འདི་ག་ཚགས་པར་ཁང་དུ་ལྷ་ས་ནས་ཟླ་9ཚེས་6ཉིན་གནས་ཚུལ་འབྱོར་གསལ། ཟླ་9ཚེས་3ནས་ཚེས་5ཉིན་བར་རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་ལྕགས་རྭ་བློ་བཟང་བསྟན་འཛིན་དང་བཅས་པས་ལྷ་ས་དང་ལྷོ་ཁ་ས་ཁུལ (གྲོང་ཁྱེར )གཉིས་སུ་ཕེབས་ནས་མཉེས་ཐང་སྒྲོལ་མ་ལྷ་ཁང་དང་། སྨིན་གྲོལ་གླིང་། ཀྲུང་ཧིན་རང་སྲུང་རྒོལ་ལན་དམག་འཁྲུག་གི་གཡུལ་ས་མདུན་མའི་བཀོད་འདོམས་པུའི་རྗེས་ཤུལ་སོགས་དགོན་སྡེ་དང་རིག་དངོས་རྗེས་ཤུལ་སྲུང་སྐྱོབ་དང་ཉམས་གསོའི་ལས་གྲྭར་བརྟག་ཞིབ་གནང་བ་རེད།

    ཁོང་གིས་རིམ་ཁག་སྲིད་གཞུང་དང་འབྲེལ་ཡོད་སྡེ་ཚན་གྱིས་ངེས་པར་དུ་གོ་སྐབས་དམ་འཛིན་དང་འགན་འཁྲི་བློ་ལ་ངེས་ཏེ་ཀྲུང་དབྱང་གི་གཅིག་གྱུར་བཀོད་སྒྲིག་དང་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཞིབ་ཕྲའི་བླང་བྱ་ལྟར་རིག་དངོས་ཁྲིམས་ལྟར་སྲུང་སྐྱོབ་དང་། ཉམས་གསོར་ཚན་རིག་དང་མཐུན་པའི་སྒོ་ནས་སྐུལ་འདེད། རིན་ཐང་ལུགས་མཐུན་ངང་གསར་སྤེལ་བཅས་བྱས་ཏེ་རིག་དངོས་ཀྱིས་བརྟན་ལྷིང་སྲུང་སྐྱོང་ནང་དམིགས་བསལ་ནུས་པ་དང་། དཔལ་འབྱོར་འཕེལ་རྒྱས་ནང་ལེགས་སྐྱེས། སྤྱི་ཚོགས་ཡར་རྒྱས་ནང་ནུས་པ་གལ་ཆེན་བཅས་འདོན་སྤེལ་བྱེད་དགོས་ཞེས་མཛུབ་སྟོན་གནང་བ་རེད།

    རིག་དངོས་སྲུང་སྐྱོབ་དང་ཉམས་གསོའི་ལས་གྲྭར་དམིགས་ཏེ་ལྕགས་རྭ་བློ་བཟང་བསྟན་འཛིན་གྱིས “རྩ་དོན་གསུམ ”མཐའ་འཁྱོངས་བྱེད་དགོས་པའི་བླང་བྱ་བཏོན་གནང་བ་སྟེ། གཅིག་ནི “སྔོན་ཆད་ལྟར་ཉམས་གསོ་དང་སྔར་ཡོད་རྒྱུན་འཁྱོངས་བྱེད་པའི ”རིག་དངོས་ཉམས་གསོའི་ལས་དོན་གྱི་རྩ་དོན་མཐའ་འཁྱོངས་བྱས་ནས་རིག་དངོས་ཆགས་ཚུལ་ལ་རྩད་ཞིབ་ནན་ཏན་དང་ཉམས་གསོའི་ཇུས་གཞི་དེ་ཚན་རིག་དང་ལུགས་མཐུན་གྱི་སྒོ་ནས་བཟོས་ཏེ་རིག་དངོས་ཀྱི་སྔར་ཡོད་རྣམ་པར་འགྱུར་ལྡོག་མི་ཐེབས་པ་དང་སྤུས་ཚད་མཐོ་རུ་འགྲོ་ཐབས་བྱེད་དགོས། གཉིས་ནི “སྤུས་ཚད་ཨང་དང་པོར ”འཇོག་པའི་རྩ་དོན་མཐའ་འཁྱོངས་བྱས་ཏེ་རིག་དངོས་སྲུང་སྐྱོབ་ཀྱི་ལས་ཀའི་ཁྱད་ཆོས་ལ་གཞིགས་པ་དང་སྤུས་ཚད་ཀྱི་ཚད་གཞི་ཞིབ་ཕྲ་བཟོས་ཏེ་རིག་དངོས་ཉམས་གསོའི་ལས་གྲྭ་དེ་ལས་གྲྭ་རྩེ་གྲ་ཞིག་ཏུ་འགྱུར་བ་བྱེད་དགོས། གསུམ་ནི “མཐུན་སྒྲིལ་མཉམ་ལས ”ཀྱི་རྩ་དོན་མཐའ་འཁྱོངས་བྱས་ཏེ་དགོན་སྡེ་དོ་དམ་ཨུ་ཡོན་ལྷན་ཁང་དང་། ཨར་རྒྱག་རུ་ཁག ས་གནས་སྲིད་གཞུང་བཅས་དང་གཞོགས་འདེགས་དམ་ཟབ་བྱས་ནས་ཁྱོན་ཡོངས་དང་མཐུན་སྒྲིལ་ལ་སྣང་ཆེན་བྱས་ཏེ་ཐུན་མོང་ཐོག་རིག་དངོས་ཉམས་གསོའི་ལས་གྲྭ་ལེགས་པར་སྒྲུབ་དགོས་པ་བཅས་རེད།