ཟླ་9ཚེས་7ཉིན་གྱི་ཕྱི་དྲོ་རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་ཧྲུའུ་ཅི་གཞོན་པ་ཧའོ་ཕུང་གིས་དྲག་ཆས་ཉེན་རྟོག་ནགས་ཚལ་བཀོད་འདོམས་པུའི་ཀྲུའུ་རེན་ཧྲའོ་ཅང་ཧོ་ཧུང་ཁྲེང་བཅས་པ་དང་མཇལ་འཛོམས་གནང་བ་རེད།
རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་སྲིད་ཁྲིམས་ཨུ་ལྷན་གྱི་ཧྲུའུ་ཅི་ཏེང་ཞའོ་ཀང་མཇལ་འཛོམས་སྐབས་ལྷན་དུ་ཕེབས་ཡོད་པ་རེད།
ཧའོ་ཕུང་གིས་དང་ཐོག་རང་སྐྱོང་ལྗོངས་ཏང་ཨུད་ཀྱི་ཚབ་ཞུས་ནས་ཧྲའོ་ཅང་ཧོ་ཧུང་ཁྲེང་དང་བཅས་པ་བོད་དུ་ལས་ཀར་རྟོག་ཞིབ་དང་མཛུབ་ཁྲིད་གནང་བར་ཕེབས་པར་དགའ་བསུ་ཞུས་གནང་བ་དང་དྲག་ཆས་ཉེན་རྟོག་ནགས་ཚལ་བཀོད་འདོམས་པུས་ལོ་མང་ནང་བོད་ཀྱི་ལས་དོན་ཁག་དང་ལྷག་པར་དུ་དྲག་ཆས་ཉེན་རྟོག་བོད་ལྗོངས་ནགས་ཚལ་དཔུང་སྡེར་ཐུགས་ཁུར་དང་རྒྱབ་སྐྱོར་གནང་བར་ཐུགས་རྗེ་ཆེ་ཞུས་གནང་ཞིང་། ཁོང་གིས་དུས་ཡུན་རིང་པོའི་ནང་དྲག་ཆས་ཉེན་རྟོག་ནགས་ཚལ་བཀོད་འདོམས་པུའི་འགོ་ཁྲིད་འོག་དྲག་ཆས་ཉེན་རྟོག་བོད་ལྗོངས་ནགས་ཚལ་དཔུང་སྡེས “ལྟེ་བར་དམིགས་ནས་འཛུགས་སྐྲུན་དམ་འཛིན་བྱེད་པ་དང་འཛུགས་སྐྲུན་དམ་འཛིན་བྱས་ནས་ལྟེ་བ་འགན་ལེན་བྱེད་པའི ”འདུ་ཤེས་བརྟན་པོ་བཙུགས་ཏེ་བོད་ཀྱི་སྤྱི་ཚོགས་བརྟན་ལྷིང་སྲུང་སྐྱོང་དང་། ནགས་ཚལ་གྱི་མེ་ཟོན་དང་མེ་གསོད། འཕྲལ་སྡོམ་གེགས་སེལ་དང་སྐྱོབ་རོགས་བཅས་ཀྱི་ལས་འགན་ཆེ་གྲས་གསུམ་ལ་དམིགས་ནས་དཔུང་སྡེའི་འཛུགས་སྐྱོང་ལ་ཤུགས་སྣོན་བརྒྱབ་པ་དང་འཐབ་འཛིང་བྱེད་ནུས་རྒྱུན་ཆད་མེད་པར་ཆེ་རུ་བཏང་ཐོག་བོད་ཀྱི་དེང་རབས་ཅན་འཛུགས་སྐྲུན་ནང་ནུས་པ་གལ་ཆེན་བཏོན་ཡོད་ཅེས་དང་། བོད་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་དྲག་ཆས་ཉེན་རྟོག་བོད་ལྗོངས་ནགས་ཚལ་དཔུང་སྡེའི་ལས་དོན་ཁག་ལ་ཚད་མཐོའི་གདེང་འཇོག་དང་ཡིད་ཧ་ཅང་ཚིམ་པོ་གནང་བ་དང་སླད་ཕྱིན་ཀྱང་སྔར་རྒྱུན་ལྟར་དྲག་ཆས་ཉེན་རྟོག་བོད་ལྗོངས་ནགས་ཚལ་དཔུང་སྡེའི་ལས་དོན་ཁག་ལ་ཐུགས་ཁུར་དང་རྒྱབ་སྐྱོར་བྱ་རྒྱུ་ཡིན་པས་དྲག་ཆས་ཉེན་རྟོག་བོད་ལྗོངས་ནགས་ཚལ་དཔུང་སྡེས་སྤྱི་ཚོགས་རིང་ལུགས་ཀྱི་བོད་ལྗོངས་གསར་པ་འཛུགས་སྐྲུན་བྱེད་པའི་རླབས་ཆེན་གྱི་ལོ་རྒྱུས་འཕེལ་རིམ་ནང་དེ་བས་ཆེ་བའི་ནུས་པ་གསར་པ་འདོན་སྤེལ་བྱེད་དགོས་ཞེས་གསུངས།
ཧོ་ཧུང་ཁྲེང་གིས་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་དྲག་ཆས་ཉེན་རྟོག་བོད་ལྗོངས་ནགས་ཚལ་དཔུང་སྡེའི་ལས་དོན་ཁག་ལ་ཐོག་མཐའ་བར་གསུམ་དུ་ཚད་མཐོའི་ཐུགས་ཁུར་དང་མཐོང་ཆེན་གནང་བར་ཐུགས་རྗེ་ཆེ་ཞུས་ཤིང་། ཁོང་གིས་དྲག་ཆས་ཉེན་རྟོག་བོད་ལྗོངས་ནགས་ཚལ་དཔུང་སྡེས་སྤྱི་ཚོགས་བརྟན་ལྷིང་སྲུང་སྐྱོང་བྱ་རྒྱུ་དང་། བོད་ཀྱི་སྣོད་བཅུད་ཁོར་ཡུག་སྲུང་སྐྱོང་བྱ་རྒྱུ། མི་རིགས་མཐུན་སྒྲིལ་སྲུང་སྐྱོང་བྱ་རྒྱུ་བཅས་ལ་སྔར་བས་ཤུགས་སྣོན་བརྒྱབ་སྟེ་དྲག་ཆས་ཉེན་རྟོག་ནགས་ཚལ་དཔུང་སྡེའི་འགན་ནུས་བློ་གཅིག་སེམས་གཅིག་གིས་ལག་བསྟར་བྱས་ཐོག་ཏང་དང་མི་དམངས་ཀྱིས་སྤྲད་པའི་བླ་ན་མེད་པའི་འགན་འཁྲི་སྔར་བས་ལེགས་པ་འཁུར་ཏེ་བོད་ཀྱི་དཔལ་འབྱོར་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་མངོན་འགྱུར་ཡོང་ཆེད་འབུལ་འོས་པའི་ལེགས་སྐྱེས་འབུལ་རྒྱུ་ཡིན་ཞེས་གསུངས་པ་རེད།