ཟླ་9ཚེས་7ནས་ཚེས་10ཉིན་བར་རྒྱལ་སྲིད་སྤྱི་ཁྱབ་ཁང་གི་དྲུང་ཆེ་གཞོན་པ་རྒྱལ་ཁབ་ཡིག་བསྐུར་ངོ་བཅར་ཅུས་ཀྱི་ཅུས་ཀྲང་ཝང་ཞུའེ་ཅུན་དང་རྒྱལ་ཁབ་ཡིག་བསྐུར་ངོ་བཅར་ཅུས་ཀྱི་ཅུས་ཀྲང་གཞོན་པ་ལི་ཀའོ་རྣམ་གཉིས་ཀྱིས་རྒྱལ་ཁབ་ཡིག་བསྐུར་ངོ་བཅར་ཅུས་ཀྱི་བོད་སྐྱོད་བརྟག་ཞིབ་ཚོགས་ཆུང་གི་སྣེ་འཁྲིད་དེ་ལྷ་ས་གྲོང་ཁྱེར་དང་ཉིང་ཁྲི་ས་ཁུལ་གྱི་གཞི་རིམ་དུ་བསྐྱོད་ནས་རང་ལྗོངས་ཀྱི་ཡིག་བསྐུར་ངོ་བཅར་ལས་དོན་ལ་རྟོག་ཞིབ་དང་བརྟག་ཞིབ་གནང་བ་དང་། ཡིག་བསྐུར་ངོ་བཅར་ཁོངས་གཏོགས་ཀྱི་ལས་བྱེད་པ་དང་ལས་བཟོར་གཟིགས་པ་དང་འཚམས་འདྲི་གནང་བ་དང་འབྲེལ་རང་སྐྱོང་ལྗོངས་ཀྱི་འགོ་ཁྲིད་དང་བཞུགས་མོལ་གནང་བ་རེད།

    རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཁྲེན་ཆོན་གོ་དང་། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་པད་མ་འཕྲིན་ལས། རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་བློ་བཟང་རྒྱལ་མཚན། རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་ལྷ་ས་གྲོང་ཨུད་ཀྱི་ཧྲུའུ་ཅི་ཆེ་དགྲ་ལྷ། ལྗོངས་ཏང་ཨུད་ཀྱི་དྲུང་ཆེ་ཝང་རུའེ་ལན་བཅས་བརྟག་ཞིབ་གནང་སྐབས་ལྷན་དུ་ཕེབས་པའམ་ཡང་ན་བཞུགས་མོལ་ཚོགས་འདུར་ཞུགས་པ་རེད།

    ལྷ་ས་གྲོང་ཁྱེར་ནོར་བུ་གླིང་གའི་དམངས་ཕན་ཉེན་རྟོག་ཞབས་ཞུའི་ས་ཚིགས་སུ་ཝང་ཞུའེ་ཅུན་དང་བཅས་པས་ལས་འགན་སྒྲུབ་བཞིན་པའི་སྤྱི་བདེའི་མི་དམངས་ཉེན་རྟོག་པར་བྱམས་བརྩེའི་ངང་གཟིགས་པ་དང་འཚམས་འདྲི་གནང་བ་དང་འབྲེལ་ཉེན་རྟོག་ཞབས་ཞུའི་ས་ཚིགས་བསྐྲུན་པ་དང་དེའི་ལས་ཀའི་གནས་ཚུལ་གྱི་སྙན་སེང་གསན་གནང་བ་དང་། ཝང་ཞུའེ་ཅུན་གྱིས་རང་ལྗོངས་ཀྱིས་དམངས་ཕན་ཉེན་རྟོག་ཞབས་ཞུའི་ས་ཚིགས་བསྐྲུན་པ་དང་གྲོང་ཁྱེར་གྱི་དྲ་མིག་ཅན་གྱི་དོ་དམ་ལག་བསྟར་བྱེད་པའི་བྱེད་སྟངས་ལ་ཁས་ལེན་གང་ལེགས་གནང་བ་རེད།

