག་མང་ཚོགས་ཀྱི་དམངས་འཚོ་དམ་འཛིན་ཡག་པོ་བྱེད་དགོས། གྲོང་གསེབ་ཀྱི་སློབ་གསོ་འཕྲོད་བསྟེན་རིག་གནས་ལུས་རྩལ་སོགས་བྱ་གཞག་འཕེལ་རྒྱས་ཧུར་ཐག་གཏོང་བ་དང་། སྤྱི་པའི་ཞབས་ཞུའི་ནུས་པ་སྒོ་ཀུན་ནས་ཆེ་རུ་གཏོང་བ། ཆུ་བེད་དང་གྲོང་གསེབ་ཀྱི་གློག་དྲ་སྒྱུར་བཀོད་རིམ་སྤོར་དང་གྲོང་གསེབ་ཀྱི་གཞུང་ལམ་འཛུགས་སྐྲུན་བྱེད་ཤུགས་ཆེ་རུ་གཏོང་བ། ཚད་ཡོད་ཀྱི་ལས་དུས་ནང་ལོ་འགོའི་དམིགས་ཚད་ལས་འགན་ལེགས་སྒྲུབ་བྱ་རྒྱུའི་འགན་ལེན་བྱེད་པ། འགན་འཁྲི་ནན་དུ་གཏོང་བ། དབུལ་སྐྱོར་གསར་སྤེལ་ལས་དོན་ལ་སྒོ་ཀུན་ནས་སྐུལ་འདེད་གཏོང་བ་བཅས་བྱེད་དགོས་པ། ལྔ་ནས་ཞིང་འབྲོག་ཁུལ་གྱི་སྒྱུར་བཅོས་དམ་འཛིན་ཡག་པོ་བྱེད་དགོས། གྲོང་གསེབ་ཀྱི་མཉམ་སྡེབ་ས་ཆའི་བདག་དབང་ཐོ་འགོད་དང་དབང་ཚད་གཏན་འཁེལ་གྱིས་ལག་ཁྱེར་སྤྲོད་པའི་ཚོད་ལྟའི་ས་ཚིགས་ཀྱི་ལས་དོན་མགྱོགས་སུ་གཏོང་བ་དང་ཆུ་ཤུར་རྫོང་གི་གྲོང་གསེབ་ཀྱི་སྒྱུར་བཅོས་ཚོད་ལྟའི་ཁུལ་གྱི་ལས་དོན་ལ་མཛུབ་ཁྲིད་བྱེད་པ་དང་ཞབས་འདེགས་ཞུ་རྒྱུར་ཤུགས་སྣོན་རྒྱག་དགོས། རྩྭ་ཐང་གི་སྣོད་བཅུད་སྲུང་སྐྱོང་ཁ་གསབ་ཀྱི་བྱ་དགའི་ལམ་སྲོལ་ལས་དོན་ནན་ཏན་ངང་ཡག་པོ་སྒྲུབ་དགོས་པ་བཅས་རེད།
ཚོགས་འདུའི་ཐོག་བླང་བྱ་བསྟན་དོན། ས་གནས་ཁག་དང་འབྲེལ་ཡོད་སྡེ་ཚན་ཁག་གིས་ངེས་པར་དུ་རང་སྐྱོང་ལྗོངས་ཏང་ཨུད་དང་སྲིད་གཞུང་གི་བླང་བྱར་གཞིགས་ནས་སྙིང་སྟོབས་ཆེར་བསྐྱེད་ཀྱིས་མདུན་ལམ་གཏོད་པ་དང་བློ་རྩ་བརྟན་པོས་ཡར་རྒྱས་བརྩོན་ལེན་བྱེད་པའི་བསམ་པའི་ཉམས་འགྱུར་དང་དམ་པ་དོན་གཉེར་དང་ཏན་ཏིག་ནུས་ལྡན་གྱི་ལས་ཀའི་བྱེད་ཐབས་ལ་བརྟེན་ནས་ཞིང་འབྲོག་ལས་དང་གྲོང་གསེབ་ཀྱི་ལས་དོན་སླར་ཡང་སྐས་རིམ་གསར་པ་ཞིག་ཏུ་སླེབས་རྒྱུར་སྐུལ་འདེད་གཏོང་དགོས།
ལྗོངས་ཏང་ཨུད་གྲོང་གསེབ་ལས་དོན་འགོ་ཁྲིད་ཚོགས་ཆུང་གི་ཁོངས་གཏོགས་ཚན་པའི་འགན་འཁུར་བློ་མཐུན་ཚོགས་འདུར་ཞུགས་ཤིང་། ལྗོངས་ནོར་སྲིད་ཐིང་དང་། ཞིང་འབྲོག་ཐིང་། བསྡོམས་རྩིས་ཅུས་བཅས་ཀྱི་འགན་འཁུར་བློ་མཐུན་གྱིས་རང་ལྗོངས་ཀྱི་མིག་སྔའི་ཞིང་འབྲོག་མང་ཚོགས་ཀྱི་འབབ་འཕར་དུས་བབ་དང་དེ་བཞིན་གོམ་སྟབས་རྗེས་མའི་ཁ་གཏད་གཅོག་ཐབས་སྐོར་གཏམ་བཤད་བྱས་པ་རེད།