ཚེས་1ཉིན་གྱི་ཕྱི་དྲོ་ལྗོངས་ཏང་ཨུད་ཀྱི་རྒྱུན་ཨུ་དྲིལ་བསྒྲགས་པུའི་པུའུ་ཀྲང་ཏུང་ཡུན་ཧུའུ་ཡིས་བོད་ཞི་བས་བཅིངས་འགྲོལ་བཏང་ནས་ལོ་60འཁོར་བ་བརྗོད་གཞི་གཙོ་བོར་བྱས་པའི “ཐང་ག་བརྒྱའི ”བྲིས་ཐང་རྣམ་གྲངས་འགོ་ཁྲིད་ཚོགས་ཆུང་གི་ཚོགས་འདུ་ཐེངས་གསུམ་པའི་ཐོག་དུས་མཚམས་གོང་མའི་ལས་ཀའི་སྙན་སེང་གསན་ནས་བྲིས་ཐང་འགའི་སྐྱ་ཐིག་ལ་ཞིབ་བཤེར་བྱས་པ་དང་འབྲེལ་གོམ་སྟབས་རྗེས་མའི་བྲིས་ཐང་གསར་བཞེངས་ལས་ཀ་བཀོད་སྒྲིག་ཀྱང་གནང་བ་རེད།
ཏུང་ཡུན་ཧུའུ་ཡིས་དུས་མཚམས་གོང་མའི་ལས་ཀར་ཁས་ལེན་གང་ལེགས་གནང་བ་མ་ཟད། རང་སྐྱོང་ལྗོངས་ཏང་ཨུད་དང་སྲིད་གཞུང་དང་དེ་བཞིན་ལྗོངས་ཏང་ཨུད་དྲིལ་བསྒྲགས་པུའུ་བཅས་ཀྱི་ཚབ་ཞུས་ནས་རྣམ་གྲངས་དེའི་ནང་ཞུགས་མཁན་ཚན་པ་དང་ལས་བྱ་ཚང་མ་དང་ལྷག་པར་དུ་སྒྱུ་རྩལ་མཁས་པ་རྣམས་ལ་སྙིང་དབུས་ནས་ཐུགས་རྗེ་ཆེ་ཞུས་ཤིང་། ཁོང་གིས “ཐང་ག་བརྒྱ ” གསར་བཞེངས་བྱ་རྒྱུ་ནི་ཐང་གའི་སྒྱུ་རྩལ་གསར་གཏོད་ལ་སྐུལ་མ་གཏོང་བའི་མཚོན་བྱེད་འདུ་འགོད་ཅིག་ཡིན། དེ་ལག་ལེན་བསྟར་བར་ཀྲུང་དབྱང་དང་རང་སྐྱོང་ལྗོངས་འགོ་ཁྲིད་ཀྱི་ཁས་ལེན་གང་ལེགས་ཐོབ་ཡོད་ལ་སྤྱི་ཚོགས་ལས་རིགས་ཁག་གི་གདེང་འཇོག་ཀྱང་ཡག་པོ་ཐོབ་ཡོད། ལྗོངས་ཏང་ཨུད་ཀྱི་འགྱུར་མེད་སྟོབས་ལྡན་གྱི་འགོ་ཁྲིད་འོག་འབྲེལ་ཡོད་སྡེ་ཚན་ཁག་དང་ལས་ཁུངས་ཀྱིས་མཐོང་ཆེན་པོ་གནང་བ་དང་། སྒྲིག་འཛུགས་ཞིབ་ཚགས་བྱས་པ། སྒྱུ་རྩལ་མཁས་པ་རྣམས་ཀྱིས་དཀའ་སྤྱད་འབད་བརྩོན་གནང་བ་བཅས་ལ་བརྟེན་ནས “ཐང་ག་བརྒྱ ”གསར་བཞེངས་འདུ་འགོད་ལ་དུས་མཚམས་རང་བཞིན་གྱི་ཡར་རྒྱས་ཆེན་པོ་བྱུང་ཡོད། ལག་ལེན་ཐོག་ནས་ལྗོངས་ཏང་ཨུད་ཀྱིས་རྣམ་གྲངས་དེ་ལག་ལེན་བསྟར་རྒྱུའི་ཐབས་ཇུས་བཏོན་པ་ནི་རྦད་དེ་ཡང་དག་པ་ཡིན་ལ་དེས་ཐང་གའི་ཐུན་མིན་སྒྱུ་རྩལ་གྱི་ཁྱད་ཆོས་ཐོན་ནས་ཐང་གའི་སྒྱུ་རྩལ་གསར་བཞེངས་བྱ་རྒྱུར་སྐུལ་མ་ཐེབས་རྒྱུ་ཡིན་པ་མ་ཟད། བོད་མི་རིགས་ཀྱི་རིག་གནས་སྲུང་སྐྱོང་དང་འཕེལ་རྒྱས་གྲུབ་འབྲས་མངོན་པའི་ཐོག་ནས་རིག་གནས་འཕེལ་རྒྱས་ཆེན་པོ་དང་དར་རྒྱས་ཆེན་པོ་ཡོང་བར་སྐུལ་མ་ཐེབས་རྒྱུར་གལ་འགངས་ཤིན་ཏུ་ཆེ་བའི་དོན་སྙིང་ཡང་ལྡན་པ་ར་འཕྲོད་བྱུང་ཡོད་ཅེས་གསུངས།
ཏུང་ཡུན་ཧུའུ་ཡིས་རྣམ་གྲངས་དེ་བསྒྲུབས་པར་དུས་ཚོད་ཐུང་བ་དང་། ལས་འགན་ལྕི་བ། འགན་འཁྲི་ཆེ་བ་བཅས་ཡིན་སྟབས་འབྲེལ་ཡོད་སྡེ་ཚན་དང་ཚན་པ་དང་དེ་བཞིན་རྣམ་གྲངས་ནང་ཞུགས་མཁན་བློ་མཐུན་ཚོས་བསམ་བློ་གཅིག་གྱུར་དང་། ངོས་འཛིན་མཐོར་གཏོང་། ནུས་ཤུགས་ཡོད་རྒུ་བཅས་ཀྱིས་སྔར་ལས་ལྷག་པའི་སྒོ་ནས་དུས་རབས་དང་། མི་དམངས། ལོ་རྒྱུས་བཅས་ལ་ངོ་གནོང་མི་དགོས་པའི་ཐང་ག་རྩེར་སོན་ཞིག་བཞེངས་དགོས་པའི་ནན་བཤད་གནང་ཡོད།
ཚོགས་འདུའི་ཐོག་ཐང་ག་50ལྷག་ཙམ་གྱི་སྐྱ་ཐིག་ཕུལ་བར་ཚོགས་ཞུགས་རིགས་གཅིག་མཁས་པ་ཚོས་གྲོས་ཞིབ་བྱས་ནས་རྩ་དོན་ཐོག་ནས་གྲོས་འཆམ་བྱུང་བ་མ་ཟད། ལས་ཀའི་དོན་དངོས་དང་ཟུང་འབྲེལ་གྱིས་གོམ་སྟབས་རྗེས་མའི་ལས་ཀ་བསྒྲུབ་རྒྱུར་བསམ་འཆར་དང་གྲོས་འགོའང་བཏོན་པ་རེད།