    རང་ལྗོངས་ཀྱི་ཡིག་བསྐུར་ངོ་བཅར་ཁོངས་གཏོགས་ཀྱི་ལས་བྱེད་པ་དང་ལས་བཟོ་ཚོར་གཟིགས་པ་དང་འཚམས་འདྲི་གནང་སྐབས་ཝང་ཞུའེ་ཅུན་གྱིས་རང་ལྗོངས་ལ་ཉེ་ལམ་ལོ་ཤས་ནང་ཡིག་བསྐུར་ངོ་བཅར་ལས་དོན་ཐད་ཐོབ་པའི་གྲུབ་འབྲས་ལ་ཁས་ལེན་གང་ལེགས་གནང་བ་དང་། རང་སྐྱོང་ལྗོངས་ཏང་ཨུད་དང་སྲིད་གཞུང་གིས་ཡུན་རིང་ནང་ཡིག་བསྐུར་ངོ་བཅར་ལས་དོན་ལ་ཚད་མཐོའི་མཐོང་ཆེན་གནང་བར་ཐུགས་རྗེ་ཆེ་ཞུས་གནང་བ་དང་འབྲེལ་ས་བབ་མཐོ་བའི་ས་ཁུལ་དུ་རྒྱུན་དུ་འབད་འཐབ་གནང་མཁན་བོད་ཀྱི་རྒྱ་ཆེའི་ཡིག་བསྐུར་ངོ་བཅར་ལས་བྱེད་པ་དང་ལས་བཟོ་ཚོར་བྱམས་བརྩེའི་འཚམས་འདྲི་གནང་ཞིང་། ཁོང་གིས་ཡུན་རིང་ནང་བོད་རང་སྐྱོང་ལྗོངས་ཀྱིས་ཡིག་བསྐུར་ངོ་བཅར་ལས་དོན་ཐད་ཀྱི་ཀྲུང་དབྱང་གི་འཐབ་ཇུས་བཀོད་སྒྲིག་རབ་དང་རིམ་པ་ཕྱོགས་ཡོངས་ནས་ལག་བསྟར་དོན་འཁྱོལ་བྱས་ནས་ཡིག་བསྐུར་ངོ་བཅར་ལས་ཀའི་སྒྲིག་སྲོལ་དང་ལམ་སྲོལ་རྒྱུན་ཆད་མེད་པར་འཐུས་ཚང་དུ་ཕྱིན་པ་དང་སྔོན་གཏན་འཁེལ་བའི་ལས་དོན་ཁག་ཏན་ཏིག་ངང་སྤེལ་ནས་ཕན་འབྲས་ལེགས་པོ་ཐོན་ཡོད་ཅེས་གསུངས་པ་དང་། ཁོང་གིས་རང་ལྗོངས་ཀྱི་ཡིག་བསྐུར་ངོ་བཅར་ཁོངས་གཏོགས་ཀྱི་ལས་བྱེད་པ་དང་ལས་བཟོ་ཚོར་ཏང་ཨུད་དང་སྲིད་གཞུང་གི་ལྟེ་བའི་ལས་དོན་ལ་དམ་པོར་དམིགས་ནས་ཡིག་བསྐུར་ངོ་བཅར་ལས་དོན་གཏིང་ཟབ་ལ་ཞིབ་ཚགས་པའི་ངང་ཡག་པོ་བསྒྲུབས་ཏེ་བོད་ཀྱི་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ཆེད་འབུལ་འོས་པའི་ལེགས་སྐྱེལ་འབུལ་དགོས་པའི་ལྕག་སྐུལ་གནང་བ་རེད།

    ཚེས་9ཉིན་གྱི་ཕྱི་དྲོ་བརྟག་ཞིབ་ཚོགས་ཆུང་དང་བཅས་པས་རང་སྐྱོང་ལྗོངས་སྲིད་གཞུང་དང་བཞུགས་མོལ་གནང་སྟེ་རང་ལྗོངས་ཀྱི་ཡིག་བསྐུར་ངོ་བཅར་ལས་དོན་གྱི་སྙན་སེང་གསན་ཞིང་། ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་པད་མ་འཕྲིན་ལས་དང་རྒྱལ་སྲིད་སྤྱི་ཁྱབ་ཁང་གི་དྲུང་ཆེ་གཞོན་པ་རྒྱལ་ཁབ་ཡིག་བསྐུར་ངོ་བཅར་ཅུས་ཀྱི་ཅུས་ཀྲང་ཝང་ཞུའེ་ཅུན་རྣམ་གཉིས་ཀྱིས་བཞུགས་མོལ་ཚོགས་འདུའི་ཐོག་གསུང་བཤད་གནང་བ་དང་། བློ་བཟང་རྒྱལ་མཚན་གྱིས་རང་ལྗོངས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་དང་ཡིག་བསྐུར་ངོ་བཅར་ལས་དོན་གྱི་འབྲེལ་ཡོད་གནས་ཚུལ་སྐོར་སྙན་སེང་ཞུས་པ་རེད།

