ཟླ་9ཚེས་8ཉིན་གྱི་སྔ་དྲོ་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཁྲེན་ཆོན་གོ་དང་། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་པད་མ་འཕྲིན་ལས་ཀྱིས་ལྷ་སར་རྒྱལ་ཁབ་འཕེལ་སྒྱུར་ཨུ་ལྷན་གྱི་ཀྲུའུ་རེན་གཞོན་པ་ཀྲུང་དབྱང་བོད་ཀྱི་ལས་དོན་མཐུན་སྦྱོར་ཚོགས་ཆུང་གི་དཔལ་འབྱོར་དང་སྤྱི་ཚོགས་འཕེལ་རྒྱས་ཙུའུ་ཡི་ཙུའུ་ཀྲང་ཏུའུ་དབྱིང་གིས་སྣེ་འཁྲིད་པའི་མཉམ་འབྲེལ་བརྟག་ཞིབ་ཚོགས་ཆུང་བཅས་པ་དང་མཇལ་འཛོམས་གནང་བ་རེད།
ཁྲེན་ཆོན་གོས་རང་སྐྱོང་ལྗོངས་ཏང་ཨུད་དང་སྲིད་གཞུང་དང་ལྗོངས་ཡོངས་ཀྱི་མི་རིགས་ཁག་གི་མི་དམངས་ཁྲི་ཚོ་300ཡི་ཚབ་ཞུས་ནས་ཏུའུ་དབྱིང་དང་བཅས་པ་བོད་དུ་རྟོག་ཞིབ་མཛུབ་ཁྲིད་དང་བརྟག་ཞིབ་གནང་བར་ཕེབས་པར་སྤྲོ་སེམས་འཁོལ་བའི་དགའ་བསུ་ཞུས་པ་མ་ཟད། རྒྱལ་ཁབ་འཕེལ་སྒྱུར་ཨུ་ལྷན་དང་ཀྲུང་དབྱང་བོད་ཀྱི་ལས་དོན་མཐུན་སྦྱོར་ཚོགས་ཆུང་གི་དཔལ་འབྱོར་དང་སྤྱི་ཚོགས་འཕེལ་རྒྱས་ཙུའུ་ཡི་ཁོངས་གཏོགས་ཚན་པས་བོད་ལ་ཐུགས་ཁུར་དང་། རོགས་རམ། རྒྱབ་སྐྱོར་བཅས་ཡུན་རིང་གནང་བར་ཐུགས་རྗེ་ཆེ་ཞུས་པ་དང་འབྲེལ་མཉམ་ཚོགས་ཚོགས་ཆུང་གིས་ལ་དུག་ལ་མ་འཛེམས་པར་གཞི་རིམ་གྱི་འཐབ་ས་མདུན་མར་ཕེབས་ཏེ་དངོས་འཛིན་དངོས་སྒྲུབ་ཀྱི་ཕྱག་ལས་གནང་སྟངས་ལ་བླ་ན་མེད་པའི་གུས་འདུད་ཀྱང་ཞུས་པ་རེད།
ཁྲེན་ཆོན་གོས་རྒྱལ་ཁབ་འཕེལ་སྒྱུར་ཨུ་ལྷན་དང་ཀྲུང་དབྱང་བོད་ཀྱི་ལས་དོན་མཐུན་སྦྱོར་ཚོགས་ཆུང་གི་དཔལ་འབྱོར་དང་སྤྱི་ཚོགས་འཕེལ་རྒྱས་ཙུའུ་ཡི་ཁོངས་གཏོགས་ཚན་པས་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་འགྲོ་རྒྱུར་སྔ་བར་ཕྱི་གསུམ་དུ་ཐུགས་ཁུར་དང་རྒྱབ་སྐྱོར་གནང་ནས་བོད་ལ་དཔལ་འབྱོར་དང་། ལས་བྱེད་པ། ཤེས་ལྡན་པ། སློབ་གསོ། ཚན་རྩལ། རྣམ་གྲངས་བཅས་ཐད་ནས་རོགས་པ་བྱ་ཤུགས་སྔར་བས་ཆེ་རུ་དང་བོད་སྐྱོར་ལས་དོན་གྱི་ཆུ་ཚད་རྒྱུན་ཆད་མེད་པར་མཐོ་རུ་བཏང་ནས་བོད་ཀྱི་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ཡོང་བར་སྒུལ་ཤུགས་སྟོབས་ཆེན་ཞིག་སྦྱིན་ཡོད་ཅེས་གསུངས།
ཏུའུ་དབྱིང་གིས་རྒྱལ་ཁབ་འཕེལ་སྒྱུར་དང་ཀྲུང་དབྱང་བོད་ཀྱི་ལས་དོན་མཐུན་སྦྱོར་ཚོགས་ཆུང་གི་དཔལ་འབྱོར་དང་སྤྱི་ཚོགས་འཕེལ་རྒྱས་ཙུའུ་ཡིས་ཏང་དང་རྒྱལ་ཁབ་ཀྱི་ལས་དོན་ཧྲིལ་པོའི་འཐབ་ཇུས་མཐོ་ཚད་ཐོག་ལངས་ནས་བོད་ཀྱི་ལས་དོན་བསྒྲུབས་པའི་གལ་འགངས་ཤིན་ཏུ་ཆེ་ཚུལ་དང་དགོས་གཏུགས་ཆེ་བར་ངོས་འཛིན་ཡག་པོ་བྱེད་པ་དང་། ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པའི་དགོངས་དོན་ལག་བསྟན་དོན་འཁྱོལ་བྱེད་པ། 《“ལོ་ལྔ་ཚན་བཅུ་གཉིས་པའི ”རིང་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་འཛུགས་སྐྲུན་རྣམ་གྲངས་ལ་རྒྱབ་སྐྱོར་བྱེད་པའི་འཆར་འགོད་ཇུས་གཞི 》ལག་ལེན་ནན་ཏན་བསྟར་བ་དང་བོད་སྐྱོར་ལས་དོན་ཁྱོན་ཡོངས་ནས་ལེགས་པར་བསྒྲུབས་ཏེ་རྣམ་གྲངས་དོན་འཁྱོལ་དང་། ལས་འགོ་འཛུགས་པ། ཕན་འབྲས་ཐོན་པ་བཅས་སྔ་ཙམ་ཡོང་བའི་སྒོ་ནས་བོད་ཀྱི་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ལ་ལེགས་སྐྱེས་སྔར་ལས་ལྷག་པ་འབུལ་རྒྱུ་ཡིན་ཞེས་གསུངས།