ཚེས་11ཉིན་གྱི་སྔ་དྲོ་རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་རྡོ་རྗེ་ཚེ་རིང་གིས་མལ་གྲོ་གུང་དཀར་རྫོང་ཆོས་ལུང་ཟངས་གཏེར་དང་སྟག་རྩེ་རྫོང་མཚོ་བོད་ཆེད་དོན་ལྷ་ས་གཏེར་ཁ་བརྟག་ཞིབ་རྣམ་གྲངས་ཚོགས་ཆུང་དུ་ཕེབས་ནས་གཏེར་ཁུལ་དང་གཏེར་ཁ་རྩད་ཞིབ་བྱ་ཚུལ་ལ་བརྟག་ཞིབ་གནང་བ་རེད།
མལ་གྲོ་གུང་དཀར་རྫོང་ཆོས་ལུང་ཟངས་གཏེར་དུ་བརྟག་ཞིབ་གནང་སྐབས་རྡོ་རྗེ་ཚེ་རིང་གིས། ཞི་མཐུན་ཡོང་བ་བྱ་རྒྱུ་ནི་སྔོན་འགྲོ་ཡིན་ཞིང་། ཁེ་ལས་ཀྱིས་ཞི་མཐུན་གྱི་གཏེར་ཁུལ་འཛུགས་སྐྲུན་བྱ་རྒྱུར་དམ་འཛིན་གྱིས་ས་གནས་དེ་གའི་མང་ཚོགས་དང་ཞི་མཐུན་ཡོང་བ་བྱས་ནས་སྐྱིན་གསབ་དང་བཀོད་སྒྲིག་ལས་དོན་ཡག་པོ་སྒྲུབ་དགོས་པ་དང་། ཁོར་ཡུག་སྲུང་སྐྱོང་བྱ་རྒྱུ་ནི་ལྟེ་བ་ཡིན་ཞིང་། ཁོར་ཡུག་སྲུང་སྐྱོང་ལས་དོན་ཡག་པོ་སྒྲུབ་ནས་བོད་ཀྱི་དྭངས་ཤིང་གཙང་བའི་རི་ཆུ་ཀླུང་གསུམ་སྲུང་སྐྱོང་ཡག་པོ་བྱེད་དགོས་པ། ཁེ་ཕན་ནི་སྒྲོག་ཐག་ལྟ་བུ་ཞིག་དང་ལས་ཀ་ཚད་དང་ལྡན་པ་ཞིག་བྱ་རྒྱུ་ནི་རྨང་གཞི་ཡིན་ཞིང་། ཁེ་ལས་དང་མང་ཚོགས་དབར་གྱི་ཁེ་ཕན་བགོ་བཤའི་འབྲེལ་བ་ཐག་གཅོད་ཡག་པོ་བྱེད་པ་དང་། ལམ་ལུགས་འཛུགས་སྐྱོང་ལ་ཤུགས་སྣོན་རྒྱག་པ། ལས་ཀའི་ལྷུ་ཚིགས་ཚད་ལྡན་དུ་གཏོང་བ། ཁེ་ལས་ཚན་རིག་དང་མཐུན་པའི་སྒོ་ནས་འཕེལ་རྒྱས་འགྲོ་རྒྱུར་སྐུལ་འདེད་གཏོང་བ་བཅས་བྱས་ནས་བོད་ཀྱི་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ཆེད་ལེགས་སྐྱེས་འབུལ་དགོས་པ་བཅས་ཀྱི་ནན་གསུང་གནང་བ་རེད།
སྟག་རྩེ་རྫོང་མཚོ་བོད་ཆེད་དོན་ལྷ་ས་གཏེར་ཁ་བརྟག་ཞིབ་ཚོགས་ཆུང་དུ་བརྟག་ཞིབ་གནང་སྐབས་རྡོ་རྗེ་ཚེ་རིང་གིས། ས་གཤིས་གཏེར་འཚོལ་གྱི་ལམ་སྲོལ་གསར་པ་མཐའ་འཁྱོངས་ཀྱིས་གཏེར་འཚོལ་གྱི་གྲུབ་ཆ་གཙོ་བོ་ཡིན་པའི་ས་གཤིས་རྩད་ཞིབ་ཚན་པ་དང་ཁྲོམ་རའི་ཧུར་བརྩོན་རང་བཞིན་ཆེ་རུ་གཏོང་དགོས་པ་དང་། ཁྱོན་ཡོངས་ནས་ལས་དོན་སྤེལ་རྒྱུ་དང་། གཙོ་གནད་མངོན་གསལ་དོད་པོ་ཡོང་བ། དམིགས་འབེན་ཁུལ་ལེགས་འདེམས། གསོག་ཚད་དང་སྤུས་ཀ་རྩད་གཅོད་ཁ་གསལ་བཅས་བྱ་རྒྱུ་མཐའ་འཁྱོངས་བྱས་ནས་རྗེས་མཐུད་གསར་སྤེལ་བྱ་ཕྱིར་གྲ་སྒྲིག་ཡག་པོ་བྱེད་དགོས་པ། གནོད་མེད་གཏེར་ཁ་རྩད་ཞིབ་དང་གསར་སྤེལ་གྱི་ལམ་བུའི་ཐོག་བསྐྱོད་རྒྱུ་མཐའ་འཁྱོངས་ཀྱིས་གསར་སྤེལ་བྱེད་པའི་ཁྲོད་སྲུང་སྐྱོང་དང་སྲུང་སྐྱོང་བྱེད་པའི་ཁྲོད་གསར་སྤེལ་བྱས་ནས་ཞི་མཐུན་གྱི་གཏེར་ཁུལ་འཛུགས་སྐྲུན་བྱ་རྒྱུར་དམ་འཛིན་ཡག་པོ་བྱེད་དགོས་པ་བཅས་ཀྱི་ནན་གསུང་གནང་བ་རེད།