    པད་མ་འཕྲིན་ལས་ཀྱིས་དང་ཐོག་རང་སྐྱོང་ལྗོངས་ཏང་ཨུད་དང་སྲིད་གཞུང་དང་ལྗོངས་ཏང་ཨུད་ཀྱི་ཧྲུའུ་ཅི་ཁྲེན་ཆོན་གོའི་ཚབ་ཞུས་ནས་ཝང་ཞུའེ་ཅུན་དང་བཅས་པ་རང་ལྗོངས་སུ་ལས་དོན་ལ་ཞིབ་བཤེར་དང་མཛུབ་ཁྲིད་གནང་བར་ཕེབས་པར་དགའ་བསུ་ཞུས་པ་དང་རྒྱལ་སྲིད་སྤྱི་ཁྱབ་ཁང་གི་གཞུང་དོན་ཁང་དང་རྒྱལ་ཁབ་ཡིག་བསྐུར་ངོ་བཅར་ཅུས་ཀྱིས་ཡུན་རིང་ནང་རང་ལྗོངས་ཀྱི་འཕེལ་རྒྱས་དང་བརྟན་ལྷིང་དང་ལྷག་དོན་དུ་ཡིག་བསྐུར་ངོ་བཅར་ལས་དོན་ལ་ཐུགས་ཁུར་དང་རྒྱབ་སྐྱོར་གནང་བར་ཐུགས་རྗེ་ཆེ་ཞུས་གནང་བ་རེད།

    པད་མ་འཕྲིན་ལས་ཀྱིས་མིག་སྔར་རང་ལྗོངས་ཀྱི་དཔལ་འབྱོར་འཕེལ་རྒྱས་དང་སྤྱི་ཚོགས་བརྟན་ལྷིང་གི་སྤྱིའི་དུས་བབ་ལེགས་པོ་ཡོད་པ་དང་ལྗོངས་ཡོངས་ཀྱི་ཡིག་བསྐུར་ངོ་བཅར་འཐབ་ཕྱོགས་ཀྱི་རྒྱ་ཆེའི་ལས་བྱེད་པ་དང་ལས་བཟོ་ཚོས་རྒྱལ་ཁབ་ཡིག་བསྐུར་ངོ་བཅར་ཅུས་ཀྱི་འབྲེལ་ཡོད་བླང་བྱ་གཞིར་བཟུང་ཡིག་བསྐུར་ངོ་བཅར་གྱི་ལས་དོན་ཡག་པོ་སྒྲུབ་པའི་འགན་འཁྲི་འཁུར་སེམས་དང་དགོས་གཏུགས་ཀྱི་སེམས་པ་སྔར་བས་ཆེ་རུ་བཏང་ནས་རང་ལྗོངས་ཀྱི་ཡིག་བསྐུར་ངོ་བཅར་ལས་དོན་སྐས་རིམ་གསར་པ་ཞིག་ཏུ་སླེབས་རྒྱུར་སྐུལ་འདེད་ཧུར་ཐག་གཏོང་དགོས་ཤིང་། དེའང་གཅིག་ནས་ཡིག་བསྐུར་ངོ་བཅར་ལས་དོན་གྱི་གནས་བབ་ཁོང་དུ་བརྟན་པོ་ཆུད་པ་བྱེད་དགོས། ཡིག་བསྐུར་ངོ་བཅར་ལས་དོན་དེ་ཚན་རིག་དང་མཐུན་པའི་འཕེལ་རྒྱས་ལ་སྐུལ་འདེད་དང་ཡུན་རིང་བདེ་འཁོད་ལ་སྐུལ་འདེད་གཏོང་བའི་རྒྱབ་ལྗོངས་ཆེ་མོའི་འོག་བཞག་ནས་བསམ་གཞིག་དང་ཞིབ་འཇུག་བྱས་ཏེ་དཔལ་འབྱོར་དང་སྤྱི་ཚོགས་མཐུན་སྦྱོར་ངང་འཕེལ་རྒྱས་འགྲོ་རྒྱུར་སྐུལ་འདེད་གཏོང་བ་དང་། སྤྱི་ཚོགས་རིང་ལུགས་ཀྱི་དམངས་གཙོ་དང་ཆབ་སྲིད་འཛུགས་སྐྱོང་ལ་སྐུལ་འདེད་གཏོང་བ། སྤྱི་ཚོགས་བརྟན་ལྷིང་ལ་སྲུང་སྐྱོང་བྱེད་པ་སོགས་ཐད་ཡིག་བསྐུར་ངོ་བཅར་ལས་དོན་གྱིས་དགེ་མཚན་ལྡན་པའི་ནུས་པ་འདོན་སྤེལ་བྱེད་དགོས་པ་དང་། གཉིས་ནས་ལས་ཀའི་བསམ་ཕྱོགས་འཐུས་ཚང་དུ་གཏོང་དགོས་ཤིང་། ལས་ཀའི་བརྒྱུད་རིམ་རང་བཞིན་དང་། དེ་ཚད་ལས་བརྒལ་བའི་རང་བཞིན། རྨང་གཞིའི་རང་བཞིན་བཅས་ཆེ་རུ་གཏོང་རྒྱུར་དམིགས་ནས་འབྱུང་རྩ་ཞུགས་རྒྱུར་ཤུགས་སྣོན་རྒྱག་པ་དང་། ཁོངས་གཏོགས་ས་ཁུལ་གྱིས་དོ་དམ་བྱེད་ཤུགས་ཆེ་རུ་གཏོང་བ། མང་ཚོགས་ཀྱི་ཁེ་ཕན་དང་འབྲེལ་བའི་སྲིད་ཇུས་དང་བྱེད་ཐབས་འཐུས་ཚང་དང་དོན་འཁྱོལ་བྱ་རྒྱུར་སྐུལ་འདེད་ཤུགས་ཆེན་གཏོང་བ་བཅས་བྱས་ནས་འགལ་བ་དང་རྩོད་གཞི་སྔར་ལས་མང་བ་ཞིག་ས་གནས་དེ་གར་སེལ་བ་དང་། གཞི་རིམ་དུ་སེལ་བ། ཐོན་བཟོ་ཡོད་པའི་སྐབས་ནས་སེལ་བ་བཅས་བྱེད་དགོས་པ། གསུམ་ནས་ཡིག་བསྐུར་ངོ་བཅར་ལས་དོན་གྱི་གཙོ་གནད་མངོན་གསལ་དོད་པོ་ཡོང་བ་བྱེད་དགོས་ཤིང་། རང་ལྗོངས་ཀྱི་ཡིག་བསྐུར་ངོ་བཅར་ལས་དོན་གྱི་དོན་དངོས་ལ་དམིགས་ནས་ཡིག་བསྐུར་ངོ་བཅར་གནད་དོན་ཐག་གཅོད་བྱེད་པའི་ལས་དོན་སྤེལ་ཤུགས་ཆེ་རུ་བཏང་སྟེ་ཁྲིམས་ལུགས་དང་སྒྲིག་སྲོལ་གཞིར་བཟུང་བརྩེ་དུང་འཆང་བཞིན་དུ་མང་ཚོགས་ཀྱི་ལས་དོན་ཡག་པོ་བསྒྲུབས་ནས་དམངས་ཀྱི་གནས་ཚུལ་དང་། དམངས་ཀྱི་འདོད་བློ། དམངས་ཀྱི་བློ་གྲོས་བཅས་ཐོགས་མེད་ཡོང་བའི་འགན་ལེན་གྱིས་མང་ཚོགས་ཀྱི་ཁྲིམས་མཐུན་ཁེ་དབང་ལ་སྲུང་སྐྱོང་བྱ་ཆེད་ལམ་ལུགས་ཀྱི་འགན་སྲུང་ནུས་ལྡན་མཁོ་འདོན་བྱེད་དགོས་པ། བཞི་ནས་ཆབ་སྲིད་ཀྱི་ལེགས་ཆ་འདོན་སྤེལ་བྱེད་དགོས་ཤིང་། འགལ་བ་དང་རྩོད་གཞི་གྲལ་བཤེར་དང་འདུམ་འགྲིག་བྱེད་པའི་ལམ་སྲོལ་རྒྱུན་ཆད་མེད་པར་འཐུས་ཚང་དུ་བཏང་ནས་ཡིག་བསྐུར་ངོ་བཅར་བྱེད་མཁན་མང་ཚོགས་ཀྱིས་ཁྲིམས་མཐུན་དང་། འགན་འཁུར་བ། ཚུལ་མཐུན། གོ་རིམ་ལྡན་པ་བཅས་ཀྱི་སྒོ་ནས་རང་གི་འདུན་པ་མཚོན་པར་བྱེད་རྒྱུའི་ཁྲིད་སྟོན་བཅས་བྱེད་དགོས་ཞེས་གསུངས་པ་རེད།

    ཝང་ཞུའེ་ཅུན་གྱིས་རྒྱལ་ཁབ་ཡིག་བསྐུར་ངོ་བཅར་ཅུས་ཀྱིས་སྲིད་ཇུས་དང་། མ་དངུལ། ཤེས་ལྡན་མི་སྣ་འཛུགས་སྐྱོང་བཅས་ཐད་ནས་བོད་ཀྱི་ཡིག་བསྐུར་ངོ་བཅར་ལས་དོན་ལ་རྒྱབ་སྐྱོར་བྱེད་ཤུགས་སྔར་བས་ཆེ་རུ་གཏོང་རྒྱུ་དང་འབྲེལ་བོད་ལ་ཡིག་བསྐུར་ངོ་བཅར་ལས་དོན་ཁྲོད་འཕྲད་པའི་དཀའ་ངལ་ཐག་གཅོད་བྱེད་རོགས་བྱས་ནས་བོད་ཀྱི་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ལ་སྔར་བས་སྐུལ་འདེད་གཏོང་རྒྱུ་ཡིན་ཞེས་གསུངས་པ་རེད།

    བློ་བཟང་རྒྱལ་མཚན་གྱིས་རང་ལྗོངས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་དང་ཡིག་བསྐུར་ངོ་བཅར་ལས་དོན་གྱི་འབྲེལ་ཡོད་གནས་ཚུལ་སྐོར་སྙན་སེང་ཞུས་རྗེས་རང་སྐྱོང་ལྗོངས་ཀྱིས་རྒྱལ་ཁབ་ཡིག་བསྐུར་ངོ་བཅར་ཅུས་ཀྱི་བླང་བྱ་གཞིར་བཟུང་བོད་ཀྱི་དོན་དངོས་དང་ཟུང་འབྲེལ་གྱིས་མང་ཚོགས་ལས་དོན་གྱིས་ཡིག་བསྐུར་ངོ་བཅར་ལས་དོན་ལ་གཅིག་འདོམས་བྱས་ནས་ཁོངས་གཏོགས་ས་ཁུལ་གྱི་འགན་འཁྲི་དོན་འཁྱོལ་བྱེད་ཤུགས་ཆེ་རུ་གཏོང་བ་དང་ལས་ཀའི་བྱེད་ཐབས་འཐུས་ཚང་དུ་བཏང་ནས་མི་དམངས་མང་ཚོགས་ཀྱི་ཁྲིམས་མཐུན་ཁེ་དབང་ལ་སྲུང་སྐྱོང་ཏན་ཏིག་བྱ་རྒྱུ་ཡིན་ཞེས་གསུངས་པ་རེད།

    རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན་གཞོན་པ་དྲུང་ཆེ་ཀྲའོ་ཀྲེང་ཤིའུ་ཕེབས་པ་དང་རང་སྐྱོང་ལྗོངས་སྲིད་གཞུང་གི་ཏང་ཙུའི་ཁོངས་མི་དྲུང་ཆེ་ཀའོ་དབྱང་གིས་བཞུགས་མོལ་ཚོགས་འདུ་གཙོ་སྐྱོང་གནང་བ་རེད།

    རྒྱལ་ཁབ་ཡིག་བསྐུར་ངོ་བཅར་ཅུས་དང་། རང་སྐྱོང་ལྗོངས་སྲིད་གཞུང་། སྲིད་གྲོས། རང་སྐྱོང་ལྗོངས་ཡིག་བསྐུར་ངོ་བཅར་ཅུས། རང་སྐྱོང་ལྗོངས་ཀྱི་འབྲེལ་ཡོད་ཚན་པ་བཅས་ཀྱི་འགན་འཁུར་བ་བཞུགས་མོལ་ཚོགས་འདུར་ཞུགས་ཡོད་པ་རེད།